13
Aj Tok Siꞌ Jun Kyechaꞌl Kye Xjal Tzan Kye Matij Txkup
1 Ntons yaji oxik wen jun naqe jun matij txkup tuj te nim aꞌ ikjaꞌn tuq tjatz. Ateꞌ tuq lajuj tkach bꞌix wuq twiꞌ, bꞌix tuj junjunchaq kye lajuj tkach atjax jun tal tkoron, bꞌix tzꞌibꞌaꞌ kyiꞌj kye twiꞌ pur tuq yol bꞌan nyaꞌtx galan nyolin tiꞌj te Qtata Dios.* 2 Te aj txkupni aj oxik wen, mer iktzaꞌ jun [nim txkup aj tuj kꞌul] leopardo tbꞌi, anke kye toq [bꞌan nim] naqe toq jun os bꞌix te stziꞌ [ax bꞌan nim] iktzaꞌ stziꞌ jun leon.* Bꞌix yaji te matij semejante kan oxik tsiꞌ jun tbalor te aj junky, bꞌix jun twitꞌlel aj jaꞌ bꞌaꞌn tzan tkꞌulun mandad, bꞌix oxik tsiꞌ nim tajwalil [tzan tyolin te tkyꞌixel]. 3 Jun twiꞌ te txkup at tuq jun okꞌol tiꞌj bꞌix okamel tuq, per yaji te okꞌol obꞌantikky. Astilji kyaqil kye xjal twitz txꞌoꞌtxꞌ ebꞌajlabꞌan tiꞌj, eꞌokslan tiꞌj. 4 Ntons enaꞌon tiꞌj te matij semejante kan tzan tpaj oxik tsiꞌ tajwalil te aj junky naqe txkup, bꞌix ax enaꞌon tiꞌj te aj naqe txkup ikxjani: “¿Abꞌl opoyon iktzaꞌ ja ntzani? ¿Abꞌl otnimsaꞌtz tkꞌuꞌj tzan tqꞌojin tukyꞌiꞌl?” 5 Bꞌix ax oxik tzoqpiꞌ tzan tjiqꞌbꞌan tibꞌ bꞌix tzan tyolin yol bꞌan nyaꞌtx galan tiꞌj Qtata Dios, bꞌix otzoqpjik tzan tkꞌulun iktzaꞌx tgan oxe aqꞌbꞌi tukyꞌi mey.a 6 Ntons owaqꞌik tzan tyolin yol bꞌan nyaꞌtx galan tiꞌj Qtata Dios bꞌix tiꞌchq yol bꞌan nyaꞌtx galan tiꞌj te tjay Qtata Dios bꞌix kyiꞌj kyaqil aj akyejax tuj kaꞌj.* 7 Bꞌix ax oxik tzoqpiꞌ tzan tqꞌojin kyiꞌj kyaqil kye aj pawameꞌ aꞌox te Qtata Dios, bꞌix oxik tzoqpiꞌ tzan kyqet titzaꞌ,* bꞌix oxik siꞌ tajwalil kyajsik kyaqil kyijajil xjal bꞌix kyajsik kyaqil amaqꞌ bꞌix kxol xjal aj nkyeyolin kyaqil yol bꞌix kyajsik kyaqil nasyon. 8 Kyaqil xjal twitz txꞌoꞌtxꞌ okyenaꞌoyon tiꞌj te aj naqe matij txkup. Aꞌeꞌ kyetz kye aj kꞌontiꞌl tzꞌibꞌanqex kybꞌi tuj te uꞌj aj nyolin abꞌleꞌ kye aj at jun kyanqꞌin tzan tpaj Te Tal Moch, te Tal Moch aj atx aj tqet kꞌuluꞌ te twitz txꞌoꞌtxꞌ [qꞌumankaj tuq] tzan tkamik [tzan kyanqꞌin kye aj nkyeꞌokslan tiꞌj].
9 Qa at jun abꞌl aj ateꞌok txkyin, instzaj xhchaꞌoꞌ kyaqil ntzani: 10 Abꞌlchaq aj okyexeꞌl pres [tzan tpaj te Qtata Dios ostzoqpiꞌtz tzan tkyꞌik ikxji], kyetz okyexeꞌl in pres. Yatzun kye aj kansal xjal tukyꞌi machit kansbꞌil, ax kyetz okyekamelkix tukyꞌi machit kansbꞌil.* Tiꞌj kyaqil ntzani, a tgan nim kypasens kye aj pawameꞌ te Qtata Dios bꞌix a tgan tzan tok witꞌlet kykꞌuꞌj tiꞌj.
11 Ntons, yaji oxik wen junky naqe txkup ikjaꞌn tuq tjatz twitz txꞌoꞌtxꞌ, bꞌix ateꞌ tuq kabꞌeꞌ tkach naqe tkach moch. Per nyolin tuq [bꞌan kaw] iktzaꞌ jun matij semejante kan. 12 Bꞌix at tuq tajwalil tzan tkꞌulun twitz te junky matij txkup iktzaꞌ te aj junky tgan, bꞌix ntkꞌuluꞌ tuq tzan tqet xobꞌleꞌ tzan kyaqil twitz txꞌoꞌtxꞌ bꞌix tzan kyqet mejlet kyaqil xjal naꞌol te matij txkup aj obꞌantik te okꞌol tiꞌj twiꞌ. 13 Bꞌix nqet tuq tkꞌuluꞌ tiꞌchq yekꞌbꞌil aj bꞌan nkyelabꞌan kye xjal tiꞌj, komo nbꞌantik tuq tzan tqetz tin qꞌaqꞌ twitz kaꞌj kywitz kyaqil xjal. 14 Bꞌix tzan tpaj kyaqil aj yekꞌbꞌilni aj nbꞌantik tuq tukyꞌi nim tajwalil tzan tok ten te junky, ikxji eqet teqꞌiꞌ kyaqil xjal twitz txꞌoꞌtxꞌ bꞌix oxik tkꞌuluꞌ mandad kyetz tzan tqet kykꞌuluꞌ jun titzbꞌalil te aj tbꞌay txkup aj oqet okꞌonsaꞌb bꞌix obꞌantikky. 15 Oxik siꞌ tajwalil tzan txik tsiꞌ tanqꞌinc te titzbꞌalil te tbꞌay aj naqe txkupni, tzan tyolin te aj titzbꞌalilni, bꞌix tzan tkansan kyaqil aj nlay kyeqet mejlet naꞌol tetz. 16 Bꞌix ax otkꞌuluj tzan tok siꞌ jun techaꞌl tiꞌj kybꞌanqꞌabꞌ qatzun tajsik kywitz kyaqil xjal —kyaqil kye aj at nim kyajwalil bꞌix kye aj nyaꞌtx nim kyajwalil,* bꞌix kyaqil kye aj qꞌinon-eꞌ bꞌix kye aj mebꞌaꞌ, bꞌix kye aj mosimeꞌ bꞌix kye aj nyaꞌtx mosimeꞌ— [otkꞌuluj tzan tok siꞌ te techaꞌl kyiꞌj] 17 bꞌix nijunwt tuq bꞌaꞌn tzan tkꞌayin ni tzan tloqꞌon qa kꞌontiꞌl atok te techaꞌl aj telponx tiꞌj tbꞌi te [tbꞌay] matij txkup qatzun te tajlal tiꞌj tbꞌiji. 18 Ntons a tgan tzan tqet qbꞌisuꞌ tuj tumeꞌl tiꞌj ntzani. Abꞌlchaq kye aj bꞌaꞌn tzan tqet kybꞌisuꞌ tiꞌj ntzani, intjaw kyajlaꞌ alkyetz tajlal te aj matij txkupni, komo te nini tajlal jun xjal, bꞌix te ja tajlalni qaq oqal tukyꞌi qaqlajuj tuj mutxꞌ (666).