9
Aj Tokslan Te Saulo Tiꞌj Jesukrist
1 Te Saulo kꞌontiꞌl tuq nkaj tsiꞌ tzan kyjaw tlajoꞌ kye aj nkyeꞌokslan tiꞌj Qajawil. Nkyeꞌok tuq txobꞌsaꞌ bꞌix tgan tuq tzan kyqet tkansaꞌ. Ntons oxwaꞌq yoliyon tukyꞌi te twitzaleꞌ pal 2 bꞌix oxik tqaniꞌ jun uꞌj tzan txik tuq Damask kyuj kye jay nabꞌil Dios joyol kye xjal aj nkyeꞌokslan tuq aj tumeꞌl niꞌn, tzan tuq ktzaj twakuꞌ pres tuj Jerusalen xuj qa ichanji.
3 Yaji ikjaꞌn tuq txik tbꞌeyil Damask, mer aj chꞌinky tuq tpon qaynin tiꞌj te amaqꞌ, tanderepent oqet txaqtxon tiꞌj tetz jun chkꞌatunal otzaj tuj kaꞌj. 4 Oqet tzꞌaqik twitz txꞌoꞌtxꞌ bꞌix oxik xhchaꞌoꞌ twiꞌ jun xjal ikxjani: “Saulo, Saulo, ¿tistil nkyinjaw alajoꞌ?” 5 Bꞌix te Saulo oxik xhchaꞌoꞌ: “¿Abꞌltzun yatz aꞌich Tat?”a “Wetz aꞌin Jesus aj nkyinjaw alajoꞌ.b 6 Pajaw waꞌlet bꞌix pax tuj amaqꞌ. Tzi oxeꞌl qꞌumlet yatz te aj presis tzan tqet akꞌuluꞌ.”c
7 Kye xjal aj ajuneꞌ tuq tukyꞌiꞌl, bꞌan ojetq tuq kyetzajbꞌaj. Cha ebꞌajkaj waꞌlet, nxik kchaꞌoꞌ tuq iktzaꞌ twiꞌ jun xjal, per kꞌontiꞌl tuq nxik kyen nijunwt. 8 Ntons te Saulo ojaw waꞌlet, bꞌix ya ma jaw tjaqoꞌ twitz, kꞌontiꞌl obꞌantik tkaꞌyin chꞌinwt. Yaji cha oxik kyjochoꞌ bꞌix oxik kyin tuj te amaqꞌ Damask. 9 Aj kypon tzi, tetz cha oqeten oxe qꞌij, kꞌontiꞌl tuq nkaꞌyin, kꞌontiꞌl nwaꞌan, kꞌontiꞌl tuq nꞌukꞌan chꞌinwt.
10 Ntons, at tuq jun xjal tzi aj nꞌokslan tuq tiꞌj Jesus, Ananiys tbꞌi, bꞌix owok jotoꞌ te Qajawil tuj twitz tetz. Te Qajawil oxik tqꞌumaꞌ tetz ikxjani: “Ananiys.” Te Ananiys owaj stzaqꞌbꞌeꞌ: “Wajaw, akyinqet tzani.” 11 Bꞌix te Qajawil oxik tqꞌumaꞌ tetz ikxjani: “Pajaw bꞌix pax tuj tjay Juds aj nnajan tuj te bꞌey aj tbꞌi “Bꞌey Bꞌan Rekt,” bꞌix tzi owokelnoj awitzaꞌ jun xjal tbꞌi Saulo aj Tars. Tetz bꞌan nxnaqꞌtzan ajnaꞌl. 12 Bꞌix maꞌtx tzꞌok jotoꞌ tuj twitz jun xjal Ananiys tbꞌi npon tukyꞌiꞌl bꞌix nqet tsiꞌ tqꞌabꞌ tajsik tzan tbꞌantik tkaꞌyin junkyꞌel.” 13 Ntons te Ananiys oxik tqꞌumaꞌ: “Wajaw, wetz oje tzꞌok nchaꞌoꞌ tiꞌj aj xjalji. Tetz tuj Jerusalen tidiꞌchq nyaꞌtx galan oje qet tkꞌuluꞌ kyiꞌj kye aj pawameꞌ te yatz. 14 Bꞌix ax tzani tuj ja amaqꞌni at tajwalil tzan kye pal aj nim kyajwalil tzan kxik tin pres tuj Jerusalen kyaqil kye aj nkyexnaqꞌtzan awiꞌj.” 15 Per te Qajawil oxik tqꞌumaꞌ tetz ikxjani: “Pax tukyꞌiꞌl tzan tpaj te ja ichanni maꞌtx tzꞌel njoyoꞌ tzan txik tpakbꞌaꞌ te npakbꞌalil kxol kye aj nyaꞌtx tijajil Israel, bꞌix kxol kye aj nim kyajwalil tzan kykꞌulun mandad, bꞌix kxol kye aj tijajil Israel. 16 Wetz oxeꞌl nyekꞌuꞌ tetz a tgan tzan tok ten nim xhchoꞌnal tzan npaj wetz.”
17 Ntons te Ananiys oxik, owox tuj te jay, oqet tsiꞌ tqꞌabꞌ tajsik te Saulo, bꞌix oxik tqꞌumaꞌ ikxjani: “Werman Saulo, te Qajaw Jesus aj ojaw kanet awitz tuj bꞌey aj ikjaꞌn tuq atzaj tzani, ma kyintzaj tlajoꞌ tzan tjaqet awitz bꞌix tzan tnoj te Txew Dios tuj awanim.” 18 Bꞌeyxnajji tuj twitz te Saulo oqet tzꞌaqik jun tidiꞌ iktzaꞌ muꞌpd bꞌix obꞌantik tkaꞌyin. Ya ma jaw waꞌlet, bꞌeyx ojaw siꞌ aꞌ twiꞌ. 19 Yaji owokten waꞌil bꞌix owetz ten twitz. Yaji okajten kabꞌe qꞌij kxol kye aj Damask aj nkyeꞌokslan tuq tiꞌj Jesus.
Aj Tpakbꞌan Te Saulo Tuj Damask
20 Bꞌeyxnajji te Saulo owaqꞌik tzan tpakbꞌan kyuj kye jay nabꞌil Dios, nxik tuq tpakbꞌaꞌ te Jesus Tkꞌwaꞌal Dios. 21 Kyaqil kye aj nkyechaꞌon tuq tiꞌj bꞌan nkyelabꞌan tuq bꞌix nkyqꞌumaꞌ tuq ikxjani: “¿Tiꞌtzun, nyaꞌtx petzun aji tetz te aj njoyon tuq tuj Jerusalen kyiꞌj kyaqil kye aj nkyexnaqꞌtzan tiꞌj Jesus? ¿Nyaꞌtx petzun axkix tetz owul tzani tzan tuq kyjaw stzyuꞌ tzan kxik twakuꞌ tuj kyqꞌabꞌ kye pal aj nim kyajwalil?”
22 Per te Saulo, te Txew Dios atqet tuq tukyꞌiꞌl tzan txik tpakbꞌaꞌ tukyꞌi jun tajwalil, bꞌix kye aj tijajil Israel tuj Damask [aj nyaꞌtx dyakwerd tuq ateꞌ tukyꞌiꞌl], kyetz kꞌontiꞌl obꞌantik tzan taj ktzaqꞌbꞌeꞌ tzan tpaj bꞌan xtxolil tuq te aj nxik tqꞌumaꞌ [tukyꞌi te Tuꞌjal Dios] qa te Jesus aji te Koloyon Aj Qꞌumankaj Oqtxiꞌ. 23 Ya ma kyꞌik kyꞌilaꞌj qꞌij, kye aj at tuq nim kyajwalil kxol kye aj tijajil Israel oqet kykawlaꞌ kyibꞌ tzan tuq tqet kykansaꞌ te Saulo. 24 Per yaji tetz dech owok xhchaꞌoꞌ. Bꞌajqꞌij tuq, chijqꞌij tukyꞌi qonikꞌan, nqet tuq kxbꞌuqiꞌ stziꞌ tlamelul te amaqꞌ tzan tuq tqet kykansaꞌ. 25 Per kye aꞌeꞌ aj nkyeꞌokslan tuq tiꞌj Jesus, kyetz oqex ksiꞌ te Saulo tuj jun matij chiꞌl bꞌix oqex kytumbꞌaꞌ qonikꞌan twiꞌ te loqꞌ tiꞌj te amaqꞌ, ikxji te Saulo okolpjik tuj kyqꞌabꞌ kye xjal.*
Aj Tpakbꞌan Te Saulo Tuj Jerusalen
26 Ya ma pon Jerusalen, tetz tgan tuq tzan tok xhchimoꞌ tibꞌ kyukyꞌi kye aꞌeꞌ aj nkyeꞌokslan tuq tiꞌj Jesus, per kyaqil kyetz bꞌan nkyexobꞌ tuq tiꞌj tzan tpaj kꞌontiꞌl tuq nkyokslaꞌ qa tetz ojetq tzꞌokslan. 27 Tzaj te Bꞌeꞌch, oxik tin te Saulo kxol kye tkyꞌixel Jesus. Oxik tqꞌumaꞌ kyetz te Saulo ojetq tuq tzꞌok ten te Qajawil tuj bꞌey aj ikjaꞌn tuq txik Damask, bꞌix te Qajawil ojetq tuq yolin tukyꞌiꞌl, bꞌix tuj Damask te Saulo ojetq tuq xik tpakbꞌaꞌ te tpakbꞌalil galan tukyꞌi tbꞌi Jesus tukyꞌi jun tkꞌuꞌjlal. 28 Ikxji te Saulo okajten kyukyꞌiꞌl Jerusalen, bꞌix nꞌok tuq xhchimoꞌ tibꞌ [kyukyꞌi kye erman]. Per tetz npakbꞌan tuq tiꞌj te Qajawil tukyꞌi jun tkꞌuꞌjlal. 29 Nim tuq nyolin kyukyꞌi kye aj tijajil Israel aj nkyeyolin tuq te yol gryeg bꞌix nim tuq nxik tqaniꞌ tzan tqet kybꞌisuꞌ byenech, per kyetz kygan tuq tzan tqet kykansaꞌ. 30 Ya ma tzꞌok kyen kye qerman ikxji, yaji oxik kyin te Saulo tuj amaqꞌ Sesarey, yaji tzi oxik kylajoꞌ max amaqꞌ Tars.
31 Ntons kyaqil kye bꞌuchꞌuj qerman jaꞌchq tuj tkwentil Judey bꞌix Galiley bꞌix Samary, kꞌontiꞌl tuq nkyejaw lajoꞌ, bꞌix mas tuq nkyeꞌok jwert nkyeꞌokslan tuq tiꞌj Qajawil tukyꞌi jun tkꞌuꞌjlal, bꞌix nkyebꞌet tuq tukyꞌi jun tumeꞌl nkyexjanin tuq Qajawil, bꞌix mas tuq nxik nimsaꞌ kykꞌuꞌj tzan te Txew Dios bꞌix nkyeꞌok tuq kyꞌilaꞌj.
Aj Tqet Qꞌanaꞌ Jun Yabꞌ Kamnaq Tuq Xhchiꞌjel
32 Ntons, yatzun te Xhpeꞌy, tetz jaꞌchq tuq nxik [nimsal kykꞌuꞌj kye qerman], ax opon qꞌolbꞌel kye qermane tuj te amaqꞌ Lida. 33 Tzi owoknoj twitz jun xjal tbꞌi Eneys, wajxaq aqꞌbꞌixiꞌ tuq toxlen ten tjaqꞌ xnoqꞌl tzan tpaj kamnaq tuq xhchiꞌjel. 34 Yaji te Xhpeꞌy oxik tqꞌumaꞌ tetz ikxjani: “Eneys, te Jesukrist nchqet tqꞌanaꞌ ajnaꞌl. Pajaw waꞌlet bꞌix intjaw aweqꞌiꞌ aj awatubꞌni.” Bꞌeyxnajji te Eneys ojaw waꞌlet. 35 Kyaqil kye aj nkyenajan tuq Lida bꞌix tkwentil Saron owok kyeꞌeꞌ te xjal bꞌix kyaqil ebꞌajꞌokslan tiꞌj te Qajawil.
Aj Tjaw Anqꞌin Te Dorks
36 Ntons, at tuq jun xuj aj nnajan tuq tuj amaqꞌ Jop. Tetz nꞌokslan tuq, bꞌix tetz tbꞌi Tabit, bꞌix tuj te yol gryeg Dorks tbꞌi [aj telponx “kyej”]. Te ja xujni nim galan nqet tkꞌuluꞌ tuq tzan tonen kyukyꞌi xjal bꞌix nxik toyeꞌ tuq jun onbꞌil kye mebꞌaꞌ xjal. 37 Tuj aj tyempji te Dorks oqet yabꞌtik bꞌix okamik. Ya ma tzꞌel txꞌajoꞌ tiꞌj te xhchiꞌjel, oqet siꞌ tuj jun kwart aj atjax tuq tmankbꞌil txol te jay. 38 Ntons, komo te amaqꞌ Jop qaynin tiꞌj te amaqꞌ Lida aj jaꞌ tuq atqet te Xhpeꞌy, ya ma tzꞌok kchaꞌoꞌ kye qerman aj Jop qa te Xhpeꞌy atqet tuq Lida, oxik kylajoꞌ kabꞌeꞌ qerman qꞌumal tukyꞌiꞌl ikxjani: “Yatz presis tzan axik Jop ajnaꞌl, kꞌon chnachqꞌinky mas tzani.”
39 Yaji te Xhpeꞌy oxik kyukyꞌiꞌl. Ya ma kyepon txini, te Xhpeꞌy oxik in aj jaꞌ tuq tanlik te kamnaq. Kyaqil kye xuj byud eꞌok noj tiꞌj te Xhpeꞌy, bꞌan nkyeꞌoqꞌ tuq bꞌix oxik kyyekꞌuꞌ te Xhpeꞌy kyaqil txakl kyqꞌanaq kye xjal aj kꞌulumeꞌ tuq tzan te Dorks [bꞌix nkyexik tuq toyeꞌ]. 40 Yaji te Xhpeꞌy eꞌetz tlajoꞌ kyaqil kye aj ateꞌox tuq tzi, bꞌix oqet mejlet bꞌix owokten xnaqꞌtzon tiꞌj. Yaji oxik teꞌeꞌ te kamnaq bꞌix oxik tqꞌumaꞌ ikxjani: “Tabit, pajaw waꞌlet.” Yaji te xuj ojaw tjaqoꞌ twitz, ya ma xik ten te Xhpeꞌy, ojaw witꞌlet. 41 Te Xhpeꞌy ojaw stzyuꞌ tqꞌabꞌ bꞌix ojaw twabꞌaꞌ, yaji etzaj tukꞌleꞌ kye xuj byud bꞌix kyaqil kye txqꞌanky erman,f bꞌix oxik tyekꞌuꞌ kyetz ya itzꞌoj.