18
Aj Tponaj Te Amaqꞌ Babilony
1 Ntons, ya ma kyꞌik kyaqil nini, yaji oxik wen junky ángel ikjaꞌn tuq tqetz tuj kaꞌj bꞌix nim tuq tajwalil, bꞌix kyaqil te twitz txꞌoꞌtxꞌ okaj bꞌan xhkꞌatun tzan tpaj xhchqitzꞌunal. 2 Bꞌix oxik tqꞌumaꞌ kongan ikxjani: “Maꞌtx ponaj, maꞌtx ponaj te aj nim amaqꞌ Babilony, bꞌix maꞌtx tzꞌok kyjay malspirit, maꞌtx tzꞌok kyjay kyaqil txakl malspirit, bꞌix kyjay kyaqil txakl pichꞌ aj nyaꞌtx galan-eꞌ bꞌix bꞌan qusqujeꞌ.* 3 Komo kyaqil nasyon twitz txꞌoꞌtxꞌ maꞌtx kynikyꞌbꞌej te kykꞌajajbꞌen kye aj amaqꞌni, te kykꞌajajbꞌen aj nkyetzeqtik tiꞌj iktzaꞌ tiꞌj te xhbꞌaꞌj.a Bꞌix kyaqil kye twitzaleꞌ kꞌulul mandad twitz txꞌoꞌtxꞌ maꞌtx xik ksamoꞌ kyibꞌ kyukyꞌiꞌl,b bꞌix kyaqil kye xkꞌaꞌmon twitz txꞌoꞌtxꞌ maꞌtx kyeꞌok qꞌinon tzan tpaj titzaꞌ kye aj amaqꞌji nkyetzeqtik tiꞌj kyqꞌinomal.”
4 Ntons oxik nchan twiꞌ jun xjal nyolin tuq tuj kaꞌj ikxjani: “Etetz waq aj aꞌix nxjalil, peꞌetetz waq kxol kye aj amaqꞌ niꞌn* tzan kꞌon txik esamoꞌ etibꞌ kxol tuj aj kchojni, tzan kꞌon tkyꞌik etiꞌj aj xhchoꞌnal bꞌan nim aj okyꞌel kyiꞌj kyetz. 5 Komo maꞌtx chꞌuqjik kchoj, maꞌtx jakon max twitz kaꞌj,* bꞌix Qtata Dios maꞌtx qet tbꞌisuꞌ tiꞌj kyaqil aj nyaꞌtx galan maꞌtx kykꞌuluj. 6 Intqet kꞌuluꞌ kyukyꞌiꞌl iktzaꞌx maꞌtx kykꞌuluj kyetz kyukyꞌi txqꞌanky. Intel kchojoꞌ kabꞌeꞌ-el iktzaꞌx maꞌtx kykꞌuluj.* Intel kchojoꞌ kabꞌeꞌ-el mas nim xhchoꞌnal twitz te aj oxik ksiꞌ kyetz kye txqꞌanky.c 7 Intxik siꞌ jun nim xhchoꞌnal kyiꞌj bꞌix intok kyen twitz oqꞌel bꞌan nim iktzaꞌx kyetz maꞌtx qet kyjiqꞌbꞌaꞌ kyibꞌ bꞌix iktzaꞌx kyaqil aj maꞌtx tzꞌel kyganiꞌ. Komo nkyqꞌumaꞌ tuq tuj kyanim ikxjani: “Qetz galan atoꞌ, nqokꞌulun mandad tukyꞌi nim qajwalil, qetz nyaꞌtx iktzaꞌ byud aꞌoꞌ, nlay tzꞌok qen twitz oqꞌel.” 8 Astilji bꞌeyx cha tuj jun qꞌij, oqtel kyajsik kyetz tidiꞌchq xhchoꞌnal bꞌix kamikyj bꞌix bꞌis bꞌix waꞌij, bꞌix owokel siꞌ kyqꞌaqꞌbꞌel tzan tpaj te Qtata Dios at tajwalil tuj tqꞌabꞌ tzan txik tpoqoꞌ kyetz.”*
9 Ntons kye kywitzaleꞌ kꞌulul mandad twitz txꞌoꞌtxꞌ aj oxik ksamoꞌ kyibꞌ [kyukyꞌi kye aj amaqꞌ Babilony],d bꞌix aj eꞌok qꞌinon tzan tpaj aj amaqꞌji, kyetz owokel jun bꞌis tuj kyanim bꞌix okyeꞌoqꞌel oj txik kyen tsibꞌal oj tok tqꞌaqꞌbꞌel. 10 Cha okyekajel kaꞌyin laqꞌchik tzan kxobꞌal tiꞌj te aj xhchoꞌnal. Oxeꞌl kyqꞌumaꞌ ikxjani: “¡Last! ¡Last te nim amaqꞌ Babilony! Per cha tuj jun rate stzaj jun nim xhchoꞌnal tajsik.”* 11 Bꞌix ax kye xkꞌaꞌmon twitz txꞌoꞌtxꞌ ax okyeꞌoqꞌel bꞌix owokel jun bꞌis tuj kyanim, tzan tpaj ya kꞌontiꞌl abꞌl oloqꞌoyon te kykꞌayjel, 12 te kykꞌayjel aj oro, plata, tal abꞌj aj bꞌan tbꞌanil txik kaꞌyin bꞌix kar, bꞌix perla, xqꞌapj lino [aj bꞌan tzꞌuꞌin], xqꞌapj [kar] aj púrpura tebꞌl, xqꞌapj seda [aj bꞌan tbꞌanil], xqꞌapj [kar] aj kyaq tebꞌl, bꞌix kyaqil [tbꞌanil] tzꞌalam aj at tkꞌokꞌjal, bꞌix tiꞌchq [bꞌan tbꞌanil] aj xtxꞌotxꞌal marfil, bꞌix tiꞌchq kꞌulumaj tukyꞌi tzꞌalam [aj kar], bꞌix tukyꞌi brons, bꞌix tukyꞌi kꞌuxbꞌil, bꞌix tukyꞌi mármol, 13 ax kykꞌayjel canela, bꞌix tiꞌchq tkꞌokꞌjal wabꞌj, bꞌix te pom, remeyj, bꞌix tiꞌchq tkꞌokꞌjal, bꞌix taꞌal ub, bꞌix aseyt, arin, triw, bꞌix aloꞌmj, karner, kway, karret, bꞌix ax nxik kykꞌayiꞌ xjal aj mosimeꞌ kyitzaꞌ, qa kchiꞌjel qatzun kyanimji 14 [Bꞌix kyekyitel tiꞌj te nim amaqꞌ ikxjani]: “Ajnaꞌl bꞌeyx te jun-eleꞌx maꞌtx ponaj te kyqꞌinomal kye aj amaqꞌni bꞌix kyaqil aj nꞌel tuq kyganiꞌ, ya nlay tzꞌok ikxji junkyꞌelky.” 15 Bꞌix ax kye aj nkyexkꞌaꞌman tukyꞌi tidiꞌchq, kyetz aj eꞌok qꞌinon tzan tpaj aj amaqꞌji, kyetz cha okyekajel kaꞌyin laqꞌchik tzan kxobꞌal tiꞌj te xhchoꞌnal aj nkyꞌik tuj te amaqꞌ, okyeꞌoqꞌel bꞌix owokel jun bꞌis tuj kyanim bꞌix oxeꞌl kyqꞌumaꞌ ikxjani: 16 “¡Last! ¡Last! Te aj nim amaqꞌni, bꞌan nxmakalin tuq bꞌix txini pur xqꞌapj xtxꞌotxꞌal lino [bꞌan tzꞌuꞌin], xqꞌapj [kar] aj púrpura [tebꞌl], xqꞌapj aj kyaq tebꞌl, bꞌix bꞌan txakuꞌ tuq tukyꞌi xtxꞌotxꞌal oro, bꞌix tukyꞌi tal abꞌj aj bꞌan tbꞌanil txik kaꞌyin bꞌix kar, bꞌix tukyꞌi perlas. 17 Per cha tuj jun rat maꞌtx mankun kyaqil te kyqꞌinomal kyetz txini.” Bꞌix ntons ax kyaqil chofer kye bark bꞌix kyaqil kye aj nkyebꞌet tuj aꞌ, bꞌix kye aqꞌunon tuj bark bꞌix kyaqil kye aj at kyaqꞌun tzan tpaj te nim aꞌ, kyaqil kyetz cha ebꞌajkaj kaꞌyin laqꞌchik. 18 Bꞌix aj txik kyeꞌeꞌ te tsibꞌal aj nꞌok tuq tqꞌaqꞌbꞌel te amaqꞌ, nkyewayun tuq, nxik kyqꞌumaꞌ tuq ikxjani: “¿Alkyetz junky amaqꞌ iktzaꞌ tuq ja chman amaqꞌni?” 19 Ntons [tzan tpaj kybꞌis] njax tuq kypuquꞌ quq tuj kywiꞌ, bꞌix nkyeꞌoqꞌ bꞌix ntzaj tuq kynaꞌon tetz, nxik kyqꞌumaꞌ tuq ikxjani kongan: “¡Last! Last te ja nim amaqꞌni, komo tzan tpaj kyaqil kyqꞌinomal kyetz txini, eꞌok qꞌinon kyaqil kye tajaw bark. ¡Bꞌix cha tuj jun rat maꞌtx kaj takun, maꞌtx ponaj! 20 Yatzun etetz aj atikxjax tuj kaꞌj bꞌix etetz aj pawamix te Qtata Dios bꞌix etetz aj tkyꞌixel Jesus aꞌix bꞌix etetz aj yolil tyol Dios aꞌix, peꞌechalaj tiꞌj ja amaqꞌni tzan tpaj te Qtata Dios maꞌtx tkꞌuluj tumeꞌl etukyꞌiꞌl aj xtxik tsiꞌ tuj il ja amaqꞌni.”*
21 Ntons yaji jun ángel bꞌan nim tbalor ojaw tin jun chman abꞌj naqe jun semejante kaꞌ. Oxik txon tukyꞌi nim tqꞌoj tuj te nim aꞌ, bꞌix oxik tqꞌumaꞌ ikxjani: “Ikxjani oxeꞌl xon kongan tjaqꞌ aꞌ te nim amaqꞌ Babilony, bꞌix ya nlay tzꞌok eꞌeꞌtky junkyꞌel.* 22 Bꞌix ya nlay tzꞌok chaꞌoꞌ txini twiꞌ arp ni twiꞌ xux ni twiꞌ trompet,* ya nlay kyeꞌoknoj txini aqꞌunon aj bꞌaꞌn kyekꞌulun tidiꞌchq tbꞌanil, bꞌix ya nlay xik chaꞌoꞌ twiꞌ jun kaꞌ kyebꞌil triw. 23 Ya nlay qꞌanalin jun qꞌanalbꞌil txini, bꞌix ya nlay xik chaꞌoꞌ jun pyest tzan tpaj maꞌtx tzꞌok junan jun abꞌl.* Anke kye aj nkyexkꞌaꞌman tuq tuj ja amaqꞌni aꞌeꞌ tuq kye aj at nim kyajwalil bꞌix nim kyqꞌinomal, per tzan tpaj te chmanbꞌil tuj aj amaqꞌni, eqet eqꞌiꞌ kyaqil nasyon twitz txꞌoꞌtxꞌ. 24 Kye xjal aj ja amaqꞌni eqet kykansaꞌf kye aj yolil tyol Dios bꞌix kye [txqꞌanky] aj pawameꞌ te Qtata Dios bꞌix kyaqil aj oje kyeqet kansaꞌ twitz txꞌoꞌtxꞌ.”*