17
Aj Tpakbꞌan Paꞌk Tuj Amaqꞌ Tesalonk
1 Ya ma kyekyꞌik tuj tkwentil te Anfípolis bꞌix te Polony, yaji ebꞌajpon Tesalonk aj jaꞌ at tuq jun jay nabꞌil Dios jaꞌ tuq nꞌok kchimoꞌ kyibꞌ kye aj tijajil Israel. 2 Iktzaꞌx naqꞌik tuq te Paꞌk, owox kxol kyetz, bꞌix oxe qꞌij aj qꞌij ojlaꞌmj tetz oyolin kyukyꞌiꞌl tiꞌj te Tuꞌjal Dios. 3 Nxik tuq tqꞌumaꞌ xtxolil bꞌix nqet tuq tyekꞌuꞌ tukyꞌi Tuꞌjal Dios, maꞌkix tuq kamik te Koloyon Aj Qꞌumankaj Oqtxiꞌ, bꞌix maꞌkix tuq jaw anqꞌin kxol kye kamnaq. Tetz nxik tuq tyoliꞌ ikxjani: “Te Jesus aj nxik npakbꞌaꞌ etetzni, a tetz te Koloyon Aj Qꞌumankaj Oqtxiꞌ.” 4 Bꞌix junjun kxol kyetz ebꞌajꞌokslan bꞌix owok kyjunchꞌiꞌ kyibꞌ tukyꞌi Paꞌk bꞌix Chil, bꞌix ax kyꞌilaꞌj aj nyaꞌtx tijajil Israel aj nkyexjanin tuq Dios ax kyetz ebꞌajꞌokslan, bꞌix ax kyꞌilaꞌj xuj aj tlimaqal xjal-eꞌ.
5 Ntons kye xjal aj nim kyajwalil kxol kye aj tijajil Israel [aj kꞌontiꞌl nkyeꞌokslan tuj aj amaqꞌji], kyetz bꞌan nkyeꞌekꞌawin tuq, bꞌix eꞌok kchimoꞌ txqꞌan xjal aj nyaꞌtx galan kyenabꞌlin aj cha nkyebꞌaqanjeꞌ tuq tuj amaqꞌ, ntons okykꞌuluj tzan kyjawlabꞌun kye xjal tuj te amaqꞌ. Ebꞌajꞌox tuj tjay Jason joyol te Paꞌk bꞌix Chil tzan tuq kyetz kyeqꞌiꞌ jwer tzan tuq txik kyqꞌapoꞌ tuj kyqꞌabꞌ kye xjal. 6 Yaji, komo kꞌontiꞌl owoknoj te Paꞌk kyitzaꞌ, astilji exik kyeqꞌiꞌ te Jason bꞌix junjunky qerman kywitz kye kꞌulul mandad tuj te amaqꞌ. Oxik kyqꞌumaꞌ kongan ikxjani: “Kye ja xjalni nkyekꞌulun nyaꞌtx galan jaꞌchq, ax maꞌtx kyeꞌul tzani tuj qamaqꞌ. 7 Bꞌix te Jason maꞌtx kye tkꞌamoj tuj tjay. Kyaqil kyetz kꞌontiꞌl nkyeꞌokslan te kawbꞌil aj ntzaj tqꞌumaꞌ te César [aj twitzaleꞌ kyiꞌj kye kꞌulul mandad qiꞌj], bꞌix kyetz nkyqꞌumaꞌ at junky twitzaleꞌ kꞌulul mandad qiꞌj aj tbꞌi Jesus.”
8 Bꞌix ya ma tzꞌok kchaꞌoꞌ ikxji, ebꞌajjaw qꞌojlik kyaqil kye xjal bꞌix kye aj nkyekꞌulun mandad tuq txini. 9 Per te Jason bꞌix kye txqꞌanky okchojoj kymult bꞌix ebꞌajxik tzoqpiꞌ.
Aj Tpakbꞌan Te Paꞌk Bꞌix Chil Tuj Amaqꞌ Berey
10 Yaji qonikꞌan kye qerman exik kylajoꞌ te Paꞌk bꞌix Chil tzan kxik Berey. Bꞌix ya ma kyepon tzi, ebꞌajꞌox tuj te jay nabꞌil Dios aj jaꞌ tuq nꞌok kchimoꞌ kyibꞌ kye aj tijajil Israel. 11 Kye xjal tzi mas tuq galan chꞌinky kyenabꞌlin kywitz kye aj Tesalonk. Kyetz okykꞌamoj te tpakbꞌalil tukyꞌi jun tkꞌuꞌjlal, bꞌix bꞌajqꞌij nqet tuq bꞌaj kxnaqꞌtzaꞌ te Tuꞌjal Dios aber qa bꞌanꞌax te aj nkypakbꞌaꞌ tuq te Paꞌk bꞌix Chil. 12 Ikxji kyꞌilaꞌj xjal aj tijajil Israel ebꞌajꞌokslan bꞌix ax kyꞌilaꞌj xjal aj nyaꞌtx tijajil Israel ebꞌajꞌokslan, nyaꞌtx aꞌox ichan sinoke ax xuj aꞌeꞌ aj tlimaqal-eꞌ aj nkyeyolin tuq te yol gryeg.
13 Ya ma tzꞌok kchaꞌoꞌ kye aj tijajil Israel aj nkyenajan Tesalonk qa te Paꞌk ax npakbꞌan tuq tyol Qtata Dios tuj Berey, ebꞌajxik txini bꞌix okykꞌuluj tzan kyjawlabꞌun kye xjal. 14 Ntons kye qerman luwew oxik kylajoꞌ te Paꞌk tzan txik tumelil te nim aꞌ, yatzun te Chil bꞌix te Timotey ebꞌajkaj tzi. 15 Ya kye aj ebꞌajxik in te Paꞌk, ebꞌajxik tukyꞌiꞌl max tuj te amaqꞌ Aténas. Yaji te Paꞌk oxik tqꞌumaꞌ kyetz tzan txik kyqꞌumaꞌ te Chil bꞌix te Timotey tzan kypon luwew txini; ntons kye qerman eꞌajtz meltzꞌjik.
Aj Tpakbꞌan Te Paꞌk Tuj Amaqꞌ Aténas
16 Aj man tuq nꞌiyon te Paꞌk kyiꞌj kye tukyꞌiꞌl tuj Aténas, tetz otzaj choꞌon tanim tzan tpaj te aj amaqꞌji kyaqil kye xjal bꞌan qꞌapoꞌ tuq kyibꞌ tzan kynaꞌon twitz titzbꞌalil tidiꞌchq. 17 Tetz nyolin tuq nim tuj te jay nabꞌil Dios kyukyꞌi kye aj tijajil Israel bꞌix kyukyꞌi kye aj nyaꞌtx aj tijajil Israel aj nkyexjanin Dios, bꞌix bꞌajqꞌij tuq nyolin tuj plas kyukyꞌi kye aj nkyeꞌok teꞌeꞌ tuq tzi. 18 Bꞌix junjun xnaqꞌtzon aj bꞌuchꞌuj Epikury bꞌix aj bꞌuchꞌuj Estoyk nkyeyolin tuq tukyꞌiꞌl. Junjun nkyyoliꞌ tuq ikxjani: “¡Tidiꞌ-alo ntwululuꞌ!” kyekyi. Bꞌix junjunky nkyqꞌumaꞌ tuq ikxjani: “Tetz cha npakbꞌan kyiꞌj txqꞌanky dios aj kꞌontiꞌl ntzaj qnaꞌoꞌ tzani.” Nkyeyolin tuq ikxji tzan tpaj te Paꞌk nxik tuq tpakbꞌaꞌ te tpakbꞌalil galan tiꞌj Jesus bꞌix tiꞌj titzaꞌ tjawlen anqꞌin.
19 Yaji kyetz otzaj kyukꞌleꞌ bꞌix oxik kyin twitz te [bꞌuchꞌuj xjal aj nꞌok qꞌumaꞌ tbꞌi] Ariyop, bꞌix oxik kyqꞌumaꞌ tetz ikxjani: “Qgana tzan tok qchaꞌoꞌ tiꞌj te aj tpakbꞌalil akꞌaꞌj aj nxik apakbꞌaꞌni. 20 Yatz ntzaj aqꞌumaꞌ qetza tidiꞌchq aj chuktky minaꞌ tok qchaꞌoꞌna, per qetza qgana tzan tok qchaꞌoꞌ tidiꞌ telponx kyaqil nini.” 21 Komo kye aj Aténas bꞌix kye aj laqꞌchik xjal aj nkyenajan tuq tzi, kꞌontiꞌl junky tidiꞌ aj bꞌan presis nꞌel tuj kywitz sinoke tzan txik kyyoliꞌ qatzun tzan tok kchaꞌoꞌ jun tidiꞌ aj minaꞌ tok kchaꞌoꞌji.
22 Ntons te Paꞌk ojaw waꞌlet kxol kye aj te Ariyop bꞌix oxik tqꞌumaꞌ ikxjani: “Etetz aj amaqꞌ Aténas, wetz nꞌok wen etetz at nim erelijyon eqꞌiꞌ etitzaꞌ. 23 Komo aj nkyinbꞌet wetz tuj junjun luwar tuj etamaqꞌ, nꞌok nkaꞌyiꞌ kyꞌilaꞌj titzbꞌalil tidiꞌchq aj nkyeqet enaꞌoꞌ. Bꞌix wetz ma tzꞌok wen tuj jun enabꞌil dios tzꞌibꞌaꞌ ja yol ikxjani: “Te ja ntzani te jun nabꞌil te dios aj kꞌontiꞌl qotzqiꞌ.” Ntons te Dios aj ntzaj enaꞌoꞌ etetz, aj kꞌontiꞌl etotzqiꞌni, tiꞌj tetz nkyinpakbꞌan ajnaꞌl.
24 A tetz te Dios aj oqet kꞌulun te twitz txꞌoꞌtxꞌ bꞌix kyaqil aj at tzani twitz txꞌoꞌtxꞌ, a tetz Tajaw te kaꞌj bꞌix te txꞌoꞌtxꞌ, bꞌix kꞌontiꞌl nnajan tuj jun jay aj cha tkꞌulbꞌen xjal. 25 Tetz kꞌontiꞌl loꞌik tkꞌuꞌj tzan txik siꞌ jun tidiꞌ tetz iktzaꞌ-wit tetz at tidiꞌ npaltin tetz, a tetz ntzaj sin qanqꞌin qkyaqil bꞌix ntzaj tsiꞌ qxew bꞌix ntzaj tsiꞌ kyaqil aj at.* 26 Cha tiꞌj jun xjal eqet tkꞌuluꞌ kyaqil kyijajil xjal aj at twitz txꞌoꞌtxꞌ, tzan kynajan jaꞌchq twitz txꞌoꞌtxꞌ kyaqil. Tetz oje kaj tsiꞌ kyaqil tumelil te tyemp bꞌix jatebꞌ tyemp qoꞌanqꞌiyon [tzani twitz txꞌoꞌtxꞌ] bꞌix jaꞌ oqonajayon.
27 Tgan tzan kyjoyon kye xjal tetz tzan toknoj kyitzaꞌ oj kyok taktzꞌan twitz nkyetakanjeꞌ nkyejoyon tiꞌj, komo nyaꞌtx laqꞌchik atqetkix te Qtata Dios qiꞌj.* 28 Komo “tzan tpaj tetz itzꞌojoꞌ ajnaꞌl, bꞌix nqoꞌaqꞌunan, nqokꞌulun tidiꞌchq, bꞌix tzan tpaj tetz atoꞌ ajnaꞌl.” Iktzaꞌx okyqꞌumaj junjun aj otzqiꞌmj tzan tpaj bꞌan bꞌisuꞌ nkyeyolin, oje kyqꞌumaj ikxjani: “Komo tzan tpaj tiꞌj oꞌel, ax aꞌoꞌ tijajil.” 29 Komo qetz aꞌoꞌ tijajil Qtata Dios, a tgan tzan tel qnikyꞌ, tetz nyaꞌtx jun tidiꞌ aj kꞌulumaj tukyꞌi xtxꞌotxꞌal oro bꞌix plata qatzun abꞌjji, bꞌix tetz nyaꞌtx cha jun titzbꞌalil aj tkꞌulbꞌen jun xjal bꞌix tetz nyaꞌtx jun aj xkonoliꞌ tzan xjal. 30 Oqtxiꞌ kye xjal kꞌontiꞌl owel kynikyꞌ tiꞌj te Qtata Dios bꞌix tetz cha okyꞌix-oq titzaꞌ te nini,* per ajnaꞌl tetz ntzaj tqꞌumaꞌ te qkyaqil qetz aj jaꞌchq tzajnaqoꞌ tzan tjaw qkyꞌixpuꞌ qnabꞌlin. 31 Te Qtata Dios oje kaj tsiꞌ jun qꞌij aj jaꞌ oxeꞌl tqꞌumaꞌ kyil kye xjal tukyꞌi tkawbꞌil tuj tqꞌabꞌ. Bꞌix oxeꞌl tqꞌumaꞌ kyil tzan jun xjal aj oje tzꞌel tjoyoꞌ tetz, bꞌix oje qet tyekꞌuꞌ ntzani bꞌanꞌax tzan tpaj te aj xjalji oje jaw tanqꞌinsaꞌ junkyꞌel.”
32 Ntons, ya ma tzꞌok kchaꞌoꞌ tiꞌj oj kyjaw anqꞌin kye kamnaq, junjun cha ebꞌajxmayin tiꞌj bꞌix junjunky nkyqꞌumaꞌ tuq ikxjani: “Qgana tzan awok qchaꞌoꞌ tiꞌj te nini tuj junky qꞌij.” 33 Ntons astilji te Paꞌk owex kxol. 34 Per junjun kyetz ebꞌajꞌokslan bꞌix ebꞌajꞌok lapet tiꞌj. Kxol kyetz atqet tuq te Yoniꞌxh, tetz jun kxol kye aj nꞌok tuq kchimoꞌ kyibꞌ txini tuj te Ariyop, bꞌix junky, jun xuj tbꞌi Dámaris, bꞌix ax ateꞌ tuq txqꞌanky xjal.