Te Tmankbꞌil 6

Te Aj Okyꞌik Aj Kyel Lokꞌpiꞌ Waqaq Lakꞌbꞌil Tiꞌj Te Uꞌj

¹ Ntons, wetz oxik weꞌeꞌ, bꞌix owel tlokꞌpiꞌ Te Tal Moch te tbꞌay lakꞌbꞌil tiꞌj te uꞌj, bꞌix oxik nchaꞌoꞌ jun kxol kye aj kykajil txkup, oxik tqꞌumaꞌ tukyꞌi jun twiꞌ iktzaꞌ twiꞌ ray ikxjani: “Qalan.” ² Yaji oxik wen jun kway saqtiꞌj, bꞌix te aj iqaꞌ tuq titzaꞌ at tuq jun xobꞌil flech tuj tqꞌabꞌ, bꞌix oxik siꞌ jun tkoron aj telponx tiꞌj tajwalil, bꞌix nkyeqet tuq tajqꞌoj titzaꞌ bꞌix owex tzan tqꞌojin kyiꞌj tzan kyqet.

³ Ntons yaji, aj tel tlokꞌpiꞌ Te Tal Moch te tkabꞌiꞌ lakꞌbꞌil, oxik nchaꞌoꞌ te tkabꞌiꞌ txkup oxik tqꞌumaꞌ ikxjani: “Qalan.” ⁴ Bꞌix owetz junky kway, per kyaqtiꞌj, bꞌix te aj iqaꞌ tuq titzaꞌ oxik siꞌ tajwalil tzan kꞌonky txik kyin kyibꞌ kye xjal twitz txꞌoꞌtxꞌ tzan kykansan kyibꞌkyibꞌx, bꞌix oxik siꞌ jun nim tmachit kansbꞌil.

⁵ Ntons yaji, aj tel tlokꞌpiꞌ Te Tal Moch te toxiꞌ lakꞌbꞌil, oxik nchan te toxiꞌ txkup oxik tqꞌumaꞌ ikxjani: “Qalan.” Yaji oxik wen jun kway qꞌeqtiꞌj bꞌix te aj iqaꞌ tuq titzaꞌ eqꞌiꞌ tuq jun libr malbꞌil tuj tqꞌabꞌ. ⁶ Bꞌix oxik nchan twiꞌ jun xjal aj nyolin tuq kxol kye kaj txkup, nxik tqꞌumaꞌ tuq ikxjani: “A tgan twiꞌ tkꞌuꞌj jun xjal te jun qꞌij tzan stzaj loqꞌoꞌ kabꞌeꞌ libr triw, bꞌix twiꞌ tkꞌuꞌj jun xjal te jun qꞌij tzan stzaj loqꞌoꞌ waqaq libr brisk, per kꞌon tzꞌok akꞌuluꞌ jun nyaꞌtx galan tiꞌj te aseyt bꞌix te taꞌl ub.”

⁷ Ntons yaji, aj tel tlokꞌpiꞌ Te Tal Moch te tkajiꞌ lakꞌbꞌil, oxik nchan te tkajiꞌ txkup oxik tqꞌumaꞌ ikxjani: “Qalan.” ⁸ Oxik wen jun kway txaꞌx spaj bꞌix te aj iqaꞌ tuq titzaꞌ, Kamikyj tbꞌi, bꞌix te aj lapik tuq tiꞌj, tetz tbꞌi Aj Jaꞌ Akyeqet Kyanim Kye Kamnaq, bꞌix oxik siꞌ kyajwalil kyiꞌj tkajiꞌ part kye xjal twitz txꞌoꞌtxꞌ tzan kykansan kyetz tukyꞌi machit aj te qꞌojbꞌil, bꞌix tukyꞌi waꞌij bꞌix yabꞌil bꞌix tzan txkup aj nyaꞌtx aloꞌmj-eꞌ.

⁹ Ntons yaji, aj tel tlokꞌpiꞌ Te Tal Moch te tjwebꞌiꞌ lakꞌbꞌil, oxik wen tjaqꞌ te pombꞌil te Qtata Dios, [tzi nkyeꞌiyon tuq] kyanim kye aj ojetq tuq kyeqet kansaꞌ tzan tpaj [nkyepakbꞌan tuq] tyol Qtata Dios bꞌix tzan tpaj te tumeꞌl aj nqet tuq kyyekꞌuꞌ. ¹⁰ Bꞌix oxik kyqꞌumaꞌ kongan ikxjani: “Qajaw, yatz bꞌan chꞌinwt achoj bꞌix jun chyolin. ¿Janikꞌbꞌaꞌn akꞌuluj tukyꞌi akawbꞌil tuj aqꞌabꞌ tzan tel kchojoꞌ kye aj nkyenajan twitz txꞌoꞌtxꞌ tzan tpaj jqetlen kykansaꞌna?” ¹¹ Ntons oxik siꞌlet kyqꞌanaq saq, bꞌix oxik qꞌumaꞌ kyetz tzan kyojlan chꞌinky max oj tjakon te kyajlal, oj kykamik txqꞌanky kyerman aj nkyeꞌaqꞌunan te Qtata Dios bꞌix aj okyeqtel kansaꞌ iktzaꞌ kyetz.

¹² Ntons yaji, aj tel tlokꞌpiꞌ Te Tal Moch te tqaqiꞌ lakꞌbꞌil, yaji otzaj jun nim kabꞌjunabꞌ, bꞌix te qꞌij owok qꞌeqmuqin naqe tebꞌl qꞌanq sak pit, bꞌix te qyaꞌ owok [kyaq twitz] naqe kyikꞌ. ¹³ Bꞌix kye cheꞌw twitz kaꞌj ebꞌajtzaj tzꞌaqik twitz txꞌoꞌtxꞌ, naqe twitz jun wiꞌ igos oj tjaw kyitoꞌ tzan jun nim kyaqꞌiqꞌ [ntzaj tilan kyaqil]. ¹⁴ Bꞌix te twitz kaꞌj oqetnaj iktzaꞌ jun tidiꞌ nꞌel in [oj tmankun token], bꞌix kyaqil kye witz bꞌix kye txꞌoꞌtxꞌ tuj nim aꞌ ejaw in tuj kyluwar. ¹⁵ Bꞌix kye kywitzaleꞌ kꞌulul mandad twitz txꞌoꞌtxꞌ, bꞌix kye aj bꞌan nim kyajwalil, bꞌix kye aꞌeꞌ kꞌulul mandad kxol kye soldad, bꞌix kye qꞌinon, bꞌix kye aj at nim kybalor, bꞌix kye aj mosimeꞌ bꞌix kye aj ya nyaꞌtx mosimeꞌ, kyaqil kyetz oqex kyewaꞌ kyibꞌ tuj jul bꞌix tuj peky twiwitz. ¹⁶ Bꞌix nxik tuq kyqꞌumaꞌ kye witz bꞌix kye peky ikxjani: “Peꞌeqet xitan qajsikna bꞌix qoqet etewaꞌna twitz te aj witꞌlik tuj twitꞌlel bꞌix tiꞌj tqꞌoj Te Tal Moch. ¹⁷ Maꞌtx pon te qꞌij tzan tjatz tqꞌoj bꞌix ¿abꞌl otipaꞌtz kyaqil ntzani?”