8
Aj Okyꞌik Aj Tjaw Jaqoꞌ Te Twuqiꞌ Lakꞌbꞌil
1 Ntons yaji, aj tel tlokꞌpiꞌ Te Tal Moch te twuqiꞌ lakꞌbꞌil tiꞌj te uꞌj, owok jun rat bꞌan takun tuj kaꞌj qanq mey or.
2 Ntons, yaji exik wen wuq ángel waꞌlkeꞌ twitz Qtata Dios, bꞌix oxik siꞌ kyetz wuq trompet. 3 Bꞌix otzaj junky ángel, oqet waꞌlet twitz te pombꞌil te Qtata Dios, te tzꞌeꞌsbꞌil aj pur xtxꞌotxꞌal oro aj atqet twitz te twitꞌlel [Qtat], bꞌix te ángel eqꞌiꞌ tuq titzaꞌ jun tqatel pom pur xtxꞌotxꞌal oro, bꞌix oxik siꞌ nim pom tetz tzan txik tqꞌapoꞌ twiꞌ te tzꞌeꞌsbꞌil junx tukyꞌi te kxnaqꞌtzbꞌen kkyaqil kye aj pawameꞌ aꞌox te tetz. 4 Tuj [te tqatel pom tuj] tqꞌabꞌ te ángel, ojax twitz Qtata Dios te tbꞌuqinal te pom tukyꞌi te kxnaqꞌtzbꞌen kye aj pawameꞌ te Qtat. 5 Yaji te ángel ojaw stzyuꞌ te pombꞌil, oqex tnojsaꞌ tukyꞌi txanqꞌaꞌl aj atqet tuq tuj te tzꞌeꞌsbꞌil,* bꞌix otzaj txon twitz txꞌoꞌtxꞌ, bꞌix ajun ray otzaj, oxik nchaꞌoꞌ tidiꞌchq bꞌan ntrenun, bꞌix ajun xhlikyꞌlikaꞌj bꞌix ajun kabꞌjunabꞌ otzaj.
Kye Xhchoꞌnal Aj Otzaj Aj Kyok Oqꞌsaꞌ Kye Tbꞌay Waqaq Trompet
6 Ntons yatzun kye wuq ángel aj eqꞌiꞌ tuq kye trompet kyitzaꞌ, oqet kykꞌuluꞌ listar kyibꞌ tzan tok kyoqꞌsaꞌ. 7 Te tbꞌay ángel owok toqꞌsaꞌ te strompet bꞌix yaji otzaj xon twitz txꞌoꞌtxꞌ saqsbꞌaqon samoꞌ tukyꞌi qꞌaqꞌ* bꞌix samoꞌ tukyꞌi kyikꞌ, bꞌix te toxiꞌ part te twitz txꞌoꞌtxꞌ otzꞌeꞌsjik, bꞌix te toxiꞌ part kye tzeꞌ twitz txꞌoꞌtxꞌ etzꞌeꞌsjik, bꞌix kyaqil te kꞌul ax oqet tzꞌeꞌk.
8 Yaji te tkabꞌiꞌ ángel owok toqꞌsaꞌ te strompet, bꞌix yaji jun tidiꞌ iktzaꞌ jun witz ntilun tuq oxik xon tuj te nim aꞌ bꞌix te toxiꞌ pedas te nim aꞌ owok pur kyikꞌ, 9 bꞌix ebꞌajkamik te toxiꞌ part kye txkup tuj te nim aꞌ, bꞌix te toxiꞌ part kye bark ebꞌajponaj.
10 Yaji te toxiꞌ ángel owok toqꞌsaꞌ te strompet, bꞌix yaji otzaj tzꞌaqik twitz kaꞌj jun nim cheꞌw ntilun iktzaꞌ jun qꞌaqꞌ,a bꞌix oqet tzꞌaqik tajsik toxiꞌ part kye aꞌ bꞌix kyajsik kye soch. 11 Bꞌix te cheꞌw Kꞌay Kꞌul tuq tbꞌi, bꞌix te toxiꞌ part kye aꞌ owok bꞌan kꞌay, bꞌix kyꞌilaꞌj xjal ebꞌajkamik tzan tpaj te aj aꞌ aj owok bꞌan kꞌay.
12 Yaji te tkajiꞌ ángel owok toqꞌsaꞌ te strompet, bꞌix yaji oyabꞌtik te toxiꞌ part te qꞌij bꞌix toxiꞌ part te qyaꞌ bꞌix toxiꞌ part kye cheꞌw twitz kaꞌj, te toxiꞌ part te kyetz ya kꞌontiꞌl tuq nqꞌanalin; ikxji kꞌontiꞌl owok xhkꞌatun te toxiꞌ part te aqꞌbꞌil bꞌix toxiꞌ part te qꞌij.*
13 Ntons, yaji oxik wen bꞌix oxik nchaꞌoꞌ jun yoqꞌon nlipan tuq twitz kaꞌj, nxik tuq tqꞌumaꞌ ikxjani: “Lasteꞌ, lasteꞌ, lasteꞌ kye aj nkyenajan twitz txꞌoꞌtxꞌ tzan tpaj owokel kyoqꞌsaꞌ naj kye oxky ángel kye kytrompetni.”