21
Owokel Junky Txꞌoꞌtxꞌ Akꞌaꞌj Bꞌix Junky Kaꞌj Akꞌaꞌj
1 Yaji oxik wen junky twitz kaꞌj akꞌaꞌj bꞌix junky twitz txꞌoꞌtxꞌ akꞌaꞌj tzan tpaj te tbꞌay twitz kaꞌj bꞌix te tbꞌay twitz txꞌoꞌtxꞌ eqet naj bꞌix ya kꞌontiꞌl te nim aꞌ.* 2 Bꞌix oxik wen te Jerusalen akꞌaꞌj,* te amaqꞌ aj pawaꞌ te Qtata Dios bꞌix chꞌinwt nyaꞌtx galan tuj, ikjaꞌn tuq tqetz tuj kaꞌj, tzajnaq tukyꞌi Qtata Dios. Bꞌan txakumaj tuq iktzaꞌ jun xuj aj bꞌan nxmakalin owokel junan tukyꞌi tichmil.* 3 Bꞌix oxik nchan twiꞌ jun xjal nyolin tuq kongan tuj te witꞌlelj ikxjani: “Ajnaꞌl te Qtata Dios nnajan kxol kye xjal. Te Qtata Dios onajayon kxol bꞌix kyetz okyeꞌokel txjalil. Te Qtata Dios axk tetz oqtelten kyukyꞌiꞌl te jun-eleꞌx,* 4 bꞌix tetz okyeꞌokel tbꞌekꞌaꞌ.a Bꞌix ya kꞌontiꞌl te kamikyj, ya kꞌontiꞌl te bꞌis, ya kꞌontiꞌl te oqꞌel, bꞌix ya kꞌontiꞌl te xhchoꞌnal, tzan tpaj kyaqil aj at tuq tbꞌayaꞌ oje ponaj.”*
5 Ntons, te aj nkꞌulun mandad aj witꞌliqet tuj twitꞌlel otzaj tqꞌumaꞌ ikxjani: “Wetz ajnaꞌl nqet nkꞌuluꞌ kyaqil akꞌaꞌj.” Bꞌix ax otzaj tqꞌumaꞌ ikxjani: “Intqet atzꞌibꞌaꞌ tzan tpaj te aj nxik nqꞌumaꞌni, bꞌanꞌax bꞌix bꞌaꞌn tzan twitꞌlet ekꞌuꞌj tiꞌj.” 6 Bꞌix ax otzaj tqꞌumaꞌ wetz ikxjani: “Maꞌtx bꞌantik kyaqil. Wetz aꞌin te tbꞌay bꞌix aꞌin te tmankbꞌil, [kyaqil tyemp akyinqet], aꞌin wetz nkyinꞌaqꞌsan kyaqil bꞌix aꞌin wetz nkyinmankunsan kyaqil. Abꞌl aj nkꞌachjik, wetz oxeꞌl nsiꞌ tukꞌaꞌ tzan tanqꞌin te jun-eleꞌx bꞌix cha tkotz.b 7 Kye aj okyipaꞌtz, okykotziꞌtz kyaqil ntzani, bꞌix wetz okyinꞌokel Dios te kyetz, bꞌix kyetz okyeꞌokel nkꞌwaꞌal.* 8 Per kye aj nkyexobꞌ, bꞌix kye aj kꞌontiꞌl nkyeꞌokslan, kye aj bꞌan tzꞌil kyanim, kye aj kansal xjal, kye aj cha kykꞌajajin qet, kye aj nkyechmanin, kye aj nkyenaꞌon tiꞌj titzbꞌalil jun tidiꞌ, kyaqil kye laꞌj-eꞌ, kyaqil kyetz okyexeꞌl tuj te nim qꞌaqꞌ aj nbranun tukyꞌi asupr; te ntzani te tkabꞌiꞌ kamikyj.”*
9 Yaji tzaj te jun ángel kxol kye kywuqil aj eqꞌimeꞌ tuq kyitzaꞌ kye wuq ukꞌbꞌil aj jaꞌ akyeqex tuq kye kymankbꞌil wuq txakl xhchoꞌnal aj otzajel siꞌ. Otzaj tqꞌumaꞌ te ángel wetz ikxjani: “Qalan, oxeꞌl nyekꞌuꞌ yatz te aj owokel junan tukyꞌi [te aj nꞌok qꞌumaꞌ] Te Tal Moch.”
10 Ntons ma tzꞌok jotoꞌ tuj nwitz tzan te Txew [Dios], te ángel ma kyinxik tin twiꞌ jun matij witz, bꞌix ma tzaj tyekꞌuꞌ wetz te amaqꞌ [Jerusalen] aj pawaꞌ te Qtata Dios, tzajnaq tukyꞌi Qtata Dios ikjaꞌn tqetz tuq tuj kaꞌj. 11 Te amaqꞌ bꞌan ntxaqtxon tuq tzan xhchqitzꞌunal Qtata Dios, bꞌan nxhpotzꞌeꞌ tuq iktzaꞌ jun abꞌj aj nim tbalor, iktzaꞌ jun abꞌj jaspe bꞌan xhlinun naqe kristal. 12 Bꞌix te amaqꞌ peꞌoniꞌ tukyꞌi jun peꞌon nim twitz bꞌix nim twaꞌlkal, ateꞌ kabꞌlajuj tlamelul, bꞌix tuj junjun lamel atqet jun ángel, bꞌix kyiꞌj kye lamel tzꞌibꞌan-ok tuq kybꞌi kye kykabꞌlajujil bꞌuchꞌuj tijajil Israel. 13 [At kaj palaj tetz bꞌix ox tlamelul junjunchaq palaj], ox tlamelul nkaj twitz oriente, oxky twitz norte, oxky twitz sur, oxky twitz occidente.* 14 Bꞌix twitꞌlel te peꞌon kabꞌlajuj chman abꞌj, tzꞌibꞌan-ok tuq kyiꞌj kye abꞌj kybꞌi kye kykabꞌlajujil tkyꞌixel [Jesus, aj nꞌok qꞌumaꞌ] Te Tal Moch. 15 Te ángel aj nyolin tuq wukyꞌiꞌl eqꞌiꞌ tuq jun tmalbꞌil pur xtxꞌotxꞌal oro, te malbꞌil te amaqꞌ kyukyꞌi kye lamel bꞌix kye tpeꞌonil.* 16 Te amaqꞌ kwagrad, te tqꞌeꞌlkal parej tuq tukyꞌi twitz, te ángel oqet tmaloꞌ te amaqꞌ tukyꞌi tmalbꞌil, bꞌix kabꞌlajuj mil (12,000) stadión tqꞌeꞌlkal [osey kabꞌeꞌ mil tukyꞌi kabꞌeꞌ oqal (2200) kilómetr], bꞌix te twitz bꞌix te twaꞌlkal parej tuq. 17 Yaji oqet tmaloꞌ te tpeꞌonil tukyꞌi jun malbꞌil iktzaꞌx nkyemalon kye xjal, bꞌix owel jun oqal tukyꞌi kaj tuj oxqal (144) kúbitos [osey qaq tuj mutxꞌ (66) metr]. 18 Te tpeꞌonil kꞌulumaj tuq tukyꞌi pur abꞌj jaspe tbꞌi, bꞌix te amaqꞌ kꞌuluꞌ tuq tukyꞌi pur xtxꞌotxꞌal oro xhchukeltibꞌ bꞌan saq naqe kristal nꞌex qebꞌl tuj. 19 Kye abꞌj aj akyeqet tuq te twitꞌlel te tpeꞌonil, bꞌan txakuꞌ tuq tukyꞌi tiꞌchq txakl tbꞌanil abꞌj. Te tbꞌay abꞌj aj te twitꞌlel jasp [tbꞌi] tuq, bꞌix te tkabꞌiꞌ sapir, bꞌix te toxiꞌ agat,c te tkajiꞌ esmeralt, 20 te tjwebꞌiꞌ sardons,d te tqaqiꞌ sardy, te twuqiꞌ krisolit, te twajxaqiꞌ beril, te tbꞌeljujiꞌ topasy, te tlajujiꞌ krisopras, te tjunlajujiꞌ jasint, bꞌix te tkabꞌlajujiꞌ amatist.* 21 Kye kykabꞌlajujil tlamelul, kꞌulumaj tukyꞌi kabꞌlajuj perla, jun perla junjunchaq. Bꞌix kye tbꞌeyil te amaqꞌ pur xtxꞌotxꞌal oro xhchukeltibꞌ, bꞌix bꞌan xhqitzꞌun naqe kristal tuq. 22 Bꞌix kꞌontiꞌl oxik wen tuj te amaqꞌ jun jay aj nabꞌil Qtata Dios tzan tpaj [kꞌontiꞌl nkyenaꞌon tetz apart tuj jun jay sinoke] akyeqet twitzx tetz [aj nꞌok qꞌumaꞌ] Te Tal Moch, bꞌix twitz te Qajaw Dios aj mas nim tajwalil twitz kyaqil. 23 Bꞌix nyaꞌtx presis tzan kyqꞌanalin ni te qꞌij ni te qyaꞌ tuj te amaqꞌ tzan tpaj xhchqitzꞌunal Qtata Dios nqꞌanalin te amaqꞌ bꞌix a Te Tal Moch te tqꞌanalbꞌil.* 24 Kye xjal okyebꞌetel tuj chkꞌatunal tetz, bꞌix kye twitzaleꞌ kꞌulul mandad twitz txꞌoꞌtxꞌ oxeꞌl kyqꞌapoꞌ kyaqil aj bꞌan tbꞌanil aj at te kyetz.e 25 Kye tlamelul nlay lamet* tzan tpaj pur chijqꞌij, nlay qoqet yupan. 26 Kye xjal okyeꞌoqex tzi tukyꞌi te aj bꞌan tbꞌanil aj at te kyetz,f bꞌix oqtel kyjiqꞌbꞌaꞌ [te Qajawil]. 27 Bꞌix nlay tzꞌox txini chꞌinwt aj nyaꞌtx galan, bꞌix kꞌontiꞌl-eꞌ xjal aj nkyekꞌulun te aj ajqꞌojaꞌ twitz tzan Qtata Dios ni kye aj kꞌontiꞌl nkyeyolin te bꞌanꞌax.* Aꞌox okyeꞌokex aj tzꞌibꞌanqex kybꞌi tuj te uꞌj aj nyolin abꞌleꞌ kye aj okyeꞌanqꞌiyon te jun-eleꞌx tzan tpaj Te Tal Moch.