13
Te Tbꞌay-el Aj Kxik Lajoꞌ Te Paꞌk Bꞌix Bꞌeꞌch Pakbꞌon Laqꞌchik
1 Kxol kye qerman tuj Antyokiy, ateꞌ tuq junjun erman aj yolil tyol Dios bꞌix junjunky aj nkyexnaqꞌtzan tuq txqꞌanky, bꞌix kyetz aꞌeꞌ aj ntzanijeꞌ: Bꞌeꞌch jun, bꞌix junky te Simon aj nꞌok tuq qꞌumaꞌ Níger,a bꞌix Lusy aj Siren junky, bꞌix junky te Manaemb aj ojaw kyibꞌ junx tukyꞌi Eródes te gobernador [tuj Galiley], bꞌix junky Saulo. 2 Aj man tuq nkyexnaqꞌtzan te Qajawil bꞌix nkyeꞌipan tuq waꞌij, te Txew Dios otzaj tyoliꞌ kyetz ikxjani: “Intel epawaꞌ te Bꞌeꞌch bꞌix te Saulo te wetz tzan kykꞌulun jun kyaqꞌun aj oxeꞌl nsiꞌ kyetz.” 3 Ntons ya ma mankun kxnaqꞌtzan bꞌix ma mankun kyipan waꞌij, kye qerman oqet ksiꞌ kyqꞌabꞌ kyajsikc bꞌix ebꞌajkawin bꞌix kyetz ebꞌajxik.
Aj Tkaj Moy Jun Chman Tuj Chipr Tzan Tyol Te Paꞌk
4 Ntons, ikxji kyetz exik lajoꞌ tzan te Txew Dios bꞌix ebꞌajqex Selewsy bꞌix yaji ebꞌajxik tuj jun bark max amaqꞌ Chipr. 5 Bꞌix ya ma kyepon tuj amaqꞌ Salamín [tuj tkwentil Chipr], nxik tuq kypakbꞌaꞌ te tyol Qtata Dios kyuj kye jay nabꞌil Dios aj jaꞌ nꞌok kchimoꞌ tuq kyibꞌ kye aj tijajil Israel. Bꞌix ax tuq nꞌonen te Waꞌnchd kyukyꞌiꞌl.
6 Ya ma kyekyꞌik tuj kyaqil tkwentil te isla Chipr, ebꞌajpon tuj te amaqꞌ Páfos. Tzi owok kyen jun xjal aj tijajil Israel, tbꞌi Barjesus,e tetz jun chman tuq, bꞌix nyolin tuq tetz jun aj yolil tyol Dios per nyaꞌtx bꞌanꞌax tuq titzaꞌ. 7 Bꞌix te ja chmanni, tetz jun tukyꞌiꞌl te kꞌulul mandad tuj aj amaqꞌji, Sergio Paulo tbꞌi. Te kꞌulul mandad tetz jun xjal bꞌan list tuq, bꞌix etzaj tukꞌleꞌ te Bꞌeꞌch bꞌix te Saulo tzan tok xhchaꞌoꞌ tyol Qtata Dios. 8 Per te chman, aj nꞌok qꞌumaꞌ Elims tuj te yol gryeg, tetz oxik tqꞌumaꞌ tidiꞌchq tukyꞌi te kꞌulul mandad tzan kꞌon tokslan te tumeꞌl titzaꞌ nꞌok qwitꞌbꞌaꞌ jkꞌuꞌj tiꞌj te Qajawil. 9 Ntons te Saulo, aj ax owok qꞌumaꞌ Paꞌk, tetz nojnaq tuq tukyꞌi Txew Dios bꞌix oxik kaꞌyin tiꞌj te chman, 10 oxik tqꞌumaꞌ ikxjani: “Yatz aj aꞌich tkꞌwaꞌal te Tajaw Choj, cha aweqꞌinqet kyiꞌj xjal bꞌix kꞌontiꞌl nchbꞌisun qa at jun tumeꞌl aj presis, yatz aj cha nꞌel awikꞌoꞌ te tumeꞌl galan, ¿tujbꞌaꞌn kaj asiꞌ tzan ayolin nyaꞌtx galan tiꞌj te tumeꞌl aj ntzaj txnaqꞌtzaꞌ te Qajawil qetz? 11 Ajnaꞌl te Qajawil okꞌuluyon awiꞌj tukyꞌi tajwalil tzan akaj moy bꞌix tuj jun tyemp nlay xik awen te chkꞌatunal te qꞌij.” Bꞌeyxnajji te xjal okaj moy, owok bꞌan qlolj tuj twitz bꞌix ntakanjeꞌ njoyon abꞌl tuq bꞌaꞌn tzan txik jochon tetz. 12 Ntons ya ma tzꞌok ten te kꞌulul mandad aj ojetq tuq kyꞌik, tetz owokslan bꞌix bꞌan nlabꞌan tuq tiꞌj te tpakbꞌalil tiꞌj Qajawil.
Aj Tpakbꞌan Te Paꞌk Bꞌix Bꞌeꞌch Tuj Antyokiy Tkwentil Pisidy
13 Yaji ya ma kyeꞌex Páfos tuj jun bark, te Paꞌk bꞌix kye txqꞌanky tukyꞌiꞌl ebꞌajpon Perg tuj tkwentil Panfily. Tzi te Waꞌnch owel tpawaꞌ tibꞌ kyiꞌj, tetz omeltzꞌjikky Jerusalen. 14 Ya ma kyeꞌetz Perg, ebꞌajpon Antyokiy qaynin tuj tkwentil Pisidy. Tzi tuj jun qꞌij ojlaꞌmj eꞌox tuj te jay nabꞌil Dios bꞌix eqet witꞌlet tzi.
15 Ya ma jaw eꞌeꞌ [te aj nyolin] tuj te Kawbꞌil tiꞌj te kyrelijyon bꞌix te ktzꞌibꞌen kye aj yolil tyol Dios,f kye kꞌulul mandad tuj te jay nabꞌil Dios oxik kyqꞌumaꞌ kyukyꞌiꞌl ikxjani: “Etetz waq qxjalil,g qa at jun eyol tzan qtzaj ekawiꞌna qetza aj atoqetna tzani ntons peꞌeyolin ajnaꞌl.”
16 Ntons te Paꞌk ojaw waꞌlet, bꞌix ojaw tin tqꞌabꞌ tzan tuq kylumet, bꞌix oxik tqꞌumaꞌ ikxjani: “Etetz aj tijajil Israel aꞌix, bꞌix etetz aj nkxjanin Qtata Dios anke [nyaꞌtx aj tijajil Israel aꞌix], instzaj echaꞌoꞌ ntzani:
17 Te Qtata Dios aj ntzaj kynaꞌoꞌ kye qijajil Israel oqtxiꞌ, tetz eꞌel tjoyoꞌ kye qijajil bꞌix otkꞌuluj tzan kyok jun nim amaqꞌ man tuq akyeqet Ejipt.* Yaji tukyꞌi nim tajwalil tetz ebꞌajꞌetz tin tuj te aj amaqꞌ niꞌn. 18 Bꞌix kawnaq (40) aqꞌbꞌi tetz oten tpasens kyiꞌj tuj te kyꞌixkꞌoj txꞌoꞌtxꞌ.* 19 Bꞌix te Qtata Dios otkꞌuluj tzan kyqet kyitzaꞌ wuq amaqꞌ tuj te tkwentil Canaán tzan txik tsiꞌ te ktxꞌoꞌotxꞌ [kye qijajil oqtxiꞌ].* 20 Ntons, okyꞌik kaj oqal tukyꞌi lajuj tuj oxqal (450) aqꞌbꞌi,h bꞌix yaji ojaw tin junjun kxol kyetz tukyꞌi nim kyajwalil tzan kykꞌulun mandad bꞌix tzan kykolon kyiꞌj kye xjal,* max aj tkaj tsiꞌ te Samuel aj yolil tyol Dios oqtxiꞌ.* 21 Yaji kyetz okyqanij tukyꞌi Qtata Dios tzan stzaj tsiꞌ jun twitzaleꞌ kꞌulul mandad te kyetz,* bꞌix tetz okaj tsiꞌ te Saúl aj tkꞌajol Sis aj te bꞌuchꞌuj tijajil Minch.* Bꞌix te Saúl okꞌulun mandad kawnaq (40) aqꞌbꞌi. 22 Ya ma tzꞌel te Saúl,* te Qtata Dios okaj tsiꞌ junky twitzaleꞌ kꞌulul mandad kxol, okaj tsiꞌ te Dawid,* bꞌix oxik tqꞌumaꞌ tiꞌj te Dawid ikxjani: “Maꞌtx tzꞌel galan tuj nwitz te Dawid aj tkꞌajol Jesey.i Tetz nbꞌisun iktzaꞌ wetz nkyinbꞌisun, bꞌix tetz oqtel tkꞌuluꞌ iktzaꞌx wetz ngan.”*
23 Ntons tiꞌj tijajil tetz, otzaj te Jesus aj Koloyon qiꞌj qetz aj tijajil Israel aꞌoꞌ, iktzaꞌx te Qtata Dios ojetq xik tsiꞌ tyol tiꞌj. 24 Aj minaꞌ tuq tul te Jesus, te Waꞌnch oxik tpakbꞌaꞌ kxol kye xjal aj tijajil Israel tzan tjaw siꞌ aꞌ kywiꞌ tjawlen kkyꞌixpuꞌ kynabꞌlin.* 25 Bꞌix aj chꞌinky tuq tmankun aj presis tuq tzan tkꞌulun te Waꞌnch, tetz oxik xhchaꞌoꞌ kye xjal ikxjani: “¿Abꞌl aꞌin etetz tuj enabꞌl? Wetz nyaꞌtx aꞌin te xjal aj nꞌebꞌisuꞌ etetz,* per tzul junky mas yaj, bꞌix wetz twitz tetz kꞌontiꞌl npon wajwalil iktzaꞌ jun xjal aj nꞌaqꞌunan te pujul twitz txajabꞌ tajaw.”j
26 Etetz waq erman aj aꞌix tijajil Abran, bꞌix etetz [aj nyaꞌtx tijajil Abran] aj nkxjanin Qtata Dios, te qkyaqil qetz otzaj siꞌ te ja tpakbꞌalil ntzani tzan jkolet. 27 Kye aj nkyenajan tuq Jerusalen bꞌix te bꞌuchꞌuj tijxjal aj mas nim kyajwalil kxol qxjalil, kꞌontiꞌl oxik kyokslaꞌ te Jesus, bꞌix ni kꞌontiꞌl owox tuj kywiꞌ te kyyol kye aj yolil tyol Dios oqtxiꞌ aj njaw eꞌelet kyuj kye jay nabꞌil Dios tuj kyaqil qꞌij ojlaꞌmj. Ikxji kyetz, aj txik ksiꞌ te Jesus tuj il, oponkix te aj nqꞌumjik tuq oqtxiꞌ. 28 Anke tetz kꞌontiꞌl til owoknoj kyitzaꞌ tzan tuq tqet kykansaꞌ, oxik kyqꞌumaꞌ te Pilat tzan txik tkꞌuluꞌ mandad tzan tuq tqet kansaꞌ.*
29 Ya ma kyꞌik kyaqil iktzaꞌx tzꞌibꞌankaj tuq tiꞌj tuj te Tuꞌjal Dios, oqetz kyin twitz te krus bꞌix owox kymuquꞌ.* 30 Per te Qtata Dios otkꞌuluj tzan tjaw anqꞌin kxol kye kamnaq.* 31 Tetz ojaw kanet bꞌix kyꞌilaꞌj qꞌij oqet ten kyukyꞌi kye aj ajuneꞌ tuq tukyꞌiꞌl aj ktzaj Galiley max Jerusalen. Bꞌix aꞌeꞌ kyetz ajnaꞌl aj nkyexik pakbꞌan tiꞌj tetz kxol kyaqil xjal.
32 Qetza ajnaꞌl nxik qpakbꞌaꞌna etetz te tyol Qtata Dios aj oxik tsiꞌ kye qijajil oqtxiꞌ, 33 ajnaꞌl maꞌtxkix tkꞌuluj qukyꞌiꞌl qetz aj aꞌoꞌ kyijajil. Opon kyaqil ntzani aj tjawlen anqꞌin te Jesus titzaꞌ, iktzaꞌx tzꞌibꞌankaj tuj te tkabꞌiꞌ Salmo aj nyolin ikxjani: “Yatz aꞌich nkꞌwaꞌal; wetz ajnaꞌl maꞌtx xhtzaj nkꞌwaꞌliꞌ.”* 34 Bꞌix bꞌanꞌax, tzan te Qtata Dios ojaw anqꞌin te Jesus kxol kye kamnaq tzan kꞌon tponaj xhchiꞌjel. Komo otyolij ikxjani: “Oxeꞌl nsiꞌ etetz kyaqil aj bꞌan galan aj wetz nwitzaleꞌ oxik nsiꞌ nyol tiꞌj tukyꞌi Dawid [oqtxiꞌ].”* 35 Bꞌix ax nyolin [te Dawid tukyꞌi Qtata Dios] tuj junky Salmo ikxjani: “Nlay atzoqpij tzan tponaj xhchiꞌjel tetz aj pawaꞌ aꞌox te yatz.”* 36 Bꞌanꞌax te Dawid tetz okꞌulun kxol txjalil tuj aj tyempji iktzaꞌ te Qtata Dios tgan tuq, bꞌix yaji tetz okamikk bꞌix te xhchiꞌjel oponaj. 37 Per te xhchiꞌjel te aj ojaw tanqꞌinsaꞌ te Qtata Dios, tetzji kꞌontiꞌl oponaj.
38 Intok echaꞌoꞌ waq erman, tzan tpaj tetz, ajnaꞌl nxik pakbꞌlet tzan tqet najsaꞌ te echoj. Bꞌix komo kꞌontiꞌl nbꞌantik tuq tzan jkꞌulun iktzaꞌ nyolin tuj te Kawbꞌil tiꞌj qrelijyon [aj oqet stzꞌibꞌaꞌ] Moisés tzan tkaj saq qanim tuj twitz Qtata Dios, 39 ntons ajnaꞌl tzan tpaj te Jesus kyaqil xjal aj okyeꞌokslayon tiꞌj tetz, bꞌaꞌn tzan tel in kchoj. 40 Intok esiꞌ enabꞌl tzan kꞌon tkanonpon etiꞌj te tyol Dios aj oqet ktzꞌibꞌaꞌ kye aj yolil tyol oqtxiꞌ ikxjani: 41 “Instzaj echaꞌoꞌ etetz aj nkxmayin tiꞌj [Nyol], peꞌelabꞌan waq bꞌix peꞌeponaj, tzan tpaj wetz ajnaꞌl oqtel nkꞌuluꞌ jun tidiꞌ, bꞌix cha at-wit abꞌl oxeꞌl qꞌuman etetz tiꞌj, nlay-tal xik etokslaꞌ.””* 42 Ntons, ya ma kyeꞌetz kyetz tuj te jay nabꞌil Dios, kye xjal oqet kywitz tzan tuq kyyolin junkyꞌel tiꞌj kyaqil nini tuj junky qꞌij ojlaꞌmj. 43 Ya ma kyekawin kxolx tzan kyaj, kyꞌilaꞌj kye aj tijajil Israel bꞌix kye aj ojetq tuq kyeꞌokslan iktzaꞌ kye aj tijajil Israel, eꞌok lapet tiꞌj Paꞌk bꞌix tiꞌj Bꞌeꞌch, bꞌix te Paꞌk tukyꞌi Bꞌeꞌch nxik tuq kykubꞌsaꞌ kykꞌuꞌj tzan kꞌon tuq tkaj kykolaꞌ te nim bꞌan galan aj nkꞌulun te Qtata Dios kxol.
44 Ya tuj junky saman, tuj te qꞌij ojlaꞌmj, kyaqil kye xjal tuj te amaqꞌ owok kchimoꞌ kyibꞌ chaꞌol tyol Qtata Dios. 45 Yatzun kye aj nim kyajwalil kxol, ya ma tzꞌok kyen kyꞌilaꞌj tuq kye xjal [nꞌok tuq kchimoꞌ kyibꞌ chaꞌoyon tiꞌj te Paꞌk], ntons bꞌan nkyeꞌekꞌawin tuq bꞌix nkyeyolin tuq nyaꞌtx bꞌanꞌax te aj ntyoliꞌ te Paꞌk bꞌix bꞌan nyaꞌtx galan nkyeyolin tuq tiꞌj.
46 Ntons te Paꞌk bꞌix Bꞌeꞌch eyolin tukyꞌi jun tkꞌuꞌjlal bꞌix oxik kyqꞌumaꞌ ikxjani: “Exol etetz presiskix tuq tzan txik jqꞌumaꞌna tbꞌay te tpakbꞌalil tiꞌj te tyol Qtata Dios. Per komo etetz ma tzꞌel etikꞌoꞌ bꞌix nꞌenaꞌoꞌ etetz kꞌontiꞌl nꞌetajoꞌ tzan ekꞌamon jun etanqꞌin te jun-eleꞌx, ntons qetza ajnaꞌl ma qoxika kxol kye aꞌeꞌ aj nyaꞌtx tijajil Israel. 47 Komo te Qtata Dios otzaj tkꞌuluꞌ mandad qetza ikxjani: “Wetz maꞌtx kxqet nsiꞌ tzan tjaw ejaqoꞌ kywitz kye aꞌeꞌ aj nyaꞌtx tijajil Israel tzan txik epakbꞌaꞌ titzaꞌ tzan kykolet kye xjal jaꞌchq twitz txꞌoꞌtxꞌ.””*
48 Ntons, ya ma tzꞌok kchaꞌoꞌ kye aj nyaꞌtx tijajil Israel ikxji, kyetz oje kyebꞌajchalaj bꞌix bꞌan nqet tuq kyjiqꞌbꞌaꞌ te tyol Qajawil. Bꞌix eꞌokslan kyaqil kye aj ojetq tuq kyekaj siꞌkix tzan kykꞌamon jun kyanqꞌin te jun-eleꞌx. 49 Ikxji oxik pakbꞌaꞌ te tpakbꞌalil tiꞌj te Qajawil tuj kyaqil aj luwarji.
50 Per yaji [kye aj nim kyajwalil kxol] kye aj tijajil Israel, kyetz oxik kykubꞌsaꞌ kykꞌuꞌj junjun xuj aj bꞌan eqꞌiꞌ kyitzaꞌ te kyrelijyon bꞌix aj bꞌan otzqiꞌmj-eꞌ bꞌix ax kyaqil kye ichan aj tlimaqal xjal-eꞌ tuj te amaqꞌ. Astilji ejaw ktzyuꞌ te Paꞌk bꞌix Bꞌeꞌch, bꞌix ebꞌajꞌex kylajoꞌ tuj tkwentil kyamaqꞌ. 51 Ntons te Paꞌk tukyꞌi Bꞌeꞌch owel kkyitoꞌ te quq tiꞌj kxajabꞌ [te jun señ kyiꞌj],l yaji ebꞌajxik max amaqꞌ Ikony. 52 Ikxji kye aj nkyeꞌokslan tuq tiꞌj Jesus, kyetz bꞌan nkyechalaj tuq bꞌix ebꞌajnoj tukyꞌi te Txew Dios tuj kyanim.*