Gataj Pablo si ga̱ꞌa̱nj sôꞌ riñan César
25
Ni̱ guyumân Festo,
riñan hioꞌó Sesarea,
ni̱ gane sôꞌ huàꞌnï̀nj gui ni̱ gachîn sôꞌ gaꞌanj sôꞌ Jerusalén.
2 Ni̱ nga guchiꞌ síchìj Festo ni̱ gaꞌanj nej rej huin ña̱an ngà nej sí huin ña̱ꞌa̱n doj siganï̂nj nej sí judío riñan sôꞌ guendâ ga̱ra̱n ruhuâ nej sôꞌ rayiꞌî Pablo,
ni̱ ûta àko gachín nìꞌhiaj nej sôꞌ,
3 riñan Festo,
si giꞌhiaj sôꞌ sunuj u,
ni̱ gàꞌnï̀nj sôꞌ ga̱ꞌna̱ꞌ Pablo ruhuâ yumanꞌ snàꞌànj Jerusalén;
dadinꞌ gàꞌ ganï̂n ruhuâ nej sôꞌ da̱gahuiꞌ huì nej sôꞌ Pablo chrej e.
4 Sani̱ nanikàj síchìj Festo ni̱ gataj sôꞌ si hua̱ na̱nj ga̱ne Pablo dukuâ gaꞌ nne yumanꞌ Sesarea,
dadinꞌ hia̱j nanikàj Festo ga̱ꞌa̱nj sôꞌ yumanꞌ dânj.
5 Ni̱ gataj síchìj Festo gunïn nej sí dânj:
—Si hua̱ da̱ꞌa̱j nej suj gìrìꞌ gaꞌanj ngàj yuman Sesarea,
ni̱ si hua̱ gakï̱nꞌïn giꞌhiaj sí dânj,
ni̱ ga̱ra̱n ruhuâ nej suj rayiꞌî sôꞌ.
6 Ni̱ nun gachin ꞌngo̱ si tï̱nj gui nej si ꞌngo̱ si chi̱ꞌ gui gahuin ràn síchìj Festo siganï̂nj nej sij,
ni̱ gaꞌanj sôꞌ ni̱ guchiꞌ sôꞌ yumanꞌ Sesarea,
ni̱ aꞌngô gui dânj ni̱ gaꞌanj gane sôꞌ riñan chrun yîla ñan ni̱ka̱j su̱n sôꞌ,
ni̱ gaꞌnḯn sôꞌ gaꞌanj ga̱ya̱ka̱j nej sij ni̱ ga̱ꞌna̱ꞌ Pablo riñan sôꞌ.
7 Ni̱ nga guchiꞌ Pablo riñan sôꞌ,
ni̱ nda ganikàj chre nej sí judío ꞌna̱ꞌ yumanꞌ snàꞌànj Jerusalén rukû Pablo,
ni̱ ûta gàꞌì gakï̱nꞌïn ni̱ ûta hàì hua nej gakï̱nꞌ garânj ruhuâ nej sôꞌ rayiꞌî Pablo,
sani̱ nun ga̱ꞌhue gìrìꞌ nej sôꞌ ga̱na̱di̱gân nej sôꞌ si yàngàꞌ hia giꞌhiaj Pablo nej gakï̱nꞌ garânj ruhuâ nej sôꞌ.
8 Ni̱ dunaꞌhuej Pablo rayiꞌî sôꞌ ni̱ gataj sôꞌ:
—Hua̱ hia ni̱ nun gi̱ꞌhia gakï̱nꞌïn ngà si-ley nej sí judío,
ni̱ nun gi̱ꞌhia gakï̱nꞌïn ngà nûhui nìko nne Jerusalén,
ni̱ gàꞌ nun gi̱ꞌhia gakï̱nꞌïn ngà César mánj.
9 Sani̱ ruhuâ Festo,
gùnàj hueꞌê sôꞌ ngà nej sí judío,
ni̱ gataj sôꞌ gunïn Pablo:
—Ruhuâꞌ ga̱ꞌa̱nj yumanꞌ snàꞌànj Jerusalén,
ni̱ hiuj dânj gi̱ꞌhiaj hiâ gakï̱nꞌ garânj ruhuâ nej sij rayiꞌîꞌ nîꞌ.
10 Hiôꞌ ni̱ gataj Pablo:
—Ñan ni̱ka̱j su̱n César nikḯn,
ni̱ hiuj dânj huin ñan daꞌhui ga̱huin hia si-ga̱kḯn.
Dadinꞌ nitaj gàꞌ si ꞌngo̱ gakï̱nꞌïn giꞌhia riñan nej sí judío mánj,
ni̱ gàꞌ niꞌin hueꞌêꞌ sa giꞌhiâ.
11 Dadinꞌ si giꞌhiâ ꞌngo̱ gakï̱nꞌ nìko xi,
ñan giri daꞌngaj gàhuìj,
hiôꞌ ni̱ si̱ giꞌhiaj chìj guendâ ga̱huij mánj;
sani̱ si sê yàngàꞌ huin nej gakï̱nꞌ garânj ruhuâ nej sij rayiꞌí,
ni̱ gàꞌ si ꞌngo̱ síi si̱ gaꞌhue ga̱na̱chri̱ ñùnj raꞌa nej sij mánj.
Ga̱ꞌa̱n riñan César ni̱ hiuj dânj ga̱huin hia si-ga̱kḯn na̱nj ánj.
12 Hiôꞌ ni̱ ganarïsnaꞌanj síchìj Festo ngà nej sí ni̱ka̱j su̱n ngà sôꞌ,
ni̱ neꞌ rùkù ni̱ gataj sôꞌ gu̱nïn Pablo:
—Riñan César ga̱ꞌa̱nj gatajꞌ;
hiôꞌ ni̱ ga̱ꞌa̱njꞌ riñan César na̱nj ánj.
Ni̱kï̱nꞌ Pablo riñan Agripa ngà riñan Berenice
13 Gachîn do̱j nej gui,
ni̱ guyumân rey Agripa ngà Berenice yumanꞌ Sesarea guendâ ga̱ꞌmi̱n sôꞌ ngà síchìj Festo.
14 Sani̱ ñan gahuin ràn nej sôꞌ gàꞌì gui hiuj dânj,
ni̱ ganataꞌ síchìj Festo rayiꞌî Pablo riñan rey Agripa,
ni̱ gataj sôꞌ:
—ꞌNï̱nj ꞌngo̱ sí dânj dukuâ gaꞌa gudunâj Felix,
15 ni̱ rayiꞌî sôꞌ huin sa gànàtàj riñanꞌ,
dadinꞌ nga gaꞌan Jerusalén,
ni̱ guchiꞌ nej rej huin ña̱an,
ni̱ nej síchìj achij màn siganï̂nj nej judío,
ni̱ gachín nìꞌhiaj nej sôꞌ si da̱gahuiꞌ nej stâdu sí nânj.
16 Sani̱ gatâ gu̱nïn nej sij si nitaj chrej dan nikaj nej romano ni̱ nitaj si dagahuiꞌ nej sôꞌ ꞌngo̱ guiì dadinꞌ gàꞌ si̱nï̱n daꞌhui sí ràyìꞌì gataꞌ gakï̱nꞌ dânj na̱nikïnꞌ sôꞌ riñan nej sí garânj ruhuâ rayiꞌî sôꞌ,
guendâ du̱naꞌhuej sôꞌ rayiꞌî nej gakï̱nꞌ garânj ruhuâ nej sí gunïnꞌ ngà sôꞌ.
17 Huê danj,
ni̱ nga gaꞌnaꞌ chre̱ꞌ nej sôꞌ neꞌ dànanj guendâ ga̱ra̱n ruhuâ nej sô rayiꞌî sí nânj,
ni̱ nun ga̱huin rànj guendâ gàkï̀n sí nânj,
dadinꞌ aꞌngô gui dânj nga gaꞌanj ga̱né riñan chrun yîla ñan giꞌhiaj hiá gakï̱nꞌïn,
ni̱ gakï̂n gaꞌnaꞌ sôꞌ riñânj.
18 Huê danj ni̱ ni̱kï̱nꞌ nej sí garânj ruhuâ rayiꞌî sôꞌ,
sani̱ nitaj gàꞌ si ꞌngo̱ gakï̱nꞌïn hua̱ nìko ganï̂n ruhuâj hua garânj ruhuâ nej sij rayiꞌî sij mánj,
19 man gakï̱nꞌ garânj ruhuâ nej sij rayiꞌî sij huin dàj guyumân ruhuâ nej sij rayiꞌî daꞌanj nej sij,
dadinꞌ Pablo gataj si hua̱ na̱nj hua̱ nìꞌnàꞌ sí gùꞌnàj Jesús,
sani̱ gàꞌ gahuiꞌ sôꞌ.
20 Sani̱ nun yu̱gui ruhuâj dàj gi̱ꞌhia rayiꞌî nuguanꞌ nânj,
ni̱ gachín naꞌan Pablo si hua̱ ruhuâ sij ga̱ꞌa̱nj sij yuman snàꞌànj Jerusalén ni̱ hiuj dânj ga̱huin hia nej nuguanꞌ garânj ruhuâ nej sôꞌ rayiꞌî sij.
21 Sani̱ gataj Pablo si hua̱ ruhuâ sôꞌ ga̱ꞌa̱nj sôꞌ riñan Augusto rayiꞌî nej nuguanꞌ garânj ruhuâ nej sí nânj rayiꞌî sôꞌ,
huê danj ni̱ gaꞌnḯn suun si du̱gumîn nej stâdu nda gàꞌnï̀n ga̱ꞌa̱nj sôꞌ riñan César.
22 Hiôꞌ ni̱ gataj Agripa gunïn Festo:
—Hua̱ ruhuâj gu̱nḯn si-nùguànꞌ sí nan nej na̱nj ánj.
Gataj Festo:
—Aꞌhioj ni̱ gu̱nïnꞌ si-nùguànꞌ sij na̱nj ánj.
23 Aꞌngô gui dânj,
ni̱ gaꞌnaꞌ rey Agripa ngà yuguej sôꞌ Berenice ni̱ ûta gahuin giꞌñanj an nga guyumân nguèj yu̱guej sôꞌ,
ni̱ gatûj nguèj yuguej sôꞌ ruhuâ dukuâ suun ngà stâdu general ni̱ ngà nej sí huin ña̱n màn ruhuâ yumanꞌ snàꞌànj dânj,
huê danj ni̱ gakḯn síchìj Festo gaꞌnaꞌ Pablo.
24 Hiôꞌ ni̱ gataj Festo:
—Rey Agripa,
ni̱ daranꞌ nej suj nej sí màn chre̱ꞌ hiuj nânj,
ni̱ sí nânj nne dukuâ gaꞌa,
ni̱ àsìj yumanꞌ snàꞌànj Jerusalén ni̱ nda hiuj nânj garânj ruhuâ ûta gàꞌì nej sí judío rayiꞌî sôꞌ riñânj,
ni̱ ûta huin duꞌhua nej sí judío ni̱ gataj nej sôꞌ si daꞌhuí da̱gahuí sí nânj.
25 Sani̱ nun gànàrìꞌìj,
si giꞌhiaj sôꞌ ꞌngo̱ gakï̱nꞌ ñan giri daꞌngaj gàhuìꞌ sôꞌ,
sani̱ ñan gataj sôꞌ si ga̱ꞌa̱nj sôꞌ riñan Augusto,
huê danj ni̱ ganï̂n ruhuâj gàꞌnï̀n ga̱ꞌa̱nj sôꞌ na̱nj ánj.
26 Sani̱ ñan nitaj gakï̱nꞌ giꞌhiaj sij ni̱ nitaj si gìrìꞌìj gàchrùnj riñan ma̱ꞌan señor rayiꞌî sij,
ni̱ rayiꞌî dan nikâ gaꞌná sij riñan nej suj,
ni̱ ña̱ꞌa̱n doj huaj si gu̱nï̂nꞌ rayiꞌî sij na̱nj rey Agripa,
ni̱ neꞌ rùkù nga gisîj nadigiꞌñûnꞌ dàj huaj rayiꞌî sij,
ni̱ gìrìꞌìj ꞌngo̱ nuguanꞌ yàngàꞌa gàchrùnj rayiꞌî sij.
27 Dadinꞌ ganï̂n ruhuâj si nitaj si dùgùnàj huaj si gàꞌnï̀n ga̱ꞌa̱nj ꞌngo̱ sí ꞌnï̱nj dukuâ gaꞌa riñan César,
si gàꞌ si̱nï̱n si nadigiꞌñûnj ni̱ gi̱ni̱ꞌín ahuin gakï̱nꞌ garânj ruhuâ nej sí dânj rayiꞌî sôꞌ mánj.