18
Aj Tyolin Te Qajawil Tukyꞌi Paꞌk Tzan Kꞌon Tkaj Tsiꞌ Tzan Tpakbꞌan Tuj Amaqꞌ Korint
1 Ya ma kyꞌik kyaqil te nini, yaji te Paꞌk owetz Aténas bꞌix oxik max amaqꞌ Korint. 2 Tzi owoknoj twitz tetz jun ichan aj tijajil Israel, Akiy tbꞌi. Tetz aj tuj tkwentil Pont tuq bꞌix te txuꞌjel tbꞌi Xhil. Kyetz man tuq kyponlen tzi, tzajnaqeꞌ tuq Italy tzan tpaj te Claudio [aj nkꞌulun mandad tzi] ojetq tuq xik tkꞌuluꞌ mandad tzan kyex kyaqil kye aj tijajil Israel aj nkyenajan tuq tuj Rom. Ntons te Paꞌk oxwaꞌq qꞌolbꞌel kyetz. 3 Bꞌix komo te Paꞌk parej tuq taqꞌun iktzaꞌx tuq kyetz, komo kyetz kꞌulul jay pach pur xtxꞌotxꞌal tzꞌuꞌm tuq, ntons tetz okajten kyukyꞌiꞌl aqꞌunon.
4 Kyaqil qꞌij ojlaꞌmj te Paꞌk nxik tuq tuj te jay nabꞌil Dios, bꞌix tzi nxik txnaqꞌtzaꞌ tuq kye xjal. Nim tuq nyolin tzan kyokslan kye xjal aj tijajil Israel bꞌix ax kye xjal aj nyaꞌtx tijajil Israel.
5 Ya ma kyepon te Chila bꞌix te Timotey tzajnaqeꞌ tuq tkwentil Masedony, yatzun te Paꞌk okaj tsiꞌ tzan taqꞌunan bꞌix owokten pakbꞌal Tyol Qtata Dios bꞌajqꞌij. Tukyꞌi jun tkꞌuꞌjlal nxik tuq tkpakbꞌaꞌ kyukyꞌi kye aj tijajil Israel, tetz tebꞌenky tuq a te Jesus te Koloyon Aj Qꞌumankaj Oqtxiꞌ. 6 Per yaji, txqꞌan aj kxol kyetz nkyeyolin tuq nyaꞌtx galan tiꞌj Paꞌk bꞌix kꞌontiꞌl tuq nkyokslaꞌ. Astilji te Paꞌk owel tkyitoꞌ tqꞌanaq kywitz [tzan tqet tyekꞌuꞌ tetz kꞌontiꞌl oqet tuj twitz te aj okykꞌuluj], bꞌix oxik tqꞌumaꞌ kyetz ikxjani: “Aꞌixk at epaj qa tzul jun xhchoꞌnal etajsik ajnaꞌl. Wetz ajnaꞌl kꞌontiꞌl npaj tiꞌj te aj okyꞌel etiꞌj.* Ajnaꞌl ma kyinxik kxol kye aj nyaꞌtx tijajil Israel.”
7 Yaji owetz tuj te jay nabꞌil Dios bꞌix oxik tjay jun xjal tbꞌi Ticio Justo, jun xjal [aj nyaꞌtx tijajil Israel per]b nnaꞌon tuq Qtata Dios, bꞌix tetz tjay atqet tuq qaynin tiꞌj te jay nabꞌil Dios. 8 Ntons at tuq jun xjal Krisp tbꞌi, tetz aji tuq te twitzaleꞌ tuj te jay nabꞌil Dios [tuj aj amaqꞌji], bꞌix ax tetz owokslan tiꞌj Qajawil kyukyꞌi kyaqil aj tuj tjay. Bꞌix kyꞌilaꞌj xjal aj amaqꞌ Korint aj nꞌok kchaꞌoꞌ tuq te aj nxik tpakbꞌaꞌ te Paꞌk, eꞌokslan bꞌix njaw tuq siꞌ aꞌ kywiꞌ.
9 Ntons, jun qonikꞌan te Paꞌk owok jotoꞌ tuj twitz tzan te Qajawil, bꞌix te Qajawil oxik tqꞌumaꞌ tetz ikxjani: “Kꞌon txobꞌ. Intxik apakbꞌaꞌ te tpakbꞌalil galan bꞌix kꞌon chlumet, 10 tzan tpaj wetz akyinqet awukyꞌiꞌl bꞌix nijunwt abꞌl bꞌaꞌn tzan tok tkꞌuluꞌ jun nyaꞌtx galan awiꞌj. Wetz ateꞌ kyꞌilaꞌj xjal tuj ja amaqꞌni aj oje kyeꞌel njoyoꞌ.”
11 Ntons te Paꞌk okajten kxol kye aj Korint jun aqꞌbꞌi tukyꞌi waqaq qyaꞌ, bꞌix nxik tuq txnaqꞌtzaꞌ tyol Qtata Dios kxol. 12 Yaji, tuj jun tyemp at tuq junky kꞌulul mandad tuj amaqꞌ Akay, Galyon tbꞌi, tuj aj tyempji kye aj tijajil Israel [aj nkyeqꞌojin tuq tiꞌj te Paꞌk], oqet kykawlaꞌ junchꞌin bꞌix ojaw ktzyuꞌ te Paꞌk bꞌix oxik kyin tuj despach twitz te kꞌulul mandad. 13 Oxik kyqꞌumaꞌ ikxjani: “Te ja xjal ntzani nxik tkubꞌsaꞌ kykꞌuꞌj kye xjal tzan kynaꞌon te Qtata Dios tukyꞌi junky tumeꞌl aj kꞌontiꞌl nyolin te Kawbꞌil tiꞌj qrelijyon.” 14 Ya ma tzꞌaqꞌik tuq te Paꞌk tzan tyolin, tzaj te Galyon, oxik tqꞌumaꞌ kye xjal ikxjani: “Qa tzan tpaj-wit jun til nyaꞌtx nim qatzun bꞌan nimji, aꞌinx-tal wetz owokel nsiꞌ nwiꞌ etiꞌj etetz aj tijajil Israel. 15 Per komo etetz cha nkxwululun tiꞌj jun yol bꞌix tiꞌj kybꞌi xjal bꞌix tiꞌj te Kawbꞌil te erelijyon etetz, intok etenx etetz titzaꞌ okxteyon. Wetz kꞌon ngan tzan wok jun pujul il exol etetz tiꞌj te nini.” 16 Ntons ebꞌajꞌetz tlajoꞌ tuj tdespach. 17 Ntons yaji, kye xjal eꞌok labꞌun tiꞌj te Sóstenes, te twitzaleꞌ tuj te jay nabꞌil Dios tzi, bꞌix oqetbꞌaj kybꞌujuꞌ ax twitz te despach, per te Galyon kꞌontiꞌl tidiꞌ otqꞌumaj.
Aj Tmeltzꞌjik Junkyꞌel Te Paꞌk Tuj Amaqꞌ Antyokiy Tuj Tkwentil Siry
18 Te Paꞌk okajten kyꞌilaꞌj qꞌijky tzi, yaji ekaj tkawiꞌ kye qerman bꞌix oxik tuj bark tzan tpon Siry, bꞌix ajuneꞌ tuq tukyꞌiꞌl te Akiy bꞌix Xhil. Ya ma pon amaqꞌ Senkrey owel tjosoꞌ tiꞌj twiꞌ tzan tpaj ojetq tuq xik tsiꞌ tjurament.* 19 Yaji ebꞌajpon Efeso, bꞌix tetz ekaj tsiꞌ tzi te Akiy bꞌix te Xhil, bꞌix oxik tuj te jay nabꞌil Dios bꞌix nyolin tuq kyukyꞌi kye aj tijajil Israel tzi. 20 Kye xjal oqet kywitz twitz tzan tuq tkaj kabꞌeꞌky qꞌij, per tetz kꞌontiꞌl otbꞌanij tzan tkaj. 21 Ekaj tkawiꞌ bꞌix oxik tqꞌumaꞌ kyetz: “(A tgan tzan nten Jerusalen tuj ninqꞌij aj okyꞌel naj)c per kyinꞌul junkyꞌel etukyꞌiꞌl qa te Qtata Dios tgan.” Yaji owex tzi tuj amaqꞌ Efeso bꞌix oxik tuj jun bark.
22 Yaji opon tuj amaqꞌ Sesarey, bꞌix ojax [Jerusalen] limal kye qerman txini. Yaji oqex Antyokiy junkyꞌel.
23 Ya ma kyꞌik nim tyemp tzi, oxik tuj tkwentil Galasy bꞌix Prijy qꞌolbꞌel kye bꞌuchꞌuj qerman tuj junjunchaq amaqꞌ txini bꞌix nkyexik tuq tnimsaꞌ kykꞌuꞌj kyaqil kye aj nkyeꞌokslan tiꞌj Jesus.
Aj Tpakbꞌan Te Pol Tuj Amaqꞌ Efeso
24 Ntons, tuj aj tyempji opon tuj amaqꞌ Efeso jun xjal tbꞌi Pol. Tetz jun aj tijajil Israel aj amaqꞌ Alejandriy tuq, bꞌix npakbꞌan tuq bꞌan galan, bꞌan totzqiꞌ tuq nim tiꞌj te Tuꞌjal Dios. 25 Tetz ojetq tuq tzaj xnaqꞌtzaꞌ tiꞌj te tpakbꞌalil tiꞌj Qajawil, bꞌix tukyꞌi jun tkꞌuꞌjlal npakbꞌan bꞌix bꞌan byenech nxnaqꞌtzan tuq tiꞌj te Jesus, per aꞌox tuq tebꞌen tiꞌj te aj ntxnaqꞌtzaꞌ tuq te Waꞌnch aj njaw tsiꞌ aꞌ tuq kywiꞌ xjal. 26 Ntons jun qꞌij owaqꞌik tzan tpakbꞌan tukyꞌi jun tkꞌuꞌjlal tuj te jay nabꞌil Dios [aj jaꞌ nkyepon tuq Akiy bꞌix Xhil], per yatzun kyetz, ya ma tzꞌok kchaꞌoꞌ tidiꞌ tuq ntxnaqꞌtzaꞌ, ntons kyetz eyolin tukyꞌiꞌl apart, kchukel, oxik kyqꞌumaꞌ xtxolil tiꞌj te Qtata Dios.
27 Yaji, komo tetz tgan tuq tzan txik [pakbꞌon] tuj tkwentil Akay, kye qerman oxik kynimsaꞌ tkꞌuꞌj bꞌix oqet ktzꞌibꞌaꞌ jun uꞌj kye aꞌeꞌ aj nkyeꞌokslan tiꞌj Jesus txini tzan kykꞌamon te tetz galan. Ya ma pon txini kxol kye aj ojetq kyeꞌokslan tzan tpaj te nim bꞌan galan aj ojetq qet tkꞌuluꞌ te Qajawil tuj kyanim, ntons tetz owonen nim kyukyꞌiꞌl. 28 Kywitz kyaqil xjal nxik tuq tpakbꞌaꞌ tukyꞌi jun tkꞌuꞌjlal, bꞌix kye aj tijajil Israel aj nyaꞌtx dyakwerd tuq ateꞌ, kꞌontiꞌl obꞌantik tzan taj ktzaqꞌbꞌeꞌ tzan tpaj tetz nqet tuq tyekꞌuꞌ tukyꞌi Tuꞌjalx Dios, te Jesus aji tuq te Koloyon Aj Qꞌumankaj Oqtxiꞌ.