19
Oj Kyqꞌijlan Kyꞌilaꞌj Xjal Tuj Kaꞌj
1 Ntons, ya ma kyꞌik kyaqil nini, yaji oxik nchaꞌoꞌ kywiꞌ kyꞌilaꞌj xjal nkyeyolin tuq tuj kaꞌj kongan ikxjani: “¡Qkyaqil qobꞌajnaꞌon te Qtata Dios!a A tetz te Koloyon qiꞌj, a tetz te bꞌan nim tajwalil, a tetz te aj atqet kyaqil tuj tqꞌabꞌ. 2 Komo tetz at tkawbꞌil tuj tqꞌabꞌ bꞌix tuj tumeꞌl nkyexik tsiꞌ tuj il, bꞌix maꞌtx xik tpoqoꞌ kye aꞌeꞌ aj amaqꞌ* aj nqet kyeqꞌiꞌ kyaqil xjal twitz txꞌoꞌtxꞌ tzan tox ksamoꞌ kyibꞌ kyukyꞌiꞌl.b Bꞌix maꞌtx tkꞌuluj te Qtata Dios tzan telbꞌaj kchojoꞌ kykamikyc kye aj qꞌapoꞌ kyibꞌ nkyeꞌaqꞌunan tuq te tetz.”
3 Yaji oxik kyqꞌumaꞌ junkyꞌel ikxjani: “¡Qkyaqil qobꞌajnaꞌon te Qtata Dios! ¡Te tsibꞌal aj amaqꞌni nlay kaj tzan xhchꞌuqin!”*
4 Kye kaj tuj kawnaq (24) tijxjal bꞌix kye kaj txkup [aj naꞌoyon te Qtata Dios] eqet mejlet tukyꞌi tajsik kywitz twitz txꞌoꞌtxꞌ bꞌix enaꞌon tiꞌj Qtata Dios aj witꞌlik tuq tuj twitꞌlel aj jaꞌ nkꞌulun mandad, nkyqꞌumaꞌ tuq ikxjani: “Intkyꞌikxwit ikxji. ¡Qkyaqil qobꞌajnaꞌon Qtata Dios!”d 5 Ntons tuj twitꞌlel oxik chaꞌoꞌ twiꞌ jun xjal aj ntqꞌumaꞌ tuq ikxjani: “Peꞌenaꞌon waq te Qtata Dios, ekyaqil etetz aj qꞌapoꞌ etibꞌ nkxꞌaqꞌunan te tetz, bꞌix nqet etokslaꞌ, ekyaqil etetz qa kꞌontiꞌl etajwalil qatzun aj at nim etajwalilji.”*
6 Bꞌix oxik nchan junkyꞌel kywiꞌ kyꞌilaꞌj xjal aj nkyeyolin iktzaꞌ jun nim aꞌ nxojin ntrenun bꞌix iktzaꞌ ray bꞌan jwert ntrenun.* Nkyqꞌumaꞌ tuq ikxjani: “¡Qkyaqil qobꞌajnaꞌon te Qtata Dios!e Te Qajaw a te Qtata Dios aj nkꞌulun mandad per tukyꞌi mas nim tajwalil kywitz kyaqil. 7 Qobꞌajchalaj waq, bꞌix qobꞌajchalajsan bꞌix intqet qjiqꞌbꞌaꞌ te Qtata Dios bꞌix tzan tpaj maꞌtx pon or tzan qten junx tukyꞌi [te aj nꞌok qꞌumaꞌ] Te Tal Moch qetz aꞌoꞌ iktzaꞌ te “Txuꞌjel” bꞌix list atoꞌ. 8 Maꞌtx stzꞌok siꞌ jun jqꞌanaq xtxꞌotxꞌal lino bꞌan tzꞌuꞌin bꞌix bꞌan sjapun.” (Komo te aj lino telponx kye kykꞌulbꞌen tuj tumeꞌl kye aj pawameꞌ te Qtata Dios.)
9 Te ángel otzaj tqꞌumaꞌ junkyꞌel wetz ikxjani: “Intqet atzꞌibꞌaꞌ ikxjani: Galanx-alo kye aj maꞌtx kyetzaj ukꞌleꞌ tzan kyqꞌijlan oj tok junan [te aj nꞌok qꞌumaꞌ] Te Tal Moch.” Bꞌix oxik tqꞌumaꞌky ikxjani: “Te ja ntzani bꞌanꞌax Tyol Qtata Dios.” 10 Ntons inqet mejlet tuq txeꞌ toq tzan nnaꞌon tetz, per tetz otzaj tqꞌumaꞌ wetz ikxjani: “Kꞌon akꞌuluj ikxji. Wetz aꞌin ax qꞌapoꞌ wibꞌ nkyinꞌaqꞌunan te Qtata Dios iktzaꞌ yatz bꞌix iktzaꞌ kye txqꞌanky awerman aj kꞌontiꞌl nkaj ksiꞌ tzan txik kypakbꞌaꞌ te bꞌanꞌax tiꞌj Jesus. Aꞌox Qtata Dios bꞌaꞌn tzan anaꞌon. Komo te Txew tgan tzan qpakbꞌan te bꞌanꞌax tiꞌj Jesus.”*
Aj Kyqet Tzan Te Qajaw Kye Tajqꞌoj
11 Bꞌix yaji oxik wenky te kaꞌj jaqoꞌ, bꞌix oxik wen jun kway saqtiꞌj bꞌix te aj iqaꞌ tuq titzaꞌ nꞌok qꞌumaꞌ “Te Aj Kꞌontiꞌl Nkaj Tsiꞌ Te Galan” bꞌix ax nꞌok qꞌumaꞌ “Te Aj Jun Yolin,” bꞌix tetz tukyꞌi tkawbꞌil tuj tqꞌabꞌ nkyexik tpoqoꞌ kye xjal, bꞌix ax tukyꞌi tkawbꞌil tuj tqꞌabꞌ nqꞌojin kyiꞌj kye tajqꞌoj. 12 Kye tbꞌaqꞌ twitz naqe toq qꞌaqꞌ,* bꞌix akyejax tuj twiꞌ kyꞌilaꞌj tal tkoron, bꞌix tzꞌibꞌan-ok tuq jun tbꞌi aj nijunwt nꞌel tnikyꞌ tiꞌj sinoke aꞌox tetz, 13 bꞌix atok tuq tqꞌanaq bꞌan ajun tuq kyikꞌ tiꞌj, bꞌix tetz tbꞌi “Te Tyol Qtata Dios,” 14 bꞌix lapikeꞌ tuq tiꞌj kye qꞌojiyon aj tuj kaꞌj, bꞌix atok kyqꞌanaq xtxꞌotxꞌal lino bꞌan tzꞌuꞌin, saq tebꞌl bꞌix bꞌan sjapun,* bꞌix iqameꞌ tuq tzan kway pur saqtiꞌj. 15 Nyolin tukyꞌi yol naqe nqꞌojin tukyꞌi jun tmachit aj tqꞌojbꞌil, bꞌan ajun teꞌ, bꞌix okyetokꞌonsaꞌtz kyaqil nasyon twitz txꞌoꞌtxꞌ tukyꞌi te tyol. Okyeqtel tkꞌuluꞌ mandad tukyꞌi stortol kꞌuxbꞌil [aj telponx okyeqtel tkꞌuluꞌ mandad tukyꞌi tkawbꞌil tuj tqꞌabꞌ, nlay kaj alkawet tiꞌj nijunwt].* A tetz te aj nxajon nyitzꞌon te ub [aj telponx] nxik tsiꞌ xhchoꞌnal kyiꞌj kye xjal tzan tpaj bꞌan nim tqꞌoj Qtata Dios aj mas nim tajwalil twitz kyaqil.* 16 Bꞌix tiꞌj te tqꞌanaq bꞌix tiꞌj toq tzꞌibꞌan-ok ikxjani: Te Twitzaleꞌ Kꞌulul Mandad Kyiꞌj Kyaqil Kywitzaleꞌ Kꞌulul Mandad. Bꞌix ax tzꞌibꞌan-ok tiꞌj ikxjani: Te Kyajawil Kyiꞌj Kyaqil Kye Aj At Nim Kyajwalil.* 17 Bꞌix oxik wen jun ángel waꞌlqet tuq twitzf te qꞌij, nqꞌolbꞌen tuq kyiꞌj kyaqil pichꞌ twitz kaꞌj, nxik tuq tqꞌumaꞌ kongan ikxjani: “Peꞌetzaj waq, intok echimoꞌ etibꞌ tzan tpaj te Qtata Dios oqtel tsiꞌ jun nim eweꞌ. 18 Peꞌetzaj tzan txik echiꞌ kchiꞌjel kywitzaleꞌ kꞌulul mandad* bꞌix kchiꞌjel kꞌulul mandad soldad bꞌix kchiꞌjel xjal aj nim kybalor, bꞌix kchiꞌjel kway bꞌix kchiꞌjel aj akyejax kyajsikji, kchiꞌjel kye aj mosimeꞌ bꞌix kye aj nyaꞌtx mosimeꞌ, bꞌix kchiꞌjel kye aj nyaꞌtx nim kyajwalil bꞌix kye aj at nim kyajwalil.”* 19 Oxik wen te [xjal aj naqe jun] matij txkup bꞌix kye kꞌulul mandad twitz txꞌoꞌtxꞌ tukyꞌi ksoldad ojetq tzꞌok kchimoꞌ kyibꞌ tzan kyqꞌojin tukyꞌi te aj iqaꞌ tzan te saqtiꞌj kway bꞌix kyukyꞌi tsoldad tetz. 20 Ntons etzyet te [xjal aj naqe jun] matij txkup bꞌix te pakbꞌon aj nyaꞌtx bꞌanꞌax titzaꞌ. A te aj nkꞌulun tuq tiꞌchq yekꞌbꞌil tukyꞌi nim tajwalil twitz te txkup bꞌix aj eqet eqꞌin kye aj okykꞌamoj te techaꞌl te matij txkup kyiꞌj bꞌix enaꞌon tiꞌj te titzbꞌalil.* Ntons etzyet bꞌix itzꞌojeꞌx ebꞌajxik xoꞌoꞌ kykabꞌil tuj te nim qꞌaqꞌ aj nbranun tukyꞌi asupr.g 21 Ya kye txqꞌanky ebꞌajqet kansaꞌ tzan te aj iqaꞌ tajsik te kway tzan te tyol aj nꞌetz tuq tuj stziꞌ naqe jun tmachit kansbꞌil, bꞌix ikxji kyaqil kye pichꞌ ebꞌajnoj [tzan kchiꞌjel kye tajqꞌoj Qtata Dios].