12
Aj Tqet Kansaꞌ Te Jacobo, Bꞌix Aj Tkolpjik Te Xhpeꞌy
1 Tuj aj tyempji, te Eródesa aj rey kꞌulul mandad, tetz ebꞌajjaw stzyuꞌ junjun qerman tzan txik tsiꞌ jun xhchoꞌnal kyiꞌj. 2 Bꞌix oqet tkansaꞌ tukyꞌi machit kansbꞌil xjal te Jacobob aj titzik Waꞌnch. 3 Ya ma tzꞌok ten galan owel tuj kywitz kye [tijxjal] aj tijajil Israel, yaji ax ojaw stzyuꞌ te Xhpeꞌy mer tuj te ninqꞌij aj nkyewaꞌan wabꞌj pan aj kꞌontiꞌl malsbꞌil tuj. 4 Ya ma jaw ktzyuꞌ, oqex ksiꞌ tuj pres, bꞌix oqet xbꞌuqiꞌ tukyꞌi kaj bꞌuchꞌuj soldad kajkajchaq soldad te junjun bꞌuchꞌuj, bꞌix bꞌisuꞌ tuq kyitzaꞌ tzan tjatz kyin kywitz kye xjal oj tkyꞌik tuq te ninqꞌij Paskw.* 5 Ikxji te Xhpeꞌy lamoꞌ tuq tuj pres, per kye qerman tukyꞌi jun tkꞌuꞌjlal bꞌan nkyexnaqꞌtzan tuq tukyꞌi Qtata Dios.
6 Ntons, te Eródes bꞌisuꞌ tuq titzaꞌ tzan tjatz tin te Xhpeꞌy [tzan tok tsiꞌ jun xhchoꞌnal tiꞌj], bꞌix axkix aj aqꞌbꞌilji te Xhpeꞌy nwitan tuq kxol kabꞌeꞌ soldad bꞌix kꞌaloꞌ tuq tukyꞌi kabꞌeꞌ kaden bꞌix kye xbꞌuqil pres ateqet tuq stziꞌ lamel nkyexbꞌuqin tuq te pres. 7 Yaji tanderepent ojaw kanet tuj pres jun ángel tlajen Qajawil bꞌix jun chkꞌatunal otxaqtxon tuj pres. Owok tmakoꞌ xtxalaj tkꞌuꞌj te Xhpeꞌy bꞌix ojaw tkꞌasuꞌ, oxik tqꞌumaꞌ: “Pajaw sekꞌ.” Yaji kye kaden aj akyeꞌok tuq tqꞌabꞌ te Xhpeꞌy eꞌel tzꞌaqik kyibꞌx. 8 Yaji te ángel oxik tqꞌumaꞌ: “Intok asiꞌ aqꞌanaq bꞌix intok asiꞌ axajabꞌ.” Ntons te Xhpeꞌy ikxji oqet tkꞌuluꞌ. Bꞌix ax oxik tqꞌumaꞌ ikxjani: “Intok asukuꞌ atxoꞌw awiꞌj bꞌix pawok lapet wiꞌj.”
9 Yaji te Xhpeꞌy owok lapet tiꞌj per kꞌontiꞌl tebꞌen qa bꞌanꞌax kyaqil aj ntkꞌuluꞌ tuq te ángel; tuj tnabꞌl te Xhpeꞌy cha tuq nꞌok jotoꞌ tuj twitz. 10 Ekyꞌik kywitz kye aj tbꞌay bꞌuchꞌuj soldad aj nkyexbꞌuqin tuq te lamel, yaji tkabꞌiꞌ bꞌuchꞌuj, ya ma kyepon twitz te lamel aj pur kꞌuxbꞌil aj atqet stzibꞌey, te lamel owel jaqlik tibꞌx, exik bꞌet max tuj junky bꞌey, bꞌix yaji te ángel oqetnaj.
11 Ya ma tzaj tnabꞌeꞌ tibꞌ te Xhpeꞌy, otqꞌumaj ikxjani: “Ajnaꞌl maꞌtx tzꞌel nnikyꞌ, bꞌanꞌax te Qajawil maꞌtx tzaj tlajoꞌ te ángel kolol wetz tuj tqꞌabꞌ te Eródes bꞌix tiꞌj kyaqil aj nkybꞌisuꞌ kye [tijxjal aj qxjalil] aj tijajil Israel.”
12 Ya ma tzaj tnabꞌeꞌ tibꞌ tiꞌj kyaqil ntzani, tetz oxik tjay Liy aj tnan Waꞌnch aj nꞌok tuq qꞌumaꞌ tbꞌi Mak, bꞌix tzi ojetq tuq tzꞌok kchimoꞌ kyibꞌ kyꞌilaꞌj tzan kxnaqꞌtzan. 13 Ya ma tzꞌok tzkꞌonkꞌaꞌ te Xhpeꞌy te lamel tzijay, owetz eꞌel tetz jun xuj Róde tbꞌi, jun kryad tzi. 14 Ya ma tzꞌel tnikyꞌ te xuj tiꞌj twiꞌ te Xhpeꞌy, tetz tzan tpaj bꞌan nchalaj tuq, kꞌontiꞌl otnaꞌoj tzan tox tjaqoꞌ te lamel sinoke owajkok junkyꞌel tuj jay qꞌumal te tpakbꞌalil te Xhpeꞌy atqet tuq tzilamel jwer.
15 Yaji kye txqꞌanky erman oxik kyqꞌumaꞌ tetz ikxjani: “Qanq cha lok aꞌichni.” Per tetz nxik tuq tyoliꞌ kyetz, bꞌanꞌax a tuq te Xhpeꞌy. Ntons kyetz oxik kyqꞌumaꞌ tetz ikxjani: “Nyaꞌtx aji. Te nini cha tanim tetz.”c
16 Per te Xhpeꞌy tzunx tuq nꞌok tzkꞌonkꞌaꞌ te lamel tzan totz jaqoꞌ te jay twitz. Ya ma tzꞌox kyjaqoꞌ, kkyaqil kyetz etzajbꞌaj. 17 Per tetz ojaw tin tqꞌabꞌ te jun seny tzan tuq kylumet, bꞌix oxik tqꞌumaꞌ kyetz titzaꞌ te Qajawil ojetq tuq kolpin tetz tuj pres. Bꞌix oxik tqꞌumaꞌ kyetz ikxjani: “Intxik eqꞌumaꞌ ntzani te Chawd bꞌix kye aꞌeꞌ qerman.” Yaji tetz owex tzi bꞌix oxik tuj junky luwar.
18 Ya ma qojaw saqxikan, kye soldad ebꞌajjaw labꞌun tzan tpaj kꞌontiꞌl tuq kyebꞌen jaꞌ ojetq xik te Xhpeꞌy. 19 Te Eródes oxik tkꞌuluꞌ mandad tzan tqet joyoꞌ te Xhpeꞌy per kꞌontiꞌl owoknoj kyitzaꞌ. Ya ma kyeqet pichꞌoꞌ kye soldad titzaꞌ oten, yaji oxik tkꞌuluꞌ mandad tzan kyqet kansaꞌ. Yatzun te Xhpeꞌy owetz Judey bꞌix oxik Sesarey, bꞌix ax okaj tzi.
Aj Tkamik Te Eródes Agrípa
20 Ntons, te Eródes nqꞌojin tuq kyiꞌj kye xjal aj amaqꞌ Tir bꞌix amaqꞌ Sidon. Astilji kye xjal owok kchimoꞌ kyibꞌ tzan kyyolin tukyꞌiꞌl. Komo ojetq tuq qet kywitz twitz te Blasto aj kꞌulul mandad te aqꞌunj tuj tjay te twitzaleꞌ kꞌulul mandad aj [Eródes], ikxji eꞌox yoliyon tukyꞌi te twitzaleꞌ tzan kꞌon tuq tqꞌojin kyiꞌj, komo tzi tuq ntzaj kyweꞌ tuj tamaqꞌ te twitzaleꞌ. 21 Yaji, tuj jun qꞌij aj okaj siꞌ tzan te [twitzaleꞌ aj] Eródes tzan tuq tok xhchimoꞌ tibꞌ kyukyꞌiꞌl, tetz owok tsiꞌ tqꞌanaq bꞌan tbꞌanil bꞌix owox witꞌlet tuj twitꞌlel aj jaꞌ npujun kyil kye xjal bꞌix owaqꞌik tzan tyolin kyukyꞌiꞌl. 22 Kye xjal [oqet kyjiqꞌbꞌaꞌ tetz,] owaqꞌik tzan ksikyꞌin ikxjani: “Tetz nyolin iktzaꞌ jun dios bꞌix nyaꞌtx iktzaꞌ jun xjal.” 23 Bꞌix tzan tpaj te Eródes kꞌontiꞌl oqet tjiqꞌbꞌaꞌ te Qtata Dios, bꞌeyxnajji jun ángel tlajen Qtata Dios oxik tsamaꞌ xhchuqꞌ tiꞌj, oqet loꞌ tzan kye xhchuqꞌ bꞌix onaj.
24 Ntons, te tyol Qajawil jaꞌchq tuq nxik pakbꞌaꞌ bꞌix kyꞌilaꞌj tuq nkyeꞌokslan tetz. 25 Ya ma bꞌantik kymandad te Bꞌeꞌch bꞌix Saulo [tuj Judey],* ebꞌajmeltzꞌjikky Jerusalen bꞌix oxik kyin kyukyꞌiꞌl jun erman Waꞌnch tbꞌi, bꞌix ax nꞌok tuq qꞌumaꞌ Mak.