22
1 Yaji [aj man tuq nꞌok jotoꞌ tuj nwitz], te ángel otzaj tyekꞌuꞌ wetz jun nim aꞌ aj ntzaj tsiꞌ qanqꞌin te jun-eleꞌx, jun aꞌ aj bꞌan xhqitzꞌun iktzaꞌ kristal, bꞌix njatz kanet tuj twitꞌlel aj jaꞌ nkꞌulun mandad te Qtata Dios bꞌix [te aj nꞌok qꞌumaꞌ] Te Tal Moch.* 2 Nkyꞌik te aꞌ ninkꞌajchaq te tbꞌeyul te amaqꞌ, bꞌix tuj kykabꞌil palaj te aꞌ atqet tuq tzi te tzeꞌ aj ntzaj tsiꞌ qanqꞌin,* bꞌix qyaꞌiꞌchaq nkaj tuq twitz, kabꞌlajuj-el jun aqꞌbꞌi. Bꞌix txaq te tzeꞌ nꞌoken tuq qꞌanbꞌil kyaqil kyijajil xjal.a 3 Bꞌix te tzi, chꞌinwt te aj ajqꞌojaꞌ tzan Qtata Dios.* Bꞌix te twitꞌlel aj jaꞌ nkꞌulun mandad te Qtata Dios bꞌix [te aj nꞌok qꞌumaꞌ] Te Tal Moch oqtelten tuj te amaqꞌ, bꞌix kye aj qꞌapoꞌ kyibꞌ nkyeꞌaqꞌunan te tetz okyenaꞌoyon tetz, 4 owokel kyen twitz, bꞌix atok tbꞌi tajsik kywitz. 5 Tzi ya nlay qoqet yupan, bꞌix kye aj nkyenajan tzi nyaꞌtx presis jun kandil te kyqꞌanalbꞌil ni te toq qꞌij, tzan tpaj te Qajawil Dios otxaqtxoyon kxol,* bꞌix okyekꞌuluyon mandad [twitz te txꞌoꞌtxꞌ akꞌaꞌj]* bꞌeyx te jun-eleꞌx.*
Te Qajaw Chꞌinky Tul
6 Te ángel otzaj tqꞌumaꞌ wetz ikxjani: “Te aj nxik nqꞌumaꞌni bꞌanꞌax bꞌix bꞌaꞌn tzan twitꞌlet ekꞌuꞌj tiꞌj. Te Qtata Dios, a tetz nyolin tuj kyanim kye aj yolil tyol, bꞌix ajixk tetz ma kyintzaj tlajoꞌ qꞌumal kye aj qꞌapoꞌ kyibꞌ tuj tqꞌabꞌ tzan tel kynikyꞌ kyaqil aj okyꞌel naj.”
7 [Ntons, kyi te Jesus]: “Tzaj eten, wetz kyinpon naj. Galanx-alo te aj oqtel tokslaꞌ te tpakbꞌalil aj tzꞌibꞌankaj tuj ja uꞌjni.”
8 Ntons, wetz aꞌin Waꞌnch oxik wen bꞌix oxik nchaꞌoꞌ kyaqil aj ntzani. Ya ma xikbꞌaj wen kyaqil, inqet mejlet twitz te ángel aj otzaj tyekꞌuꞌ te ja ntzani, inqet mejlet twitz tzan tuq nnaꞌon tetz. 9 Per tetz otzaj tqꞌumaꞌ wetz: “Kꞌon akꞌuluj ikxji tzan tpaj ax wetz aꞌin qꞌapoꞌ wibꞌ nkyinꞌaqꞌunan te Qtata Dios iktzaꞌx yatz aꞌich bꞌix iktzaꞌx kye awerman aꞌeꞌ aj yolil tyol Dios bꞌix iktzaꞌx kye aj nqet kyokslaꞌ te tpakbꞌalil tuj ja uꞌjni. Paqet mejlet naꞌol aꞌox te Qtata Dios.” 10 Bꞌix ax otzaj tqꞌumaꞌ wetz ikxjani: “Kꞌon qet awewaꞌ te tpakbꞌalil aj tzꞌibꞌankaj tuj ja uꞌjni tzan tpaj chꞌinky tpon or tzan tkanon kyaqil ntzani. 11 Te aj nkꞌulun nyaꞌtx tumeꞌl, intok ten [qa tgan] tzan tkꞌulun nyaꞌtx tumeꞌl; bꞌix te aj pur nyaꞌtx galan tuj tanim, intok ten [qa tgan] tzan stenkix ikxji; bꞌix te xjal aj nbꞌet tuj tumeꞌl, kꞌon kaj tsiꞌ tzan tbꞌet ikxji; bꞌix te aj oje tzꞌel galan tuj twitz Qtata Dios, intkaj ikxji, kꞌon stzoqpij tzan tok jun tidiꞌ nyaꞌtx galan tuj tanim.”*
12 [Ntons, otzaj tqꞌumaꞌ Jesus wetz ikxjani]: “Bꞌanꞌax wetz kyinpon naj, bꞌix otzajel win te junjunchaq te aj kykambꞌaꞌtz iktzaꞌx kykꞌulbꞌen.* 13 Wetz aꞌin te tbꞌay bꞌix aꞌin te tmankbꞌil, [kyaqil tyemp akyinqet], akyinqet tuq atx aj bꞌan tbꞌay oqtxiꞌ bꞌix akyinqet te jun-eleꞌx, bꞌix aꞌin wetz nkyinꞌaqꞌsan kyaqil bꞌix aꞌin wetz nkyinmankunsan kyaqil.”* 14 Galanx-alo kye aj maꞌtx kykꞌuluj tzan tnajslet kchoj,b ikxji kyetz at kyoklen tzan kypon tiꞌj te tzeꞌ aj ntzaj tsiꞌ qanqꞌin* bꞌix tzan kyox tuj tlamelul te amaqꞌ. 15 Per nlay kyeꞌox kye aj kꞌontiꞌl nkyekꞌulun galan,c ni kye aj nkyechmanin, ni kye aj nkyekꞌajajin, ni kye aj nkyekansan xjal, ni kye aj nkyenaꞌon tiꞌj titzbꞌalil jun tidiꞌ, ni kyaqil kye aj bꞌan kygan tqet kyeqꞌiꞌ xjal.
16 “Wetz aꞌin Jesus, maꞌtx xik nlajoꞌ te ángel qꞌumal ntzani kxol kye qerman. Wetz aꞌin xhchuxul tijajil Dawid,d bꞌix aꞌin wetz iktzaꞌ te nin cheꞌw aj ntxaqtxon oj stzaj txekaꞌj.”e
17 Ntons te Txew Dios bꞌix kye aj nkyeꞌokslan Te Tal Moch, kyetz nkyeqꞌuman: “Pawul.” Bꞌix kye aj nkyechaꞌon ntzani, inkyqꞌuman: “Pawul.” Bꞌix te aj at kꞌachjel tuj [tanim], instzaj bꞌix intukꞌan te aꞌ cha tkotz aj ntzaj tsiꞌ qanqꞌin.* 18 Oxeꞌl nqꞌumaꞌ bꞌanꞌax, kye aj nꞌok kchaꞌoꞌ kyaqil aj tzꞌibꞌankaj tuj ja uꞌjni, qa at abꞌl owokel stzꞌaqsaꞌ tiꞌj titzaꞌ nyolin ja uꞌjni, ax oxeꞌl siꞌ tetz tzan Qtata Dios jun xhchoꞌnal tiꞌj iktzaꞌx nyolin tuj ja uꞌjni. 19 Bꞌix qa at abꞌl owelal tin chꞌin tiꞌj te tpakbꞌalil aj nyolin tuj ja uꞌjni, te Qtata Dios owelal tin toklen tzan tpon tiꞌj te tzeꞌ aj ntzaj tsiꞌ qanqꞌin, bꞌix owelal tin toklen tzan tox tuj te amaqꞌ aj pawaꞌ te Qtata Dios, iktzaꞌx tzꞌibꞌanqex tuj ja uꞌjni.* 20 Te [Jesus] aj nyolin qa te ntzani bꞌanꞌax, ntqꞌumaꞌ ikxjani: “Bꞌanꞌax, kyinpon luwew.” [Bꞌix wetz nꞌaj ntzaqꞌbꞌeꞌ:] “¡Intkyꞌikxwit ikxji! Intul Qajaw Jesus.”
21 Bwen, ntons, tzaj siꞌxwit etajsik ekyaqil etetz jun nim bꞌan galan tzan te Qajaw Jesus. ¡Intkyꞌikxwit ikxji!