15
Kye Wuq Angel Aj Eqꞌiꞌ Kye Laq Kyitzaꞌ
1 Ntons owok jotoꞌ tuj nwitz junky seny tuj kaꞌj, bꞌan nim bꞌix chuktky, aj bꞌan nqolabꞌan tiꞌj. Oxik wen wuq ángel, bꞌix eqꞌiꞌ tuq kyitzaꞌ wuq txakl xhchoꞌnal bꞌan nim, bꞌix aꞌox kye ja txakl xhchoꞌnal ntzani aj okyꞌel masky bꞌix tukyꞌi te ntzani ojawetz tqꞌoj Qtata Dios. 2 Bꞌix ax oxik wen jun chqꞌaj iktzaꞌ xtxꞌotxꞌal pur kristal samoꞌ tukyꞌi qꞌaqꞌ, bꞌix waꞌlkeꞌ tuq tzi kye aj oqet kyitzaꞌ te matij txkup, aꞌeꞌ aj kꞌontiꞌl enaꞌon te titzbꞌalil bꞌix kꞌontiꞌl okykꞌamoj tzan tok siꞌ kyiꞌj te tajlal te tbꞌi, bꞌix eqꞌiꞌ tuq kyarp aj ojetq tuq xik siꞌ kyetz tzan Qtata Dios. 3 Kyetz nxik tuq kybꞌitzaꞌ jun bꞌitz aj oqet stzꞌibꞌaꞌ Moisés,* te Moisés aj qꞌapoꞌ tuq tibꞌ nꞌaqꞌunan tuq te Qtata Dios. Nxik tuq kybꞌitzaꞌ ikxjani tzan kynaꞌon [te aj nꞌok qꞌumaꞌ] Te Tal Moch: “Tata Dios. Yatz at mas nim awajwalil twitz kyaqil, kyaqil aj nqet akꞌuluꞌ bꞌan nim bꞌix nqolabꞌan tiꞌj. Kyaqil aj nchkꞌulun tumeꞌl bꞌix bꞌanꞌax. Yatz aꞌich te twitzaleꞌ kꞌulul mandad kyiꞌj kyaqil amaqꞌ. 4 ¿Abꞌl nlay qet xobꞌlen te yatz? ¿Abꞌl nlay qet jiqꞌbꞌan te yatz? Komo aꞌox yatz aꞌich bꞌan kꞌontiꞌl achoj. Bꞌix kyaqil xjal twitz txꞌoꞌtxꞌ okyeꞌulel awitz tzan kyqet mejlet naꞌol te yatz.* Bꞌix maꞌtx tzꞌok en kyaqil aj maꞌtx qet akꞌuluꞌ tukyꞌi akawbꞌil tuj aqꞌabꞌ.”
5 Ntons, ya ma kyꞌik kyaqil nini, yaji oxik wen tuj kaꞌj bꞌix ojaqet te jay tuj kaꞌj aj nabꞌil Qtata Dios, te jay tabernaculo [aj telponx tetz atqet kxol txjalil].* 6 Bꞌix eꞌetz tuj te jay wuq ángel aj eqꞌiꞌ tuq wuq txakl xhchoꞌnal kyitzaꞌ, atok tuq kyqꞌanaq xtxꞌotxꞌal lino, bꞌix bꞌan sjapun bꞌix bꞌan xhqitzꞌun, bꞌix atok tuq twitz kypech jun kykꞌalel pur xtxꞌotxꞌal oro [aj telponx tiꞌj kyajwalil]. 7 Jun te kykajil aj txkup [aj naꞌoyon te Qtata Dios] oxik tsiꞌ wuq ukꞌbꞌil kye wuq ángel. Per kye ukꞌbꞌil nojnaq tuq tuj pur tukyꞌi xhchoꞌnal aj oxeꞌl tsiꞌ te Qtata Dios tzan tqꞌoj [kyiꞌj kye aj tajqꞌoj], te Qtata Dios aj itzꞌoj te jun-eleꞌx. 8 Bꞌix ajun sibꞌ onoj tuj te jay tzan tpaj xhchqitzꞌunal bꞌix bꞌan nim tajwalil, bꞌix nijunwt xjal bꞌaꞌn tuq tzan tox txini* max oj tmankun kye wuq xhchoꞌnal aj ntzaj siꞌ tuq tzan kye wuq ángel.