Gaꞌanj Timoteo ngà Pablo ni̱ ngà Silas
16
Neꞌ rùkù ni̱ guchiꞌ nguèj sij ñan ngàj yumanꞌ Derbe ngà yumanꞌ Listra;
ni̱ hiuj dânj nne ꞌngo̱ sí gaꞌnaꞌ ga̱huin chru̱un ni̱ gùꞌnàj sôꞌ Timoteo,
ni̱ huin sôꞌ daꞌní ꞌngo̱ siyànà ꞌna̱ꞌ riñan hioꞌó Judea ni̱ guyumân ruhuâ siyànà dânj niꞌin Ma̱ꞌan Jesús,
sani̱ rej Timoteo huin ꞌngo̱ sí griego;
2 ni̱ gaꞌmin hueꞌê nej dinï̂nt màn yumanꞌ Listra rayiꞌî sôꞌ ni̱ huê danj na̱nj gaꞌmin hueꞌê nej sôꞌ màn yumanꞌ Iconio rayiꞌî sôꞌ.
3 Ni̱ garanꞌ ruhuâ Pablo si ga̱ꞌa̱nj Timoteo ngà sôꞌ;
ni̱ gaꞌnïnꞌ sôꞌ suun si gìyìꞌnèꞌ raa̱ nneè nàꞌàj Timoteo rayiꞌî nej sí judío nne riñan nej hioꞌó dânj;
dadinꞌ niꞌin daranꞌ nej sôꞌ si rej Timoteo huin si gaꞌmin nânj griego.
4 Ni̱ nga gachîn nej sij ñan nngaj nej yumanꞌ snàꞌànj dânj,
ni̱ nagaꞌhuiꞌ nej sij ñanj ñan giyiꞌnïnꞌ suun giꞌhiaj nej sôꞌ gaꞌanj gi̱di̱gân si̱nï̱n si-nùguànꞌ Ma̱ꞌan Ñaꞌanj an ngà nej sôꞌ ni̱kï̱nꞌ riñan nuhuî nne Jerusalén,
ni̱ dugûta su̱n nej sij si da̱gahuin nej sôꞌ sa taj riñan ñanj dânj.
5 Huê danj ni̱ ganahuin yìtï̀nj ruhuâ nej dinï̂nt huin si-nùhuì Ma̱ꞌan Jesús ni̱ guyumân doj ruhuâ nej sôꞌ niꞌin nej sôꞌ Ma̱ꞌan Jesús,
ni̱ daꞌ gui ni̱ gahuin gàꞌì nej sôꞌ doj ginikòꞌ rukû Ma̱ꞌan Jesús.
Ganikïnꞌ ꞌngo̱ sí ꞌnaꞌ yuman Macedonia riñan Pablo
6 Ni̱ gachîn nej sij riñan hioꞌó Frigia ngà riñan hioꞌó ni̱ka̱j ñuꞌunj Galacia,
ni̱ nagiꞌhiaj ha̱i̱ Ma̱ꞌan Espíritu Santo si gànàtàꞌ nej sij si-nùguànꞌ Ma̱ꞌan Ñaꞌanj an riñan nej guiì màn riñan hioꞌó Asia;
7 ni̱ nga guchiꞌ nej sij yumanꞌ Misia,
ni̱ ganï̂n ruhuâ nej sij ga̱ꞌa̱nj nej sij yumanꞌ Betinia,
sani̱ nun ga̱ꞌhuej Ma̱ꞌan Espíritu Santo ga̱ꞌa̱nj nej sij yumanꞌ dânj.
8 Ni̱ gachîn nej sij nìchrùnꞌ ñan nngaj yumanꞌ Misia,
ni̱ gaꞌanj nej sij ñan nngaj yumanꞌ gùꞌnàj Troas.
9 Ni̱ neꞌ ñànꞌan ganï̂n Ma̱ꞌan Ñaꞌanj an ganikïnꞌ ꞌngo̱ sí ꞌna̱ꞌ yumanꞌ Macedonia riñan Pablo,
ni̱ ûta àko gachín niꞌhiaj sí dânj ni̱ gataj sôꞌ:
“Ga̱chi̱n sòꞌ ga̱ꞌna̱ꞌ yumanꞌ Macedonia ni̱ gu̱ru̱gûñuꞌunj rukû nej ñûnj.”
10 Ni̱ nga giniꞌin sij sí ganikïnꞌ sí nânj riñan sij,
ni̱ nda nanè chre ni̱ gaꞌanj nej ñûnj yumanꞌ Macedonia,
ni̱ garânj daꞌngaꞌ ruhuâ nej ñûnj si Ma̱ꞌan Ñaꞌanj an gakḯn ga̱ꞌa̱nj nej ñûnj guendâ gànàtàꞌ nej ñûnj nuguanꞌ gi̱ꞌhiaj ga̱na̱ni̱n nej guiì.
Pablo ngà Silas dukuâ gaꞌa
11 Ni̱ yumanꞌ Troas gidaꞌa nej ñûnj,
ꞌngo̱ barkû huaj ni̱ka̱ chre nda Samotracia,
ni̱ aꞌngô gui dânj ni̱ guchiꞌ nej ñûnj Neápolis;
12 ni̱ hiuj dânj gahui nej ñûnj ni̱ gaꞌanj nej ñûnj Filipos,
ni̱ nânj huin yumanꞌ snàꞌànj nngaj si̱nï̱n ñan gayiꞌì hioꞌó Macedonia,
ni̱ huê danj na̱nj hua̱ ꞌngo̱ yumanꞌ màn nej sí ꞌna̱ꞌ riñan hioꞌó Roma;
ni̱ gane nej ñûnj do̱j nï̀nꞌ nej gui hiuj nânj.
13 Ni̱ ꞌngo̱ gui ganarânj ruhuâ huin nga gahui nej ñûnj neꞌ ye̱ꞌ ri̱ña̱n rahueꞌ nu̱n riñan yumanꞌ snàꞌànj dânj,
nìchrùnꞌ duꞌhua ꞌngo̱ kïn huaj hiuj dânj,
ni̱ ganï̂n ruhuâ nej ñûnj si hua̱ ꞌngo̱ lugâ ñan huaꞌanj ga̱ꞌmi̱n nej judío ngà Ma̱ꞌan Ñaꞌanj an;
ni̱ gaꞌanj ga̱ne nej nûnj,
ni̱ ganarïsnaꞌanj nej ñûnj si-nùguànꞌ Ma̱ꞌan Ñaꞌanj an ngà nej siyànà naraꞌhuiꞌ hiuj dânj.
14 Hiôꞌ ni̱ ꞌngo̱ siyànà gùꞌnàj Lidia,
ꞌnïnj sun guduꞌhuêj atsîj ma̱re sàꞌ xi,
ni̱ yiñán siyànà nânj huin yumanꞌ snàꞌànj Tiatira,
ni̱ nnùn ña̱ꞌa̱nj siyànà nânj riñan Ma̱ꞌan Ñaꞌanj an,
ni̱ gunïn siyànà nânj si-nùguànꞌ Ma̱ꞌan Ñaꞌanj an;
ni̱ ganaꞌnï̂nj Ma̱ꞌan Señor nimân siyànà nânj ni̱ ûta hueꞌê gananï̂n rakï̂ꞌ rayiꞌî nej nuguanꞌ ganataꞌ Pablo.
15 Ni̱ nga gataꞌ nne siyànà nânj,
ni̱ gataꞌ nne nej duguiꞌij ni̱ ûta àko gachín niꞌhia riñan nej ñûnj ni̱ gata gunïn nej ñûnj:
—Si niꞌin nej suj si hueꞌê dagahuín riñan Ma̱ꞌan Señor,
ni̱ ga̱tu̱ nej suj ruhuâ dukuá,
ni̱ gùnàj nej suj.
Ni̱ ûta giꞌhiaj guesaj si gùnàj nej ñûnj dukuaj.
16 Gahuin nga nï̀nꞌ huaj ga̱ꞌmi̱n nej ñûnj ngà Ma̱ꞌan Ñaꞌanj an,
ni̱ ganariꞌ duguiꞌ nej ñûnj ngà ꞌngo̱ siyànà dânj ni̱ nun nanè ganaꞌin daꞌngaꞌ ruhuâ nimanj,
ni̱ ûta gahuin yi̱ruꞌhue rikij giꞌhia.
17 Ni̱ nìkòꞌ siyànà nânj,
rukû Pablo ngà rukû nej ñûnj,
ni̱ ûta nùkuaj gagua,
ni̱ gata:
—Nej sinaꞌu nânj huin si-musû Ma̱ꞌan Ñaꞌanj ni̱ka̱j sun yàkàan,
ni̱ gidigân ninj chrej gi̱ꞌhiaj ga̱ꞌhue ga̱na̱ni̱n nej guiì.
18 Ni̱ huê dànanj gataj siyànà nânj ûta gàꞌì nej gui;
sani̱ giri ruhuâ Pablo guendâ gaꞌmin siyànà nânj dànanj,
ni̱ nanikàj sôꞌ ni̱ gataj sôꞌ gu̱nïn nanè gananiꞌin daꞌnga nânj:
—Nga siyu̱gui Ma̱ꞌan Jesús aꞌnïnꞌ sùnj riñanꞌ ni̱ ga̱hui̱ꞌ ruhuâ nimân siyànà nan ni̱ ga̱ꞌa̱nj raj.
Ni̱ huê gè orâ dânj gahui nanè nânj ruhuâ nimân siyànà nânj ni̱ gaꞌan.
19 Sani̱ giniꞌin si-yi̱ruꞌhue siyànà nânj si nitaj sanꞌanj gi̱ꞌhiaj ga̱nan sôꞌ,
ni̱ gidaꞌa nej sôꞌ Pablo ngà Silas,
ni̱ ni̱ka̱j nej sôꞌ gaꞌanj nej sôꞌ riñan raꞌhue nìko,
ñan nne nej síchìj ni̱ka̱j suun;
20 ni̱ ni̱ka̱j nej sôꞌ gaꞌanj nej sôꞌ nguèj sij riñan nej guesì,
ni̱ gataj nej sôꞌ:
—Sí judío huin nguèj sí nânj,
ni̱ ûta giꞌhiaj nguèj sij gachej ruhuâ nej guiì ni̱ dugunïnꞌ nguèj sij nej guiì màn yumanꞌ snàꞌànj huin yiñûnꞌ,
21 ni̱ gidigân nguèj sij aꞌngô chrej nitaj si dùgùnàj hua ga̱na̱huin ro̱ꞌoꞌ ni̱ gàꞌ si̱ gaꞌhue da̱gahuînꞌ,
dadinꞌ sí romano huin nêꞌ.
22 Huê danj ni̱ naraꞌhuiꞌ nej guiì yùmànꞌan ni̱ gayiꞌì ninj ni̱ gaꞌhuiꞌ ninj niꞌhiaj nguèj sij,
ni̱ gutù nej guesì siganꞌ nguèj sij ni̱ gaꞌnïnꞌ nej sôꞌ suun si gùtàꞌ nej sí stâdu rutsìi yichrá nguèj sij.
23 Neꞌ rùkù ngà gisîj duguañun staꞌu nej sí dânj nguèj sij,
ni̱ gachrîj nej sôꞌ dukuâ gaꞌa nguèj sij,
ni̱ gaꞌnïnꞌ nej sôꞌ suun riñan sí ni̱ka̱j ñuꞌunj dukuâ gaꞌa,
ni̱ gataj nej sôꞌ si ga̱nï̱n sí dânj nej sí du̱gumîn ñan nne dukuâ gaꞌa.
24 Ni̱ nga ganahuin ra̱ꞌa nej sí nânj,
sun giyiꞌnïnꞌ riñan nej sôꞌ,
ni̱ gachrîj nej sôꞌ nguèj sij ruhuâ dukuâ gaꞌ nne nda ni̱ka̱ꞌ dânj,
ni̱ gachrîj sôꞌ dakó nguèj sij ruhuâ kaj tàj hiuꞌuj u.
25 Sani̱ ruhuâ da̱ꞌa̱j neꞌ ñànꞌ mánj,
ni̱ achín niꞌhiaj Pablo ngà Silas riñan Ma̱ꞌan Ñaꞌanj an,
ni̱ achrá nguèj sôꞌ chraꞌa riñan Ma̱ꞌan Ñaꞌanj an,
ni̱ gunïn aꞌngô nej sí màn ruhuâ dukuâ gaꞌa sa giꞌhiaj nguèj sij.
26 Hiôꞌ ni̱ nda nanè chre ni̱ gayiꞌij gaꞌhuij ꞌngo̱ ñûn nùkuaj xi,
huê danj ni̱ gisikiꞌ nï̀nꞌ nej hiëj nngaj yiꞌî hueꞌ dukuâ gaꞌ dânj;
ni̱ nda nanè chre ganayîꞌnïnj riñan daranꞌ nej rahueꞌ dukuâ gaꞌ dânj,
ni̱ ganachi daranꞌ nej agaꞌ kadena ànùmin daranꞌ nej sí màn ruhuâ dukuâ gaꞌ dânj.
27 Huê danj ni̱ ganaꞌnï̂nj ñan sí ni̱ka̱j ñuꞌunj dukuâ gaꞌ dânj,
ni̱ giniꞌin sôꞌ si hua̱ niꞌnï̀nj riñan daranꞌ nej rahueꞌ nu̱n riñan dukuâ gaꞌa,
ni̱ giri sôꞌ si-yitî sôꞌ ni̱ ruhuâ sôꞌ da̱gahuiꞌ sôꞌ ma̱ꞌan sôꞌ,
dadinꞌ ganï̂n ruhuâ sôꞌ si gunânj nej sij ruhuâ dukuâ gaꞌa.
28 Sani̱ ûta nùkuaj aguâj Pablo,
ni̱ gataj sôꞌ:
—Si̱ dagahuiꞌ sòꞌ ma̱ꞌânꞌ mánj,
dadinꞌ màn daranꞌ nej ñûnj.
29 Hiôꞌ ni̱ gachín sí dânj ñaꞌan tàj raa̱ kantil,
ni̱ nda nanè chre gatûj sôꞌ gaꞌanj sôꞌ neꞌ rùhuà dukuâ gaꞌa,
ni̱ nda nagunanꞌ chre nneè kú sô,
ni̱ ganikïnꞌ rúdàkòj sôꞌ yiꞌî Pablo ngà yiꞌî Silas;
30 ni̱ giri sôꞌ ruhuâ dukuâ gaꞌa nguèj sij,
ni̱ gataj sôꞌ:
—Nùnj huin si gi̱ꞌhia ni̱ gànànìnj ràꞌaj.
31 Ni̱ gataj nguèj sij:
—Gùyùmàn ruhuâ sòꞌ niꞌînꞌ Ma̱ꞌan Señor Jesús,
ni̱ ga̱na̱ni̱nꞌ raj,
ni̱ huê danj na̱nj ga̱na̱ni̱n daranꞌ nej guiì màn ruhuâ dukuât nej na̱nj ánj.
32 Ni̱ gaꞌmin nej sij si-nùguànꞌ Ma̱ꞌan Señor riñan sí nânj,
ni̱ huê danj na̱nj gaꞌmin nej sij si-nùguànꞌ Ma̱ꞌan Ñaꞌanj an riñan daranꞌ nej guiì màn ruhuâ dukuâ sôꞌ.
33 Ni̱ huê gè orâ neꞌ ñànꞌ dânj,
ni̱ ganaꞌnïnꞌ sôꞌ ñan giranꞌ yiꞌì nneè kú ngue sij;
ni̱ neꞌ rùkù ni̱ gataꞌ nne sí nânj ni̱ huê danj na̱nj gataꞌ nne daranꞌ nej guiì huin duguiꞌ sôꞌ.
34 Ni̱ ni̱ka̱j sôꞌ gaꞌanj sôꞌ dukuâ sôꞌ nguèj sij,
ni̱ ganï̂n sôꞌ mesa;
ni̱ ûta ganahuin nìhiàꞌ ruhuâ sôꞌ rayiꞌî guendâ guyumân ruhuâ sôꞌ niꞌin sôꞌ si-nùguànꞌ Ma̱ꞌan Ñaꞌanj an.
35 Ni̱ nga garangaꞌ gui dânj,
ni̱ gaꞌnḯn nej guesì nej policia ni̱ gataj nej sôꞌ gu̱nïn sí ni̱ka̱j ñuꞌunj dukuâ gaꞌ dânj:
Gataj nej guesì si gànàꞌnï̀nj raꞌâꞌnguèj sí danj na̱nj ánj.
36 Ni̱ gataj sí dugumîn dukuâ gaꞌa nej nuguanꞌ nânj riñan Pablo:
—Gaꞌnïnꞌ nej guesì suun si gìrìj sòꞌ ruhuâ dukuâ gaꞌa;
huê danj ni̱ gahui nej suj hia̱j na̱nj ánj,
ni̱ si̱ giriñun ruhuâ nej suj mánj.
37 Sani̱ gataj Pablo gu̱nïn nej policia:
—Duguañun nej sij nej ñûnj ni̱ giniꞌin yùmànꞌ daranꞌ nej guiì sani̱ nun ga̱hui̱ ñanj ahuin ràyìꞌì gakï̱nꞌ giꞌhiaj nej ñûnj,
aꞌngoj ni̱ nej sí màn yumanꞌ Roma huin nej ñûnj,
ni̱ gachrîj nej suj dukuâ gaꞌa nej nûnj,
hia̱j ni̱ ganï̂n ruhuâ nej suj gi̱ri̱ huì nej suj nej ñûnj na̱nj nîꞌ.
Sani̱ si gaꞌhue danj gaj mánj,
si ruhuâ nej sij ni̱ ga̱ꞌna̱ꞌ gi̱ri̱ nej ma̱ꞌan nej sij nej ñûnj.
38 Ni̱ ganataꞌ nej sí dugumîn riñan dukuâ gaꞌa nej nuguanꞌ nânj riñan nej guesì,
ni̱ ûta guyuꞌhuiꞌ nej sí nânj nga gunïn nej sôꞌ si sí romano huin nguèj sij.
39 Ni̱ gaꞌnaꞌ nej sí guesì nânj,
ni̱ ûta àko gachín niꞌhiaj nej sôꞌ;
ni̱ giri nej sôꞌ ruhuâ dukuâ gaꞌa nguèj sij,
ni̱ gachín niꞌhiaj nej sôꞌ si ga̱ꞌa̱nj nej sij neꞌ ye̱ꞌ yumanꞌ snàꞌànj dânj.
40 Hiôꞌ ni̱,
gahui nej sij ruhuâ dukuâ gaꞌa,
ni̱ gatûj nej sij dukuâ Lidia,
ni̱ giniꞌin nej sij nej dinï̂nt,
ni̱ giꞌhiaj nej sij si ga̱na̱huin nìhiàꞌ ruhuâ nej sôꞌ huê danj ni̱ gahui nej sij ni̱ gaꞌanj nej sij.