15
Aj Txik Kyqꞌumaꞌ Kye Tijxjal Tidiꞌ Te Aj Presis Kxol Kye Aj Nyaꞌtx Tijajil Israel
1 Ntons junjun aj tzajnaqeꞌ tuq Judey, nkyexnaqꞌtzan tuq kxol kye qerman ikxjani: “Qa etetz nlay tzꞌok etechalul iktzaꞌx [eqꞌiꞌ qitzaꞌna] aj okaj tqꞌumaꞌ Moisés,* ntons nlay kxkolet.” 2 Yaji te Paꞌk bꞌix te Bꞌeꞌch ebꞌajjaw wululun kyukyꞌiꞌl tzan tpaj te ntzani. Astilji kye qerman oqet kybꞌisuꞌ tzan txik max Jerusalen te Paꞌk bꞌix Bꞌeꞌch bꞌix txqꞌanky aj kxol kyetz, tzan kyyolin tiꞌj te ntzani kxol kye aꞌeꞌ tkyꞌixel Jesus txini bꞌix kyukyꞌi kye txqꞌanky aj te bꞌuchꞌuj tijxjal. 3 Ntons kye aj exik lajoꞌ tzan kye qerman, ekyꞌik tuj tkwentil Penisy bꞌix Samary, bꞌix oxik kyqꞌumaꞌ kxol kye qerman tzi kyaqil titzaꞌ kye aj nyaꞌtx tijajil Israel ojetq tuq kaj kykolaꞌ te kykostumbr tzan kyokslan tiꞌj te bꞌanꞌax, bꞌix ikxji kyaqil kye qerman bꞌan nkyechalaj tuq.
4 Ya ma kyepon Jerusalen, kyetz ebꞌajkꞌamet tzan kyaqil kye qerman txini bꞌix tzan kye tkyꞌixel Jesus bꞌix kye aj te bꞌuchꞌuj tijxjal. Yaji oxik kyqꞌumaꞌ kyaqil aj tbꞌanil aj ojetq tuq tkꞌuluj te Qtata Dios kyukyꞌiꞌl. 5 Ntons ebꞌajjaw waꞌlet junjun aj bꞌuchꞌuj Parisey aj ojetq tuq kyeꞌokslan bꞌix oxik kyqꞌumaꞌ ikxjani: “Presis tzan tqꞌumlet kye xjal tzan tok siꞌlet kyechalul bꞌix tzan tqet kyokslaꞌ te Kawbꞌil tiꞌj qrelijyon [aj oqet stzꞌibꞌaꞌ] Moisés.”
6 Ntons kye tkyꞌixel Jesus bꞌix kye tijxjal owok kchimoꞌ kyibꞌ tzan kyyolin tiꞌj te ntzani. 7 Ya ma kyeyolin nim tiꞌj, te Xhpeꞌy ojaw waꞌlet bꞌix oxik tqꞌumaꞌ ikxjani: “Instzaj echaꞌoꞌ waq erman, etetz etebꞌen te Qtata Dios jun-el inꞌel tjoyoꞌ tzan txik nqꞌumaꞌ te tpakbꞌalil galan kxol kye aj nyaꞌtx tijajil Israel tzan kyokslan.* 8 Te Qtata Dios aj totzqiꞌ kyanim kye xjal, tetz oqet tyekꞌuꞌ bꞌaꞌn tuq tzan tkꞌamon kyetz, komo otzaj tsiꞌ te Txew tuj kyanim iktzaꞌx otzaj tsiꞌ qetz.* 9 Tuj twitz te Qtata Dios, qetz nyaꞌtx mas tbꞌanil aꞌoꞌ kywitz kyetz, komo ax kyetz nkaj saq kyanim tzan tpaj toklen witꞌlet kykꞌuꞌj tiꞌj Qtat. 10 Ajnaꞌl etetz, ¿tistil kꞌontiꞌl nqet etokslaꞌ te Qtat tzan tpaj nxik eqꞌumaꞌ kye qerman tzan txik kyin te Kawbꞌil aj eqꞌiꞌ kyitzaꞌ qxjalil,a aj ni kye qijajil oqtxiꞌ ni qetz ajnaꞌl kꞌontiꞌl nbꞌantik tzan tqet jkꞌuluꞌ? 11 Qetz nqoꞌokslan nqokolet tzan te Qajaw Jesus nyaꞌtx tzan tpaj tbꞌanil-wit aꞌoꞌ sinoke tzan tpaj ikxji tetz tgan, bꞌix ax kyetz nkyekolet ikxji.”
12 Kkyaqil kye xjal ebꞌajlumet bꞌix yaji nꞌok tuq kchaꞌoꞌ aj nxik tuq kyqꞌumaꞌ te Paꞌk bꞌix te Bꞌeꞌch tiꞌj tidiꞌchq aj nqet tkꞌuluꞌ tuq te Qtata Dios kxol kye aj nyaꞌtx tijajil Israel, tidiꞌchq yekꞌbꞌil tukyꞌi tajwalil Qtata Dios bꞌix tidiꞌchq aj nkyelabꞌan tuq kye xjal tiꞌj.
13 Ya ma mankun kyyolin kyetz, yaji te Chaw oxik tqꞌumaꞌ ikxjani: 14 “Erman, kyintzaj echaꞌoꞌ. Te Simon maꞌtx tzaj tqꞌumaꞌ titzaꞌ te Qtata Dios nnabꞌlin bꞌan galan kxol kye aj nyaꞌtx tijajil Israel tzan kyel tpawaꞌ txqꞌan kxol kyetz tzan kyok te tetz. 15 Tzan tpaj te nini nponkix tyol [te Qtata Dios aj oqet tzꞌibꞌaꞌ tzan] te aj yolil tyol oqtxiꞌ aj tzꞌibꞌankaj ikxjani: 16 “‘Oj tkyꞌik kyaqil ntzani, yaji kyinꞌulel junkyꞌel, bꞌix ojawel nkꞌuluꞌky te tjay tijajil Dawid; te aj oje ponaj, ojawel nkꞌuluꞌ junkyꞌel.b 17 Ikxji kye txqꞌanky xjal okyejoyoyon wiꞌj wetz aj Kyajawil aꞌin, kyaqil aꞌeꞌ aj nyaꞌtx tijajil Israel aj ukꞌlemeꞌ tzan kyok te wetz ax kyetz okyeꞌokel te wetz.’ 18 Ikxji ntqꞌumaꞌ te Qajawil aj okaj tsiꞌ kyaqil ntzani atx bꞌan oqtxiꞌ.”*
19 Ntons astilji wetz tuj nnabꞌl kꞌontiꞌl tzan tel qin gan kye aj nyaꞌtx tijajil Israel tzan kykꞌulun iktzaꞌ te Qtata Dios tgan. 20 Mejor aꞌox intqet tzꞌibꞌlet jun uꞌj tzan tkaj kykolaꞌ tzan kynaꞌon kye titzbꞌalil tidiꞌchq* bꞌix te kꞌajajbꞌilj* bꞌix tzan kꞌon txik kchiꞌ txkup aj cha nꞌel bꞌinoꞌ kyalqc bꞌix ni kꞌontiꞌl tzan txik kchiꞌ kyikꞌ.* 21 Komo atx aj bꞌan oqtxiꞌ tuj kyaqil qꞌij ojlaꞌmj tuj te jay nabꞌil Dios tuj kyaqil amaqꞌ, ateꞌkix xjal aj njaw eꞌen te Kawbꞌil aj oqet stzꞌibꞌaꞌ Moisés.”
22 Ntons kye tkyꞌixel Jesus bꞌix kye aj te bꞌuchꞌuj tijxjal bꞌix kyaqil kye txqꞌanky qerman oqet kybꞌisuꞌ tzan kyel kyjoyoꞌ xjal tzan kxik kylajoꞌ amaqꞌ Antyokiy tukyꞌi Paꞌk bꞌix Bꞌeꞌch. Owel kyjoyoꞌ te Juds aj nꞌok tuq qꞌumaꞌ Barsabas, bꞌix Chil,d kyetz at tuq kyajwalil kxol kye qerman. 23 Kyiꞌj kyetz oxik ksamaꞌ te uꞌj aj jaꞌ tuq nyolin ikxjani: “Qetza aj tkyꞌixel Jesus aꞌoꞌna bꞌix kye aj te bꞌuchꞌuj tijxjal, nqet qtzꞌibꞌaꞌna te etetz qerman aj nyaꞌtx tijajil Israel, etetz aj atikxqet Antyokiy, Siry bꞌix Silisy. Jun limbꞌil te etetz. 24 Qetza oje tzꞌok qchaꞌoꞌna ateꞌ junjun xjal xiknaqeꞌ tzani oje kyepon tzi bꞌix qetza kꞌontiꞌl exik jkꞌuluꞌ mandad. Oje tzꞌok qchaꞌoꞌna cha nkyekꞌulun joder etiꞌj tukyꞌi aj nxik kyqꞌumaꞌ, bꞌix cha nkykꞌuluꞌ tzan tnaꞌnon etanim (tzan tpaj nxik kyqꞌumaꞌ tzan tok siꞌlet etechalul bꞌix tzan tqet etokslaꞌ te Kawbꞌil oqtxiꞌ.)e 25 Astilji qetza ma tzꞌok qchimoꞌna qibꞌ bꞌix ma qet qbꞌisuꞌna tzan kyel qjoyoꞌna kabꞌeꞌ qerman tzan kxik qꞌolbꞌel etetz junx kyukyꞌi kye qerman aj ganimeꞌ nim qitzaꞌ, te Paꞌk bꞌix Bꞌeꞌch. 26 Kyetz oje tzꞌok kyen nim xhchoꞌnal chꞌinky tuq nkyeqet kansaꞌ tzan tpaj nkyepakbꞌan tiꞌj Qajaw Jesukrist. 27 Astilji qetza maꞌtx xik qlajoꞌna etukyꞌiꞌl te Juds bꞌix te Chil tzan kyyolin kyetz etukyꞌiꞌl bꞌix oxeꞌl kyqꞌumaꞌ xtxolil tidiꞌ maꞌtx qokajna tiꞌj tzani. 28 Tuj twitz te Txew Dios bꞌix ax tuj qwitz qetza ma tzꞌel galan tzan kꞌon txik jqꞌumaꞌna junky tidiꞌ mas aj presis tzan tqet ekꞌuluꞌ kywitz kye ntzani: 29 Kꞌon xik echiꞌ txkup aj oje xik qꞌapet kye titzbꞌalil, bꞌix kꞌon xik echiꞌ kyikꞌ, bꞌix kꞌon xik echiꞌ txkup aj cha nꞌel bꞌinoꞌ kyalq, bꞌix kꞌon kxkꞌajajin. Qa etetz oqtel etokslaꞌ nini ntons jun galan nꞌekꞌuluꞌ. Dios etukyꞌiꞌl. [Aꞌox ntzani.]”
30 Ntons ya ma kyexik kawiꞌ, kyetz ebꞌajxik max Antyokiy, bꞌix ya ma kyepon, eꞌok kchimoꞌ kyaqil kye qerman bꞌix oxik kyqꞌapoꞌ te uꞌj. 31 Ya ma jaw kyeꞌeꞌ kye qerman te uꞌj, kyetz oje kyechalaj tzan tpaj jun nimsbꞌil kykꞌuꞌj.
32 Bꞌix komo te Juds bꞌix te Chil kyetz aꞌeꞌ aj yolil tyol Dios tuq, ntons oxik kynimsaꞌ kykꞌuꞌj kye qerman tukyꞌi kyyol bꞌan galan, bꞌix ikxji ojaw kyin kykꞌuꞌj kye qerman. 33 Ya ma kyꞌik kyꞌilaꞌj qꞌij kyqetlen ten txini, yaji eꞌetz kawiꞌ tukyꞌi jun tumeꞌl galan tzan kye qerman tzi tzan kymeltzꞌjikky kxol kye qerman [tuj Jerusalen] aj ebꞌajxik lajon te kyetz. 34 Per yatzun te Chil oqet tuj twitz tzan tkajten txini.f 35 Yatzun te Paꞌk bꞌix te Bꞌeꞌch, kyetz ebꞌajkaj Antyokiy, nxik tuq kxnaqꞌtzaꞌ bꞌix nkyepakbꞌan tuq tiꞌj Tyol Qajawil junx kyukyꞌi kyꞌilaꞌj txqꞌanky aj nkyepakbꞌan tuq.
Aj Txik Te Paꞌk Bꞌix Bꞌeꞌch Qꞌolbꞌel Kye Qerman Aj Jaꞌ Tuq Ojetq Kyekyꞌik Tbꞌayaꞌ
36 Ya ma kyꞌik kyꞌilaꞌj qꞌij, te Paꞌk oxik tqꞌumaꞌ te Bꞌeꞌch ikxjani: “Qoꞌo junkyꞌel qꞌolbꞌel kye qerman tuj kyaqil amaqꞌ aj jaꞌ oje xik qpakbꞌaꞌ te tyol Qajawil, tzan tok qchaꞌoꞌ titzaꞌ ateꞌ.” 37 Te Bꞌeꞌch tgan tuq tzan txik tin kyukyꞌiꞌl kyetz te Waꞌnch aj nꞌok qꞌumaꞌ tuq Mak. 38 Per te Paꞌk kꞌontiꞌl oqet tuj twitz tzan tpaj te Mak ojetq tuq kyekaj tkaꞌyiꞌ jun-el* tuj tkwentil Panfily bꞌix kꞌontiꞌl oxik kyukyꞌiꞌl pakbꞌayon. 39 Kyetz kꞌontiꞌl eten dyakwerd kxol, astilji oqet kypawaꞌ kyibꞌ, te Bꞌeꞌch oxik tin Mak tukyꞌiꞌl bꞌix exik Chipr* tuj jun bark, 40 bꞌix te Paꞌk owel tjoyoꞌ te Chilg tzan txik tukyꞌiꞌl. Kye txqꞌanky qerman ebꞌajxik kykawiꞌ bꞌix ekaj kyqꞌapoꞌ tuj tqꞌabꞌ Qajawil tzan tkꞌulun jun nim bꞌan galan kyukyꞌiꞌl. 41 Ntons te Paꞌk okyꞌik tuj tkwentil Siry bꞌix Silisy, bꞌix njaw tuq tin kykꞌuꞌj kye kyaqil bꞌuchꞌuj qerman txini.