16
Aj Txik Te Timotey Tukyꞌi Paꞌk Bꞌix Chil
1 Ntons, te Paꞌk opon amaqꞌ Derb bꞌix yaji amaqꞌ Listr, bꞌix tzi at tuq jun xjal aj nꞌokslan tuq tiꞌj Jesus, Timotey tbꞌi. Tetz tnan jun aj tijajil Israel, jun xuj aj kꞌontiꞌl tuq nkaj tsiꞌ tzan tokslan [tiꞌj Jesukrist], bꞌix te stat jun aj nyaꞌtx tuq tijajil Israel. 2 Kye qerman aj Listr bꞌix kye aj Ikony nkyeyolin tuq galan tiꞌj te Timotey. 3 Te Paꞌk tgan tuq tzan txik te Timotey tukyꞌiꞌl, ntons oxik tukꞌleꞌ per tbꞌay owok tsiꞌ techalul tzan kꞌon tuq kyyolin kye aj tijajil Israel aj nkyenajan tuq tuj aj luwarji, tzan tpaj kyebꞌen tuq te stat nyaꞌtx tuq jun aj tijajil Israel. 4 Tuj kyaqil amaqꞌ aj jaꞌ tuq nkyekyꞌik, nxik tuq kyqꞌumaꞌ kye qerman kyaqil aj ojetq tuq kye kaj tiꞌj kye tkyꞌixel Jesus bꞌix kye aj te bꞌuchꞌuj tijxjal tuj Jerusalen. 5 Ikxji kye bꞌuchꞌuj qerman jaꞌchq, kyetz mas tuq nkyeten jwert titzaꞌ witꞌlik kykꞌuꞌj tiꞌj Qajawil bꞌix bꞌajqꞌij mas xjal nkyeꞌok lapet tzan kyokslan.
Aj Tok Jotoꞌ Tuj Twitz Te Paꞌk Jun Xjal Aj Masedony
6 Ntons, komo te Txew Dios kꞌontiꞌl ostzoqpij tzan kkyꞌik pakbꞌal tyol Qtata Dios tuj Asy, astilji ebꞌajkyꞌik tuj tkwentil Prijy bꞌix Galasy. 7 Ya ma kyepon xtxaꞌm xtxꞌoꞌotxꞌ te Misy, kyetz nqet tuq kybꞌisuꞌ tzan kyox tuj te amaqꞌ Bitiny per te Txew Jesus kꞌontiꞌl ostzoqpij. 8 Ya ma kyekyꞌik tuj tkwentil Misy, ebꞌajxik Troas.
9 Tzi te Paꞌk jun aqꞌbꞌil owok jotoꞌ tuj twitz jun ichan aj Masedony waꞌlqet tuq twitz bꞌix nqet tuq twitz twitz, oxik tqꞌumaꞌ ikxjani: “Pakyꞌik chꞌin Masedony bꞌix pawonen chꞌin qiꞌja.” 10 Bꞌeyx aj tok jotoꞌ tuj twitz te Paꞌk, oxikna Masedony. Qetza witꞌlik jkꞌuꞌjna tuq, te Qtata Dios ojetq tuq qoxik tukꞌleꞌna tzan txik qpakbꞌaꞌna txini te tpakbꞌalil galan tiꞌj Jesukrist.
Aj Tpon Te Paꞌk Bꞌix Chil Tuj Amaqꞌ Filipos
11 Ya ma qoꞌetzna tukyꞌi bark tuj Troas, oxikna derech Samotrasy bꞌix tuj junky iwitq opona Neápolis. 12 Yaji oxikna Filipos te amaqꞌ aj mas nim tuj tkwentil Masedony, bꞌix jun amaqꞌ aj jaꞌ nkyekꞌulun mandad kye aj Rom. Ntons txini, oqetena kabꞌe qꞌij.
13 Yaji tuj jun qꞌij ojlaꞌmj oꞌexna xtxaꞌm te amaqꞌ stziꞌ jun aꞌ, komo qetza tuj qnabꞌla qa tzi at tuq jun luwar jaꞌ nꞌok kchimoꞌ kyibꞌ kye xjal tzan kxnaqꞌtzan. Aj qpona txini, oqet witꞌletna yoliyon kyukyꞌi kye xuj aj ojetq tuq tzꞌok kchimoꞌ kyibꞌ tzi bꞌix oyolina kyukyꞌiꞌl. 14 Jun xuj [aj atqet tuq tzi] Lidy tbꞌi, tetz jun aj kꞌayil xqꞌapj xtxꞌotxꞌal púrpura, bꞌix tzajnaq tuq Tyatir bꞌix nnaꞌon tuq Qtata Dios. Bꞌix te Qajawil oxik tsiꞌ jun tnabꞌl tzan tel tnikyꞌ tzan tokslan tiꞌj te aj nxik tqꞌumaꞌ tuq te Paꞌk. 15 Ya ma jaw siꞌ aꞌ twiꞌ tetz bꞌix kye aꞌeꞌ aj tuj tjay, tetz oqet twitz qwitza, otzaj tqꞌumaꞌ ikxjani: “Qa etetz tuj ewitz nkyinꞌokslan bꞌan bꞌanꞌax tiꞌj Qajawil ntons peꞌekaj njay ajnaꞌl.” Astilji, okajna tzi.
Aj Kyel Jaqlik Kye Lamel Te Pres Aj Jaꞌ Lamomeꞌ Tuq Te Paꞌk Bꞌix Chil
16 Jun qꞌij aj ikjaꞌn tuq qxikna tuj te luwar aj jaꞌ nqoxnaqꞌtzan te Qtata Dios, owetz tuj qbꞌeya jun qꞌopoj aj ateꞌ tuq tajawil bꞌix tetz at tuq jun malspirita tuj tanim aj nxik tsiꞌ tpoder tzan tkanon tuq tiꞌj tidiꞌ aj okyꞌel. Bꞌix tzan tpaj nini tetz nim tuq tmin ntkꞌuluꞌ ganar kye tajawil. 17 Te ja qꞌopojni tetz lapik tuq qiꞌja bꞌix tiꞌj Paꞌk, bꞌix nxik tuq tqꞌumaꞌ kongan ikxjani: “Kye ja xjal ntzanijeꞌ nkyeꞌaqꞌunan te Qtata Dios aj atjax tuj kaꞌj aj mas nim tajwalil twitz kyaqil. Kyetz nxik kypakbꞌaꞌ te etetz te bꞌey galan titzaꞌ tzan jkolet tiꞌj qchoj.”
18 Kyꞌilaꞌj qꞌijxiꞌ tuq ntkꞌuluꞌ ikxji, bꞌix yaji te Paꞌk ojetq tuq tziktik tzan txik xhchaꞌoꞌ kobꞌchaq ikxji. Tetz owaj meltzꞌjik tiꞌj, bꞌix oxik tqꞌumaꞌ tukyꞌi te malspirit aj atqex tuq tuj tanim te qꞌopoj, oxik tqꞌumaꞌ ikxjani: “Tukyꞌi tajwalil Jesukrist, oxeꞌl nkꞌuluꞌ mandad yatz tzan ajatz tuj tanim ja qꞌopojni.” Ntons, bꞌeyxnajji te malspirit ojatz tuj tanim te qꞌopoj.
19 Ya ma tzꞌok kyen kye tajaw te qꞌopoj ya nlay tuq bꞌantik tzan tok mas kytumin tzan tpaj tetz, ojaw ktzyuꞌ te Paꞌk bꞌix te Chil, bꞌix exik kyin tuj plas te amaqꞌ kywitz kye kꞌulul mandad tuj amaqꞌ. 20 Ya ma pon kyin kywitz kye kꞌulul mandad, oxik kyqꞌumaꞌ ikxjani: “Kye aj tijajil Israel ntzanijeꞌni, kyetz cha nkyekꞌulun tzan kyjaw labꞌun kye xjal tuj qamaqꞌ 21 bꞌix nxik kxnaqꞌtzaꞌ junky kostumbr aj qetz tzan te jkawbꞌil nlay bꞌantik tzan txik qin bꞌix ni tzan tqet jkꞌuluꞌ qetz aj aꞌoꞌ aj Rom.”
22 Ntons kye xjal ebꞌajjaw labꞌun kyiꞌj, bꞌix kye kꞌulul mandad owel kylaquꞌ kyqꞌanaq te Paꞌk bꞌix Chilb bꞌix oxik kykꞌuluꞌ mandad tzan kyqet jubꞌchaꞌ tukyꞌi tzeꞌ. 23 Ya ma kyeqet jubꞌchaꞌ kyꞌilaꞌj-el, yaji ebꞌajqex siꞌ tuj pres bꞌix oxik kyqꞌumaꞌ te xbꞌuqil pres tzan kyqet kxbꞌuqiꞌ byenech. 24 Yatzun te xbꞌuqil pres eqex tlamoꞌ tuj jun luwar tujx te pres, bꞌix oqex tsiꞌ kyoq tuj jun xhapbꞌil oqj.
25 Ntons mas yaj, qanq bꞌan chukaqꞌbꞌil tuq, te Paꞌk bꞌix te Chil nkyexnaqꞌtzan tuq bꞌix nkyebꞌitzan tuq bꞌitz te Qtata Dios, bꞌix kye txqꞌanky aj pres nkyechaꞌon tuq kyiꞌj. 26 Yaji tanderepent otzaj jun kabꞌjunabꞌ bꞌan nim, ojaw tkyitoꞌ kyaqil twitꞌlel te loqꞌ te pres, bꞌeyxnajji kye tlamelul te pres ebꞌajꞌel jaqlik bꞌix kye kaden aj nꞌoken tuq kꞌalbꞌil kye xjal ebꞌajꞌel kyibꞌx. 27 Ya ma tzꞌel twatl te xbꞌuqil pres bꞌix ya ma xik ten te lambꞌil stziꞌ te pres jaqoꞌ tuq, ntons tetz otzyet tmachit aj qꞌojbꞌil bꞌix oqet tuq tkansaꞌ tibꞌ tzan tpaj tetz tuj tnabꞌl ojetq tuq kyeꞌoqik kye aj pres. 28 Per te Paꞌk luwew ojaw sikyꞌin kongan ikxjani: “Kꞌon tzꞌok akꞌuluꞌ jun tidiꞌ awiꞌj. Qkyaqil qetza aqoqetna tzani.”
29 Ntons te xjal oxik tqꞌumaꞌ tzan stzaj qꞌanaliꞌ tuq tuj tbꞌey bꞌix owox oqelan tuj te pres, bꞌix bꞌan nluꞌlun tuq oqet mejlet twitz Paꞌk bꞌix Chil. 30 Yaji ebꞌajꞌetz tin tuj te pres bꞌix oxik xhchaꞌoꞌ kyetz ikxjani: “Tat, instzaj eqꞌumaꞌ chꞌin, tidiꞌ presis tzan tqet nkꞌuluꞌ tzan nkolet.”
31 Yaji kyetz owaj ktzaqꞌbꞌeꞌ ikxjani: “Pawokslan tiꞌj Qajaw Jesus, ikxji ochkoletel yatz aꞌich bꞌix kyaqil aꞌeꞌ aj tuj ajay.” 32 Ntons kyetz oxik kypakbꞌaꞌ te Tyol Qtata Dios tetz bꞌix kye kyaqil aꞌeꞌ aj tuj tjay. 33 Axkix aj or aj aqꞌbꞌilji, ojaw xtxꞌajoꞌ twitz kye okꞌol kyqetlen jubꞌchaꞌ. Bꞌix tetz ojaw siꞌ aꞌ twiꞌ bꞌix kyaqil kye aꞌeꞌ aj tuj tjay. 34 Ntons te xjal ebꞌajꞌox tin tuj tjay bꞌix [otqꞌumaj tzan] txik siꞌ kyweꞌ, bꞌix kyaqil kye aj tuj tjay ebꞌajchalaj tzan tpaj kyokslbꞌen tiꞌj Qtata Dios.
35 Ntons, ya ma qosaqxikan kye kꞌulul mandad oxik kylajoꞌ txqꞌan mulon qꞌumal tetz ikxjani: “Inkxik atzoqpiꞌ kye aj xjalni.” 36 Yaji te xbꞌuqil pres oxik tqꞌumaꞌ te Paꞌk ikxjani: “Kye kꞌulul mandad maꞌtx stzaj kyqꞌumaꞌ tzan exik tzoqplet. Ajnaꞌl bꞌaꞌn tzan exik. ¡Kyebꞌaꞌ waq kxik!”
37 Per yatzun te Paꞌk oxik tqꞌumaꞌ kyetz ikxjani: “Tbꞌay ma qoqetbꞌaj kyjubꞌchaꞌ kywitz kyaqil bꞌix kꞌontiꞌl tuq qil, bꞌix qetza aꞌoꞌna at qoklena tzan jkolet tzan te kawbꞌil aj Rom, bꞌix ma qoqex ksiꞌna tuj pres. ¿Bꞌix ajnaꞌl kygan tzan qxikna ktzoqpiꞌ ewj? ¡Nlay! Inktzaj kyetz kywitzaleꞌ eqꞌil te qetza.”
38 Ntons ikxji kye mulon oxik kyqꞌumaꞌ kyukyꞌi kye kꞌulul mandad te amaqꞌ, bꞌix kyetz ebꞌajxobꞌ toklen kchaꞌoꞌ qa at tuq kyoklen tzan kykolet tzan te kawbꞌil aj Rom. 39 Ntons kye kꞌulul mandad ebꞌajxwaꞌq aj jaꞌ tuq akyeqet kyetz, bꞌix oqet kywitz kywitz [tzan kyex]. Ya ma kyejatz kyin, oqet kywitz kywitz tzan kyex tuj te amaqꞌ. 40 Ntons ya ma kyejatz tuj te pres, ebꞌajxik tjay Lidy, bꞌix ya ma kyepon kxol kye qerman, oxik kynimsaꞌ kykꞌuꞌj tzan kyten jwert. Yaji ebꞌajꞌex tzi.