10
Te Tbꞌay-el Aj Tpakbꞌan Te Xhpeꞌy Kxol Kye Aj Nyaꞌtx Tijajil Israel
1 Tuj te amaqꞌ Sesarey at tuq jun xjal Koneꞌl tbꞌi, tetz jun kapitan tiꞌj jun bꞌuchꞌuj soldad aj tbꞌi “Kye Aj Italy.” 2 Tetz kyukyꞌi kyaqil aꞌeꞌ aj tuj tjay bꞌan nkyexjanin tuq Qtata Dios. Ax nxik toyeꞌ tuq jun onbꞌil kye mebꞌaꞌ xjal [aj tijajil Israel] bꞌix nxnaqꞌtzankix tuq tukyꞌi Qtata Dios. 3 Jun qꞌij qanq tuj toxiꞌ or tuq te qaleꞌ, owok jotoꞌ tuj twitz, oxik ten bꞌan bꞌanꞌax jun ángel tlajen Dios tpon tukyꞌiꞌl aj jaꞌ tuq tetz atqet, bꞌix oxik tqꞌumaꞌ ikxjani: “Koneꞌl.”
4 Te Koneꞌl okaj kaꞌyin tiꞌj te ángel bꞌix tukyꞌi jun txobꞌal oxik xhchaꞌoꞌ ikxjani: “¿Tat, tidiꞌtzun?” Yaji te ángel oxik tqꞌumaꞌ ikxjani: “Te Qtata Dios maꞌtx tzꞌel galan tuj twitz te aj nxik axnaqꞌtzaꞌ bꞌix te onbꞌil aj nxik awoyeꞌ kye mebꞌaꞌ xjal. 5 Ntons ajnaꞌl, inkxik alajoꞌ kabꞌe xjal max tuj te amaqꞌ Jop, tzan stzaj kyukꞌleꞌ te Simon aj ax nꞌok qꞌumaꞌ tbꞌi Xhpeꞌy. 6 Tetz atok tposad tjay jun xjal tbꞌi Simon aj nꞌaqꞌunan tukyꞌi tzꞌuꞌm bꞌix nnajan qaynin stziꞌ te nim aꞌ.”
7 Ya ma xik te ángel aj ojetq tuq yolin tukyꞌiꞌl, te Koneꞌl etzaj tukꞌleꞌ kabꞌeꞌ tmos bꞌix jun soldad aj bꞌan nxjanin tuq te Qtata Dios. 8 Ya ma xikbꞌaj tqꞌumaꞌ kyetz kyaqil, exik tlajoꞌ tuj te amaqꞌ Jop.
9 Ya tuj junky iwitq, ojetq tuq qoꞌok chijqꞌij, aj man tuq ikjaꞌn kypon kye xjal tuj amaqꞌ Jop, te Xhpeꞌy ojax xnaqꞌtzon twiꞌ te jay. 10 Tetz bꞌan nꞌel tuq tkꞌuꞌj bꞌix tgan tuq waꞌan, per aj man tuq nqet kꞌuluꞌ te tweꞌ, owok jotoꞌ tuj twitz. 11 Oxik ten te kaꞌj tel jaqlik, bꞌix oxik teꞌeꞌ tqetz twitz txꞌoꞌtxꞌ jun tidiꞌ iktzaꞌ jun sabl tzyuꞌ tuq kykajil xtxaꞌm. 12 Tuj te sabl ateꞌ tuq kyaqil txakl txkup kaj kyoq bꞌix txkup aj cha nkyexik jilin twitz txꞌoꞌtxꞌ bꞌix pichꞌ. 13 Bꞌix oxik xhchaꞌoꞌ twiꞌ jun xjal, otzaj tqꞌumaꞌ ikxjani: “Pajaw waꞌlet Xhpeꞌy. Intqet akansaꞌ jun achiꞌ bꞌix pawaꞌan.” 14 Bꞌix te Xhpeꞌy owaj stzaqꞌbꞌeꞌ ikxjani: “Tat,a wetz nlay. Ni jun-el oje xik nwaꞌaꞌ jun tidiꞌ aj xjan tzan qwaꞌan.”* 15 Bꞌix twiꞌ te xjal otzaj tqꞌumaꞌky tkaꞌmjjiꞌn-el ikxjani: “Te aj oje tkꞌuluj te Qtata Dios tzan tkaj saq tuj twitz, kꞌon tzꞌok aqꞌumaꞌ yatz qa jun tidiꞌ nyaꞌtx galan.” 16 Te ntzani okyꞌik oxmaj, yaji bꞌeyxnajji te sabl ojax in junkyꞌel tuj kaꞌj.
17 Te Xhpeꞌy bꞌan nbꞌisun tuq tiꞌj tidiꞌ telponx te aj ojetq tuq tzꞌok jotoꞌ tuj twitz. Yaji kabal kypon kye aꞌeꞌ tlajen Koneꞌl stziꞌ tlamelul te jay, nkyechaꞌon tuq tiꞌj te Simon. 18 Ya ma kyepon, oxik kchaꞌoꞌ qa tzi atok tuq tposad jun xjal aj tbꞌi Simon aj nꞌok tuq qꞌumaꞌ Xhpeꞌy. 19 Bꞌix aj man tuq nbꞌisun te Xhpeꞌy tiꞌj te aj ojetq tuq tzꞌok jotoꞌ tuj twitz, te Txew Dios oxik tqꞌumaꞌ tetz ikxjani: “Ateꞌ oxb ichan nkyejoyon te yatz. 20 Pajaw waꞌlet bꞌix paqex kyukyꞌiꞌl bꞌix pax kyukyꞌiꞌl. Kꞌon naꞌnon awanim tzan tpaj aꞌin wetz ma kyintzaj lajon te kyetz.”
21 Ntons te Xhpeꞌy oqetznajji bꞌix oxik tqꞌumaꞌ ikxjani: “Aꞌin wetz te aj nkyinꞌejoyoꞌ. ¿Tidiꞌ emandad ma kxꞌul?” 22 Bꞌix kyetz owaj ktzaqꞌbꞌeꞌ ikxjani: “Qetza ma qotzaj lajoꞌna tzan jun kapitan te jun bꞌuchꞌuj soldad, Koneꞌl tbꞌi. Tetz jun xjal aj nbꞌet tuj tumeꞌl, aj nqet txjaniꞌ Qtata Dios, bꞌix aj bꞌan jiqꞌbꞌaꞌ kyitzaꞌ kyaqil kye aj tijajil Israel. Jun ángel tlajen Dios oxik qꞌuman te tetz presis tuq tzan axik tukꞌleꞌ tzan axik tjay bꞌix ikxji tzan tok xhchaꞌoꞌ kyaqil tidiꞌchq aj at tzan txik aqꞌumaꞌ.” 23 Ntons te Xhpeꞌy eꞌox tukꞌleꞌ tuj jay, bꞌix ebꞌajkaj aj aqꞌbꞌilji tukyꞌiꞌl. Tuj junky iwitq te Xhpeꞌy oxik kyukyꞌiꞌl bꞌix txqꞌan erman aj nkyenajan tuq Jop ebꞌajxik tukyꞌiꞌl.
24 Ya tuj junky iwitq ebꞌajpon Sesarey, bꞌix te Koneꞌl nꞌiyon tuq kyiꞌj, bꞌix ojetq tuq kyeꞌok tukꞌleꞌ aꞌeꞌ tfamily bꞌix junjun xjal aj bꞌan tajyol-eꞌ tuq. 25 Ya ma pon te Xhpeꞌy tjay te Koneꞌl, te Koneꞌl owetz kanol tetz bꞌix oqet mejlet twitz [iktzaꞌ twitz jun dios]. 26 Per te Xhpeꞌy ojaw tjukꞌuꞌ, oxik tqꞌumaꞌ ikxjani: “Pajaw waꞌlet. Wetz ax aꞌin jun xjal iktzaꞌ aꞌich.” 27 Aj man tuq nyolin tukyꞌi Koneꞌl, owox tuj te jay bꞌix kyꞌilaꞌj xjal ojetq tuq tzꞌok kchimoꞌ kyibꞌ tzi.
28 Yaji oxik tqꞌumaꞌ te Xhpeꞌy kye xjal ikxjani: “Etetz etebꞌen qetza aj tijajil Israel, tzan tpaj te qrelijyona, qetza kꞌontiꞌl tzoqpimoꞌ tzan tox qsamoꞌ qibꞌa kyukyꞌi xjal aj nyaꞌtx tijajil Israel bꞌix pyor tzan qliman kyetz. Per te Qtata Dios maꞌtx tzaj tyekꞌuꞌ wetz tzan kꞌon tok nqꞌumaꞌ qa xjan tzan qyolin tukyꞌi jun xjal aj nyaꞌtx qijajil.* 29 Astilji aj stzaj qꞌumaꞌ wetz tzan ntzaj, wetz ma kyintzaj bꞌix kꞌontiꞌl tidiꞌ ma nqꞌumaj. Ajnaꞌl ngan tzan tok nchaꞌoꞌ ¿tistil ma kyintzaj etukꞌleꞌ?”
30 Yaji te Koneꞌl oxik tqꞌumaꞌ tetz ikxjani: “Kaje qꞌijxiꞌ, qanq axkix ja or ntzani, wetz nkyinꞌipan tuq waꞌij bꞌix nkyinxnaqꞌtzan tuq tzani tuj njay, bꞌix yaji qanq te toxiꞌ or te qaleꞌ, ojaw kanet jun xjal nwitz bꞌix te tqꞌanaq bꞌan ntxaqtxon tuq, 31 bꞌix otzaj tqꞌumaꞌ wetz ikxjani: “Koneꞌl, te Qtata Dios maꞌtx tzꞌel galan tuj twitz te aj nxik axnaqꞌtzaꞌ bꞌix te onbꞌil aj nxik awoyeꞌ kye mebꞌaꞌ xjal. 32 Inkxik alajoꞌ xjal tuj te amaqꞌ Jop tzan stzaj kyukꞌleꞌ te Simon aj nꞌok qꞌumaꞌ Xhpeꞌy, tetz atqet tuj tjay junky Simon aj nꞌaqꞌunan tukyꞌi tzꞌuꞌm bꞌix nnajan qaynin stziꞌ te nim aꞌ.”c 33 Astilji bꞌeyx oxik nkꞌuluꞌ mandad tzan axik joybꞌaj, bꞌix yatz galan aꞌich maꞌ xhchꞌul. Qkyaqil qetza tzani, atoꞌ twitz Qtata Dios bꞌix qgana tzan tok qchaꞌoꞌ kyaqil aj maꞌtx tzaj tqꞌumaꞌ te Qtata Dios te yatz tzan tok qchaꞌoꞌna.”
34 Ntons te Xhpeꞌy owaqꞌik tzan tyolin kxol, oxik tqꞌumaꞌ ikxjani: “Ajnaꞌl bꞌanꞌax nꞌel nnikyꞌ te Qtata Dios kꞌontiꞌl nꞌok ten kyiꞌj kye xjal abꞌl jun mas tbꞌanil twitz junky,* 35 sinoke tuj kyaqil amaqꞌ tetz nkyetkꞌamoꞌ kye aj nkyexjanin te tetz bꞌix kye aj nkyekꞌulun kyaqil tuj tumeꞌl. 36 Te ja tpakbꞌalil ntzani axkix aj oxik pakbꞌaꞌ kye aꞌeꞌ aj tijajil Israel tzan te Jesukrist, aj Tajawil tiꞌj kyaqil, tzan qten galan tukyꞌi Qtata Dios. 37 Etetz etebꞌen te tpakbꞌalil aj oje xik pakbꞌaꞌ tuj kyaqil tkwentil Judey, owaqꞌik tuj Galiley aj tmankun tpakbꞌan te Waꞌnch [qa presis tuq] tzan tjaw siꞌ aꞌ qwiꞌ. 38 Etetz etebꞌen titzaꞌ te Qtata Dios oqet tyekꞌuꞌ te Jesus aj Nasaret joyomaj titzaꞌ tzan tpaj okaj tsiꞌ te Txew tajsik bꞌix oxik tsiꞌ jun tajwalil. Bꞌix te Jesus jaꞌchq oqet tkꞌuluꞌ tidiꞌchq bꞌan galan, bꞌix nkyeqet tqꞌanaꞌ tuq kyaqil kye aj nꞌok kyen tuq twitz xhchoꞌnal tzan tpaj te Tajaw Choj. Kyaqil ntzani oqet tkꞌuluꞌ tzan tpaj te Qtata Dios atqet tuq tukyꞌiꞌl.
39 Qetza owok qena kyaqil aj oqet tkꞌuluꞌ te Jesus tuj tkwentil Judey bꞌix tuj amaqꞌ Jerusalen, per kyetz oqet kykansaꞌ, ojaw kyyobꞌaꞌ twitz jun krus. 40 Per te Qtata Dios otkꞌuluj tzan tjaw anqꞌin tuj toxiꞌn qꞌij bꞌix ojaw kanet qwitza. 41 Kꞌontiꞌl ojaw kanet kywitz kyaqil xjal, sinoke aꞌox ojaw kanet qwitz qetza aj ojetq tuq qoꞌel tjoyoꞌ te Qtata Dios tzan txik qpakbꞌaꞌna te aj ojetq tzꞌok qen, qetza aj owaꞌana tukyꞌiꞌl bꞌix oꞌukꞌana tukyꞌiꞌl aj tjaw anqꞌin. 42 Bꞌix tetz otzaj tlajoꞌna pakbꞌayon kxol kyaqil xjal bꞌix tzan txik jqꞌumaꞌna te aj qebꞌen tiꞌj te bꞌanꞌax, qa te Qtata Dios maꞌtx qet tsiꞌ te Jesukrist tzan txik tqꞌumaꞌ qa at kypaj kye aj itzꞌojeꞌ bꞌix kye aj kamnaqeꞌ. 43 Kkyaqil kye aj yolil tyol Dios oqtxiꞌ ojetq tuq kyeyolin tiꞌj Jesus, kkyaqil kye aj okyeꞌokslayon tiꞌj, kyetz oqtel najsaꞌ te kchoj.”
44 Ntons aj man tuq nyolin te Xhpeꞌy kyaqil ntzani kyukyꞌiꞌl, otzaj te Txew Dios kyajsik kkyaqil kye aj nkyechaꞌon tuq tiꞌj. 45 Yatzun kye aj tijajil Israeld aj ajuneꞌ tuq tukyꞌi Xhpeꞌy bꞌix aj ojetq tuq kyeꞌokslan, kyetz bꞌan nkyelabꞌan tuq tzan tpaj te Txew Dios ax ojetq tuq tzaj siꞌ kyajsik kye xjal aj nyaꞌtx tijajil Israel. 46 Komo nꞌok tuq kchaꞌoꞌ nkyeyolin tuq tuj junky yol chuktky aj kꞌontiꞌl nꞌel kynikyꞌ tuq tiꞌj tbꞌayaꞌ, bꞌix nxik kyqꞌumaꞌ tuq tidiꞌchq bꞌan galan tiꞌj Qtata Dios.
47 Ntons te Xhpeꞌy oxik tyoliꞌ ikxjani: “¿Bꞌaꞌn petzun tzan tel qin gan tzan kꞌon tjaw siꞌ aꞌ kywiꞌ ja xjalni, aj maꞌtx tzaj te Txew Dios kyajsik iktzaꞌx qetz?” 48 Yaji tetz exik tkꞌuluꞌ mandad tzan tjaw siꞌ aꞌ kywiꞌ tukyꞌi tbꞌi Jesukrist. Bꞌix yaji oqet kywitz twitz te Xhpeꞌy tzan tuq tkajten kabꞌeꞌky qꞌij kxol tzi.