11
Aj Okykꞌuluꞌtz Kye Kabꞌeꞌ Yolil Tyol Dios Tuj Jerusalen
1 Yaji otzaj siꞌ wetz jun tal tzeꞌ malbꞌil,* bꞌix otzaj qꞌumaꞌ wetz ikxjani: “Qalan bꞌix intqet amaloꞌ te jay aj te nabꞌil Qtata Dios bꞌix te pombꞌil, bꞌix intjaw awin kyajlal kye aj nkyenaꞌon Qtata Dios tzi. 2 Per kꞌon qet amaloꞌ te tzijay aj tiꞌjx te jay aj te nabꞌil Qtata Dios; kꞌon xik asiꞌ tkwentil tzan tpaj te nini oje xik qꞌapoꞌ kye aj kꞌontiꞌl nkyeꞌokslan, bꞌix te amaqꞌ aj pawaꞌ te Qtata Dios nlay qet kxjaniꞌ, oqtelbꞌaj kywabꞌeꞌ oxe aqꞌbꞌi tukyꞌi mey.a 3 Bꞌix okyexeꞌl nlajoꞌ kabꞌeꞌ yolil nyol, bꞌix oxe aqꞌbꞌi tukyꞌi meyb okyepakbꞌayon nyol. Kyetz owokel ksiꞌ kyqꞌanaq naqe kyqꞌanaq aj bꞌis ateꞌ.c 4 Kye ja yolil nyol, kyetz iktzaꞌ kye kabꞌeꞌ wiꞌ olib bꞌix kye kabꞌeꞌ tqatel kandel aj akyeqet twitz te Qajawil aj tajaw kyaqil twitz txꞌoꞌtxꞌ.* 5 Qatzun at abꞌl tgan kꞌulun jun nyaꞌtx galan kyiꞌj, [kyetz oxeꞌl kyqꞌumaꞌ kyyol]d tzan kyqetbꞌaj tzꞌeꞌsaꞌ kyaqil kyajqꞌoj, ikxji okamel te aj tgan kꞌulun jun nyaꞌtx galan kyiꞌj. 6 Kyetz at kyajwalil tzan kylamon twitz kaꞌj tzan kꞌon stzaj jabꞌ tuj kyaqil qꞌij aj nkyeyolin nyol,* bꞌix ax at kyajwalil tzan tok te aꞌ pur kyikꞌ kyitzaꞌ* bꞌix tzan stzaj ksamaꞌ kyꞌilaꞌj yabꞌil twitz txꞌoꞌtxꞌ iktzaꞌx kyetz kygan. 7 Per ya oj tmankun kypakbꞌan kyaqil, yaji jun naqe txkupe aj tzajnaqf tuj te jul aj kꞌontiꞌl txeꞌ,* oqꞌojiyon kyiꞌj, bꞌix okyeqtel titzaꞌ bꞌix okyeqtel tkansaꞌ.* 8 Bꞌix ya kye kxlimal okyekajel tanlet tuj tkayul te aj amaqꞌji, aj chman amaqꞌ aj jaꞌ oqet kansaꞌ te Kyajawil twitz krus, bꞌix tzan tpajji nꞌok qꞌumaꞌ iktzaꞌ Sodom* bꞌix Ejipt. 9 Bꞌix kye kyaqil xjal tuj kyaqil amaqꞌ bꞌix kyaqil kyijajil xjal bꞌix tuj kyaqil yol bꞌix jaꞌchq tzajnaqeꞌ tuj kyaqil nasyon, oxeꞌl kyeꞌeꞌ te kxlimal oxe qꞌij tukyꞌi mey, bꞌix nlay ktzoqpij tzan kyqex muquꞌ. 10 Bꞌix kyaqil kye aj nkyenajan twitz txꞌoꞌtxꞌ okyechalajel, oqtel kyqꞌijlaꞌ, okyesipayon kyoyej kxolx, okyechalajel tzan tpaj ojetq kyekamik kye yolil nyol aj nkyeyolin tuq te kykꞌulbꞌen kye xjal twitz txꞌoꞌtxꞌ nyaꞌtx galan.”
11 Per yaji, ya ma kyꞌik te oxe qꞌij tukyꞌi mey, yaji te Txew Qtata Dios aj ntzaj tsiꞌ qanqꞌin, ejaw tanqꞌinsaꞌ, bꞌix kyaqil aj eꞌok eꞌen kyetz ebꞌajxobꞌ nim. 12 Bꞌix kye pakbꞌon oxik kchan tuj kaꞌj twiꞌ jun xjal otzaj tqꞌumaꞌ kongan ikxjani: “Peꞌejatz tzani.” Ntons ejax tuj kaꞌj tuj muj bꞌix kyaqil kye kyajqꞌoj eꞌok eꞌen tetz. 13 Bꞌeyxnajji otzaj jun kabꞌjunabꞌ bꞌan jwert,* bꞌix te tlajujiꞌ part te amaqꞌ oqet tilan, bꞌix tzan tpaj te kabꞌjunabꞌ ebꞌajkamik wuq mil (7000) xjal, bꞌix yatzun kye aj kꞌontiꞌl ekamik, ebꞌajxobꞌ bꞌix ebꞌajnaꞌon te Qtata Dios aj atjax tuj kaꞌj.
14 A te tkabꞌiꞌ nim xhchoꞌnal maꞌtx kyꞌikni per tzulnaj te toxiꞌ.
Te Aj Okyꞌik Aj Tok Oqꞌsaꞌ Te Twuqiꞌ Trompet
15 Yaji te twuqiꞌ ángel owok toqꞌsaꞌ te strompet, bꞌix yaji oxik nchaꞌoꞌ kywiꞌ kyꞌilaꞌj xjal nkyeyolin kongan tuj kaꞌj ikxjani: “Ajnaꞌl a te Qtata Dios bꞌix te Koloyon aj Joyomaj titzaꞌ okꞌuluyon mandad tiꞌj te twitz txꞌoꞌtxꞌ kyaqil, bꞌix okꞌuluyon mandad bꞌeyx te jun-eleꞌx tiꞌj kyaqil.”* 16 Ya kye aj kaj tuj kawnaq (24) tijxjal aj witꞌlikeꞌ tuq tuj kywitꞌlel twitz Qtata Dios, ebꞌajqet mejlet tukyꞌi tajsik kywitz max twitz txꞌoꞌtxꞌ bꞌix enaꞌon tetz. 17 Nxik tuq kyqꞌumaꞌ ikxjani: “Pixon te yatz Tata Dios, yatz aj mas nim awajwalil twitz kyaqil, yatz aj [bꞌeyx] atichqet ajnaꞌl bꞌix atichqetkix tuq. Yatz maꞌtx kaj kyaqil tuj aqꞌabꞌ tukyꞌi awajwalil bꞌix ajnaꞌl maꞌtx chkꞌulun mandad tukyꞌi awajwalil tiꞌj kyaqil. 18 Kye xjal ebꞌajjaw qꞌojlik awiꞌj, per ajnaꞌl yatz maꞌtx tzaj aqꞌoj kyiꞌj, maꞌtx pon or tzan aqꞌuman kyil kye kamnaq. Ajnaꞌl maꞌtx pon or tzan txik asiꞌ kykanabꞌ kye aj qꞌapoꞌ kyibꞌ nkyeꞌaqꞌunan te yatz, kye aj yolil ayol bꞌix kye txqꞌanky aj pawameꞌ awitzaꞌ, aꞌeꞌ aj nchqet tuq kxjaniꞌ, qa nim kyajwalil qatzun nyaꞌtxji.* Bꞌix maꞌtx pon or tzan kypon anajsaꞌ kye aj cha nkyekꞌulun nyaꞌtx galan twitz txꞌoꞌtxꞌ.”
19 Bꞌix yaji, te jay aj tuj kaꞌj aj nabꞌil Qtata Dios ojaqet bꞌix tuj te jay ebꞌajil tuq te kaxh aj telponx tiꞌj te yol aj oxik tsiꞌ te Qtata Dios oqtxiꞌ. Bꞌix ajun xhlikyꞌlikaꞌj tuq, bꞌix ajun kywiꞌ xjal txik chaꞌon tuq, bꞌix ajun ray nim tuq, bꞌix otzaj jun nim kabꞌjunabꞌ, bꞌix oqet tzꞌaqik nim saqsbꞌaqon.*