7
Kye Jun Oqal Tukyꞌi Kaj Tuj Oxqal Mil (144,000) Xjal Kxol Kye Aj Israel Aj Pawameꞌ Te Qtata Dios
1 Ntons, ya ma kyꞌik kyaqil nini, oxik wen kaj ángel waꞌlkeꞌ tuq tuj kykajil palaj te twitz txꞌoꞌtxꞌ, nqet kymaqoꞌ tuq te kykajil palaj jaꞌ ntzaj te kyaqꞌiqꞌ twitz txꞌoꞌtxꞌ* tzan kꞌon stzaj chꞌinwt kyaqꞌiqꞌ twitz txꞌoꞌtxꞌ, ni tajsik te nim aꞌ ni kxol kye tzeꞌ. 2 Bꞌix oxik wen junky ángel ikjaꞌn tjatz tuq tumelil aj jaꞌ njakul te qꞌij. Eqꞌiꞌ tuq titzaꞌ jun tidiꞌ tzan tok siꞌlet techaꞌl [kyiꞌj kye xjal aj telponx qꞌapomeꞌ kyibꞌ] te Qtata Dios, te Qtat aj at jun tanqꞌin. Bꞌix oxik tqꞌumaꞌ tukyꞌi jun twiꞌ bꞌan kongan kyukyꞌi kye kykajil ángel aj ojetq tuq xik siꞌ kyajwalil tzan txik ksiꞌ jun nyaꞌtx galan tiꞌj te twitz txꞌoꞌtxꞌ bꞌix tiꞌj te nim aꞌ, oxik tqꞌumaꞌ ikxjani: 3 “Kꞌon tzꞌok ekꞌuluꞌ jun tidiꞌ tiꞌj te twitz txꞌoꞌtxꞌ ni tiꞌj te nim aꞌ ni kyiꞌj kye tzeꞌ max oj tokbꞌaj qsiꞌ jun techaꞌl tajsik kywitz kye aj qꞌapoꞌ kyibꞌ te Qtata Dios.”
4 Bꞌix oxik nchan jatebꞌ tuq kybꞌet kye aj owok siꞌ jun kyechaꞌl, oxik nchaꞌoꞌ oqal tukyꞌi kaj tuj oxqal mil (144,000) kybꞌet tuq tzan kyaqil kxol kyaqil bꞌuchꞌuj tijajil Israel. 5 Te bꞌuchꞌuj aj tijajil Juda, kabꞌlajuj mil tuq (12,000) kye aj atok jun kyechaꞌl; te bꞌuchꞌuj aj tijajil Ruben, ax kabꞌlajuj mil tuqky (12,000); te bꞌuchꞌuj aj tijajil Gad, ax kabꞌlajuj milky (12,000); 6 bꞌix te bꞌuchꞌuj aj tijajil Aser, ax kabꞌlajuj milky (12,000); te bꞌuchꞌuj aj tijajil Nep, ax kabꞌlajuj milky (12,000); te bꞌuchꞌuj aj tijajil Manases, ax kabꞌlajuj milky (12,000); 7 bꞌix te bꞌuchꞌuj aj tijajil Simeón, ax kabꞌlajuj milky (12,000); te bꞌuchꞌuj aj tijajil Lewi, ax kabꞌlajuj milky (12,000); te bꞌuchꞌuj aj tijajil Isakar, ax kabꞌlajuj milky (12,000); 8 bꞌix te bꞌuchꞌuj aj tijajil Sabulon, ax kabꞌlajuj milky (12,000); te bꞌuchꞌuj aj tijajil Chep, ax kabꞌlajuj milky (12,000); te bꞌuchꞌuj aj tijajil Minch, ax kabꞌlajuj milky (12,000).
Kye Xjal Aj Jaꞌchq Tzajnaqeꞌ Akyeqet Twitz Qajawil
9 Ntons, ya ma kyꞌik kyaqil nini, yaji oxik wen jun nim bꞌuchꞌuj xjal kꞌontiꞌl tuq nbꞌantik kyajlet, jaꞌchq tzajnaqeꞌ tuj kyaqil nasyon bꞌix tiꞌj kyaqil kyijajil xjal, bꞌix tzajnaqeꞌ tuj kyaqil amaqꞌ bꞌix tuj kyaqil yol; bꞌix waꞌlkeꞌ tuq twitz te twitꞌlel te aj nkꞌulun mandad bꞌix twitz [te aj nꞌok qꞌumaꞌ] Te Tal Moch, bꞌix saq tuq kyqꞌanaq bꞌix eqꞌiꞌ tuq txaq rams kyitzaꞌ. 10 Bꞌix nxik tuq kyqꞌumaꞌ kongan ikxjani: “Te aj ma qet kolon te qetz a te Qtata Dios aj witꞌlik tuj twitꞌlel bꞌix Te Tal Moch.” 11 Bꞌix kyaqil kye ángel sipaꞌ kyibꞌ tiꞌj twitꞌlel, bꞌix kye tijxjal bꞌix kye kaj txkup, kkyaqil kyetz eqet mejlet twitz te Qtata Dios tzan kynaꞌon tetz. 12 Nxik tuq kyqꞌumaꞌ ikxjani: “¡Bꞌanꞌax ikxji! Inkyyolinxwit kyaqil galan tiꞌj tetz, instenxwit bꞌan nim tajwalil, bꞌix at jun tnabꞌl tzan tbꞌisun tuj tumeꞌl. Intxikxwit siꞌ pixon tetz, bꞌix intqetxwit jiqꞌbꞌaꞌ. Instenxwit kyaqil tuj tqꞌabꞌ, bꞌix instenxwit tbalor. Intqetxwit naꞌoꞌ te Qtata Dios te jun-eleꞌx. ¡Ikxji kixiꞌ!”*
13 Ntons jun tijxjal otzaj tqꞌumaꞌ wetz ikxjani: “Wen, kye aj atok kyqꞌanaq saqni, ¿abꞌleꞌtzun? Bꞌix ¿jaꞌ tzajnaqeꞌ?” 14 Wetz oxik nqꞌumaꞌ tetz: “Tat, yatz awebꞌen.” Yaji tetz owajtz stzaqꞌbꞌeꞌ wetzky ikxjani: “Kye aj ntzanijeꞌ aꞌeꞌ kye aj oje tzꞌok kyen twitz te bꞌan nim xhchoꞌnal.* Kyetz oje kaj saq kyiꞌj tzan tpaj owel xhchikyꞌela [te aj nꞌok qꞌumaꞌ] Te Tal Moch aj tkamik.b 15 Astilji akyeqet twitz te Qtata Dios aj jaꞌ witꞌlik tuj twitꞌlel nkꞌulun mandad, bꞌix nkyenaꞌon te tetz bꞌajqꞌij bꞌix bꞌajaqꞌbꞌil tuj tjay, bꞌix tetz okyeqtel tkoloꞌ.c 16 Ya nlay tzꞌok kyen twitz waꞌij ni twitz tzakjel, bꞌix te qꞌij ya nlay qet kyajsik bꞌix nlay tzꞌok kyen twitz kyaq.* 17 Komo Te Tal Moch aj atqet tuj te witꞌlelj oqtel tkꞌuluꞌ kwentd te kyetz, bꞌix oxeꞌl tyekꞌuꞌ kyetz jaꞌ at te aꞌ aj ntzaj tsiꞌ te qanqꞌin [te jun-eleꞌx], bꞌix te Qtata Dios otkyꞌixwinsaꞌtz kyaqil taꞌal kywitz.”