2
Qa Bꞌanꞌax Nqobꞌet Tukyꞌi Te Qtata Dios, A Tgan Tzan Qbꞌet Iktzaꞌ Tetz Tgan
1 Nkꞌwaꞌal, wetz nqet ntzꞌibꞌaꞌ te etetz ntzani tzan kꞌon ejoyon choj. Per qa at jun te etetz okꞌuluyon choj, at abꞌl nyolin qiꞌj twitz te Qtat, a te Jesukrist aj kꞌontiꞌl xhchoj.* 2 Te Jesukrist axk tetz oxik tqꞌapoꞌ tibꞌ te jun present tzan tel in te qchoj, bꞌix nyaꞌtx aꞌox qiꞌj qetz sinoke kyiꞌj kyaqil kye xjal twitz txꞌoꞌtxꞌ.* 3 Ikxjani te tumeꞌl titzaꞌ nꞌel qnikyꞌ qa oje tzꞌok qotzqilaꞌ tetz: Nqet qokslaꞌ aj okaj tqꞌumaꞌ te Qtata Dios.* 4 Abꞌl aj ntqꞌumaꞌ, “Wetz wotzqiꞌ te Qtata Dios,” per qa tetz kꞌontiꞌl nqet tokslaꞌ te aj okaj tqꞌumaꞌ, ntons te nini jun xjal laꞌj bꞌix kꞌontiꞌl jun bꞌanꞌax tukyꞌiꞌl. 5 Yatzun te xjal aj nqet tokslaꞌ te Tyol Qtata Dios, tetz bꞌanꞌax nqet tganiꞌ te Qtat bꞌix kye txqꞌanky xjal iktzaꞌ te Qtat oje qoqet tganiꞌ qetz. Ikxji te tumeꞌl titzaꞌ nꞌel qnikyꞌ qa qetz atoꞌ tukyꞌiꞌl. 6 Abꞌl aj ntqꞌumaꞌ galan at tukyꞌi Qtata Dios, tetz a tgan tzan tbꞌet tuj tumeꞌl iktzaꞌ obꞌet te [Jesukrist].
7 Etetz aj ganimix witzaꞌ, wetz kꞌontiꞌl nqet ntzꞌibꞌaꞌ te etetz junky tumeꞌl akꞌaꞌj aj nkaj nqꞌumaꞌ, sinoke axkix aj okaj qꞌumaꞌ etetz tbꞌay-el oqtxiꞌ. Te aj okaj qꞌumaꞌ oqtxiꞌ a te aj owok echaꞌoꞌ etetz. 8 Per ajnaꞌl okajel nqꞌumaꞌ junkyꞌel etetz iktzaꞌ jun tidiꞌ man akꞌaꞌj,* bꞌix nꞌok qen titzaꞌ te ntzani nꞌel bꞌanꞌax tukyꞌi te [Jesukrist] bꞌix ax etukyꞌiꞌl etetz. Nꞌok qen nini tzan tpaj te nyaꞌtx galana ikjaꞌn tkyꞌik bꞌix te tumeꞌl bꞌan bꞌanꞌaxb maꞌtx tzꞌaqꞌik. 9 Abꞌl aj ntqꞌumaꞌ qa tetz nbꞌet tuj tumeꞌl,c per nꞌok tqꞌojiꞌ jun abꞌl tetz, ntons tzunx nbꞌet tuj te nyaꞌtx galan.d 10 Te aj nqet tganiꞌ jun abꞌl tetz, te nini nbꞌet tuj tumeꞌl, bꞌix kꞌontiꞌl jun tidiꞌ tiꞌj aj bꞌaꞌn tzan tqet tzꞌaqik junky titzaꞌ.* 11 Per yatzun te aj nꞌok tqꞌojiꞌ jun abꞌl tetz, tetz cha tkꞌulunqet nyaꞌtx galane bꞌix nbꞌet tuj te nyaꞌtx galan, bꞌix kꞌontiꞌl tebꞌen alkyetz tbꞌey eqꞌiꞌ tzan tpaj te nyaꞌtx galan iktzaꞌ te qlolj oje qet yupan tuj twitz.
Te Ja Uꞌj Ntzani Kye Kyaqil Kꞌwaꞌalbꞌaj Bꞌix Kye Kꞌwaꞌlon
12 Ntons, etetz aj nkꞌwaꞌal aꞌix, wetz nqet ntzꞌibꞌaꞌ te etetz tzan tpaj te echoj oje qet najsaꞌ tzan tpaj [te Jesukrist]. 13 Bꞌix etetz aj kꞌwaꞌlon aꞌix, wetz nqet ntzꞌibꞌaꞌ te etetz tzan tpaj oje tzꞌok etotzqilaꞌ te aj atqet tuq bꞌan tbꞌay-el. Bꞌix etetz aj kuꞌxon aꞌix, wetz nqet ntzꞌibꞌaꞌ te etetz tzan tpaj oje qet etitzaꞌ te [Tajaw Choj] aj cha tkꞌulunqet pur nyaꞌtx galan. 14 Ntons, etetz aj kꞌwaꞌalbꞌaj aꞌix, wetz maꞌtx qet ntzꞌibꞌaꞌ te etetz tzan tpaj oje tzꞌok etotzqilaꞌ te Qtat. Bꞌix etetz aj kꞌwaꞌlon aꞌix, wetz maꞌtx qet ntzꞌibꞌaꞌ te etetz tzan tpaj oje tzꞌok etotzqilaꞌ te aj atqet tuq bꞌan tbꞌay-el. Bꞌix etetz aj kuꞌxon aꞌix, wetz maꞌtx qet ntzꞌibꞌaꞌ te etetz tzan tpaj jwert atix bꞌix te Tyol Qtata Dios atqex tuj etanim, bꞌix oje qet etitzaꞌ te [Tajaw Choj] aj cha tkꞌulunqet pur nyaꞌtx galan.
Kꞌon Tzꞌel Qganiꞌ Te Tidiꞌchq Aj At Twitz Txꞌoꞌtxꞌ
15 Kꞌon tzꞌel eganiꞌ te aj nyaꞌtx galan twitz txꞌoꞌtxꞌ bꞌix kye tidiꞌchq aj at twitz txꞌoꞌtxꞌ. Qa at abꞌl nꞌel tganiꞌ kyaqil nini, ikxji kꞌontiꞌl nqet tganiꞌ te Qtata Dios. 16 Komo kyaqil [te nyaꞌtx galan] aj at twitz txꞌoꞌtxꞌ, iktzaꞌ te aj nꞌel tganiꞌ te qchiꞌjel bꞌix te aj nꞌel tganiꞌ kye tbꞌaqꞌ qwitz bꞌix te aj nqet kyjiqꞌbꞌaꞌ kyibꞌ kye xjal tiꞌj, te nini nyaꞌtx tukyꞌi Qtata Dios ntzaj, sinoke cha tzani twitz txꞌoꞌtxꞌ.* 17 Te twitz txꞌoꞌtxꞌ bꞌix te aj nyaꞌtx galan aj nꞌel kyganiꞌ kye xjal, kyaqil nini chꞌinky tponaj, yatzun te xjal aj nqet tkꞌuluꞌ iktzaꞌ tgan te Qtata Dios, tetz atqetkix bꞌeyx te jun-eleꞌx.
Te Tajqꞌoj Qajaw Jesukrist A Te Aj Kꞌontiꞌl Ntokslaꞌ Qa Te Jesukrist Tkꞌwaꞌal Dios
18 Nkꞌwaꞌal, ajnaꞌl chꞌinky tponbꞌaj te kyaqil aj tzani twitz txꞌoꞌtxꞌ. Etetz oje tzꞌok echaꞌoꞌ owulel te tajqꞌoj te Qajaw Jesukrist. Per ajnaꞌl oje kyeꞌul kyꞌilaꞌj tajqꞌoj Qajaw Jesukrist. Astilji qebꞌen ajnaꞌl chꞌinky tponbꞌaj kyaqil. 19 Tzani qxol qetz ebꞌajꞌex, per kyetz nyaꞌtx tuq aj qxol; cha aꞌeꞌ-wit tuq aj qxol, ntons kꞌontiꞌl-tal ebꞌajꞌex. A tgan tuq tzan kyex tzan tel qnikyꞌ nyaꞌtx kyaqil aj akyeꞌotz tuq qxol bꞌanꞌax nkyeꞌokslan iktzaꞌ qetz nqoꞌokslan. 20 Per yatzun etetz, oje tzaj siꞌ te Txew Dios tuj etanim bꞌix ekyaqil oje tzꞌox tuj ewiꞌ te tumeꞌl bꞌanꞌax.* 21 Wetz kꞌontiꞌl ma qet ntzꞌibꞌaꞌ ntzani tzan tpaj kꞌontiꞌl-wit etebꞌen te tumeꞌl bꞌanꞌax, sinoke etebꞌen te bꞌanꞌax bꞌix te nikꞌbꞌil kꞌontiꞌl tzajnaq tiꞌj te bꞌanꞌax. 22 ¿Abꞌl te aj nyaꞌtx bꞌanꞌax titzaꞌ? ¿Nyaꞌtx petzun a te aj nyolin qa te Jesus nyaꞌtx aji tetz te Krist [Aj Joyomajkix Tuq]? Te tajqꞌoj te Qajaw Jesukrist a te aj kꞌontiꞌl ntokslaꞌ tiꞌj te Qtata Dios bꞌix tiꞌj te Tkꞌwaꞌal. 23 Abꞌl aj kꞌontiꞌl ntokslaꞌ tiꞌj te Tkꞌwaꞌal Qtata Dios, ax nyaꞌtx galan atqet tukyꞌi te Qtat; yatzun te aj ntokslaꞌ te Tkꞌwaꞌal, tetz galan atqet tukyꞌi te Qtat. 24 Per yatzun etetz ajnaꞌl, kyaqil aj owok echaꞌoꞌ bꞌan tbꞌay, intqex ten tuj etanim, kꞌon tzꞌaj enajsaꞌ. Qa etetz nlay tzꞌaj enajsaꞌ tuj etanim kyaqil aj owok echaꞌoꞌ tbꞌay-el, ntons ax etetz okxteyon tukyꞌi te Tkꞌwaꞌal bꞌix tukyꞌi te Qtat. 25 Aj ntzani te aj okaj tsiꞌ tyol tiꞌj tzan stzaj tsiꞌ qetz: Jun qanqꞌin te jun-eleꞌx.
26 Wetz nqet ntzꞌibꞌaꞌ ntzani te etetz tzan kypaj kye aj nkyeqet eqꞌin te etetz. 27 Per yatzun etetz ajnaꞌl, te Txew Qtata Dios aj otzaj tsiꞌ te Qajaw Jesukrist etetz, atqex tuj etanim te jun-eleꞌx. Astilji nyaꞌtx presis tzan etzaj xnaqꞌtzaꞌ tzan junky. Komo te Txew Qtata Dios nxik txnaqꞌtzaꞌ te etetz kyaqil aj presis, bꞌix kyaqil nini bꞌanꞌax bꞌix nyaꞌtx jun nikꞌbꞌil. Bꞌix iktzaꞌx oje xik txnaqꞌtzaꞌ te etetz, ax etetz kꞌon kaj ekolaꞌ te tetz.