14
Te Kybꞌitz Kye Aj Oqal Tukyꞌi Kaj Tuj Oxqal Mil (144,000) Xjal Aj Tijajil Israel
1 Ntons oxik weꞌeꞌ Te Tal Moch waꞌlqet tuq twiꞌ te witz aj Sión [tbꞌi], bꞌix akyeqet tuq oqal mil tukyꞌi kaj tuj oxqal mil (144,000) xjal tukyꞌiꞌl, bꞌix tajsik kywitz nyolin tbꞌi tetz bꞌix tbꞌi Stat.* 2 Bꞌix oxik nchaꞌoꞌ nkyeyolin tuq tuj kaꞌj, bꞌix kywiꞌ iktzaꞌ twiꞌ jun nim aꞌ tibꞌx nxojin, iktzaꞌ jun ray bꞌan jwert, bꞌix iktzaꞌ kywiꞌ txqꞌan aj nkyebꞌitzan tukyꞌi arp. 3 Bꞌix kye aj nkyexik nchaꞌoꞌ, nxik tuq kybꞌitzaꞌ jun bꞌitz akꞌaꞌj twitz te twitꞌlel aj jaꞌ nkꞌulun mandad te [Qtata Dios] bꞌix kywitz kye kaj txkup [aj naꞌoyon te Qtata Dios] bꞌix kywitz kye [kaj tuj kawnaq (24)] tijxjal. Aꞌox kye aj oqal tukyꞌi kaj tuj oxqal mil (144,000) xjal aj ekoleta kxol kye aj akyeqet twitz txꞌoꞌtxꞌ, aꞌox kyetz bꞌaꞌn tuq tzan tel kynikyꞌ tiꞌj te bꞌitz. 4 Kye ja ntzanijeꞌ aꞌeꞌ kye aj kꞌontiꞌl ejoyon choj tukyꞌi xuj, kyetz tumeꞌl nkyebꞌet, bꞌix aꞌeꞌ kye ja ntzanijeꞌ aj lapikeꞌ tiꞌj Te Tal Moch jaꞌchq aj jaꞌ nkyꞌik. Kye ja ntzanijeꞌ aꞌeꞌ kye aj bꞌan tbꞌay ebꞌajkolet kxol kye xjal, tzan kyok te Qtata Dios bꞌix Te Tal Moch. 5 Bꞌix kyetz, kꞌontiꞌl owetz jun nikꞌbꞌil tuj ktziꞌ, kyetz kꞌontiꞌl jun tidiꞌ nyaꞌtx galan kyiꞌj.*
Te Tpakbꞌalil Aj Eqꞌiꞌ Tzan Kye Ox Angel Tzan Txik Kypakbꞌaꞌ Kxol Kyaqil Xjal Twitz Txꞌoꞌtxꞌ
6 Yaji oxik wen junky ángel nlipan twitz kaꞌj bꞌix eqꞌiꞌ tuq titzaꞌ te tpakbꞌalil galan aj kꞌontiꞌl nponaj bꞌix tetz tmandad tzan txik tswaꞌ te tpakbꞌalil kye kyaqil xjal twitz txꞌoꞌtxꞌ, kye kyaqil nasyon bꞌix kye kyaqil kyijajil xjal bꞌix tuj kyaqil kyyolx, bꞌix tuj kyaqil amaqꞌ. 7 Nxik tuq tpakbꞌaꞌ kongan ikxjani: “Intqet exobꞌleꞌ te Qtata Dios bꞌix intqet ejiqꞌbꞌaꞌ tzan tpaj maꞌtx pon te qꞌij tzan txik tsiꞌ xhchoꞌnal kyiꞌj kye aj at kyil. Peꞌeqet mejlet naꞌol tetz, te aj oqet kꞌulun te twitz kaꞌj bꞌix te twitz txꞌoꞌtxꞌ bꞌix te nim aꞌ bꞌix kyaqil kye soch.” 8 Yaji junky ángel owok lapetky tiꞌj, bꞌix oxik tqꞌumaꞌ ikxjani: “Maꞌtx qet, maꞌtx qet te nim amaqꞌ Babilony,* aj maꞌtx tkꞌuluj tzan kynikyꞌbꞌen kyaqil amaqꞌ te kykꞌajajbꞌen aj nkyetzeqtik tiꞌj iktzaꞌ tiꞌj te xhbꞌaꞌj.”b
9 Ntons yaji at tuq junky toxiꞌ ángel, owok lapet kyiꞌj kye tbꞌay, bꞌix ntyoliꞌ tuq ikxjani: “Qa at abꞌl aj oqtel tnaꞌoꞌ te matij txkup bꞌix tiꞌj titzbꞌalil, qatzun ma stzoqpij tzan tok siꞌ te techaꞌl tajsik twitz qatzun tiꞌj tqꞌabꞌji, 10 tetz ax owokel teꞌeꞌ tqꞌoj Qtata Dios,c oxeꞌl siꞌ jun nim xhchoꞌnal tiꞌj tukyꞌi qꞌaqꞌ tukyꞌi asupr,* oxeꞌl siꞌ xhchoꞌnal tiꞌj twitz Te Tal Moch bꞌix kywitz kye ángel aj pawameꞌ aꞌox te Qtata Dios. 11 Te jun-eleꞌx te tsibꞌal te xhchoꞌnal ojawel, bꞌix nlay kyeꞌojlan ni chijqꞌij ni qonikꞌan kyaqil kye aj nkyenaꞌon te matij txkup bꞌix te titzbꞌalil, bꞌix kyaqil kye aj atok te techaꞌl kyiꞌj.”*
12 Ntons, te ja ntzani a tgan tzan kyipan tukyꞌi nim kypasens kye aj pawameꞌ te Qtata Dios, kye aj nqet kyokslaꞌ Qtata Dios bꞌix kꞌontiꞌl nkaj ksiꞌ tzan tok witꞌlet kykꞌuꞌj tiꞌj Jesus. 13 Bꞌix oxik nchan tuj kaꞌj, ntzaj tuq qꞌumaꞌ wetz ikxjani: “Intqet atzꞌibꞌaꞌ ntzani: Ajnaꞌl galanx-alo kye aj okyekamel aj nkyeꞌokslan tiꞌj Qajaw.” Bꞌix kyi te Txew Dios ikxjani: “Bꞌanꞌax ikxji, tzan kyojlan tiꞌj kyaqil kyaqꞌumbꞌen, komo te kykꞌulbꞌen telponx titzaꞌ witꞌlik kykꞌuꞌj tiꞌj Qtata Dios.”
Te Xjal Aj Eqꞌiꞌ Tjobꞌil Triw Tuj Tqꞌabꞌ
14 Ntons, yaji wetz oxik wen jun muj bꞌan sjapun bꞌix tajsik te muj witꞌlik tuq jun xjal mer iktzaꞌ tijajil xjal* bꞌix atjax tuq tuj twiꞌ jun tkoron pur xtxꞌotxꞌal oro, bꞌix tuj tqꞌabꞌ jun jobꞌil triw ajun teꞌ. 15 Ntons owetz junky ángel tuj te jay aj nabꞌil Qtata Dios bꞌix oxik tqꞌumaꞌ kongan te aj atjax tuq tajsik muj, oxik tqꞌumaꞌ ikxjani: “Intjaw awin te ajobꞌil bꞌix pajoꞌon tzan tpaj maꞌtx tzꞌok kyꞌixkꞌoj te awalj twitz txꞌoꞌtxꞌ, bꞌix maꞌtx pon tyemp tzan tjaw.”* 16 Ya te aj witꞌlik tuq tajsik te muj, ojaw tin te tjobꞌil bꞌix okyꞌik tin tajsik te txꞌoꞌtxꞌ, bꞌix ojaw tkꞌupuꞌ te awalj.
Te Angel Aj Eqꞌiꞌ Jun Kꞌupbꞌil Lobꞌj Ub Tuj Tqꞌabꞌ
17 Ntons yaji, junky ángel owetz tuj te jay tuj kaꞌj aj nabꞌil Qtata Dios, bꞌix ax eqꞌiꞌ tuq titzaꞌ jun tkꞌupbꞌil ajun teꞌ. 18 Bꞌix tuj te pombꞌil [tuj te jay aj nabꞌil Qtata Dios], owetz junky ángel aj at tuq tajwalil tiꞌj te qꞌaqꞌ. Tetz oxik tqꞌolbꞌeꞌ te aj eqꞌiꞌ tuq te tkꞌupbꞌil aj ajun teꞌ, oxik tqꞌumaꞌ tetz ikxjani: “Intkyꞌik awin te akꞌupbꞌil tuj te awalj, bꞌix inkyel akꞌupuꞌ kyaqil te resim lobꞌj ub twitz txꞌoꞌtxꞌ tzan tpaj maꞌtx qꞌanxik.” 19 Ntons te ángel okyꞌik tin te tkꞌupbꞌil twitz txꞌoꞌtxꞌ bꞌix owel tkꞌupuꞌ kyaqil te resim lobꞌj ub, bꞌix oqex tsiꞌ tuj jun nim tqatel tzan tuq tetz yitzꞌlet. [Te ntzani telponx] owokel kyen xhchoꞌnal tuj tqꞌabꞌ Qtata Dios kye aj kꞌontiꞌl nkyeꞌokslan. 20 Te resim lobꞌj ub owetz yitzꞌoꞌ tuj te tqatel tiꞌjx te amaqꞌ, bꞌix tuj te tqatel owetz pur kyikꞌ,* ojakon max tjaqꞌ ktziꞌ kway, bꞌix nxik tbꞌeteꞌ tuq ox oqal (300) kilómetr.d