8
Aj Taqꞌik Tzan Kyjaw Lajoꞌ Kye Aj Nkyeꞌokslan Tiꞌj Jesukrist
1 Ntons te Saulo bꞌan dyakwerd tuq tzan tkamik te Xhteꞌk. Ntons, tuj aj qꞌijji owaqꞌik kyjoylik kye aj nkyeꞌokslan tuq tiꞌj Jesus tuj te amaqꞌ Jerusalen. Astilji kyaqil kyetz oxik kslabꞌuꞌ kyibꞌ jaꞌchq tuj tkwentil Judey bꞌix Samary, aꞌox kye tkyꞌixel Jesus ekaj txini tuj amaqꞌ Jerusalen. 2 Yaji txqꞌan xjal aj nkyexjanin tuq te Qtata Dios ojaw kyin txlimal te Xhteꞌk bꞌix oqet kyitzꞌleꞌ bꞌix oje kyebꞌisun nim. 3 Yatzun te Saulo, tetz njoyonkix tuq kyiꞌj kye aj nkyeꞌokslan bꞌix nꞌox tuq tuj kyjay tzan kyetz tjukiꞌ, ichan bꞌix xuj nkyeꞌetz tuq tin bꞌix nkyexik tuq tsamaꞌ pres.*
Aj Tpakbꞌan Lip Tuj Samary
4 Ntons kye aj ebꞌajxik slabꞌuꞌ, jaꞌchq nxik tuq kypakbꞌaꞌ te tpakbꞌalil galan titzaꞌ tzan jkolet. 5 Jun te kyetz, Lip tbꞌi, oxik Samary bꞌix tzi oxik tpakbꞌaꞌ kxol kye xjal tiꞌj te Koloyon Aj Qꞌumankaj Oqtxiꞌ. 6 Kye xjal nꞌok tuq kchimoꞌ kyibꞌ bꞌix nꞌok tuq ksiꞌ kywiꞌ tiꞌj tyol te Lip, bꞌix dyakwerd tuq ateꞌ tiꞌj tyol bꞌix nꞌok tuq kyen kye yekꞌbꞌil aj nqet tuq tkꞌuluꞌ tukyꞌi tajwalil Dios. 7 Komo kyꞌilaꞌj tuq kye xjal aj akyeqex tuq malspirit tuj kyanim nkyebꞌantik tuq, bꞌix kye malspirit nkyeqawun tuq oj kyjatz; ax kyꞌilaꞌj aj kamnaq tuq kchiꞌjel bꞌix aꞌeꞌ aj kox-eꞌ nkyebꞌantik tuq. 8 Ntons kye xjal tzi, bꞌan nkyechalaj tuq.
9 Ntons at tuq jun xjal tzi, Simon tbꞌi. Tetz jun chman tuq bꞌix kyaqil kye xjal aj Samary nkyelabꞌan tuq tiꞌj te tidiꞌchq aj nqet tkꞌuluꞌ, bꞌix tetz nxik tuq tqꞌumaꞌ at tuq nim tajwalil. 10 Kyaqil kye xjal nꞌok tuq ksiꞌ kywiꞌ tiꞌj, kꞌwaꞌl, tijxjal, kyaqil, bꞌix nkyqꞌumaꞌ tuq ikxjani: “A tetz te aj tzajnaq tukyꞌi Qtata Dios tukyꞌi nim tajwalil bꞌix nꞌok qꞌumaꞌ “Te Aj Nim Tajwalil.”” 11 Kyetz nxik tuq kyokslaꞌ, bꞌan nkyelabꞌan tuq tiꞌj tzan tpaj te aj xhchmanbꞌen kyꞌilaꞌj aqꞌbꞌixiꞌ tuq.
12 Per ya ma xik kyokslaꞌ aj nxik tpakbꞌaꞌ tuq te Lip tiꞌj te tpakbꞌalil galan aj nyolin tiꞌj Jesukrist bꞌix titzaꞌ tzan kykaj tuj tqꞌabꞌ Qtata Dios, ya ma xik kyokslaꞌ nini, ojaw siꞌ aꞌ kywiꞌ ichan tukyꞌi xuj. 13 Bꞌix ax te Simon otokslaj, bꞌix ya tjawlen siꞌ aꞌ twiꞌ kꞌontiꞌl tuq nkaj tsiꞌ tzan tok lapet tiꞌj Lip, bꞌan nlabꞌan tuq tiꞌj kyaqil yekꞌbꞌil aj nqet tkꞌuluꞌ tuq te Lip bꞌix tiꞌj kyaqil yekꞌbꞌil aj nkꞌulun tuq tukyꞌi tajwalil Qtata Dios.
14 Ntons, kye tkyꞌixel Jesus tuj Jerusalen, ya ma tzꞌok kchaꞌoꞌ qa kye aj Samary ojetq tuq kyeꞌokslan te tyol Qtata Dios, yaji oxik kylajoꞌ te Xhpeꞌy bꞌix te Waꞌnch tuj Samary. 15 Bꞌix ya ma kyepon kyetz txini, exnaqꞌtzan kyiꞌj kye aj ojetq tuq kyeꞌokslan, tzan tqex te Txew Dios tuj kyanim. 16 Komo minaꞌ tuq tqex te Txew Dios tuj kyanim, sinoke aꞌox tuq ojetq tjaw siꞌ aꞌ kywiꞌ tukyꞌi tbꞌi Qajaw Jesus. 17 Ntons te Xhpeꞌy bꞌix te Waꞌnch oqet ksiꞌ kyqꞌabꞌ kyajsik, bꞌix kyetz okykꞌamoj te Txew Dios tuj kyanim.
18 Ya ma tzꞌok ten te Simon oj tqet ksiꞌ kyqꞌabꞌ kye tkyꞌixel Jesus kyajsik kye xjal nqex tuq te Txew Dios tuj kyanim, ntons tetz oxik tsuquꞌ tmin kyetz bꞌix oxik tqꞌumaꞌ ikxjani: 19 “Ax instzaj esiꞌ wetz wajwalil tzan tqex te Txew Dios tuj kyanim kye xjal chaꞌoj tqet nsiꞌ nqꞌabꞌ kyajsik.”
20 Ntons yaji te Xhpeꞌy oxik tqꞌumaꞌ, “Paxikx-wit tuj qꞌaqꞌ tukyꞌix atumin tzan tpaj yatz nchbꞌisun qa tukyꞌi tmin bꞌaꞌn tzan stzaj aloqꞌoꞌ te aj ntzaj tsiꞌ te Qtata Dios cha jkotz. 21 Yatz kꞌontiꞌl awoklen tzan akꞌamon tetz tzan tpaj te awanim nyaꞌtx galan ntbꞌisuꞌ tuj twitz Qtata Dios.* 22 Intkaj akolaꞌ te aj nyaꞌtx galan aj nꞌakꞌuluꞌni, bꞌix paxnaqꞌtzan tukyꞌi Qajawil. Ikxji qanq oqtel tnajsaꞌ te aj nyaꞌtx galan aj nchbꞌisun tuj awanim. 23 Wetz nꞌok wen awiꞌj at nim qꞌoj tuj awanim bꞌix tzunx atichqet tuj tqꞌabꞌ te aj nyaꞌtx galan.”
24 Yaji te Simon oxik tqꞌumaꞌ: “Peꞌexnaqꞌtzan chꞌin waq etetz wiꞌj tukyꞌi Qtata Dios tzan kꞌon tkyꞌik wiꞌj aj maꞌtx stzaj eqꞌumaꞌni.”
25 Ntons ya ma mankun kyyolin bꞌan byenech tiꞌj te bꞌanꞌax aj kyebꞌenky tuq bꞌix aj tmankun kypakbꞌan kyukyꞌi kye xjal tiꞌj Tyol Qtata Dios, ebꞌajꞌaj Jerusalen, bꞌix aj ikjaꞌn tuq kyaj, nxik tuq kypakbꞌaꞌ tuj junjunky aldey tuj tkwentil Samary.
Aj Txik Tpakbꞌaꞌ Lip Tukyꞌi Jun Xjal Aj Etyopiy
26 Ntons, yatzun te Lip, jun ángel tlajen Qajawil oxik tqꞌumaꞌ tukyꞌiꞌl: “Pajaw waꞌlet bꞌix pax qetnaq tuj te kyꞌixkꞌoj txꞌoꞌtxꞌ tuj tbꞌeyil Gas aj ntzaj Jerusalen.” 27 Ntons te Lip oxik, bꞌix tuj bꞌey owoknoj twitz jun xjal aj Etyopiy. Tetz jun xjal sloꞌq bꞌix nim tuq tajwalil, tetz aji tuq te chimol tmin te xuj aj tbꞌi Candace aj twitzaleꞌ kꞌulul mandad tuj Etyopiy. Te xjal ojetq tuq meltzꞌjik naꞌol Qtata Dios tuj Jerusalen 28 bꞌix ikjaꞌn tuq taj tuj tamaqꞌ. Witꞌlijax tuq tuj te tkaret, bꞌix njaw tuq teꞌeꞌ te uꞌj aj oqet stzꞌibꞌaꞌ te Chay aj yolil tyol Dios.
29 Yaji te Txew Dios oxik tqꞌumaꞌ te Lip: “Pax, pawok laqꞌchet tiꞌj aj karet niꞌn.”
30 Ya ma tzꞌok laqꞌchet te Lip, oxik xhchaꞌoꞌ, te xjal aj Etyopiy njaw tuq teꞌeꞌ te uꞌj aj oqet stzꞌibꞌaꞌ te Chay aj yolil tyol Dios oqtxiꞌ. Yaji te Lip oxik xhchaꞌoꞌ tetz ikxjani: “¿Nꞌel peꞌ anikyꞌ tiꞌj aj njaw aweꞌeꞌni?”
31 Tzaj te xjal, owaj stzaqꞌbꞌeꞌ: “¿Titzaꞌ owelal nnikyꞌ tiꞌj? Komo kꞌontiꞌl abꞌl ntzaj qꞌuman wetz titzaꞌ atok xtxolil.” Yaji oxik tqꞌumaꞌ tetz te Lip tzan tjax tuj te karr bꞌix tzan tqet witꞌlet tukyꞌiꞌl. 32 Te aj njaw tuq ten tuj te Tuꞌjal Dios aj ntzani: “Tetz oxik eqꞌiꞌ tuj kansbꞌil iktzaꞌ jun chꞌi tal karner, iktzaꞌ jun chꞌi tal karner aj kꞌontiꞌl njaw oqꞌ oj tel in stzamal, ax ikxji tetz kꞌontiꞌl owel stziꞌ chꞌinwt. 33 Owel in tkyꞌexaw bꞌix kꞌontiꞌl oqet kykꞌuluꞌ tumeꞌl tukyꞌiꞌl. Nlay bꞌantik tzan txik jqꞌumaꞌ abꞌleꞌ tijajil tzan tpaj maꞌtx mankun te tanqꞌin tzani twitz txꞌoꞌtxꞌ.”*
34 Ntons yaji te xjal oxik tqaniꞌ te Lip: “Instzaj aqꞌumaꞌ chꞌin, ¿abꞌl qiꞌj nyolin tuq te aj yolil tyol Diosni? ¿Nyolin peꞌ tiꞌjx tetz qatzun tiꞌj junkyji?” 35 Ntons te Lip owaqꞌik tzan tyolin tiꞌj te aj jaꞌ tuq njaw kyeꞌeꞌ, bꞌix ax tukyꞌi txqꞌanky uꞌj tuj te Tuꞌjal Dios oxik tqꞌumaꞌ te tpakbꞌalil galan tiꞌj Jesus.
36 Mas yaj ekyꞌik aj jaꞌ tuq at jun aꞌ bꞌix te xjal oxik tqꞌumaꞌ, “Tzani at jun aꞌ aj jaꞌ galan tzan tjaw asiꞌ aꞌ nwiꞌ.” 37 Te Lip oxik tqꞌumaꞌ: “Qa yatz bꞌanꞌax nꞌawokslaꞌ tukyꞌi jun tkꞌuꞌjlal, bꞌaꞌn tzan tjaw nsiꞌ aꞌ awiꞌ.” Yaji te xjal owaj stzaqꞌbꞌeꞌ: “Wetz nkyinꞌokslan tiꞌj te Jesukrist aji te Tkꞌwaꞌal Qtata Dios.”a 38 Ntons te xjal oxik tkꞌuluꞌ mandad tzan twaꞌlet te tkaret bꞌix kykabꞌil eqex tujb te aꞌ bꞌix te Lip ojaw tsiꞌ aꞌ twiꞌ.