12
Aj Okyꞌik Tiꞌj Te Xuj Aj Chꞌinky Tuq Tkyꞌix
1 Yaji, ojaw kanet twitz kaꞌj jun seny bꞌan chuktky ikxjani: Jun xuj ntxaqtxon tuq iktzaꞌ qꞌij,a bꞌix te qyaꞌ atqet tuq tjaqꞌ toq, bꞌix tuj twiꞌ atjax tuq jun tkoron akyeꞌok tuq kabꞌlajuj cheꞌw tiꞌj. 2 Te xuj chꞌinky tuq tkyꞌix bꞌix bꞌan nqawun tuq tzan xhchoꞌnal te alaꞌmj tzan tpaj maꞌtx pon styemp tuq tzan tkyꞌix.* 3 Yaji ojaw kanet twitz kaꞌj junky seny bꞌan chuktky, jun nim txkup per naqe jun matij semejante kan, kyaqtiꞌj, bꞌix ateꞌ tuq wuq twiꞌ bꞌix lajuj tkach,* bꞌix tuj junjunchaq kye wuq twiꞌ atjax jun tal tkoron. 4 Bꞌix tukyꞌi tjeꞌ eꞌel tkyꞌisuꞌ te toxiꞌ part kye cheꞌw twitz kaꞌj bꞌix etzaj txoꞌoꞌ twitz txꞌoꞌtxꞌ.* Bꞌix te aj matij semejante kanni owaꞌlet twitz te xuj aj nꞌalan tuq, tzan txik xhchoꞌ tuq te tal oj titzꞌjik. 5 Te xuj otalaj jun tal ichan aj okꞌuluyon kwent kyaqil xjal twitz txꞌoꞌtxꞌ tukyꞌi nim tajwalil.b Per te kꞌwaꞌl ojaw eqꞌiꞌ bꞌix ojax in tuj kaꞌj tukyꞌi Qtata Dios tzan sten tukyꞌiꞌl tuj twitꞌlel aj jaꞌ nkꞌulun mandad. 6 Yatzun te xuj owoqik max tuj te kyꞌixkꞌoj txꞌoꞌtxꞌ aj jaꞌ kꞌontiꞌl najayon, aj jaꞌ at tuq jun tewbꞌil kꞌulumaj tzan Qtata Dios tzan tuq tqet kꞌuluꞌ kwent txini oxe aqꞌbꞌi tukyꞌi mey.c
7 Ntons yaji owaqꞌik jun qꞌoj tuj kaꞌj. Te Migel* bꞌix kye txqꞌanky ángel tukyꞌiꞌl, kyetz nkyeqꞌojin tuq tukyꞌi te aj matij semejante kan. Te kan nqꞌojin tuq bꞌix nꞌok tuq oneꞌ tzan txqꞌanky ángel aꞌeꞌ aj tukyꞌiꞌl, 8 per kꞌontiꞌl okyipaj, bꞌix kꞌontiꞌl tuq jun luwar te kyetz tuj kaꞌj. 9 Owetz in te aj matij semejante kan kyaqtiꞌj, aj kan bꞌan oqtxiꞌ tijky,* aj tbꞌi “Tajaw Choj” bꞌix ax “Satanas”* tbꞌi, aj nkyeqet teqꞌiꞌ kyaqil xjal twitz txꞌoꞌtxꞌ, bꞌix tetz kyukyꞌi kye ángel etzaj xon twitz txꞌoꞌtxꞌ. 10 Ntons oxik nchan tuj kaꞌj twiꞌ jun xjal nyolin tuq kongan ikxjani: “Ajnaꞌl maꞌtx tzul te Koloyon tukyꞌi nim tajwalil, bꞌix ikxji tzan tkꞌulun mandad te Qtata Dios tiꞌj kyaqil, maꞌtx tzul te Koloyon aj Qꞌumankaj Oqtxiꞌ tzan te Qtata Dios bꞌix at toklen tzan tkꞌulun mandad. Komo maꞌtx tzꞌex xon te aj npoqon tuq kye qerman, aj nxik tuq poqon te kyetz bꞌajqꞌij bꞌix bꞌajaqꞌbꞌil twitz Qtata Dios.* 11 Per maꞌtx qet kyitzaꞌ tzan tpaj toklen witꞌlet kykꞌuꞌj tiꞌj xhchikyꞌel Te Tal Moch aj owel aj tkamik, bꞌix ax tzan tpaj nxik tuq kyqꞌumaꞌ kye txqꞌanky te bꞌanꞌax aj kyebꞌen tuq tiꞌj tetz, bꞌix kꞌontiꞌl ebꞌajxobꞌ tzan kykamik [tzan tpaj kyokslbꞌen tiꞌj Te Tal Moch]. 12 Tzan tpaj nini, peꞌechalaj waq etetz aj tuj kaꞌj. Yatzun etetz aj nkxnajan twitz txꞌoꞌtxꞌ qatzun tuj te nim aꞌ, last aꞌix tzan tpaj te Tajaw Choj maꞌtx qex exol tukyꞌi tqꞌoj, komo tebꞌenky nyaꞌtx nimky tuj tqꞌij.”
13 Ntons, ya ma tzꞌok ten te matij semejante kan ojetq tzaj xon twitz txꞌoꞌtxꞌ, ntons owok lapet tiꞌj te xuj aj ojetq tuq talan te tal ichan, owok lapet tiꞌj tzan tjaw tlajoꞌ. 14 Per yatzun te xuj, etzaj siꞌ kabꞌeꞌ txikyꞌ iktzaꞌ txikyꞌ jun chman yoqꞌon, tzan tuq txik lipan tuj te kyꞌixkꞌoj txꞌoꞌtxꞌ aj jaꞌ kꞌontiꞌl najayon aj jaꞌ tuq oqtel kꞌuluꞌ kwent oxe aqꞌbꞌi tukyꞌi mey,d bꞌix laqꞌchik tiꞌj te matij semejante kan. 15 Per tuj stziꞌ te matij semejante kan owetz jun chman aꞌ tzan tuq tkanon tiꞌj te xuj, tzan txik iqaꞌ tuq tzan te aꞌ. 16 Per te txꞌoꞌtxꞌ owonen tiꞌj te xuj, te txꞌoꞌtxꞌ oxikbꞌaj tukꞌaꞌ te aꞌ aj owetz tuj stziꞌ te matij semejante kan. 17 Ntons te matij semejante kan masky ojakul tqꞌoj tiꞌj te xuj, astilji tzan tjatz tqꞌoj oxwaꞌq qꞌojiyon kyiꞌj kye txqꞌanky tijajil te xuj, aꞌeꞌ aj nqet kyokslaꞌ te Qtata Dios bꞌix nxik tuq kyqꞌumaꞌ kye txqꞌanky te bꞌanꞌax aj kyebꞌen tuq tiꞌj Jesukrist. 18 Bꞌix yaji te matij semejante kan okaj waꞌlet stziꞌ te nim aꞌ.