17
Aj Txik Siꞌ Tuj Il Te Amaqꞌ Babilony
1 Ntons jun kxol kye wuq ángel aj eqꞌiꞌ tuq kyitzaꞌ kye wuq ukꞌbꞌil,* otzaj tyoliꞌ wetz ikxjani: “Qalan tzani. Oxeꞌl nyekꞌuꞌ titzaꞌ oxeꞌl siꞌ tuj il te xuj aj nkyeqet teqꞌiꞌ xjal,a te xuj [aj telponx tiꞌj jun amaqꞌ]* aj atqet jaꞌ ateꞌ kyꞌilaꞌj aꞌ. 2 Kyaqil kye kywitzaleꞌ kꞌulul mandad twitz txꞌoꞌtxꞌ oxik ksamoꞌ kyibꞌ tukyꞌiꞌl,b bꞌix ax kyaqil xjal twitz txꞌoꞌtxꞌ okynikyꞌbꞌej [te aj nxik tsuquꞌ kyukyꞌiꞌl] aj iktzaꞌ jun xhbꞌaꞌj aj nchoꞌon kywiꞌ titzaꞌ.”c
3 Yaji inxik tin* te Txew Dios tuj jun luwar bꞌan kyꞌixkꞌoj txꞌoꞌtxꞌ aj jaꞌ kꞌontiꞌl najayon. Bꞌix oxik wen jun xuj witꞌlijax tajsik jun txkup kyaqtiꞌj, bꞌix tiꞌj te txkup tzꞌibꞌaꞌ tuq tiꞌj pur yol bꞌan nyaꞌtx galan tiꞌj Qtata Dios, bꞌix ateꞌ tuq wuq twiꞌ bꞌix lajuj tkach.* 4 Te xuj atok tuq tqꞌanaq morad tebꞌl bꞌix kyaq, bꞌix bꞌan txakuꞌ tuq tukyꞌi oro bꞌix tukyꞌi tal abꞌj bꞌan tbꞌanil bꞌix uwj perla bꞌan tbꞌanil. Bꞌix eqꞌiꞌ tuq tuj tqꞌabꞌ jun ukꞌbꞌil xtxꞌotxꞌal oro bꞌix te aj atqex tuq tuj telponx te tkꞌajajbꞌen bꞌix kyaqil tkꞌulbꞌen aj ajqꞌojaꞌ twitz tzan Qtata Dios. 5 Bꞌix tzꞌibꞌaꞌ tuq tajsik twitz jun tbꞌi chuktky, bꞌix nyolin ikxjani: Babilony Aj Nim [Amaqꞌ], Kyamaqꞌ Kye Aj Nkyexnaqꞌtzan Te Kꞌajajbꞌilj Bꞌix Kyaqil Aj Ajqꞌojaꞌ Twitz Tzan Qtata Dios. 6 Bꞌix te xuj kꞌontiꞌl ntnabꞌe tuq tibꞌ tzan tpaj tkansbꞌend kyꞌilaꞌj xjal aj pawameꞌ te Qtata Dios bꞌix nkyepakbꞌan tuq tiꞌj Jesus. Bꞌix wetz bꞌan nkyinlabꞌan tuq nim tiꞌj kyaqil ntzani.
7 Ntons yaji, te ángel otzaj tqꞌumaꞌ wetz ikxjani: “¿Tistil bꞌan nchlabꞌan? Wetz oxeꞌl nqꞌumaꞌ tidiꞌ telponx tiꞌj te xuj bꞌix tiꞌj te aj matij txkup iqal tetz, aj wuq twiꞌni bꞌix lajuj tkach. 8 Te aj txkup maꞌtx xik awenni, tetznini [jun xjal] aj atqet tuq per ya kꞌontiꞌl sinoke ikjaꞌn tjatz tuj te jul aj kꞌontiꞌl txeꞌ bꞌix cha swal tkamiky tzul.* Bꞌix kye aj nkyenajan twitz txꞌoꞌtxꞌ aj kꞌontiꞌl tzꞌibꞌanqex kybꞌi tuj te uꞌj te qanqꞌin* atx aj tkajlen kꞌuluꞌ te twitz txꞌoꞌtxꞌ, kyetz okyelabꞌayon oj tok kyen te aj naqe txkup aj atqet tuq bꞌix ajnaꞌl ya kꞌontiꞌl per tzul junkyꞌelky. 9 Tiꞌj te ntzani a tgan tzan qbꞌisun tuj tumeꞌl. Kye aj wuq twiꞌni telponx kyiꞌj wuq witz aj jaꞌ witꞌlik te xujni, bꞌix ax telponx kyiꞌj wuq twitzaleꞌ kꞌulul mandad. 10 Bꞌix jwebꞌ kxol kye ja twitzaleꞌ kꞌulul mandadni oje kyekamik, bꞌix jun nkꞌulun mandad ajnaꞌl, bꞌix te junky minaꞌ tjakon tuj twitꞌlel jaꞌ okꞌuluyon mandad, per ya oj tjakon te aj tmankbꞌil, nlay ten nim tuj. 11 Yatzun te aj naqe txkup aj atqet tuq oqtxiꞌ per ajnaꞌl kꞌontiꞌl, a tetz owokel te twajxaqiꞌ [twitzaleꞌ kꞌulul mandad]; tetz jun te kywuqil bꞌix ikjaꞌn txik tzan tponajsaꞌ bꞌeyx te jun-eleꞌx. 12 Yatzun kye aj lajuj kachni, telponx lajuj twitzaleꞌ kꞌulul mandad aj minaꞌ kykꞌamon kyajwalil tzan kykꞌulun mandad, per okykꞌamoꞌtz kyajwalil cha jun rat junx tukyꞌi te aj txkupni.* 13 Kye ja lajuj kꞌulul mandadni, kyetz dyakwerd ateꞌ tzan tkaj ksiꞌ kyaqil kyajwalil tuj tqꞌabꞌ te [xjal aj naqe jun] matij txkup, bꞌix ax kyaqil aj jaꞌ nkyekꞌulun mandad tuq. 14 Okyeqꞌojiyon tiꞌj [te aj nꞌok qꞌumaꞌ] Te Tal Moch per okyeqtel titzaꞌ tzan tpaj tetz aji te Kyajawil Kyiꞌj Kyaqil Kye Aj At Nim Kyajwalil, bꞌix ax a tetz te Twitzaleꞌ Kꞌulul Mandad Kyiꞌj Kyaqil Kywitzaleꞌ Kꞌulul Mandad.* Bꞌix kye aj ajuneꞌ tukyꞌiꞌl, kyetz aꞌeꞌ kye aj ukꞌlemeꞌ titzaꞌ, bꞌix joyomeꞌ titzaꞌ bꞌix kꞌontiꞌl nkaj ksiꞌ tzan kyokslan tiꞌj.” 15 Bꞌix te ángel otzaj tqꞌumaꞌ junkyꞌel wetz ikxjani: “Kye kyꞌilaꞌj aꞌ aj ma xik awen aj jaꞌ witꞌliqet te xuj aj nkyeqet teqꞌiꞌ kye amaqꞌ, kye aj kyꞌilaꞌj aꞌni telponx kye [kyaqil] amaqꞌ bꞌix bꞌuchꞌuj xjal bꞌix nasyon bꞌix [xjal aj nkyeyolin kyaqil] yol. 16 Bꞌix kye lajuj twitzaleꞌ kꞌulul mandad bꞌix te matij txkupni, owokel kyajqꞌojaꞌ te xuj [aj telponx tiꞌj te amaqꞌ Babilony] aj nkyeqet teqꞌiꞌ txqꞌanky, bꞌix okajel ksiꞌ bꞌan takun, owelal kyin kyaqil tidiꞌ tzi bꞌix okajelbꞌaj kxituꞌ bꞌix owokel ksiꞌ tqꞌaqꞌbꞌel.e 17 Komo te Qtata Dios oqex tsiꞌ tuj kyanim aj tgan tetz tzan kykꞌulun, tzan kyten dyakwerd tzan txik kyqꞌapoꞌ kyajwalil tuj tqꞌabꞌ te aj matij txkup, max chaꞌoj tkanonkix iktzaꞌ maꞌtx tqꞌumaj Qtata Dios. 18 Te xuj aj maꞌtx xik awenni, telponx te aj matij amaqꞌ aj nkꞌulun mandad kyiꞌj kye twitzaleꞌ kꞌulul mandad twitz txꞌoꞌtxꞌ.”