16
1 Ntons yaji oxik nchan tuj te jay aj nabꞌil Qtata Dios tuj kaꞌj nxik tuq qꞌumaꞌ kyukyꞌi kye wuq ángel ikxjani: “Pex waq qoꞌol kye wuq ukꞌbꞌil kyajsik [kye xjal] twitz txꞌoꞌtxꞌ aj telponx owokel esiꞌ kyiꞌj kye wuq xhchoꞌnal bꞌan nim tzan tpaj tqꞌoj Qtata Dios.”a
2 Ntons yaji oxik te tbꞌay ángel bꞌix oxik tswaꞌ te tbꞌay xhchoꞌnal bꞌan nim kyajsik [kye xjal] twitz txꞌoꞌtxꞌ,b bꞌix owok kyiꞌj kye aj atok tuq kyiꞌj te techaꞌl te matij txkup, aꞌeꞌ aj nkyeqet mejlet naꞌol te titzbꞌalil, ojaw kanet txꞌaꞌk kyiꞌj,* bꞌix kꞌontiꞌl tuq tremeyul bꞌix ajun taqꞌikal.
3 Ntons yaji te tkabꞌiꞌ ángel oxik tswaꞌ te tkabꞌiꞌ xhchoꞌnal bꞌan nim tzan tok te nim aꞌ pur kyikꞌ, per naqe xhchikyꞌel jun kamnaq, bꞌix ebꞌajkamik kyaqil tidiꞌchq aj nkyeꞌanqꞌin tzi.
4 Ntons yaji te toxiꞌ ángel oxik tswaꞌ te toxiꞌ xhchoꞌnal bꞌan nim tzan kyok kye aꞌ bꞌix kye soch pur kyikꞌ.*
5 Yaji oxik nchan te ángel aj [nꞌeꞌen] kye aꞌ twitz txꞌoꞌtxꞌ, ntyoliꞌ tuq ikxjani: “Yatz aj bꞌan kꞌontiꞌl achoj, yatz aj atichqet kixiꞌ bꞌix atichqet tuq, yatz at akawbꞌil tuj aqꞌabꞌ tzan tpaj maꞌtx kyexik asiꞌ tuj il [kye aj xjalni]. 6 Komo kyetz ebꞌajqet kykansaꞌ kye aj pawameꞌ tuq te yatz bꞌix kye aj yolil ayol, per ajnaꞌl maꞌtx xik asiꞌ kyikꞌ te kyukꞌaꞌ, bꞌix te nini nkyajoꞌ.” 7 Bꞌix oxik nchan twiꞌ junky otzaj yolin tuj te pombꞌil ikxjani: “Bꞌanꞌax ikxji Tat, yatz mas nim awajwalil twitz kyaqil, yatz tukyꞌi tumeꞌl bꞌix tukyꞌi akawbꞌil tuj aqꞌabꞌ [nkyexik apoqoꞌ kye aj at kchoj].”
8 Ntons yaji te tkajiꞌ ángel oxik tswaꞌ twitz te qꞌij te tkajiꞌ xhchoꞌnal bꞌan nim, bꞌix [te Qtata Dios otkꞌuluj] tzan kyqet tzꞌeꞌsaꞌ kye xjal tzan te qꞌij.c 9 Bꞌix kye xjal eqetbꞌaj xuliꞌ, bꞌix eyolin yol bꞌan nyaꞌtx galan tiꞌj Qtata Dios aj at tajwalil tiꞌj kyaqil ja xhchoꞌnalni, bꞌix kꞌontiꞌl ojaw kkyꞌixpuꞌ kynabꞌlin tzan tqet kyjiqꞌbꞌaꞌ te tetz.
10 Ntons yaji te tjwebꞌiꞌ ángel oxik tswaꞌ te tjwebꞌiꞌ xhchoꞌnal bꞌan nim tajsik te aj matij txkup tuj twitꞌlel aj jaꞌ nkꞌulun mandad. Yaji tuj kyaqil tkwentil aj jaꞌ nkꞌulun mandad tuq owok bꞌan qlolj.* Kye xjal nqet tuq bꞌaj ktxꞌaꞌoꞌ kyaqꞌ tzan xhchoꞌnal, 11 bꞌix eyolin yol bꞌan nyaꞌtx galan tiꞌj Qtata Dios aj tuj kaꞌj tzan tpaj te xhchoꞌnal aj nꞌok kyen tuq bꞌix tzan tpaj te ktxꞌaꞌak kyiꞌj, bꞌix kꞌontiꞌl ojaw kkyꞌixpuꞌ kynabꞌlin.
12 Ntons yaji te tqaqiꞌ ángel oxik tswaꞌ te tqaqiꞌ xhchoꞌnal bꞌan nim tzan tqex kyꞌixwik te chman aꞌ aj tbꞌi Eufrátes,* tzan kkyꞌik kye twitzaleꞌ kꞌulul mandad [kyukyꞌi kye ksoldad], aꞌeꞌ aj tzajnaqeꞌ tuq aj jaꞌ njakul qꞌij. 13 Yaji oxik wen eꞌetz tuj stziꞌ te matij semejante kan, bꞌix tuj stziꞌ te matij txkup, bꞌix tuj stziꞌ te junky naqe txkup aj nyaꞌtx bꞌanꞌax yolin, eꞌetz tuj ktziꞌ kyetz ox malspirit naqe kyekaꞌyin xtxꞌoꞌ. 14 Komo kye ntzani malspirit aj bꞌaꞌn tuq tzan kykꞌulun seny tukyꞌi nim kyajwalil, ikjaꞌn kxik chimol kyaqil kye twitzaleꞌ kꞌulul mandad twitz txꞌoꞌtxꞌ [kyukyꞌi kye ksoldad] tzan kyqꞌojin tiꞌj Qtata Dios tuj aj qꞌij aj okyexeꞌl tsiꞌ tuj il te Qtata Dios kye xjal aj nyaꞌtx galan, per te Qtata Dios mas nim tajwalil twitz kyaqil.
15 (“Tzaj eten” [ntqꞌumaꞌ te Qajaw]. “Wetz kyinpon iktzaꞌ jun eleqꞌ.* Galanx-alo te aj atok tnabꞌl, bꞌix atok tqꞌanaq tzan kꞌon tex sqit bꞌix tzan kꞌon tqet kyꞌixwik oj tkyꞌik kyaqil ntzani.”) 16 Bꞌix [kye aj ox malspiritni] eꞌok kchimoꞌ kyaqil kye twitzaleꞌ kꞌulul mandad [kyukyꞌi kye ksoldad] tuj te luwar aj tbꞌi tuj te yol ebrey “Armagedon.”d
17 Ntons yaji te twuqiꞌ ángel oxik tswaꞌ te twuqiꞌ xhchoꞌnal aj bꞌan nim tuj kyaqꞌiqꞌ. Bꞌix yaji tuj te jay aj nabꞌil Qtata Dios, mer tuj te twitꞌlel Qtat aj jaꞌ nkꞌulun mandad, oxik nchan twiꞌ [te Qtata Dios] otzaj tyoliꞌ ikxjani: “Ajnaꞌl maꞌtx bꞌantik.”* 18 Ntons ajun xhlikyꞌlikaꞌj otzaj, bꞌix ajun kywiꞌ xjal txik chaꞌon tuq, bꞌix ajun ray tuq, bꞌix otzaj jun kabꞌjunabꞌ mas bꞌan jwert twitz kye txqꞌanky kabꞌjunabꞌ aj oje kyꞌik atx aj kyten kye xjal twitz txꞌoꞌtxꞌ.* 19 Te nim amaqꞌ oqet pax, owel oxe pedas, bꞌix kye amaqꞌ tuj kyaqil twitz txꞌoꞌtxꞌ ebꞌajqet xitan. Yatzun te Qtata Dios kꞌontiꞌl owajnaj tiꞌj tkꞌuꞌj te nim amaqꞌ aj Babilony, otzaj nim tqꞌoj tiꞌj bꞌix oxik tsiꞌ jun xhchoꞌnal bꞌan nim.e 20 Kyaqil txꞌoꞌtxꞌ tuj te nim aꞌ bꞌix kyaqil witz ebꞌajqetnaj,* 21 bꞌix otzaj twitz kaꞌj kyajsik kye xjal jun saqsbꞌaqon jun kintalchaq talal. Bꞌix kye xjal ebꞌajyolin yol bꞌan nyaꞌtx galan tiꞌj Qtata Dios tzan tpaj te aj saqsbꞌaqonni jun xhchoꞌnal bꞌan nim.*