5
Aꞌox Te Qajawil At Toklen Tzan Tjaw Tjaqoꞌ Te Uꞌj
1 Ntons tuj tbꞌanqꞌabꞌ te aj witꞌlik tuj twitꞌlel aj jaꞌ nkꞌulun mandad, oxik wen jun uꞌj bꞌochqꞌiꞌ bꞌix tzꞌibꞌaꞌ tuq kykabꞌil palaj, bꞌix lamoꞌ tuq tukyꞌi wuq lakꞌbꞌil. 2 Bꞌix oxik wen jun ángel nim tbalor nxik tuq tqꞌumaꞌ kongan ikxjani: “¿Abꞌl at toklen tzan tjaw tjaqoꞌ te uꞌj bꞌix tzan kyel tlokꞌpiꞌ kye wuq lakꞌbꞌilni?” 3 Per nijunwt tuj kaꞌj ni twitz txꞌoꞌtxꞌ ni tjaqꞌ txꞌoꞌtxꞌ, nijunwt at tuq toklen tzan tjaw tjaqoꞌ te uꞌj ni tzan tjaw ten-wit chꞌin. 4 Wetz bꞌan nkyinꞌoqꞌ tuq tzan tpaj kꞌontiꞌl abꞌl at tuq toklen tzan tjaw tjaqoꞌ te uꞌj, ni tzan tjaw ten-wit chꞌin. 5 Yaji jun tijxjal [kxol kye kaj tuj kawnaq (24) tijxjal] otzaj tqꞌumaꞌ wetz ikxjani: “Kꞌon xhchꞌoqꞌ. [Te aj nꞌok qꞌumaꞌ] “Te Leon Aj Juda,” aj tijajil Dawid, tetz maꞌtx kambꞌan, bꞌix at toklen tzan tjaw tjaqoꞌ te uꞌj bꞌix tzan kyel tlokꞌpiꞌ kye wuq lakꞌbꞌil.”a
6 Yaji oxik wen tuj te witꞌlelj bꞌix kxol kye kaj txkup, bꞌix kxol kye tijxjal, oxik wen jun tal moch* misbꞌil, aj ojetq qet kansaꞌ tbꞌay per ajnaꞌl itzꞌoj bꞌix waꞌlqet tuq. At tuq wuq tkachb bꞌix wuq tbꞌaqꞌ twitz; te nini telponx kye wuq txew aj [nkyeꞌaqꞌunan] te Qtata Dios bꞌix etzaj samaꞌ twitz txꞌoꞌtxꞌ. 7 Yaji tzaj tetz, okyꞌik tkꞌamoꞌ te uꞌj aj atqet tuq tuj tqꞌabꞌ te aj witꞌlik tuq tuj twitꞌlel. 8 Ya ma kyꞌik tkꞌamoꞌ te uꞌj, kye kykajil txkup bꞌix kye kaj tuj kawnaq (24) tijxjal eqet mejlet twitz te tal moch. Kkyaqil eqꞌiꞌ tuq kyarp bꞌix jun pombꞌil pur xtxꞌotxꞌal oro nojnaq tuq tukyꞌi pom, bꞌix te nini telponx aj nxik kxnaqꞌtzaꞌ [kyaqil] qerman aj pawameꞌ te Qtata Dios.* 9 Bꞌix nxik kybꞌitzaꞌ tuq jun bꞌitz akꞌaꞌj ikxjani: “Yatz at awoklen tzan tjaw awin te uꞌj bꞌix tzan kyel alokꞌpiꞌ kye lakꞌbꞌil, tzan tpaj ochqet kansaꞌ bꞌix ikxji tukyꞌi achikyꞌel owel achojoꞌ kchoj kyꞌilaꞌj xjal tzan kyok te Qtata Dios kxol kyaqil kyijajil xjal jaꞌchq, kyaqil yol, kyaqil amaqꞌ, kyaqil nasyon. 10 Bꞌix maꞌtx akꞌuluj tzan kykaj tuj tqꞌabꞌ Qtata Dios bꞌix tzan kyten naꞌol tetz kyaqil tyemp te jun-eleꞌx,* bꞌix okyekꞌuluyon mandad [kyiꞌj kye xjal] twitz txꞌoꞌtxꞌ.”
11 Yaji oxik wen bꞌix oxik nchaꞌoꞌ kywiꞌ kyꞌilaꞌj ángel sipaꞌ kyibꞌ tiꞌj te witꞌlelj bꞌix kye kykajil txkup bꞌix kye tijxjal, bꞌix bꞌan kyꞌilaꞌj mil tuq kybꞌet, kꞌontiꞌl obꞌantik kyajlet.* 12 Nxik tuq kyqꞌumaꞌ bꞌan kongan ikxjani: “Te Tal Moch aj okamik, tetz at toklen tiꞌj tzan sten kyaqil tuj tqꞌabꞌ, bꞌix nim tqꞌinomal; at jun tnabꞌl tzan tbꞌisun tuj tumeꞌl bꞌix at jun tbalor; at toklen tzan tqet jiqꞌbꞌaꞌ bꞌix at nim xhchqitzꞌunal; tetz at toklen tzan kyyolin kyaqil galan tiꞌj.”*
13 Bꞌix ax oxik wen kyaqil aꞌeꞌ aj at kyanqꞌin, kyaqil aj tkꞌulbꞌen Qtata Dios twitz kaꞌj bꞌix twitz txꞌoꞌtxꞌ, tjaqꞌ txꞌoꞌtxꞌ, bꞌix tuj te nim aꞌ bꞌix kyaqil tidiꞌchq aj at tuj, oxik nchaꞌoꞌ nkyqꞌumaꞌ tuq ikxjani: “Te aj witꞌlik tuj twitꞌlel aj jaꞌ nkꞌulun mandad, aj nꞌok qꞌumaꞌ Te Tal Moch, inkyyolinxwit kyaqil galan tiꞌj, intqetxwit jiqꞌbꞌaꞌ, instenxwit tetz tajwalil mas nim twitz kyaqil, intokxwit kyaqil tuj tqꞌabꞌ, intkyꞌikxwit ikxji tuj kyaqil tyemp te jun-eleꞌx.”
14 Ntons yaji kye kykajil txkup nkyqꞌumaꞌ tuq ikxjani: “Ikxjikixiꞌ.” Bꞌix kye kaj tuj kawnaq (24) tijxjal eqet mejlet, bꞌix enaꞌon te aj itzꞌoj te jun-eleꞌx.