19
Aj Stzaj Te Txew Dios Kyajsik Kye Aj Efeso
1 Aj tzunx tuq atqet te Pol tuj Korint, yatzun te Paꞌk tkyꞌiklen kyuj junjun luwar laqꞌchik stziꞌ te nim aꞌ, opon tuj amaqꞌ Efeso aj jaꞌ eꞌoknoj twitz junjun xjal aj nkyeꞌokslan tiꞌj Jesus. 2 Oxik tqꞌumaꞌ kyetz ikxjani: “¿Otzaj peꞌetajsik etetz te Txew Dios aj etokslan?” Kyetzaj kyetz, owaj ktzaqꞌbꞌeꞌ ikxjani: “Qetza minaꞌ tok qchaꞌoꞌna qa at jun Txew Dios.” 3 Ntons te Paꞌk oxik xhchaꞌoꞌ kyetz: “¿Ntons tukyꞌi abꞌl qbꞌi ojaw siꞌ aꞌ etetz ewiꞌ?” Yaji kyetz owaj ktzaqꞌbꞌeꞌ: “Tukyꞌi tumeꞌl iktzaꞌ aj ntxnaqꞌtzaꞌ tuq te Waꞌnch.” 4 Yaji te Paꞌk oxik tqꞌumaꞌ ikxjani: “Te Waꞌnch njaw tsiꞌ tuq aꞌ kywiꞌ kye xjal tjawlen kkyꞌixpuꞌ kynabꞌlin bꞌix nxik tuq tqꞌumaꞌ kyetz tzan kyokslan tuq tiꞌj te aj tzul mas yaj, bꞌix a tuq te Jesus aj tzul.”* 5 Ya ma tzꞌok kchaꞌoꞌ ikxji, kye xjal ojaw siꞌ aꞌ kywiꞌ tukyꞌi tbꞌi Qajaw Jesus. 6 Ya ma qet tsiꞌ te Paꞌk tqꞌabꞌ kyajsik, yaji te Txew Dios otzaj kyajsik bꞌix eꞌaqꞌik tzan kyyolin tuj junky yol, bꞌix epakbꞌan aj otzaj qꞌumaꞌ kyetz tzan Qtata Dios. 7 Kyetz kabꞌlajuj xjal kybꞌet tuq tzan kkyaqil.
8 Ntons te Paꞌk nꞌox tuq tuj te jay nabꞌil Dios bꞌix opakbꞌan oxe qyaꞌ tzi tukyꞌi jun tkꞌuꞌjlal bꞌix nyolin tuq kyukyꞌiꞌl bꞌix nkyexik tuq txnaqꞌtzaꞌ tiꞌj te tumeꞌl titzaꞌ tzan kykaj tuj tqꞌabꞌ Qtata Dios bꞌix kye xjal nkyeꞌokslan tuq. 9 Per ateꞌ tuq txqꞌanky aj bꞌan tzꞌak-eꞌ, kꞌon kygan tuq tzan kyokslan sinoke kywitz kye xjal cha nkyeyolin tuq nyaꞌtx galan tiꞌj te Tumelila [tiꞌj Qajawil]. Ntons te Paꞌk owel tpawaꞌ tibꞌ kyiꞌj, bꞌix ebꞌajxik tin tukyꞌiꞌl kye aj ojetq tuq kyeꞌokslan tiꞌj Jesus, exik tin tuj jun skwel aj te jun xjal tbꞌi Tiran, bꞌix tzi nyolin tuq bꞌajqꞌij kyukyꞌiꞌl. 10 Ikxji otkꞌuluj kabꞌeꞌ aqꞌbꞌi, bꞌix kyaqil kye aj nkyenajan tuq kyuj kye amaqꞌ tuj Asy, kyaqil aj tijajil Israel bꞌix kye aj nyaꞌtx tijajil Israel, kyetz owok kchaꞌoꞌ te Tyol Qajawil. 11 Te Qtata Dios nqet tuq tkꞌuluꞌ tidiꞌchq yekꞌbꞌil aj aꞌox tetz nbꞌantik titzaꞌ, nxik tuq tsiꞌ tajwalil te Paꞌk bꞌix ikxji kyꞌilaꞌj yabꞌ nkyebꞌantik tuq titzaꞌ. 12 Kye xjal nxik tuq kyeqꞌiꞌ kꞌalbꞌilj qatzun xhqꞌapjji aj ojetq tuq tzꞌok tmakoꞌ te Paꞌk, bꞌix yaji nqet tuq ksiꞌ kyajsik kye yabꞌ bꞌix te yabꞌil nꞌel tuq kyiꞌj bꞌix kye malspirit nkyejatz tuq tuj kyanim.
Aj Okyꞌik Kyiꞌj Wuq Xjal Aj Njatz Kyin Tuq Malspirit Tuj Kyanim Xjal
13 Ntons, junjun aj tijajil Israel qꞌanon xbꞌetlon-eꞌ, aj njatz tuq kyin malspirit tuj kyanim xjal, yaji oqet kykꞌuluꞌ probar tzan kykꞌulun nini tukyꞌi tbꞌi Jesus. Nxik tuq kyqꞌumaꞌ te jun malspirit ikxjani: “Oxeꞌl nkꞌuluꞌ mandad yatz tukyꞌi tbꞌi te Jesus aj ntpakbꞌaꞌ te Paꞌk.” 14 Ntons jun xjal aj tijajil Israel, jun pal aj nim tajwalil, Exheb tbꞌi, tetz ateꞌ tuq wuq tkꞌajol bꞌix kywuqil kyetz nkyekꞌulun tuq ikxji. 15 Yaji te malspirit owajtz stzaqꞌbꞌeꞌ ikxjani: “Wetz wotzqiꞌ te Jesus bꞌix ax te Paꞌk, per etetz kꞌontiꞌl wotzqimix aꞌix. ¿Abꞌlixtzun etetz?” 16 Yaji te xjal aj jaꞌ tuq atqex te malspirit oxik lipan kyiꞌj bꞌix eqet titzaꞌ bꞌix eqet tbꞌujuꞌ, bꞌix sqit ebꞌajꞌex oqik tuj te jay bꞌix tukyꞌi okꞌol.
17 Kyaqil kye xjal aj nkyenajan tuq tuj amaqꞌ Efeso, kye aj tijajil Israel bꞌix aꞌeꞌ aj nyaꞌtx tijajil Israel, kyetz owok kchaꞌoꞌ te ntzani, bꞌix kkyaqil ebꞌajxobꞌ. Ikxji te Qajaw Jesus nqet tuq bꞌaj jiqꞌbꞌaꞌ kxol. 18 Kyꞌilaꞌj kye aj ojetq tuq kyeꞌokslan, njatz tuq kyqꞌumaꞌ kchoj kywitz kyaqil bꞌix tidiꞌchq nyaꞌtx galan aj kchmanbꞌen tuq. 19 Kyꞌilaꞌj kye aj bꞌaꞌn tuq kyechmanin ebꞌajꞌokslan, bꞌix otzaj kyin kyaqil kyuꞌuj aj nꞌoken tuq kyitzaꞌ bꞌix oqet kkyꞌeꞌsaꞌ kywitz kyaqil. Oxik kyin kykwent jatebꞌ tzan kyaqil kye uꞌj, bꞌix tzan kyaqil jakon lajuj tuj oxqal mil (50,000) tmin xtxꞌotxꞌal plat. 20 Ikxji te tpakbꞌalil tiꞌj te Qajawil jaꞌchq tuq nꞌok chaꞌoꞌ bꞌix nqet tuq yekꞌuꞌ tajwalil.
21 Ntons, ya ma kyꞌik kyaqil ntzani, te Paꞌk oqet tbꞌisuꞌ tuj tanim tzan txik Jerusalen, per tbꞌay mejor tzan txik tuq qꞌolbꞌel kye qerman tuj Masedony bꞌix Akay. Oxik tqꞌumaꞌ ikxjani: “Chaꞌoj nten Jerusalen, yaji a tgan tzan nxik max Rom.” 22 Ntons, tetz exik tlajoꞌ kabꞌeꞌ xjal tuj Masedony aj nkyeꞌonen tuq tukyꞌiꞌl, jun Timotey bꞌix te junky Erast tbꞌi, bꞌix yaji tetz okaj kabꞌeꞌky qꞌij Asy.
Aj Kyjaw Labꞌun Kye Xjal Tuj Amaqꞌ Efeso
23 Ntons tuj aj tyempji ebꞌajjaw labꞌun kye xjal tuj Efeso tzan tpaj [nyaꞌtx dyakwerd tuq ateꞌ tukyꞌi] te Tumelil* [tiꞌj Qajawil]. 24 Komo tuj aj amaqꞌji, at tuq jun xjal aj tbꞌi Met, tetz jun tzꞌaqol, bꞌix nqet tzꞌaqoꞌ tuq tidiꞌchq tukyꞌi xtxꞌotxꞌal plat, bꞌix nkꞌulun tuq titzbꞌalil te jay aj jaꞌ tuq ntzaj naꞌoꞌ te dios aj tbꞌi Artemis,b bꞌix tzan tpaj tetz kye tzꞌaqol nkyekꞌulun ganar tuq nim tmin. 25 Ntons eꞌok xhchimoꞌ kkyaqil kye txqꞌanky aj parej kyaqꞌun, bꞌix oxik tqꞌumaꞌ kyetz ikxjani: “Instzaj echan waq, etetz etebꞌen tzan tpaj te ja qaqꞌunni nꞌok nim qtumin. 26 Bꞌix nꞌok echaꞌoꞌ tiꞌj te xjal aj Paꞌk tbꞌini, tetz nxik tqꞌumaꞌ kye xjal, kye dios aj nqet jkꞌuluꞌ tukyꞌi jqꞌabꞌ kꞌontiꞌl tidiꞌ token, bꞌix ikxji kyꞌilaꞌj xjal tuj ja qamaqꞌ Efesoni bꞌix tuj kyaqil amaqꞌ tuj tkwentil Asy, oje kyeꞌokslan tetz bꞌix oje kaj kykolaꞌ iktzaꞌ eqꞌiꞌ qitzaꞌ. 27 Te ntzani nyaꞌtx galan tzan tpaj qanq te qaqꞌun nlay qet en galan tzan kye xjal, bꞌix ax kebal nlay qet xjaniꞌ te jay nabꞌil te dios Artemis aj nqet jiqꞌbꞌaꞌ nim. Ikxji owelal ikꞌoꞌ kyaqil tajwalil, tetz aj nqet naꞌoꞌ tzan kye xjal tuj kyaqil amaqꞌ tuj tkwentil Asy bꞌix tzan kyaqil xjal twitz txꞌoꞌtxꞌ.”
28 Ya ma tzꞌok kchaꞌoꞌ ikxji, kkyaqil otzaj kyqꞌoj bꞌix oxik kyqꞌumaꞌ kongan ikxjani: “¡A te Artemis dios tiꞌj qamaqꞌ Efeso! ¡A tetz nim tajwalil!” 29 Kye xjal ejaw labꞌun, bꞌix derepent owok kchimoꞌ kyibꞌ, eꞌok labꞌun kyiꞌj kabꞌeꞌ xjal aj Masedony aj ajuneꞌ tuq tukyꞌi Paꞌk, te Gay bꞌix Aristark, bꞌix oeꞌex kyjukiꞌ bꞌix epon kyin aj jaꞌkix tuq nꞌok kchimoꞌ kyibꞌ. 30 Te Paꞌk tgan tuq tzan tox kxol tzan tuq tyolin kyukyꞌiꞌl per kye aꞌeꞌ qerman kꞌontiꞌl oktzoqpij. 31 Bꞌix ax junjun xjal aj at nim kyajwalil aj nkyekꞌulun mandad tuj junjun amaqꞌ aj Asy, kyetz tajyol-eꞌ tuq te Paꞌk, bꞌix ax kyetz oxik kylajoꞌ kymandader tukyꞌi Paꞌk tzan tqet tuq kywitz twitz tzan kꞌon tuq tpon tyekꞌuꞌ twitz kxol kye xjal. 32 Kye xjal aj nkyelabꞌun tuq, junjun nkyesikyꞌin jun tidiꞌ bꞌix junjunky chuktky, tzan tpaj kꞌontiꞌl tuq kyebꞌen tidiꞌ nkyꞌik, bꞌix kyꞌilaꞌj kꞌontiꞌl tuq kyebꞌen tistil ojetq tzꞌok kchimoꞌ kyibꞌ tzi. 33 Txqꞌan xjal aj tijajil Israel oxik kyyoliꞌ tumeꞌl te jun xjal Jant tbꞌi, tzan tyolin kyukyꞌi kye xjal. Te Jant ojaw tin tqꞌabꞌ [tzan tuq kylumet] tzan txik tyoliꞌ xtxolil tiꞌj te aj nkyꞌik. 34 Per ya ma tzꞌel kynikyꞌ tiꞌj qa tetz jun aj tijajil Israel, kye xjal mas ejaw sikyꞌin, qanq kabꞌeꞌ or eten tzan ksikyꞌin: “¡A te Artemis dios tiꞌj qamaqꞌ Efeso! ¡A tetz nim tajwalil!”
35 Yaji te aj tzꞌibꞌon tuj te despach elumet kye xjal titzaꞌ, bꞌix oxik tqꞌumaꞌ kyetz ikxjani: “Etetz waq aj Efeso, kyaqil xjal kyebꞌen qetz aj Efeso nqet jkꞌuluꞌ kwent te jay nabꞌil te dios Artemis aj bꞌan jiqꞌbꞌaꞌ nim bꞌix te titzbꞌalil aj tzajnaq tuj kaꞌj.c 36 Nijunwt nyolin qa nyaꞌtx ikxji. Astilji presis tzan elumet chꞌin bꞌix kꞌon ekꞌuluj jun tidiꞌ tzan tpaj bꞌan nksakantik aj otzajel enaꞌon tetz junkyꞌel mas yajx. 37 Etetz maꞌtx kyetzaj etin kye ja xjalni bꞌix kyetz kꞌontiꞌl tidiꞌ nyaꞌtx galan maꞌtx kykꞌuluj tiꞌj te jay aj jaꞌ ntzaj qnaꞌoꞌ te dios Artemis bꞌix kꞌontiꞌl maꞌtx xtxik kyyoliꞌ kyyol nyaꞌtx galan tiꞌj. 38 Ikxji qa te Met bꞌix kye aj nkyeꞌaqꞌunan tukyꞌiꞌl at kyqꞌoj kyiꞌj ja xjalni, ntons akyeqet kye kꞌulul mandad bꞌix at kydespach, mejor tzan kypon txini qꞌumal tidiꞌ kyil ja xjalni. 39 Bꞌix qa etetz egan junky tidiꞌ, ntons bꞌaꞌn tzan tok qchimoꞌ qibꞌ tuj jun tumeꞌl iktzaꞌx nyolin te Kawbꞌil. 40 Komo tzan tpaj kyaqil aj maꞌtx kyꞌikni, kebal qoꞌok qꞌumaꞌ aj joyol qꞌoj aꞌoꞌ, bꞌix qa otzajel chaꞌoꞌ tistil ma kyꞌik kyaqil ntzani, kꞌontiꞌl tidiꞌ bꞌaꞌn tzan txik jqꞌumaꞌ, komo kꞌontiꞌl qebꞌen.” 41 Ya ma xik tqꞌumaꞌ ikxji, ebꞌajꞌaj tlajoꞌ kyaqil kye xjal kyjay.