3
Kꞌontiꞌl Tzan Qjoyon Choj Qetz Aj Loꞌik Jkꞌuꞌj Tiꞌj Qajaw Jesukrist
1 Intok esiꞌ waq enabꞌl titzaꞌ te Qtata Dios bꞌan nqoqet tganiꞌ tzan qok qetz te tkꞌwaꞌal, bꞌix qetz bꞌanꞌax aꞌoꞌ tkꞌwaꞌal.* Astilji kye aj twitz ja txꞌoꞌtxꞌni, kyetz kꞌontiꞌl kyotzqimoꞌ tzan tpaj minaꞌ tok kyotzqilaꞌ te Qtat. 2 Etetz waq aj ganimix witzaꞌ, qetz ajnaꞌl aꞌoꞌ tkꞌwaꞌal Qtata Dios, bꞌix anke kꞌontiꞌl qebꞌen titzaꞌ qetz oqobꞌajꞌokel mas yaj, aꞌox qebꞌen oj tjaw kanet te Qajaw Jesukrist, oqoꞌokel iktzaꞌ tetz tzan tpaj owokel qen tetz iktzaꞌxkix tetz kaꞌyin bꞌix iktzaꞌxkix tetz nabꞌlin. 3 Abꞌl aj loꞌik tkꞌuꞌj ikxji, ntpawaꞌ tibꞌx tzan tkaj saq tanim iktzaꞌx te Qajaw pawaꞌ tibꞌ bꞌix saq tanim. 4 Abꞌl aj njoyon choj, tetz nyaꞌtx dyakwerd at tukyꞌi te aj nyolin te Tkawbꞌil Qtata Dios, komo oj qjoyon choj kꞌontiꞌl nqet qokslaꞌ te Tkawbꞌil. 5 Etetz etebꞌen [te Qajawil] owul tzani twitz txꞌoꞌtxꞌ tzan tel tin te qchoj* bꞌix etebꞌen tetz kꞌontiꞌl xhchoj chꞌinwt. 6 Abꞌl te aj kꞌontiꞌl nkaj tkolaꞌ, tetz oje kaj tsiꞌ tzan tjoyon choj. Yatzun te aj njoyon choj, minaꞌ tok teꞌeꞌ bꞌix minaꞌ tok totzqilaꞌ. 7 Etetz nkꞌwaꞌal, kꞌon kxqet eqꞌiꞌ waq tzan nijunwt. Te aj nkꞌulun kyaqil tuj tumeꞌl, tetzji nbꞌet tuj tumeꞌl iktzaꞌx te Qajaw nbꞌet tuj tumeꞌl. 8 Per te aj njoyon choj, tetz jun aj te Tajaw Choj, komo te Tajaw Choj jun chimol choj atx aj bꞌan tbꞌay-el. Astilji owul te tkꞌwaꞌal Qtata Dios tzan tponaj taqꞌumbꞌen te Tajaw Choj.* 9 Abꞌl aj oje tzꞌok jun tkꞌwaꞌal Qtata Dios,a ya kꞌontiꞌl njoyon choj tzan tpaj te Qtata Dios atqex tuj tanim, bꞌix ya nlay bꞌantik tzan tjoyon choj tzan tpaj oje tzꞌok tkꞌwaꞌal Qtata Dios. 10 Ikxjani nꞌel qnikyꞌ abꞌleꞌ kye tkꞌwaꞌal Qtata Dios bꞌix abꞌleꞌ kye tkꞌwaꞌal te Tajaw Choj: Abꞌl aj kꞌontiꞌl nbꞌet tuj tumeꞌl iktzaꞌ te Qtata Dios tgan, ntons nyaꞌtx tkꞌwaꞌal Qtata Dios; bꞌix abꞌl aj kꞌontiꞌl nqet tganiꞌ jun abꞌl tetz, ax nyaꞌtx tkꞌwaꞌal Qtata Dios.
A Tgan Tzan Kyqet Qganiꞌ Kye Txqꞌanky
11 Aj ntzani te tpakbꞌalil aj owok echaꞌoꞌ bꞌan tbꞌay-el: A tgan tzan tqet qganiꞌ qibꞌx qxolx.* 12 Kꞌontiꞌl tzan tel qin iktzaꞌ te Kain. Tetz qꞌapoꞌ tibꞌ tuq tuj tqꞌabꞌ te Tajaw Choj bꞌix oqet tkansaꞌ te titzꞌin.* ¿Tistil oqet tkansaꞌ? Tzan tpaj tkꞌulbꞌen te Kain nyaꞌtx tuq tumeꞌl, bꞌix te tkꞌulbꞌen te titzꞌin bꞌan tumeꞌl tuq. 13 Kꞌon kxlabꞌan waq erman qa kye xjal tzani twitz ja txꞌoꞌtxꞌni okxꞌokel kyajqꞌojaꞌ. 14 Qetz qebꞌenky oje qokolpjik tuj tqꞌabꞌ te kamikyj tzan qanqꞌin [te jun-eleꞌx], bꞌix qebꞌenky nini tzan tpaj nkyeqet qganiꞌ kye qerman. Abꞌl aj kꞌontiꞌl nqet tganiꞌ jun abꞌl tetz, tetz tzunx atqex tuj tqꞌabꞌ te kamikyj.* 15 Abꞌl aj nꞌok tajqꞌojaꞌ jun abꞌl tetz, te nini jun kansal xjal, bꞌix etetz etebꞌen jun kanson kꞌontiꞌl jun tanqꞌin te jun-eleꞌx. 16 Qetz nꞌel qnikyꞌ titzaꞌ atok oj tqet qganiꞌ junky tzan tpaj te Jesukrist. Tetz oxik tqꞌapoꞌ tibꞌ tzan tkamik* [tzan tpaj nqoqet tganiꞌ]. Astilji ax ikxji qetz a tgan dispwest aꞌoꞌ tzan jkamik tzan kypaj kye qerman. 17 Qa at jun xjal aj at tidiꞌ tetz tzani twitz txꞌoꞌtxꞌ bꞌix nꞌok teꞌeꞌ jun abꞌl tetz presis jun onbꞌil tiꞌj jun tidiꞌ aj npaltin tetz, per qa kꞌontiꞌl nꞌok loꞌet tkꞌuꞌj tiꞌj, ikxji te aj xjalni kꞌontiꞌl nqet tganiꞌ te junky iktzaꞌ te Qtata Dios nqet tganiꞌ. 18 Etetz nkꞌwaꞌal, kꞌon qet qganiꞌ jun abꞌl qetz aꞌox tukyꞌi qtziꞌ, sinoke intqet qyekꞌuꞌ tukyꞌi jkꞌulbꞌen bꞌix tuj jun tumeꞌl bꞌanꞌax.
19 Ikxji owelal qnikyꞌ eqꞌiꞌ te bꞌanꞌax qitzaꞌ, bꞌix oqnaꞌoꞌtz galan tuj qanim tuj twitz Qtata Dios, 20 qa derepent te qanim nyolin jun tidiꞌ qiꞌj, komo te Qtata Dios mas nim tajwalil twitz te qanim bꞌix tetz tebꞌen kyaqil. 21 Erman aj ganimix witzaꞌ, qa te qanim kꞌontiꞌl nyolin jun tidiꞌ qiꞌj, ntons bꞌaꞌn tzan qnaꞌon galan atoꞌ tuj twitz Qtata Dios, 22 bꞌix ikxji kyaqil aj oxeꞌl jqaniꞌ qetz tukyꞌiꞌl otzajel tsiꞌ tzan tpaj nqet qokslaꞌ te aj okaj tqꞌumaꞌ, bꞌix njkꞌuluꞌ iktzaꞌ tetz tgan. 23 Bꞌix aj ntzani te aj okaj tqꞌumaꞌ: Tzan qokslan tiꞌj Jesukrist aj tkꞌwaꞌal tetz, bꞌix tzan tqet qganiꞌ qibꞌx iktzaꞌx okaj tqꞌumaꞌ.* 24 Bꞌix te xjal aj nqet tokslaꞌ te aj okaj tqꞌumaꞌ, kꞌontiꞌl nkaj tkolaꞌ te Qtata Dios, bꞌix te Qtata Dios atqet tukyꞌiꞌl. Bꞌix te tumeꞌl titzaꞌ nꞌel qnikyꞌ qa tetz atqet qukyꞌiꞌl a te ntzani: Tetz oje tzaj tswaꞌ te Txew tuj qanim.