9
1 Yaji te tjwebꞌiꞌ ángel owok toqꞌsaꞌ te strompet, bꞌix yaji oxik wen [jun ángel naqe] jun cheꞌw ojetq stzaj lankꞌan twitz txꞌoꞌtxꞌ, bꞌix oxik siꞌ tetz tal te lamel jaqbꞌil te jul aj kꞌontiꞌl txeꞌ. 2 Bꞌix ojaw tjaqoꞌ te jul aj kꞌontiꞌl txeꞌ, bꞌix ojatz jun chman sibꞌ tuj naqe sibꞌ tuj jun chman jorn, bꞌix oqloljxbꞌik twitz te qꞌij bꞌix kyaqil tuj kyaqꞌiqꞌ tzan te sibꞌ aj ojatz tuj te jul. 3 Bꞌix tuj te sibꞌ ejatz xkuchiꞌ, exik twitz txꞌoꞌtxꞌ bꞌix oxik siꞌ ktxꞌabꞌla iktzaꞌ ktxꞌabꞌl kye alakran twitz txꞌoꞌtxꞌ. 4 Bꞌix oxik kꞌuluꞌ mandad tzan kꞌon kykꞌulun nyaꞌtx galan tiꞌj awalj ni tiꞌj kꞌul ni tiꞌj tzeꞌ, sinoke aꞌox kyiꞌj xjal aj kꞌontiꞌl atok jun kyechaꞌl aj owok siꞌ tajsik kywitz aj telponx aꞌeꞌ aj te Qtata Dios.* 5 Bꞌix exik kꞌuluꞌ mandad tzan kꞌon kyqet kykansaꞌ sinoke cha aꞌox tzan kyel ktxꞌaꞌoꞌ, tzan tok kyen kye xjal twitz nim xhchoꞌnal jwebꞌ qyaꞌ, bꞌix te ktxꞌabꞌl iktzaꞌ ktxꞌabꞌl alakran oj tel txꞌaꞌoꞌ jun xjal. 6 Tuj aj tyempji kye xjal kyganiꞌtz-tal tzan kykamik, per nlay kyekamik, bꞌix okyjoyoꞌtz tumeꞌl titzaꞌ tzan kykamik per nlay tzꞌoknoj tumeꞌl titzaꞌ tzan kykamik. 7 Bꞌix kye xkuchiꞌ iktzaꞌ tuq kway aj list-eꞌ tzan kxik in qꞌojiyon, bꞌix tuj kywiꞌ at tuq jun naqe kykoron xtxꞌotxꞌal oro, bꞌix te kywitz naqe kywitz xjal.* 8 Bꞌix at tuq stzamal kywiꞌ iktzaꞌ stzamal kywiꞌ xuj, bꞌix te twitz kyeꞌ iktzaꞌ twitz teꞌ jun leon. 9 Bꞌix at tuq txaybꞌil kypech iktzaꞌ xtxꞌotxꞌal kꞌuxbꞌil, bꞌix te kxikyꞌ bꞌan nxumin tuq iktzaꞌ bꞌan kyꞌilaꞌj karret jukꞌuꞌ tzan kway bꞌan nkyexumin ikjaꞌn kxik qꞌojiyon kyiꞌj kyajqꞌoj.b 10 Bꞌix te kyjeꞌ iktzaꞌ tuq tjeꞌ alakran, bꞌix ax at tuq ktxꞌabꞌl. Bꞌix oxik siꞌ jun permis te kyetz tzan tok ksiꞌ xhchoꞌnal kyiꞌj xjal tukyꞌi kyjeꞌ, jwebꞌ qyaꞌ. 11 Bꞌix te kꞌulul mandad kyetz, a te ángel tiꞌj te jul aj kꞌontiꞌl txeꞌ,* bꞌix tetz tbꞌi tuj te yol ebrey “Abadon” bꞌix tuj te yol gryeg “Apolión” [aj telponx Xitul Kyaqil].
12 Te tbꞌay nim xhchoꞌnal maꞌtx kyꞌik, per yaji okyꞌel kabꞌeꞌky mas nim xhchoꞌnal twitz ntzaꞌn.
13 Yaji te tqaqiꞌ ángel owok toqꞌsaꞌ te strompet, bꞌix yaji tuj te pombꞌil aj xtxꞌotxꞌal oro aj atqet tuq twitz Qtata Dios, oxik nchan ntzaj yolin twiꞌ jun xjal ninkꞌajchaq kye kykajil kach tajsik te tzꞌeꞌsbꞌil. 14 Nxik tuq tqꞌumaꞌ tukyꞌi te tqaqiꞌ ángel aj eqꞌiꞌ tuq te trompet titzaꞌ, kyi ikxjani: “Inkyel atzoqpiꞌ kye kaj ángel aj tzyumeꞌ stziꞌ te chman aꞌ aj tbꞌi Eufrátes.” 15 Ntons yatzun kye kaj ángel aj ojetq tuq kyeqet kꞌuluꞌ preparar te aj orji bꞌix te aj qꞌijji bꞌix te aj qyaꞌji bꞌix te aj aqꞌbꞌiji, exik tzoqpiꞌ tzan tqet kykansaꞌ te toxiꞌ part kye xjal [twitz txꞌoꞌtxꞌ]. 16 Ntons oxik wen bꞌan kyꞌilaꞌj soldad tajsik kway, kabꞌeꞌ oqal miyon (200,000,000) tuq kybꞌet; komo wetz oxik nchaꞌoꞌ jatebꞌ tuq kybꞌet. 17 Ikxji oxik wen te aj owok jotoꞌ tuj nwitz, bꞌix kye xjal tajsik kykway, atok tuq jun txaybꞌil kypech [kyaq] tebꞌl naqe qꞌaqꞌ bꞌix tukyꞌi tebꞌl [bꞌan txaꞌx] naqe abꞌj jasint bꞌix ax tukyꞌi tebꞌl [qꞌan qꞌeqmuqin] naqe asupr. Bꞌix kye kway, kyetz kywiꞌ iktzaꞌ twiꞌ jun leon bꞌix tuj ktziꞌ nꞌetz tuq qꞌaqꞌ, sibꞌ bꞌix asupr. 18 Tzan tpaj ja ox xhchoꞌnal ntzani, ebꞌajkamik te toxiꞌ part kye xjal twitz txꞌoꞌtxꞌ tzan te qꞌaqꞌ bꞌix te sibꞌ bꞌix te asupr aj nꞌetz tuq tuj ktziꞌ.c 19 Komo kye kway bꞌaꞌn tuq tzan kykansan tzan tpaj te aj nꞌetz tuq tuj ktziꞌ bꞌix tzan tpaj te kyjeꞌ, komo te kyjeꞌ iktzaꞌ jun kan, at tuq kywiꞌ bꞌix nkyeꞌokꞌonsan tuq kye xjal. 20 Bꞌix yatzun kye txqꞌanky xjal aj kꞌontiꞌl ebꞌajkamik tzan kye ja xhchoꞌnalni, tzan tpaj nini ni kꞌontiꞌl okaj kykolaꞌ tzan kykꞌulun nyaꞌtx galan, bꞌix kꞌontiꞌl okaj ksiꞌ tzan kynaꞌon kye malspirit ni kywitz kyitzbꞌalil tidiꞌchq xtxꞌotxꞌal oro, plat, brons qatzun tidiꞌ aj kꞌuluꞌ tukyꞌi abꞌj qatzun tukyꞌi tzeꞌji, aj kꞌontiꞌl nbꞌantik kyeꞌen bꞌix ni tzan kchaꞌon bꞌix ni tzan kybꞌet.* 21 Bꞌix kꞌontiꞌl ojaw kkyꞌixpuꞌ kynabꞌlin, kꞌontiꞌl okaj kykolaꞌ tzan kykansan ni tzan kchmanin ni tzan kykꞌajajin ni tzan kyelqꞌan.