20
Aj Txik Te Paꞌk Toxmajjiꞌn-el Pakbꞌon Laqꞌchik
1 Ntons ya ma kyꞌik kyaqil nini, te Paꞌk eꞌok xhchimoꞌ kyaqil kye aj nkyeꞌokslan tuq tiꞌj Jesus, bꞌix oxik tsiꞌ junjun konsej te kyetz bꞌix etzaj txjaqꞌeꞌ tzan tkawin kyetz. Yaji ebꞌajkaj tkawiꞌ bꞌix oxik Masedony. 2 Otzajbꞌaj tbꞌetzaꞌ kyaqil tkwentil Masedony bꞌix nxik tuq tnimsaꞌ kykꞌuꞌj kye qerman bꞌix tidiꞌchq konsej nxik tuq tqꞌumaꞌ kyetz. Yaji oxik Gresy 3 bꞌix tzi okajten oxe qyaꞌ. Yaji ikjaꞌn tuq txik Siry, per owok xhchaꞌoꞌ kye aj tijajil Israel tuj aj luwarji ojetq tuq qet kybꞌisuꞌ tzan tuq tjaw ktzyuꞌ, mejor oqet tbꞌisuꞌ tzan tkyꞌik Masedony junkyꞌel.
4 Ebꞌajxik tukyꞌiꞌl te Sópater aj tkꞌajol Pir, jun aj amaqꞌ Berey; bꞌix Aristark bꞌix te Segundo, kyetz aꞌeꞌ aj amaqꞌ Tesalonk; bꞌix Gay aj amaqꞌ Derb; bꞌix te Timotey; bꞌix ax te Tíkiko bꞌix Trófimo aꞌeꞌ aj Asy. 5 Kyetz ebꞌajtbꞌayaj qwitza bꞌix oqet kyiyoꞌna tuj amaqꞌ Troas. 6 Per ya ma kyekyꞌik kye ninqꞌij aj nqowaꞌan te wabꞌj pan aj kꞌontiꞌl malsbꞌil tuj, qetza oxik tuj jun bark aj owetz Filipos bꞌix tuj jwebꞌ qꞌij owok qchimoꞌ qibꞌa amaqꞌ Troas bꞌix tzi oqetena wuq qꞌij.
Aj Tpon Te Paꞌk Tuj Amaqꞌ Troas
7 Ntons, tuj te tbꞌay qꞌij te saman, qetza owok qchimoꞌ qibꞌa kyukyꞌi kye qerman tzi tzan qwaꞌan junx,a bꞌix te Paꞌk owaqꞌik tzan txnaqꞌtzan qxola. Komo tuj junky qꞌij presis tuq tzan txik tuj tbꞌey, astilji oyolin nim tuj max aj qok chukaqꞌbꞌil. 8 Bꞌix tuj te kwart twiꞌ te jay aj jaꞌ tuq chimoꞌ qibꞌ, at tuq kyꞌilaꞌj kandil txaqomeꞌ. 9 Bꞌix at tuq jun kuꞌxon tbꞌi Ewtik, tetz witꞌlikqet tuq tuj jun tbentanul te jay. Bꞌix komo te Paꞌk onachqꞌin nim tzan txik txnaqꞌtzaꞌ, ntons te kuꞌxon owaj tzyuꞌ tkꞌuꞌj, dech otzaj tzꞌaqik max tuj toxiꞌ txol jawnaq te jay. Ya ma jaw kyeqꞌiꞌ, ojetq tuq kamik. 10 Ntons te Paꞌk oqetz, oqet mutzlet tajsik te kuꞌxon bꞌix ojaw xhchileꞌ, bꞌix oxik tqꞌumaꞌ kye xjal ikxjani: “Kꞌon kxobꞌ, tetz itzꞌojx.” 11 Yaji te Paꞌk ojax junkyꞌel aj jaꞌ tuq chimoꞌ qibꞌ bꞌix owaꞌana.b Ya ma qowaꞌan, te Paꞌk nyolin tuq kyukyꞌi kye qerman max aj stzaj txekaꞌj. Yaji oxikna tuj qbꞌey. 12 Bꞌix yatzun te kuꞌxon, owaj in tjay itzꞌoj bꞌix bꞌan nkyechalaj tuq.
13 Qetza otbꞌayajna twitz te Paꞌk bꞌix ojaxna tuj jun bark tzan qxikna max amaqꞌ Ason aj jaꞌ owokel jkꞌulbꞌaꞌna tuq te Paꞌk. Komo ikxji ojetq tuq qet tbꞌisuꞌ tetz tzan tpaj tgan tuq tzan txik tukyꞌi toq. 14 Ya ma tzꞌok jkꞌulbꞌaꞌna qibꞌ amaqꞌ Ason, tetz ojax qukyꞌila tuj bark bꞌix oxikna tuj jun amaqꞌ tbꞌi Mitilen. 15 Yaji tuj junky iwitq oꞌexna tzi ax tuj bark bꞌix opona qaynin twitz jun luwar tbꞌi Kiy. Ya tuj junky iwitq oxikna junxlaꞌ te aꞌ bꞌix opona tuj te amaqꞌ Sámos bꞌix yaji, tuj junky iwitq [tuj toxiꞌ qiꞌj] opona amaqꞌ Milet.
16 Okyꞌik ikxji tzan tpaj te Paꞌk ojetq tuq qet tbꞌisuꞌ tzan tkyꞌik xtxalaj amaqꞌ Efeso tzan tpaj kꞌon tgan tuq nachqꞌin tuj tkwentil Asy, tetz tgan tuq tpon luwew Jerusalen tzan jqeten txini tuj te nim qꞌij Pentecostés.
Aj Kykaj Tkawiꞌ Te Paꞌk Kye Qerman Aj Efeso
17 [Ntons tzi tuj Milet,] te Paꞌk oxik tlajoꞌ tmandader tzan ktzaj tukꞌleꞌ kye tijxjal kxol kye qerman tuj Efeso. 18 Ya ma kyepon, oxik tqꞌumaꞌ kyetz ikxjani: “Etetz etebꞌen titzaꞌ wetz nkyinbꞌet tuj tumeꞌl exol etetz atxkix aj wul tzani tuj tkwentil Asy. 19 Wetz qꞌapoꞌ wibꞌ nkyinꞌaqꞌunankix tuq te Qajawil bꞌix kꞌontiꞌl tuq nkyinbꞌisun wiꞌjx wetz, sinoke nim tuq nkyinbꞌisun kyiꞌj kye qermanc anke tidiꞌchq xhchoꞌnal nkyꞌik tuq wiꞌj tzan tpaj nyaꞌtx galan nkybꞌisuꞌ kye aj tijajil Israel wiꞌj. 20 Bꞌix wetz kꞌontiꞌl okaj nsiꞌ tzan txik npakbꞌaꞌ te aj bꞌan galan te etetz, nxikkix tuq nxnaqꞌtzaꞌ kywitz kyaqil xjal bꞌix jaꞌchq tuj junjun jay. 21 Nxik tuq npakbꞌaꞌ kyukyꞌi kye aj tijajil Israel bꞌix kyukyꞌi kye aj nyaꞌtx tijajil Israel, oje xik nqꞌumaꞌ kyetz tzan tjaw kkyꞌixpuꞌ kynabꞌlin iktzaꞌ te Qtata Dios tgan bꞌix tzan tok kywitꞌbꞌaꞌ kykꞌuꞌj tiꞌj Qajaw Jesus.
22 Ajnaꞌl wetz ma kyinxik Jerusalen bꞌix tuj wanim nkyinnaꞌon bꞌan presis tzan nxik anke kꞌontiꞌl webꞌen tidiꞌ okyꞌel wiꞌj txini. 23 Per tuj kyaqil amaqꞌ aj jaꞌ nkyinpon, te Txew Dios ntzaj tqꞌumaꞌ tuj wanim okyꞌel tidiꞌchq xhchoꞌnal wiꞌj, bꞌix okyinqtex siꞌ tuj pres, okyinqtel kꞌaloꞌ tukyꞌi kaden. 24 Per wetz kꞌontiꞌl nkyinbꞌisun qa okyinkamel, sinoke cha aꞌox ngan tzan tbꞌantik kyaqil te aj okaj tsiꞌ te Qajaw Jesus wetz, tzan txik npakbꞌaꞌ te tpakbꞌalil titzaꞌ nqokolet tzan te Qtata Dios aj bꞌaꞌn galan nabꞌlin qukyꞌiꞌl.* 25 Wetz oje kyinpakbꞌan exol etetz te tumeꞌl titzaꞌ tzan ekaj tuj tqꞌabꞌ Qtata Dios. Bꞌix ajnaꞌl, wetz sewur atin ya nlay kyinꞌok eꞌeꞌ tzan nijunwt te etetz.
26 Wetz ngan tzan txik nqꞌumaꞌ etetz ajnaꞌl, kꞌontiꞌl npaj tiꞌj kyaqil aj okyꞌel kyiꞌj* kye xjal. 27 Komo wetz oxik npakbꞌaꞌ kyaqil te tpakbꞌalil galan aj bꞌisuꞌxkix tuq tzan te Qtata Dios bꞌix kꞌontiꞌl oqet wewaꞌ chꞌinwt. 28 Intok esiꞌ waq enabꞌl etiꞌjx etetz, bꞌix kyiꞌj kye qermand aj nkyexik eteꞌeꞌ tzan tpaj okxkaj siꞌ tzan te Txew Dios te kꞌulul kwent te kyetz. Etetz a tgan tzan kyqet ekꞌuluꞌ kwent kyaqil kye qerman aj nkyeꞌokslan tiꞌj te Qtata Dios, kyaqil kye aj ajixk tetz etzaj tukꞌleꞌ tzan tpaj tkamlen aj tel xhchikyꞌel. 29 Wetz webꞌen, oj waj wetz, kyeꞌul txqꞌanky xjal kꞌulul tidiꞌchq nyaꞌtx galan kyiꞌj kye qerman, kyeꞌul iktzaꞌ xoꞌj aj bꞌan xtxꞌuꞌj npon kynajsaꞌ kye karner. 30 Bꞌix exolx etetz, okyeꞌelatz junjun aj oxeꞌl kxnaqꞌtzaꞌ tidiꞌchq aj nyaꞌtx bꞌanꞌax tzan kyqet kyeqꞌiꞌ kye aj nkyeꞌokslan tiꞌj Jesus. 31 Astilji, intok esiꞌ waq enabꞌl. Instzaj enaꞌoꞌ, wetz oxe aqꞌbꞌi aj maꞌtx kyinqeten exol, kꞌontiꞌl okaj nsiꞌ tzan txik nsiꞌ jun konsej etukyꞌiꞌl ekyaqil etetz anke tidiꞌchq tuq xhchoꞌnal nꞌok wen. 32 Ajnaꞌl waq erman, wetz witꞌlik nkꞌuꞌj tzan tonen etukyꞌiꞌl te Qajawil bꞌix te Tyol aj bꞌan galan tzan eten bꞌan jwert tukyꞌiꞌl bꞌix tzan txik tsiꞌ te etetz te nim bꞌan galan aj oqet tbꞌisuꞌ tzan stzaj tsiꞌ te qkyaqil qetz aj pawamoꞌ aꞌox te tetz.
33 Wetz kꞌontiꞌl maꞌtx tzꞌel nqꞌajabꞌ tiꞌj jun tidiꞌ te junky, kꞌontiꞌl maꞌtx tzꞌel nganiꞌ stumin ni tqꞌanaq. 34 Etetz etebꞌen, wetz maꞌtx kyinꞌaqꞌunan tukyꞌi nqꞌabꞌx tzan tuq toknoj kyaqil aj presis te wetz bꞌix kye aj ajuneꞌ tuq wukyꞌiꞌl. 35 Wetz oje kxik nxnaqꞌtzaꞌ, aji te tumeꞌl tzan qaqꞌunan bꞌix ikxji tzan qonen kyukyꞌi kye aj presis jun onbꞌil te kyetz. Komo iktzaꞌx otqꞌumaj te Qajaw Jesus ikxjani: “Mas nchalaj qanim oj txik qoyeꞌ jun tidiꞌ te junky, twitz oj jkꞌamon.””
36 Ntons, ya ma xik tqꞌumaꞌ kyaqil ntzani, te Paꞌk oqet mejlet bꞌix owokten xnaqꞌtzon kyukyꞌi kkyaqil kyetz. 37 Kkyaqil ebꞌajꞌoqꞌ bꞌix otzaj kcheleꞌ te Paꞌk bꞌix ekawin tukyꞌiꞌl tukyꞌi jun limbꞌil bꞌan galan.e 38 Kye xjal bꞌan nkyebꞌisun tuq tzan tpaj ojetq tuq xik tqꞌumaꞌ kyetz, ya nlay tuq tzꞌok kyeꞌeꞌky. Yaji oxwaꞌq kywabꞌaꞌtz max tuj te bark.