10
Aj Tyolin Te Angel Aj Eqꞌiꞌ Te Tal Uꞌj Titzaꞌ
1 Ntons yaji, oxik wen junky ángel bꞌan nim tbalor ikjaꞌn tuq tqetz tuj kaꞌj bꞌix bꞌalqꞌiꞌ tuq tiꞌj tukyꞌi muj, bꞌix at tuq jun kyaqmaljabꞌ tuj twiꞌ,* bꞌix te twitz [ntxaqtxon tuq] naqe qꞌij* bꞌix kye toq iktzaꞌ pur qꞌaqꞌ. 2 Atox tuq tuj tqꞌabꞌ jun chꞌi tal uꞌj jaqoꞌ tuq. Bꞌix te ángel waꞌlqet tukyꞌi toq aj tbꞌanqꞌabꞌ tuj te nim aꞌ, bꞌix te toq aj tsurt twitz txꞌoꞌtxꞌ. 3 Bꞌix oxik tkꞌuluꞌ mandad bꞌan kongan iktzaꞌ oj tjulin jun leon, bꞌix ya ma jaw sikyꞌin te ángel, yaji oxik nchaꞌoꞌ wuq ray nkyetrenun nkyeyolin. 4 Ya ma kyeꞌel te kxlinkꞌubꞌ kye wuq ray, wetz oqet tuq ntzꞌibꞌaꞌ, per oxik nchan twiꞌ jun xjal otzaj qꞌolbꞌen wiꞌj tuj kaꞌj, otzaj tqꞌumaꞌ ikxjani: “Cha intqet awewaꞌ te aj maꞌtx kyqꞌumaj kye wuq rayni bꞌix kꞌon qet atzꞌibꞌaꞌ.” 5 Ntons te ángel aj oxik wen waꞌlk tuj te nim aꞌ bꞌix twitz txꞌoꞌtxꞌ, ojaw tin te tbꞌanqꞌabꞌ jawnaq twitz kaꞌj 6 bꞌix oxik tsiꞌ tjurament tiꞌj [Qtata Dios] aj itzꞌoj te jun-eleꞌx, aj oqet kꞌulun te twitz kaꞌj bꞌix kyaqil aj at tzi bꞌix te twitz txꞌoꞌtxꞌ bꞌix kyaqil aj at tzi bꞌix te nim aꞌ bꞌix kyaqil aj at tzi; oxik tsiꞌ tjurament tzan tponkix naj luwew kyaqil aj presis tuq tzan tkyꞌik. 7 Bꞌix yatzun oj tok oqꞌsaꞌ te junky trompet tzan te twuqiꞌ ángel, opoyonkix naj luwew te aj bꞌisuꞌ tzan te Qtata Dios, iktzaꞌx oxik tqꞌumaꞌ kye aj yolil tyol.*
8 Yaji, te aj oxik nchan tuj kaꞌj intzaj tqꞌolbꞌeꞌ junkyꞌel ikxjani: “Pax eqꞌil te uꞌj aj jaqoꞌ tuj tqꞌabꞌ te ángel aj waꞌlqet tuj te nim aꞌ bꞌix twitz te txꞌoꞌtxꞌni.” 9 Inxwaꞌq tukyꞌi te ángel, oxik nqꞌumaꞌ tzan stzaj tsiꞌ tuq te tal uꞌj. Yatzun tetz otzaj tqꞌumaꞌ wetz ikxjani: “Ntzani, bꞌix intxik awaꞌaꞌ. Owokel bꞌan kꞌay tuj akꞌuꞌj titzaꞌ, per tuj atziꞌ owokel bꞌan kyiꞌ iktzaꞌ taꞌl tzeꞌ.” 10 Ntons owel win te tal uꞌj tuj tqꞌabꞌ bꞌix oxik nwaꞌaꞌ; owok bꞌan kyiꞌ tuj ntziꞌ naqe taꞌl tzeꞌ per ya ma kyaqon tuj nkꞌuꞌj owok bꞌan kꞌay.* 11 Yaji tetz otzaj tqꞌumaꞌky wetz ikxjani: “Presis tzan txik ayoliꞌ nyol junkyꞌel kyiꞌj kyꞌilaꞌj amaqꞌ, bꞌix kyiꞌj kyꞌilaꞌj nasyon, bꞌix kyiꞌj xjal aj nkyeyolin tuj kyꞌilaꞌj txqꞌanky yol, bꞌix kyiꞌj kyꞌilaꞌj kꞌulul mandad twitz txꞌoꞌtxꞌ.”