25
Aj Tpon In Te Paꞌk Twitz Porcio Festo
1 Yaji te Festo oxe qꞌijxiꞌ tuq tkꞌamlen te tmulbꞌil tzan tkꞌulun mandad tuj tkwentil Sesarey, yaji oxik Jerusalen. 2 Ya ma pon Jerusalen, yaji kye pal aj nim kyajwalil bꞌix kye xjal aj tlimaqal xjal-eꞌ kxol kye aj tijajil Israel, ebꞌajpon twitz tetz qaniyon tiꞌj te Paꞌk. Oqet kywitz twitz 3 tzan tbꞌekꞌan tzan txik tkꞌuluꞌ mandad tzan stzaj in te Paꞌk tuj Jerusalen. Komo ikxji kyetz bꞌaꞌn tuq tzan kyten list tuj bꞌey tzan tuq tqet kykansaꞌ te Paꞌk. 4 Per te Festo oxik tqꞌumaꞌ, te Paꞌk atqet pres Sesarey, bꞌix tetz owajel tuq luwew junkyꞌel txini. 5 Oxik tqꞌumaꞌ ikxjani: “Junjun exol etetz aj at kyajwalil, inkxik bꞌeyx wukyꞌiꞌl. Qa te aj ichanji at til, ntons bꞌaꞌn tzan txik epoqoꞌ txini.”
6 Te Festo oqeten txini wajxaq qꞌij qatzun lajuj qꞌijji, yaji omeltzꞌjik junkyꞌel Sesarey. Yaji tuj junky iwitq, owox tuj twitꞌlel tuj tdespach aj jaꞌ npujun kyil kye xjal bꞌix oxik tkꞌuluꞌ mandad tzan stzaj in te Paꞌk twitz. 7 Ya ma pon in te Paꞌk, kye aj tijajil Israel aj tzajnaqeꞌ tuq Jerusalen eꞌok tenan tiꞌj bꞌix oxik kyqꞌumaꞌ tidiꞌchq til bꞌan nim bꞌix kꞌontiꞌl tuq nbꞌantik tzan tqet kyyekꞌuꞌ jun preb qa bꞌanꞌax. 8 Yaji te Paꞌk, tzan tkolet, nxik tuq tqꞌumaꞌ ikxjani: “Wetz kꞌontiꞌl wil maꞌtx tzaj nchukuꞌ, ni tiꞌj te Kawbꞌil tiꞌj te qrelijyon qetz aj tijajil Israel, ni tiꞌj te Nin Jay Nabꞌil Qtata Dios, ni tiꞌj te César aj te twitzaleꞌ kyiꞌj kye kꞌulul mandad, kꞌontiꞌl maꞌtx kyinjoyon choj.”
9 Komo te Festo tgan tuq tzan tkaj galan kyukyꞌi kye aj tijajil Israel, oxik tqꞌumaꞌ tetz te Paꞌk ikxjani: “¿Agan peꞌ tzan axik Jerusalen tzan tok nchaꞌoꞌ awiꞌj txini?”
10 Ntons te Paꞌk owaj stzaqꞌbꞌeꞌ ikxjani: “Wetz akyinqet tuj tdespach te tkyꞌixel te César aj te twitzaleꞌ kyiꞌj kye kꞌulul mandad, bꞌix tzani aj jaꞌ a tgan tzan tok chaꞌoꞌ wiꞌj. Yatz awebꞌen wetz kꞌontiꞌl jun nyaꞌtx galan maꞌtx nkꞌuluj kyiꞌj kye aj tijajil Israel. 11 Qa wetz aꞌin jun joyol il, bꞌix qa tzan tpaj jun tidiꞌ aj maꞌtx nkꞌuluj presis tzan nkamik, dispwest aꞌin tzan nkamik; per qa nyaꞌtx bꞌanꞌax kyaqil wil aj ntzaj kyqꞌumaꞌ kye ja xjalni, kꞌontiꞌl abꞌl at toklen tzan nxik tqꞌapoꞌ tuj kyqꞌabꞌ. Wetz at woklen tzan nkolon wibꞌ twitz te César aj te twitzaleꞌ kyiꞌj kye kꞌulul mandad, astilji ajnaꞌl nkyinqanin tzan nxik etin twitz tetz.”
12 Ya ma xik xhchaꞌoꞌ te Festo kyukyꞌi kye aꞌeꞌ aj nkyetzaj swan tuq jun konsej kyetz, oxik tqꞌumaꞌ tetz te Paꞌk ikxjani: “Yatz maꞌtx aqanij tzan axik in twitz te twitzaleꞌ, ntons ma txikkix tukyꞌiꞌl.”
Aj Tyolin Te Porcio Festo Twitz Te Agrípa Tiꞌj Te Paꞌk
13 Ya ma kyꞌik kyꞌilaꞌj qꞌij, jun rey kꞌulul mandad Agrípaa tbꞌi, bꞌix te Berenis [aj tanabꞌ], epon Sesarey qꞌolbꞌel te Festo. 14 Komo eqeten txini kyꞌilaꞌj qꞌij, ntons te Festo oyolin tukyꞌi te Agrípa tiꞌj te Paꞌk, oxik tqꞌumaꞌ ikxjani: “Tzani, at jun xjal okaj siꞌ pres tzan Félix. 15 Aj nxwaꞌq Jerusalen, kye pal aj nim kyajwalil bꞌix kye aj te bꞌuchꞌuj tijxjal aj mas nim kyajwalil kxol tijajil Israel, kyetz ebꞌajpon wukyꞌiꞌl qaniyon tiꞌj te Paꞌk, tzan tkanslet. 16 Yaji wetz oxik nqꞌumaꞌ, qxol qetz aj Rom, kꞌontiꞌl nxik qsiꞌ tuj il jun xjal qa te xjal minaꞌ tkolon tibꞌ kywitz kye aj nkyexik poqon tetz. 17 Astilji aj wul qet tzani, bꞌeyx tuj junky iwitq inꞌox tuj nwitꞌlel tuj ndespach bꞌix owok nchimoꞌ wibꞌ kyukyꞌiꞌl bꞌix oxik nkꞌuluꞌ mandad tzan stzaj in te xjal nwitz. 18 Per ya ma kyeꞌul kye aj nkyexik poqon tuq tetz, kꞌontiꞌl otzaj kyqꞌumaꞌ jun til nim iktzaꞌ ojetq tuq qet nbꞌisuꞌ wetz. 19 Te aj nxik tuq kyqꞌumaꞌ tiꞌj, cha aꞌox tuq tiꞌj kyrelijyon kyetz bꞌix tiꞌj jun xjal tbꞌi Jesus aj oje kamik bꞌix te Paꞌk ntyoliꞌ itzꞌoj. 20 Wetz kꞌontiꞌl tuq webꞌen tidiꞌ tuq bꞌaꞌn tzan nkꞌulun, astilji oxik nchaꞌoꞌ te Paꞌk qa dispwest tuq tetz tzan txik in Jerusalen tzan tok qchaꞌoꞌ tiꞌj txini. 21 Per yaji otqanij tzan tkolon tibꞌ twitz te twitzaleꞌ qiꞌj; astilji oxik nkꞌuluꞌ mandad tzan tqet kxbꞌuqiꞌ max oj txik nsamaꞌ tukyꞌi te twitzaleꞌ.”b 22 Ntons te Agrípa oxik tqꞌumaꞌ ikxjani: “Ax wetz ngan-tal tzan tok nchaꞌoꞌ te ja xjalni.” Yaji te Festo owaj stzaqꞌbꞌeꞌ ikxjani: “Bꞌeyx nchiꞌj owokel achaꞌoꞌ.”
23 Yaji tuj junky iwitq te Agrípa bꞌix te Berenis ebꞌajpon, bꞌix kye xjal ekꞌamon te kyetz tukyꞌi jun nim limbꞌil, bꞌix eꞌox junx kyukyꞌi kye kꞌulul mandad kyiꞌj kye kapitan kye soldad bꞌix kyukyꞌi kye ichan tlimaqal xjal-eꞌ tuj te amaqꞌ. Yaji te Festo oxik tkꞌuluꞌ mandad tzan stzaj in te Paꞌk kywitz. 24 Ntons te Festo oxik tqꞌumaꞌ ikxjani: “Yatz tat Agrípa, bꞌix ekyaqil etetz waq aj maꞌtx tzꞌok echimoꞌ etibꞌ tzani qukyꞌila, aj ntzani te xjal aj nkyqꞌumaꞌ kyaqil kye aj tijajil Israel tuj Jerusalen, bꞌix kye aj nkyenajan tzani, nkyqꞌumaꞌ tzan tkamik. 25 Wetz kꞌontiꞌl nꞌoknoj witzaꞌ jun til aj presis-wit tzan tkamik. Ajnaꞌl komo ajixk tetz maꞌtx tqanij tzan txik tqꞌumaꞌ til twitz te twitzaleꞌc qiꞌj, ntons maꞌtx qet nbꞌisuꞌ tzan txik nsamaꞌ tukyꞌiꞌl. 26 Per wetz kꞌontiꞌl webꞌen tidiꞌ oqtel ntzꞌibꞌaꞌ tiꞌj tetz tzan txik nsamaꞌ tukyꞌi te twitzaleꞌ. Astilji maꞌtx tzul win awitz yatz tat Agrípa bꞌix ax ewitz etetz. Ikxji oj tok echaꞌoꞌ kyaqil tiꞌj, bꞌaꞌn tzan tqet ntzꞌibꞌaꞌ tukyꞌi te twitzaleꞌd tiꞌj ja xjalni titzaꞌ etetz nꞌel tuj ewitz. 27 Komo nyaꞌtx tumeꞌl tzan txik nsamaꞌ jun aj pres bꞌix qa kꞌontiꞌl tidiꞌ til nyolin tiꞌj.”