11
Aj Txik Tqꞌumaꞌ Te Xhpeꞌy Tidiꞌ Okyꞌik Kxol Kye Aj Nyaꞌtx Tijajil Israel
1 Kye aꞌeꞌ tkyꞌixel Jesus bꞌix kye aꞌeꞌ qerman aj akyeqet tuq Judey, kyetz owok kchaꞌoꞌ kye aj nyaꞌtx tijajil Israel ax ojetq tuq kykꞌamoj tyol Qtata Dios. 2 Ya ma ponky te Xhpeꞌy Jerusalen, tetz owok iliꞌ kyitzaꞌ kye aj tzunx nxik tuq kxnaqꞌtzaꞌ tzan tok kyechalul kye qerman [iktzaꞌ nyolin te Kawbꞌil oqtxiꞌ]. 3 Oxik kyqꞌumaꞌ tetz ikxjani: “¿Tistil yatz ma xhchꞌox tuj kyjay aj xjal [aj nyaꞌtx qxjalil] aj kꞌontiꞌl atok kyechalul, bꞌix ma chwaꞌan kyukyꞌiꞌl?”
4 Ntons yaji te Xhpeꞌy owaqꞌik tzan txik tqꞌumaꞌ kyetz titzaꞌ okyꞌik kyaqil, bꞌix oxik tqꞌumaꞌ ikxjani: 5 “Wetz akyinqet tuq tuj amaqꞌ Jop, aj man tuq nkyinxnaqꞌtzan owok jotoꞌ tuj nwitz jun nim sabl, oxik wen tzyuꞌ tuq kykajil xtxaꞌm ikjaꞌn tuq tqetz tuj kaꞌj tzan tkyaqul aj jaꞌ tuq wetz akyinqet. 6 Ya ma tzꞌok nsiꞌ nnabꞌl tidiꞌ tuq at tuj, oxik wen kyaqil txakl txkup twitz txꞌoꞌtxꞌ, txkup aj kaj kyoq bꞌix txkup aj nyaꞌtx aloꞌmj bꞌix txkup aj cha nkyexik jilin twitz txꞌoꞌtxꞌ bꞌix kye pichꞌ. 7 Bꞌix oxik nchaꞌoꞌ twiꞌ jun xjal otzaj tqꞌumaꞌ wetz ikxjani: “Pajaw waꞌlet Xhpeꞌy, intqet akansaꞌ achiꞌ bꞌix pawaꞌan.” 8 Bꞌix wetz oxik nqꞌumaꞌ: “Nlay Tat, wetz ni jun-el oxik nwaꞌaꞌ jun tidiꞌ aj xjan tzan qwaꞌan.” 9 Ntons oxik nchaꞌoꞌ tkaꞌmjjiꞌn-el twiꞌ te xjal tuj kaꞌj, otzaj tqꞌumaꞌ ikxjani: “Te aj oje tkꞌuluj te Qtata Dios tzan tkaj saq tuj twitz, kꞌon tzꞌok aqꞌumaꞌ yatz qa jun tidiꞌ nyaꞌtx galan.”
10 Te ntzani okyꞌik oxmaj bꞌix yaji kyaqil ojax in junkyꞌel tuj kaꞌj. 11 Bꞌeyxnajji tuj aj ratji epon ox ichan tuj te jay aj jaꞌ tuq atin, etzaj lajoꞌ max amaqꞌ Sesarey, ebꞌajpon joyol wetz txini. 12 Te Txew Dios otzaj tqꞌumaꞌ wetz tzan nxik kyukyꞌiꞌl bꞌix tzan kꞌon tnaꞌnon wanim. Astilji inxwaꞌq bꞌix exik wukyꞌiꞌl kye ja waqaq erman ntzani, bꞌix qkyaqilna oꞌoxna tuj tjay jun xjal txini. 13 Te xjal otzaj tqꞌumaꞌ qetza titzaꞌ owok jotoꞌ tuj twitz jun ángel waꞌlk tuq tuj tjay bꞌix oxik tqꞌumaꞌ ikxjani: “Inkxik alajoꞌ xjal tuj te amaqꞌ Jop tzan stzaj kyukꞌleꞌ te Simon aj nꞌok qꞌumaꞌ tbꞌi Xhpeꞌy. 14 Tetz otzajel tqꞌumaꞌ titzaꞌ bꞌaꞌn tzan akolet yatz bꞌix kyaqil kye aꞌeꞌ aj tuj ajay.”
15 Ntons, man tuq waqꞌlen nyolin kyukyꞌiꞌl, te Txew Dios otzaj kyajsik iktzaꞌx otzaj qajsik qetz aj taqꞌik kyaqil ntzani. 16 Otzaj tiktzꞌan tiꞌj wanim tyol te Qajaw Jesus ikxjani: “Te Waꞌnch ojaw tsiꞌ aꞌ kywiꞌ xjal, per ajnaꞌl chꞌinky stzaj te Txew Dios etajsik.”* 17 Astilji, qa te Qtata Dios ntzaj tsiꞌ Txew te qetz aj nqoꞌokslan tiꞌj te Qajaw Jesukrist, bꞌix yaji ax nxik tsiꞌ parej kye aj nyaꞌtx tijajil Israel, ¿tidiꞌ wetz wajwalil tzan tel weqꞌiꞌ gan te Qtata Dios?”
18 Ya ma tzꞌok kchaꞌoꞌ ikxjani, kkyaqil kꞌontiꞌlky tidiꞌ okyqꞌumaj, sinoke bꞌan oqet kyjiqꞌbꞌaꞌ Qtata Dios. Oxik kyqꞌumaꞌ ikxjani: “Ntons ax kye aj nyaꞌtx tijajil Israel ax te Qtata Dios nkꞌulun tzan kynaꞌon tuj kyanim tzan tjaw kkyꞌixpuꞌ kynabꞌlin tzan kyanqꞌin te jun-eleꞌx.”
Aj Kyok Qꞌumaꞌ “Cristianos” Tuj Antyokiy
19 Ntons, yatzun kye aj ebꞌajxik slabꞌuꞌ jaꞌchq tzan tpaj nkyejoylik tuq atx aj tkamlen te Xhteꞌk,* kyetz ebꞌajpon max amaqꞌ Penisy bꞌix amaqꞌ Chipr bꞌix max amaqꞌ Antyokiy, bꞌix nxik tuq kypakbꞌaꞌ te tpakbꞌalil [tiꞌj Jesus] anke aꞌox kyukyꞌi kye aj tijajil Israel bꞌix nyaꞌtx kye txqꞌanky. 20 Per ax ateꞌ tuq junjun kyetz aꞌeꞌ aj Chipr tuq bꞌix aꞌeꞌ aj Siren, ebꞌajpon Antyokiy bꞌix oxik kypakbꞌaꞌ tpakbꞌalil tiꞌj Qajaw Jesus kye aꞌeꞌ aj nkyeyolin tuq gryeg. 21 Te Qajawil atqet tuq kyukyꞌiꞌl per tukyꞌi nim tajwalil. [Astilji,] kyꞌilaꞌj xjal ebꞌajꞌokslan bꞌix oxik kyqꞌapoꞌ kyibꞌ tuj tqꞌabꞌ Qajawil.
22 Ya ma tzꞌok kchaꞌoꞌ kye qerman tuj Jerusalen ikxji, yaji oxik kylajoꞌ te Bꞌeꞌch max Antyokiy. 23 Ya ma pon te Bꞌeꞌch txini, tetz owok ten titzaꞌ te Qajawil ojetq qet tkꞌuluꞌ nim bꞌan galan kxol, ntons tetz oje chalaj bꞌix oxik tnimsaꞌ kykꞌuꞌj tzan kꞌon tnaꞌnon kyanim tzan tkaj kykolaꞌ te Qajawil. 24 Komo te Bꞌeꞌch jun xjal bꞌan galan tuq bꞌix atqex tuq te Txew Dios tuj tanim tukyꞌi nim tajwalil, bꞌix bꞌan witꞌlik tuq tkꞌuꞌj tiꞌj Qtata Dios. Bꞌix kyꞌilaꞌj xjal tzi ebꞌajꞌokslan tiꞌj Qajawil.
25 Yaji te Bꞌeꞌch oxik amaqꞌ Tars joyol te Saulo, bꞌix ya ma tzꞌoknoj twitz, oxik tin Antyokiy. 26 Tzi eqeten jun aqꞌbꞌi kxol kye qerman bꞌix exik kxnaqꞌtzaꞌ kyꞌilaꞌj xjal. Tuj Antyokiy, tzi owok qꞌumaꞌ tbꞌay-el “Kye Aj Krist” kybꞌi kye aj nkyeꞌokslan tuq tiꞌj Jesukrist.a
27 Tuj aj tyempji junjun aj yolil tyol Dios aj akyeqet tuq Jerusalen ebꞌajqex Antyokiy. 28 Jun te kyetz Agab* tbꞌi, bꞌix tetz oxik tqꞌumaꞌ te aj nyolin tuq te Txew Dios tuj tanim, qa maꞌ tuq kyꞌik jun nim waꞌij tuj kyaqil amaqꞌ. Te nini okyꞌikkixiꞌ mas yaj tuj tkwent te Claudio aj gobernador kꞌulul mandad. 29 Yaji kye qerman tuj Antyokiy oqet kybꞌisuꞌ tzan txik ksamaꞌ jun onbꞌil kye qerman tuj Judey, oqet kykawlaꞌ tzan stzaj kyin junjunchaq aj janikꞌponꞌixiꞌ bꞌaꞌn tuq tzan txik kswaꞌ te kyonbꞌil. 30 Ikxji oqet kykꞌuluꞌ, bꞌix yaji exik kylajoꞌ te Bꞌeꞌch bꞌix Saulo tzan txik kyin kyukyꞌi kye aꞌeꞌ aj te bꞌuchꞌuj tijxjal [tuj Judey].