14
Aj Tpakbꞌan Te Paꞌk Bꞌix Bꞌeꞌch Tuj Amaqꞌ Ikony
1 Ntons yaji [ebꞌajpon] Ikony, bꞌix tzi te Paꞌk bꞌix te Bꞌeꞌch eꞌox tuj te jay nabꞌil Dios aj jaꞌ nꞌok kchimoꞌ kyibꞌ kye aj tijajil Israel. Tzi ebꞌajpakbꞌan kxol kye xjal bꞌix kyꞌilaꞌj ebꞌajꞌokslan, xjal aj tijajil Israel bꞌix aj nyaꞌtx tijajil Israel. 2 Per kye aj tijajil Israel aj kꞌontiꞌl eꞌokslan, kyetz oxik kyqꞌumaꞌ tidiꞌchq nyaꞌtx galan kyukyꞌi kye aj nyaꞌtx tijajil Israel tzan stzaj kyqꞌoj kyiꞌj kye qerman bꞌix tzan kybꞌisun nyaꞌtx galan kyiꞌj. 3 Astilji te Paꞌk bꞌix te Bꞌeꞌch ekajten txini kyꞌilaꞌj qꞌij, bꞌix nkyepakbꞌan tuq tukyꞌi jun tkꞌuꞌjlal tiꞌj Qajawil, qa tetz mas bꞌan galan qukyꞌiꞌl twitz te aj nqajoꞌ. Bꞌix te Qajawil nqet tuq tyekꞌuꞌ bꞌanꞌax te aj nkyepakbꞌan tuq tiꞌj jun galan aj kꞌontiꞌl nqajoꞌ, astilji te Qajawil oxik tsiꞌ tajwalil te kyetz tzan tqet kykꞌuluꞌ tidiꞌchq yekꞌbꞌil bꞌix tidiꞌchq aj nkyelabꞌan tuq kye xjal tiꞌj. 4 Kyaqil kye xjal tuj te amaqꞌ pawaꞌ tuq kyibꞌ, junjun dyakwerd tuq ateꞌ kyukyꞌi kye [aj nim kyajwalil kxol kye] aj tijajil Israel, bꞌix txqꞌanky dyakwerd tuq ateꞌ kyukyꞌi kye tkyꞌixel Jesus.
5 Per txqꞌan aj nyaꞌtx tijajil Israel bꞌix txqꞌanky aj tijajil Israel, kyetz kyukyꞌi kye kꞌulul mandad kxol, oqet kybꞌisuꞌ tzan kyok kyyasoꞌ bꞌix tzan kyok kxon tukyꞌi abꞌj. 6 Per yatzun te Paꞌk bꞌix Bꞌeꞌch, ya ma tzꞌok kchaꞌoꞌ ikxji, ebꞌajꞌoqik bꞌix exik max Listr bꞌix Derb, kabꞌeꞌ amaqꞌ tuj tkwentil Likawny, bꞌix ax exik tuj kyꞌilaꞌj luwar aj qaynin tzi. 7 Bꞌix tzi, kyetz nxik tuq kypakbꞌaꞌ te tpakbꞌalil galan tiꞌj Jesukrist.
Aj Tqet Kybꞌisuꞌ Kye Aj Amaqꞌ Listr Qa Te Paꞌk Bꞌix Bꞌeꞌch Dios-eꞌ
8 Ntons, at tuq jun xjal txini tuj amaqꞌ Listr aj kꞌontiꞌl tuq nbꞌantik tbꞌet tzan tpaj tetz kox tuq titzꞌjlenx, ni jun-el tetz obꞌet. 9 Tetz bꞌan atok tuq txkyin tiꞌj te aj ntqꞌumaꞌ tuq te Paꞌk. Te Paꞌk oxik teꞌeꞌ bꞌix owok ten te xjal witꞌlik tuq tkꞌuꞌj tzan tbꞌantik. 10 Yaji oxik tqꞌumaꞌ tukyꞌi nim twiꞌ ikxjani: “Pajaw waꞌlet.” Yaji te xjal ojaw xlinkꞌan bꞌix obꞌet.
11 Ya ma tzꞌok kyen kye xjal aj ojetq tuq tkꞌuluj te Paꞌk, kyetz ebꞌajjaw sikyꞌin kongan tuj kyyol aj Likawny, oxik kyqꞌumaꞌ ikxjani: “Kye dios maꞌtx kyekyaqul qxol iktzaꞌ xjal.” 12 Owok kyqꞌumaꞌ [tukyꞌi kybꞌi junjun dios aj ntzaj kynaꞌoꞌ kyetz], te Bꞌeꞌch owok kyqꞌumaꞌ Séusa bꞌix te Paꞌk owok kyqꞌumaꞌ Ermesb tzan tpaj a tetz te aj mas nyolin tuq. 13 Te jay aj jaꞌ nkyenaꞌon tuq te Séusc atqet tuq twitz te amaqꞌ, bꞌix te chman aj te Séus otzaj tin stziꞌ tlamelul te amaqꞌ junjun tal tor bꞌix ubꞌech bꞌan txakuꞌ, bꞌix tetz kyukyꞌi kyaqil kye xjal kygan tuq tzan tqet ksiꞌ present te Paꞌk bꞌix te Bꞌeꞌch.
14 Ya ma tzꞌok kchaꞌoꞌ te Paꞌk bꞌix te Bꞌeꞌch, kyetz owel kylaquꞌ kyqꞌanaq kyiꞌj [tzan tqet kyyekꞌuꞌ nyaꞌtx dyakwerd tuq ateꞌ], bꞌix eꞌox kxol kye xjal bꞌix oxik kyqꞌumaꞌ tukyꞌi nim kywiꞌ ikxjani: 15 “Etetz ¿tistil etetz nꞌekꞌuluꞌ ikxjani? Qetza ax aꞌoꞌna xjal iktzaꞌ etetz aꞌix. Qetza cha nqopakbꞌan etetz te tpakbꞌalil galan tzan tkaj esiꞌ kyaqil aj nyaꞌtx galanni, bꞌix tzan etokslan tiꞌj Qtata Dios aj at jun tanqꞌin, aj oqet kꞌulun te twitz kaꞌj bꞌix te twitz txꞌoꞌtxꞌ bꞌix te nim aꞌ bꞌix kyaqil aj at.” 16 Oqtxiꞌ te Qtata Dios ostzoqpij tzan kybꞌet kyaqil xjal iktzaꞌ kyetz kyganx. 17 Per tetz kꞌontiꞌl okaj tsiꞌ tzan tqet tyekꞌuꞌ abꞌl tuq tetz, komo tidiꞌchq galan ntkꞌuluꞌ. Komo aji tetz te aj ntzaj saman te jabꞌ, bꞌix kyaqil aj tbꞌanil twitz etawal aj nkaj, bꞌix ax ntzaj tsiꞌ kyaqil aj presis tzan ewaꞌan, bꞌix tzan xhchalaj etanim. 18 Anke kyetz oxik kyqꞌumaꞌ kyaqil nini, pen obꞌantik tzan tel kyin gan kye xjal tzan tqet ksiꞌ tuq te present te kyetz. 19 Ntons yaji, kyetzaj txqꞌan aj tijajil Israel aꞌeꞌ aj Antyokiy [qaynin tuj tkwentil Pisidy] bꞌix txqꞌanky aj Ikony. Kyetz oxik kykubꞌsaꞌ kykꞌuꞌj kye xjal, bꞌix astilji owok kxoꞌoꞌ tukyꞌi abꞌj te Paꞌk, bꞌix yaji owex kyjukiꞌ xtxaꞌm amaqꞌ, komo kyetz tuj kynabꞌl qa ojetq tuq kamik. 20 Yaji, kye qerman, kyetz owok kchimoꞌ kyibꞌ tiꞌj te Paꞌk, bꞌix tetz ojaw waꞌlet bꞌix oxik junkyꞌel tuj amaqꞌ. Ya tuj junky iwitq oxik Derb tukyꞌi Bꞌeꞌch.
21 Ya ma xik kypakbꞌaꞌ te tpakbꞌalil galan tuj Derb, bꞌix ya ma kyeꞌokslan tiꞌj Jesus kyꞌilaꞌj xjal tzi, emeltzꞌjik junkyꞌel Listr bꞌix Ikony bꞌix Antyokiy [qaynin tuj tkwentil Pisidy]. 22 Kyuj kye aj amaqꞌ niꞌn kyetz oxik kynimsaꞌ kykꞌuꞌj kye aj nkyeꞌokslan tiꞌj Jesus bꞌix nkyexik tuq kykawiꞌ tzan kꞌon tkaj ksiꞌ tzan tok kywitꞌbꞌaꞌ kykꞌuꞌj tiꞌj Qajawil. Bꞌix oxik kyqꞌumaꞌ kyetz kye xjal ikxjani: “Qetz aj nqokaj tuj tqꞌabꞌ Qtata Dios, qetz nꞌok qen twitz tidiꞌchq xhchoꞌnal [tzan tpaj xjal aj nkyeqꞌojin qiꞌj].” 23 Yaji kxol junjunchaq bꞌuchꞌuj qerman, ekaj ksiꞌ tijxjal tukyꞌi kyajwalil. Yaji ya ma kyexnaqꞌtzan bꞌix ma kyeꞌipan waꞌij, ekaj kswaꞌ tuj tqꞌabꞌ te Qajawil aj jaꞌ witꞌlik kykꞌuꞌj.
Aj Kymeltzꞌjik Junkyꞌel Te Paꞌk Bꞌix Bꞌeꞌch Aj Jaꞌ Ebꞌajtzaj Lajoꞌ
24 Ntons ya ma kyekyꞌik tuj tkwentil Pisidy, yaji ebꞌajpon tuj tkwentil Panfily. 25 Ya ma xik kypakbꞌaꞌ Tyol Qtata Dios tuj amaqꞌ Perg [tuj tkwentil Panfily], yaji ebꞌajxik amaqꞌ Ataly.
26 Yaji ebꞌajxik tuj bark tzan kypon junkyꞌel amaqꞌ Antyokiy [tuj tkwentil Siry] aj jaꞌ exik qꞌapoꞌ tuj tqꞌabꞌ Qtata Dios jun-el tzan tqet kykꞌuluꞌ tuq te aqꞌunj, bꞌix ajnaꞌl ojetq tuq bꞌantik kyitzaꞌ. 27 Ya ma kyepon Antyokiy, eꞌok kchimoꞌ kyaqil kye aj bꞌuchꞌuj qerman txini bꞌix oxik kyqꞌumaꞌ kyaqil aj bꞌan tbꞌanil ojetq tuq tkꞌuluj te Qtata Dios kyukyꞌiꞌl kxol kye xjal, bꞌix oxik kyqꞌumaꞌ titzaꞌ tuq kye aj nyaꞌtx tijajil Israel ojetq tuq tzꞌok kywitꞌbꞌaꞌ kykꞌuꞌj tiꞌj Jesus. 28 Yaji ebꞌajkaj tzi kyꞌilaꞌj qꞌij kxol kye qerman.