22
1 “Ajnaꞌl waq erman bꞌix etetz erman aj tijxjal aꞌix, instzaj echaꞌoꞌ te aj oxeꞌl nyoliꞌ wiꞌj tzan nkolon wibꞌ ewitz.” 2 Ya ma xik kchaꞌoꞌ te Paꞌk nyolin tuq kyukyꞌiꞌl tuj kyyol ebrey, ntons kye xjal elumet byenech bꞌix te Paꞌk oxik tqꞌumaꞌ ikxjani: 3 “Ax wetz aꞌin aj tijajil Israel [iktzaꞌx aꞌix]. Inꞌitzꞌjik amaqꞌ Tars tuj tkwentil Silisy per injaw kyꞌibꞌ tuj ja amaqꞌ ntzani. Inqet xnaqꞌtzaꞌ tzan te Gamaliel* bꞌix bꞌan eqꞌiꞌ witzaꞌ te Kawbꞌil tiꞌj qrelijyon aj nxik kyin tuq kye qijajil oqtxiꞌ. Bꞌix wetz bꞌan nqet nxjaniꞌ te Qtata Dios iktzaꞌx etetz ajnaꞌl. 4 Wetz tbꞌayaꞌ wajqꞌoj tuq kywitz kye aj nkyeꞌokslan te tumeꞌl aj eqꞌiꞌ witzaꞌ ajnaꞌl. Nkyejaw tuq nlajoꞌ tzan kyqet nkansaꞌ, bꞌix nkyejaw tuq ntzyuꞌ bꞌix nkyeqex tuq nsiꞌ tuj pres xuj qa ichanji. 5 Komo te twitzaleꞌ pal, tetz tebꞌen qa bꞌanꞌax ntzani, bꞌix kyaqil kye aj te bꞌuchꞌuj tijxjal aj mas nim kyajwalil qxol qetz aj tijajil Israel aꞌoꞌ ax kyetz kyebꞌen. Kyetz bꞌaꞌn tzan kyyolin jun-el otzaj ksiꞌ jun uꞌj tzan nxik tuq Damask tzyul aꞌeꞌ aj nkyeꞌokslan tuq txini bꞌix tzan tuq ktzaj win tzani Jerusalen tzan kyqex nsiꞌ pres.*
6 Per aj ikjaꞌn tuq nxik wetz txini, bꞌix aj chꞌinky tuq npon Damask, qanq ojetq qopon chijqꞌij tuq, tanderepent jun xhkꞌatun oqet txaqtxon wiꞌj tzajnaq tuq tuj kaꞌj. 7 Inqet tzꞌaqik twitz txꞌoꞌtxꞌ bꞌix oxik nchaꞌoꞌ twiꞌ jun xjal, otzaj tqꞌumaꞌ wetz ikxjani: “Saulo, Saulo, ¿tistil nkyinjaw alajoꞌ?”
8 Yaji wetz oxik nchaꞌoꞌ: “¿Abꞌltzun aꞌich tat?” Yaji tetz owajtz stzaqꞌbꞌeꞌ ikxjani: “Wetz aꞌin Jesus aj Nasaret aj njaw alajoꞌ yatzni.” 9 Kye aj ajuneꞌ tuq wukyꞌiꞌl oxik kyen te aj xhkꞌatun ntxaqtxon per kꞌontiꞌl owel kynikyꞌ te aj ntzaj yolin tuq wukyꞌiꞌl.
10 Yaji wetz oxik nchaꞌoꞌ tetz: “¿Tat, tidiꞌ presis tzan nkꞌulun?” Yaji te Qajawil otzaj tqꞌumaꞌ ikxjani: “Pax Damask bꞌix tzi otzajel qꞌumaꞌ yatz te aj presis tzan tqet akꞌuluꞌ.”
11 Komo tzan tpaj xhchqitzꞌunal aj otzaj txaqtxon, bꞌeyx inkaj moy titzaꞌ, yaji kye wukyꞌiꞌl cha inxik kyjochoꞌ max amaqꞌ Damask. 12 Tzi at tuq jun xjal tbꞌi Ananiys. Tetz jun xjal aj bꞌan eqꞌiꞌ titzaꞌ kyaqil iktzaꞌx nyolin tuj te Kawbꞌil tiꞌj qrelijyon bꞌix nqet tuq txjaniꞌ te Qtata Dios. Kyaqil kye xjal aj tijajil Israel nkyeyolin tuq galan tiꞌj tetz. 13 Tetz opon qꞌolbꞌel wetz aj jaꞌ tuq atinqet, bꞌix otzaj tqꞌumaꞌ wetz ikxjani: “Erman Saulo, ajnali intjaw jaqet te awitz.” Yaji bꞌeyxnajji ojaqet te nwitz bꞌix bꞌaꞌn tuq tzan txik wen tetz. 14 Yaji otzaj tqꞌumaꞌ ikxjani: “Te Dios aj ntzaj kynaꞌoꞌ kye qijajil oqtxiꞌ, tetz maꞌtx xhchꞌel tjoyoꞌ tzan tel anikyꞌ tidiꞌ tetz tgan, bꞌix tzan tok awen te Jesus aj kꞌontiꞌl xhchoj bꞌix tzan tok achaꞌoꞌ Tyol tuj stziꞌx tetz. 15 Yatz oxeꞌl aqꞌumaꞌ kywitz kyaqil xjal kyaqil aj maꞌtx tzꞌok awen bꞌix aj maꞌtx tzꞌok achaꞌoꞌ tiꞌj tetz. 16 Bꞌix kꞌon xhchꞌiyon mas. Pajaw waꞌlet, intjaw aꞌ awiꞌ bꞌix intqet awitz twitz te Qajawil tzan tqet tnajsaꞌ tetz te achoj.”
17 Ya ma kyinmeltzꞌjik Jerusalen, inꞌox tuj te Nin Jay Nabꞌil Qtata Dios xnaqꞌtzon bꞌix owok jotoꞌ tuj nwitz. 18 Oxik weꞌeꞌ te Qajawil, otzaj tqꞌumaꞌ wetz ikxjani: “Sekꞌ awex bꞌeyxnaj tuj ja amaqꞌni tzan tpaj nlay tzꞌok ksiꞌ kye xjal kywiꞌ tiꞌj te aj oxeꞌl aqꞌumaꞌ kyetz wiꞌj wetz.”
19 Yaji oxik nqꞌumaꞌ ikxjani: “Tat, kyetz kyebꞌen qa wetz nkyejaw tuq ntzyuꞌ kyuj kye jay nabꞌil yatz kye aj nkyeꞌokslan awiꞌj bꞌix nkyeqex tuq nsiꞌ tuj pres bꞌix nkyeqet tuq nbꞌujuꞌ. 20 Bꞌix aj tqet kykansaꞌ te Xhteꞌk aj nꞌaqꞌunan tuq te yatz, ax wetz akyinqet tuq tzi bꞌix dyakwerd tuq atin kyukyꞌiꞌl bꞌix [nkyinꞌonen tuq kyukyꞌiꞌl] oqet nxbꞌuqiꞌ ktxoꞌw kye aj eqet kansan tetz.”* 21 Yaji tetz otzaj tqꞌumaꞌ wetz ikxjani: “Pax, intqet akꞌuluꞌ awibꞌ, wetz otxeꞌl nlajoꞌ laqꞌchik kxol kye xjal aj nyaꞌtx tijajil Israel.””
22 Ntons, max tzani kye xjal owok ksiꞌ kywiꞌ tiꞌj per [ya ma tzꞌok kchaꞌoꞌ te ja ntzani], yaji eꞌaqꞌik tzan kyjaw sikyꞌin junkyꞌel bꞌix nxik tuq kyqꞌumaꞌ ikxjani: “¡Intqet ekansaꞌ ja xjalni! ¡Nyaꞌtx galan tzan tanqꞌin!” 23 Nkyesikyꞌin tuq bꞌix njaw tuq kkyitoꞌ kyqꞌanaq bꞌix nkyequqin tuq. 24 Yaji te kꞌulul mandad kye soldad oxik tqꞌumaꞌ tzan tox siꞌ te Paꞌk tuj kyjay kye soldad. Yaji oxik tkꞌuluꞌ mandad tzan tqet poqꞌchaꞌ tzan tjatz tqꞌumaꞌ tistil tuq kye xjal bꞌan nkyelabꞌun tuq tiꞌj. 25 Per ya aj ojetq tuq qet wakuꞌ tzan tuq tqet jubꞌchaꞌ, te Paꞌk oxik xhchaꞌoꞌ te jun kapitan kxol kye soldad aj atqet tuq qaynin tiꞌj, oxik tqꞌumaꞌ ikxjani: “¿At etetz etajwalil tzan te kawbꞌil [aj Rom] tzan tqet ejubꞌchaꞌ jun xjal aj at toklen tzan tkolet tzan te kawbꞌil aj Rom bꞌix qa kꞌontiꞌl til ojetq tzꞌok eten?” 26 Ya ma tzꞌok xhchaꞌoꞌ ikxji, te kapitan oxik yoliyon tukyꞌi te kꞌulul mandad bꞌix oxik tqꞌumaꞌ ikxjani: “¿Tidiꞌ akꞌuluꞌtz ajnaꞌl? Te ja xjalni, tetz at toklen tzan tkolet tzan te jkawbꞌil qetz aj Rom.”
27 Yaji tzaj te kꞌulul mandad, owok laqꞌchet tiꞌj te Paꞌk, oxik xhchaꞌoꞌ tetz ikxjani: “¿Bꞌanꞌax yatz at awoklen tzan akolet tzan te jkawbꞌilna qetza aj Rom?” Yaji te Paꞌk owaj stzaqꞌbꞌeꞌ: “Bꞌanꞌax.” 28 Yaji te kꞌulul mandad oxik tqꞌumaꞌ ikxjani: “Wetz nim tmin onnajsaj tzan wok jun aj bꞌaꞌn tzan tkolet tzan te kykawbꞌil aj Rom.” Yaji te Paꞌk owaj stzaqꞌbꞌeꞌ ikxjani: “Per wetz witzꞌjlenx at woklen tzan nkolet tzan te kykawbꞌil aj Rom.” 29 Ya ma tzꞌok kchaꞌoꞌ ikxji, kye aj oxik tuq sin xhchoꞌnal tiꞌj te Paꞌk eꞌel laqꞌchet tiꞌj, bꞌix ax te kꞌulul mandad kyiꞌj ax oxobꞌ tzan tpaj te Paꞌk at tuq toklen tzan tqet koloꞌ tzan te kykawbꞌil aj Rom, bꞌix ojetq tuq qet wakuꞌ tukyꞌi kaden.
Aj Tpon In Te Paꞌk Kywitz Kye Aj At Kyajwalil Kxol Kye Tijajil Israel
30 Ya tuj junky iwitq te kꞌulul mandad kyiꞌj kye kapitan kye soldad tgan tuq tzan tok xhchaꞌoꞌ byenech alkyetz te bꞌanꞌax tistil tuq kye aj tijajil Israel nkyeqanin tuq tiꞌj te Paꞌk. Ntons eꞌel tin kye kaden tiꞌj, bꞌix eꞌok xtxokoꞌ kye pal aj nim kyajwalil bꞌix kyaqil kye tijxjal aj te bꞌuchꞌuj mas nim kyajwalil kxol kye tijajil Israel, bꞌix yaji oxik tqꞌumaꞌ tzan stzaj in te Paꞌk, bꞌix oqet tsiꞌ te Paꞌk kywitz.