20
Aj Tkaj Kꞌaloꞌ Te Ma Chman Txkup Jun Mil Aqꞌbꞌi
1 Ntons yaji oxik wen jun ángel ikjaꞌn tuq tqetz tzajnaq tuq tuj kaꞌj, bꞌix eqꞌiꞌ tuq tyabul jaqbꞌil te jul aj kꞌontiꞌl txeꞌ, bꞌix eqꞌiꞌ tuq tuj tqꞌabꞌ jun chman kaden. 2 Bꞌix te ángel oqet tkꞌaloꞌ te matij semejante kan, bꞌix okaj tkꞌaloꞌ jun mil aqꞌbꞌi. Te aj matij semejante kan ax nꞌok qꞌumaꞌ te “aj matij kan oqtxiꞌ,”* aj tbꞌi te “Tajaw Choj” bꞌix ax nꞌok qꞌumaꞌ “Satanas.” 3 Ntons oqex txon te ángel te matij kan tuj te jul aj kꞌontiꞌl txeꞌ, bꞌix okaj tlamoꞌ bꞌix oqet tsiꞌ tal te tlamelul te jul, tzan tkaj txini jun mil aqꞌbꞌi tzan kꞌon kyqet teqꞌiꞌky kye xjal.a Bꞌix max chaꞌoj tkyꞌik te jun mil aqꞌbꞌi, yaji oxeꞌl tzoqpiꞌ junkyꞌel per cha jun rat. 4 Ntons, ax oxik wen kyꞌilaꞌj witꞌlelj bꞌix kye aj witꞌlikeꞌ tzi aꞌeꞌ kye aj oxik siꞌ kyajwalil tzan kykꞌulun mandad.* Bꞌix [exik wen] kyanim kye aj eqet kansaꞌb tzan tpaj kypakbꞌen te bꞌanꞌax tiꞌj Jesus bꞌix tzan tpaj kypakbꞌen te bꞌanꞌax tiꞌj tyol Qtata Dios,* bꞌix kyaqil kyanim kye aj kꞌontiꞌl enaꞌon tiꞌj te [xjal aj naqe jun] matij txkup ni tiꞌj te titzbꞌalil, bꞌix kꞌontiꞌl okytzoqpij tzan tok siꞌ techaꞌl tajsik kywitz qa tiꞌj kyqꞌabꞌji, bꞌix [oweꞌej] ejaw anqꞌin junkyꞌel bꞌix ekꞌulun mandad junx tukyꞌi Krist jun mil aqꞌbꞌi.c 5 Te ntzani a te tbꞌay bꞌuchꞌuj xjal aj okyejawel anqꞌin bꞌix kye txqꞌanky xjal aj ojetq kyekamik, nlay kyejaw anqꞌin max oj tkyꞌik te jun mil aqꞌbꞌi. 6 Galanx-alo bꞌix pawameꞌ te Qtata Dios kye aj okyejawel anqꞌin tbꞌay. Nlay tzꞌok kyen te tkabꞌiꞌ kamikyj,* sinoke okyeqtelten naꞌol Qtata Dios tukyꞌi Krist bꞌix okyekꞌuluyon mandad jun mil aqꞌbꞌi junx tukyꞌi Krist.
Te Aj Okyꞌel Oj Txik Tzoqpiꞌ Te Twitzaleꞌ Joyol Qꞌoj Oj Tmankun Te Tyemp Jun Mil Aqꞌbꞌi
7 Ntons, ya oj tkyꞌik te jun mil aqꞌbꞌi, te Satanas ojawetz tzoqpiꞌ, 8 bꞌix okyeqtel teqꞌiꞌ kye xjald tuj kyaqil part twitz txꞌoꞌtxꞌ bꞌix kye aj Gog* bꞌix Magog. Okyeꞌokel xhchimoꞌ tzan kyqꞌojin bꞌix kye tsoldad okyeꞌokel naqe sanik.e 9 [Owok jotoꞌ tuj nwitz], ebꞌajnoj txini,f bꞌix ejaw xtxꞌuꞌk te amaqꞌ, cha owok-oq kymaqoꞌ te kyamaqꞌ kye aj pawameꞌ te Qtata Dios, aj amaqꞌ aj nqet tuq ganiꞌ nim tzan Qtata Dios. Per yatzun kyiꞌj kye kyajqꞌoj, oqetz jun qꞌaqꞌ tuj kaꞌj kyiꞌj bꞌix ebꞌajmankun kyaqil. 10 Te Tajaw Choj aj ojetq tuq qet eqꞌin kyetz, oqex xon tuj te nim qꞌaqꞌ aj nbranun tukyꞌi asupr,g aj jaꞌ eqex xon te [xjal aj naqe jun] matij txkup bꞌix te yolil tyol aj nyaꞌtx bꞌanꞌax titzaꞌ. Tzi owokel kyen xhchoꞌnal bꞌajqꞌij bꞌix bꞌajaqꞌbꞌil bꞌeyx te jun-eleꞌx.
11 Bꞌix oxik wen jun xjal witꞌlik tuq tuj twitꞌlel aj jaꞌ nkꞌulun mandad bꞌix te twitꞌlel bꞌan nim bꞌix saq tuq, bꞌix oxik wen twitz tetz eqet naj te twitz kaꞌj bꞌix te twitz txꞌoꞌtxꞌ, ya kꞌontiꞌl tuq kyoken.h 12 Bꞌix exik wen kye aj ojetq tuq kyekamik, kye aj nim tuq kyajwalil bꞌix kye aj nyaꞌtx nim tuq kyajwalil,* waꞌlkeꞌ tuq twitz te witꞌlelj, bꞌix txqꞌan uꞌj ejaw jaqoꞌ, bꞌix ax ojaw jaqoꞌ junky uꞌj aj nyolin abꞌleꞌ kye aj okyeꞌanqꞌiyon te jun-eleꞌx, bꞌix otzaj qꞌumaꞌ kyaqil kchoj kye kamnaq iktzaꞌx kykꞌulbꞌen aj tzꞌibꞌankaj kyuj kye uꞌj.* 13 Komo kyaqil kye aj oje kyekamik ejaw anqꞌin junkyꞌel, kye aj ekamik tuj te nim aꞌ bꞌix kye txqꞌanky kamnaq,i kyaqil ejaw anqꞌin tzan txik qꞌumaꞌ kchoj iktzaꞌx tuq te kykꞌulbꞌen. 14 Oponaj te kamikyj bꞌix ax oponaj jaꞌ nkyexik kyanim kye xjal aj nkyekamik,j kykabꞌil eponaj tuj te nim qꞌaqꞌ.k Te ja nim qꞌaqꞌni a te tkabꞌiꞌ kamikyjji. 15 Bꞌix kyaqil kye xjal aj kꞌontiꞌl tuq tzꞌibꞌanqex kybꞌi tuj te uꞌj aj nyolin abꞌleꞌ kye aj okyeꞌanqꞌiyon te jun-eleꞌx, yaji kyetz exik xon tuj te nim qꞌaqꞌ.