21
Tidiꞌ Okyꞌik Tuj Tbꞌey Paꞌk Aj Tmeltzꞌjikky Jerusalen
1 Ya ma kyekaj jkawiꞌna, qetza ojaxna tuj te bark bꞌix oxikna derech tumelil amaqꞌ Kos, bꞌix ya tuj junky iwitq amaqꞌ Ródas, bꞌix yaji amaqꞌ Pátara. 2 Bꞌix txini owoknoj jun bark qwitz aj ikjaꞌn tuq txik derech Penisy bꞌix ntons oxikna tuj te bark. 3 Aj qkyꞌikna, oxik qena te tkwentil Chipr, cha okaj tuj qsurt, yaji oxikna tumelil Siry bꞌix opona amaqꞌ Tir tzan tpaj te bark presis tuq tzan tkaj tsiꞌ iqtz txini. 4 Tzi eꞌoknoj qwitza kye aj nkyeꞌokslan tuq tiꞌj Jesus bꞌix okajtena tzi wuq qꞌij. Tzan tpaj te Txew Dios nyolin tuq tuj kyanim [qa te Paꞌk owokel ten twitz xhchoꞌnal], kyetz oxik kyqꞌumaꞌ te Paꞌk tzan kꞌon tuq txik Jerusalen. 5 Ya ma kyꞌik wuq qꞌij tzi, oꞌetzna bꞌix kye qerman etzaj wabꞌal qetza max xtxaꞌm te amaqꞌ, ax ajuneꞌ kyaqil kye kxuꞌjel bꞌix kye kykꞌwaꞌal. Yaji oqet mejletna tlobꞌen aꞌ bꞌix ax tzi oxnaqꞌtzana te Qtata Dios. 6 Yaji ekaj jkawiꞌna bꞌix ojaxna tuj te bark, bꞌix kyetz ebꞌajꞌaj kyjay.
7 Ya ma qopona Tolemáida qetzlen Tir, oxwaꞌqna qꞌolbꞌel kye qerman tzi bꞌix okajna jun qꞌij kyukyꞌiꞌl txini. 8 Ya tuj junky iwitq [qkyaqil qetza aj aqoqetna tuq tukyꞌi Paꞌk], oꞌexna tzi bꞌix opona Sesarey bꞌix okajna tjay Lip* aj pakbꞌal tiꞌj te tpakbꞌalil galan tiꞌj Jesus, tetz jun te kywuqil kye aj nkyeꞌonen tuq kyukyꞌiꞌl kye tkyꞌixel Jesus. 9 Tetz ateꞌ tuq kaj tmeꞌal qꞌopoj minaꞌ tuq tok kyen twitz ichan bꞌix kyetz aꞌeꞌ aj yolil tyol Dios tuq.
10 Aj aqoqetna tuq tzi, komo oqetena kyꞌilaꞌj qꞌij, opon jun aj yolil tyol Dios tzajnaq tuq Judey, tetz tbꞌi Agab.* 11 Ya ma pon qukyꞌila, owel tin tsinch te Paꞌk bꞌix owok tkꞌaloꞌ tqꞌabꞌx tukyꞌi toq bꞌix oxik tqꞌumaꞌ ikxjani: “Ikxjani ntyoliꞌ te Txew Dios: “Kye aj tijajil Israel tuj Jerusalen oqtel kykꞌaloꞌ ikxjani te tajaw ja sinchni bꞌix oxeꞌl kyqꞌapoꞌ tuj kyqꞌabꞌ kye aj nyaꞌtx qxjalil tijajil Israel aj kꞌontiꞌl nkyeꞌokslan te Qtata Dios.”” 12 Ya ma tzꞌok qchaꞌoꞌna ikxji, qetza bꞌix kye aj Sesarey oqet qwitza twitz te Paꞌk tzan kꞌon tuq txik Jerusalen.
13 Ntons te Paꞌk owajtz stzaqꞌbꞌeꞌ qetza ikxjani: “¿Tistil nkxꞌoqꞌ? Ikxji cha mas ntzaj choꞌon wanim etitzaꞌ. Wetz dispwest aꞌin nyaꞌtx aꞌox tzan nqet kꞌaloꞌ sinoke ax tzan nkamik Jerusalen tzan tpaj te Qajaw Jesus.” 14 Ntons qetza oqet qwitza twitz tzan kꞌon tuq txik per kꞌontiꞌl oxik tokslaꞌna. Ntons oxik qtzoqpiꞌna bꞌix oxik jqꞌumaꞌna ikxjani: “Intkyꞌik iktzaꞌx tgan te Qajawil.” 15 Yaji qetza oqet jkꞌuluꞌna qibꞌ bꞌix oxikna Jerusalen. 16 Ax ebꞌajtzaj qukyꞌila txqꞌanky qerman aj Sesarey aj nkyeꞌokslan tiꞌj Jesus, bꞌix opon kyina tjay Mnason jun xjal aj Chipr, tetz jun xjal bꞌan oqtxiꞌxiꞌ tuq tokslbꞌen tiꞌj Jesus bꞌix tzi okajtena tjay.
Aj Txik Tqꞌumaꞌ Te Paꞌk Tidiꞌ Ojetq Tkꞌuluj Te Qtata Dios Kxol Kye Aj Nyaꞌtx Tijajil Israel
17 Ya ma qopona Jerusalen kye qerman okykꞌamojna tukyꞌi jun tkꞌuꞌjlal, bꞌan nkyechalaj tuq. 18 Tuj junky iwitq te Paꞌk oxik qukyꞌila qꞌolbꞌel te Chaw bꞌix kkyaqil kye tijxjal ojetq tuq tzꞌok kchimoꞌ kyibꞌ tzi. 19 Ya ma liman te kyetz kkyaqil, yaji oxik tqꞌumaꞌ kyaqil xtxolil tiꞌj tkꞌulbꞌen Qtata Dios tukyꞌiꞌl kxol kye aj nyaꞌtx tijajil Israel. 20 Ya ma tzꞌok kchaꞌoꞌ ikxji, kkyaqil kyetz oqet kyjiqꞌbꞌaꞌ nim te Qtata Dios. Yaji oxik kyqꞌumaꞌ te Paꞌk ikxjani: “Ajnaꞌl erman, yatz nꞌok awen ateꞌ bꞌan kyꞌilaꞌja aj tijajil Israel oje kyeꞌokslan, bꞌix kyetz kꞌon kygan tzan tkaj ksiꞌ te Kawbꞌil tiꞌj qrelijyon. 21 Bꞌix oje tzꞌok kchaꞌoꞌ awiꞌj qa yatz nxik axnaqꞌtzaꞌ kxol kye [qxjalil] aj tijajil Israel aj [nkyenajan tuj txqꞌanky amaqꞌ] kxol kye aj nyaꞌtx qijajil, tzan tkaj kykolaꞌ te [Kawbꞌil tiꞌj qrelijyon aj oqet stzꞌibꞌaꞌ] Moisés, bꞌix tzan tkaj kykolaꞌ tzan tok ksiꞌ kyechalul te kykꞌwaꞌal, bꞌix tzan tkaj kykolaꞌ kyaqil aj nkykꞌuluꞌ qxjalil ikxji. 22 ¿Titzaꞌ oqoteyon ajnaꞌl? Kye xjal owokel kchimoꞌ kyibꞌb tzan tpaj owokelkix kchaꞌoꞌ qa yatz maꞌtx xhchꞌul.
23 Ajnaꞌl intqet akꞌuluꞌ te aj oxeꞌl jqꞌumaꞌna yatz: Qxola ateꞌ kaj xjal aj oje xik ksiꞌ kyyol tzan kykꞌulun jun tidiꞌ te Qtata Dios. 24 Inkxik awin awukyꞌiꞌl bꞌix intqet akꞌuluꞌ junx kyukyꞌiꞌl iktzaꞌ nyolin te Kawbꞌil tiꞌj qrelijyon tzan tkaj saq etanim tuj twitz Qtata Dios, bꞌix yatz intxik achojoꞌ kyaqil aj presis tzan tqet kskꞌoniꞌ kywiꞌ.* Ikxji kyaqil kye xjal owelal kynikyꞌ te aj oje tzꞌok kchaꞌoꞌ awiꞌj nyaꞌtx bꞌanꞌax, bꞌix ikxji owokel kyen yatz nqet akꞌuluꞌ iktzaꞌxkix te Kawbꞌil tiꞌj qrelijyon.
25 Yatzun kyiꞌj kye xjal aj nyaꞌtx tijajil Israel aj oje kyeꞌokslan, qetza oje qet qtzꞌibꞌaꞌna jun uꞌj te kyetz [nyaꞌtx presis tzan txik kyin te Kawbꞌil te qrelijyon sinoke cha aꞌox] tzan kꞌon xik kywaꞌaꞌ aj qꞌapomaj kye titzbꞌalil jun tidiꞌ, bꞌix tzan kꞌon xik kchiꞌ jun txkup aj cha nꞌel bꞌinoꞌ kyalq, bꞌix tzan kꞌon xik kchiꞌ xhchikyꞌel jun txkup, bꞌix tzan kꞌon kyekꞌajajin.”*
Aj Tjaw Tzyuꞌ Te Paꞌk Tuj Te Nin Jay Nabꞌil Qtata Dios
26 Ntons te Paꞌk ebꞌajxik tin tukyꞌiꞌl kye aj kaj ichan. Yaji tuj junky iwitq oqet tkꞌuluꞌ junx kyukyꞌiꞌl iktzaꞌ te Kawbꞌil nyolin tzan tkaj saq kyanim tuj twitz Qtata Dios. Yaji owox tuj te Nin Jay Nabꞌil Qtata Dios tzan txik tqꞌumaꞌ alkyetz qꞌij tuq omankuyon tzan tbꞌantik kyaqil aj nyolin tuq te Kawbꞌil tiꞌj te nini, bꞌix ikxji tzan txik kyqꞌapoꞌ te kyoyej aj presis tzan txik ksiꞌ junjunchaq te kyetz.
27 Ya aj chꞌinky tuq tmankun te twuqiꞌ qꞌij, junjun aj tijajil Israel aj tzajnaqeꞌ tuq tuj tkwentil Asy, ya ma xik kyen te Paꞌk atqet tuq tuj te Nin Jay Nabꞌil Qtata Dios, okykꞌuluj tzan kyjaw labꞌun kye xjal bꞌix eꞌok tenan tiꞌj te Paꞌk. 28 Nkyesikyꞌin tuq ikxjani: “¡Etetz aj tijajil Israel aꞌix, sekꞌ etonen waq qukyꞌila! Aj ntzaꞌn te xjal aj nxik txnaqꞌtzaꞌ nyaꞌtx tumeꞌl, aj nyaꞌtx ikxji eqꞌiꞌ tzan kye qxjalil bꞌix nyaꞌtx iktzaꞌ nyolin tuj te Kawbꞌil tiꞌj qrelijyon aj oqet stzꞌibꞌaꞌ Moisés, bꞌix nxnaqꞌtzan nyaꞌtx galan tiꞌj te ja Nin Jay Nabꞌil Qtata Dios bꞌix maꞌtx kyeꞌotz tin txqꞌan xjal aj nyaꞌtx tijajil Israel. Ikxji nkꞌulun jun bꞌan nyaꞌtx galan tiꞌj te ja Nin Jay aj pawaꞌ aꞌox te nabꞌil Qtata Dios.” 29 Nxik kyyoliꞌ tuq ikxjani tzan tpaj ojetq tuq tzꞌok kyen jun qerman aj Efeso, Trófimo tbꞌi,* ajun tuq tukyꞌi Paꞌk tuj aj amaqꞌji, bꞌix kyetz tuj kynabꞌl qa te Paꞌk owox tukꞌleꞌ tuj te Nin Jay Nabꞌil Qtata Dios.
30 Ntons kyaqil kye xjal tuj te amaqꞌ ebꞌajjaw labꞌun, exik karedin tzi, ojaw ktzyuꞌ te Paꞌk bꞌix owex kyjukiꞌ tiꞌjx te Nin Jay Nabꞌil Qtata Dios bꞌix okaj kylamoꞌ tlamelul. 31 Chꞌinky tuq tqet kykansaꞌ, bꞌix te kꞌulul mandad kyiꞌj kye kapitan kye soldad tuj Jerusalen owok xhchaꞌoꞌ, kyaqil kye xjal tuj te amaqꞌ ojetq tuq kyejaw labꞌun. 32 Ntons, tetz eꞌok xhchimoꞌ kye tsoldad bꞌix kye kapitan kye soldad bꞌix ebꞌajxik oqelan aj jaꞌ tuq akyeqet kye xjal. Ya ma xik kyeꞌeꞌ kye xjal ojetq pon te kꞌulul mandad kyukyꞌi tsoldad, ntons okaj ksiꞌ tzan tqet kybꞌujuꞌ te Paꞌk. 33 Ntons te kꞌulul mandad kye kapitan kye soldad owok laqꞌchet tiꞌj te Paꞌk bꞌix oqet ktzyuꞌ, oxik tkꞌuluꞌ mandad tzan tqet kykꞌaloꞌ tukyꞌi kabꞌeꞌ kaden. Yaji oxik xhchaꞌoꞌ abꞌl tuq tetz bꞌix tidiꞌ tuq ojetq tkꞌuluj. 34 Per kxol kye xjal junjun nkyqꞌumaꞌ tuq jun tidiꞌ bꞌix junjunky nkyqꞌumaꞌ tuq junky tidiꞌ, ikxji te kꞌulul mandad kꞌontiꞌl owel tnikyꞌ tidiꞌ te tumeꞌl tzan tpaj bꞌan nkyeqawjeꞌ tuq, mejor oxik tkꞌuluꞌ mandad tzan txik kyin tuj kyjay kye soldad. 35 Ya ma kyepon aj jaꞌ xhkaleliꞌ stziꞌ kyjay kye soldad, kye soldad oxik kyin te Paꞌk per cha ojaw kyiqaꞌ tzan tpaj kye xjal kygan tuq tzan kybꞌujun tetz. 36 Kyaqil tuq kye xjal lapikeꞌ tuq kyiꞌj bꞌix nkyesikyꞌin tuq ikxjani: “¡Intqet kanslet, intqet kanslet!”
37 Aj ikjaꞌn tuq tox in tuj kyjay kye soldad, te Paꞌk oxik xhchaꞌoꞌ tukyꞌi te kꞌulul mandad kyiꞌj kye kapitan kye soldad ikxjani: “¿Bꞌaꞌn tzan nyolin awukyꞌiꞌl jun chꞌi rat?” Yaji te kꞌulul mandad oxik xhchaꞌoꞌ ikxjani: “¡Ntons yatz bꞌaꞌn chyolin tuj yol gryeg! 38 ¿Nyaꞌtx peꞌ aꞌich yatz aj Ejipt aj oxik tkubꞌsaꞌ kykꞌuꞌj kye xjal tzan kyqꞌojin tiꞌj te gobyern, bꞌix yaji owex, oxik tuj te kyꞌixkꞌoj txꞌoꞌtxꞌ tukyꞌi kaj mil (4000) xjal aꞌeꞌ aj joyol qꞌoj?”
39 Yaji te Paꞌk oxik tqꞌumaꞌ ikxjani: “Wetz bꞌanꞌax aꞌin jun aj tijajil Israel bꞌix aꞌin aj Tars tuj tkwentil Silisy, jun nim amaqꞌ. Per tzoqpij chꞌin tzan nyolin wetz kyukyꞌiꞌl kye ja xjalni.” 40 Ya ma stzoqpij te kꞌulul mandad kye soldad tzan tyolin te Paꞌk, ntons te Paꞌk oqet waꞌlet twiꞌ te grad bꞌix ojaw tin tqꞌabꞌ tzan kylumet kye xjal. Ya ma kyelumet kye xjal, owaqꞌik tzan tyolin tuj te yol ebrey, oxik tqꞌumaꞌ ikxjani: