Junta nìko ga Jerusalén
15
Nej gui dânj ni̱ guyumân da̱ꞌa̱j nej sí màn riñan hioꞌó Judea yumanꞌ snàꞌànj Antioquía ni̱ gayiꞌì nej sôꞌ gidigân nej sôꞌ nej dinï̂nt ni̱ gataj nej sôꞌ:
Si ga̱ꞌne̱ꞌ nej dinï̂nt do̱j raa̱ nneè nàꞌàj nej sôꞌ dàj rûnꞌ taj riñan si-ley Moisés,
ni̱ sisi̱ si̱ gaꞌneꞌ nej sôꞌ do̱j raa̱ nneè nàꞌàj nej sôꞌ ni̱ si̱ ga̱na̱ni̱n nej sôꞌ gataj nej sì dânj.
2 Ni̱ ûta ganarïsnaꞌanj Pablo ngà Bernabé ngà nej sí gidigân dànanj ni̱ huê danj na̱nj ûta nùkuaj gunïnꞌ nej sij ngà nguèj sôꞌ,
ni̱ guchiꞌ nej sij ꞌngo̱ duꞌhua si ga̱ꞌa̱nj Pablo ni̱ Bernabé ni̱ gaꞌanj aꞌngô nej dinï̂nt nda Jerusalén huin yumanꞌ snàꞌànj an,
daꞌnga ni̱ gahuin hia nuguanꞌ nânj giꞌhiaj nej sôꞌ gaꞌanj gidigân si̱nï̱n si-nùguànꞌ Ma̱ꞌan Ñaꞌanj an ngà nej sôꞌ ni̱kï̱nꞌ riñan nûhui.
3 Ni̱ gaꞌnḯn si-nùhuì Ma̱ꞌan Jesús nne yumanꞌ snàꞌànj Antioquía gaꞌanj nej sij,
ni̱ gachîn nej sij Fenicia ni̱ huê danj na̱nj gachîn nej sij Samaria,
ni̱ gananï̂n nej sij riñan nej judío nìkòꞌ rukû Ma̱ꞌan Jesús si guyumân ruhuâ nej sí nàsìnùnj un niꞌin nej sôꞌ Ma̱ꞌan Ñaꞌanj an;
ni̱ ûta ganahuin nìhiàꞌ ruhuâ nej dinï̂nt judío giꞌhiaj nej sij.
4 Ni̱ guchiꞌ Pablo ngà Bernabé yumanꞌ snàꞌànj Jerusalén,
ni̱ ganahuin ra̱ꞌa nej sôꞌ gaꞌanj gi̱di̱gân si̱nï̱n ni̱ nej sôꞌ ni̱kï̱nꞌ riñan si-nùhuì Ma̱ꞌan Jesús nguèj sij,
ni̱ ganataꞌ nguèj sij dàj nìko giꞌhiaj Ma̱ꞌan Ñaꞌanj an ngà nguèj sij.
5 Ni̱ màn nej sí guyumân ruhuâ niꞌin Ma̱ꞌan Jesús hiuj dânj ni̱ yiꞌnïnꞌ nej sí fariseo huin nej sôꞌ,
ni̱ gayiꞌì nej sôꞌ gataj nej sôꞌ:
—Ña̱ꞌa̱n huaj si gìyìꞌnèꞌ doj raa̱ nneè nàꞌàj nej sí nàsìnùnj guyumân ruhuâ niꞌin Ma̱ꞌan Jesús,
ni̱ daꞌhuiꞌ nej sij da̱gahuin nej sij riñan si-ley Moisés.
6 Huê danj ni̱ ganahuin chre̱ꞌ nej sôꞌ gaꞌanj gi̱di̱gân si̱nï̱n si-nùguànꞌ Ma̱ꞌan Ñaꞌanj an ngà nej sôꞌ ni̱kï̱nꞌ riñan nûhui guendâ na̱di̱giꞌñûn nej sôꞌ rayiꞌî nuguanꞌ nânj.
7 Ni̱ neꞌ rùkù nga gisîj ûta gunïnꞌ nej sij,
ni̱ ganayumàn Pedro ni̱ gataj sôꞌ:
—Gàꞌ niꞌin nej suj di̱nï̂nj,
si àsìj ri̱ki doj ni̱ gàꞌ ganagui Ma̱ꞌan Ñaꞌanj an ñùnj si ga̱ꞌa̱nj gànàtàj si-nùguànꞌanj riñan nej sí nàsìnùnj un,
daꞌnga ni̱ guyumân ruhuâ nej sij niꞌin nej sij Ma̱ꞌan.
8 Sani̱ Ma̱ꞌan Ñaꞌanj an niꞌin dàj hua ruhuâ nimân nej guiì,
ni̱ gidiganj si ꞌì ruhuâj niꞌin nej guiì nàsìnùnj un,
rayiꞌî dan gaꞌhuij Ma̱ꞌan Espíritu Santo riñan ninj,
dàj rûn rikij Ma̱ꞌan Espíritu Santo riñan nêꞌ.
9 Ni̱ nun gi̱ꞌhiaj ni̱nïnj nej sij riñanj dadinꞌ dàj rûnꞌ giꞌhia ngà nêꞌ ni̱ huê danj giꞌhia ngà nej sij,
guendâ guyumân ruhuâ nej sij ni̱ nagiꞌhiaj sàꞌaj ruhuâ nimân nej sij.
10 Nùnj huin saj ni̱ ruhuâ nej suj gu̱nï̱nꞌ nej suj ngà ma̱ꞌan Ñaꞌanj an rayiꞌî sa giꞌhia ràꞌaj.
Ni̱ gutaꞌ nej suj igû àꞌì dânj yichrá nej sôꞌ,
ni̱ gàꞌ rej nej suj ni̱ gàꞌ nêꞌ naꞌhue gùnùkuaj dagahuin sun gaꞌnïnꞌ Ma̱ꞌan Ñaꞌanj an ràꞌaj.
11 Sa si̱nï̱n guyumân ruhuâ nêꞌ huin si ꞌngo̱ rïn Ma̱ꞌan Jesús huin sa gi̱ꞌhiaj ga̱na̱ni̱n nêꞌ,
ni̱ huê danj na̱nj guyumân ruhuâ nej sôꞌ si Ma̱ꞌan Jesús huin sa gi̱ꞌhiaj ga̱na̱ni̱n nej sôꞌ.
12 Huê danj ni̱ dḯn gahuin duꞌhua daranꞌ nej guiì màn hiuj dânj,
ni̱ gunïn ninj nej nuguanꞌ gaꞌmin Bernabé ngà Pablo,
dadinꞌ ganataꞌ nguèj sôꞌ dàj ûta nìko hua sa giꞌhiaj Ma̱ꞌan Ñaꞌanj an ni̱ dàj hueꞌê guruguñuꞌunj Ma̱ꞌan Ñaꞌanj an rukû nguèj sôꞌ siganï̂nj nej sí nàsìnùnj un.
13 Ni̱ nga gisîj gaꞌmin nguèj sôꞌ,
ni̱ gaꞌmin Jacobo ni̱ gataj sôꞌ:
—Gu̱nïn nej suj nej nuguanꞌ ga̱ꞌmi̱n di̱nï̂nj.
14 Gàꞌ gunïn nêꞌ dàj ganataꞌ Simón,
si gaꞌnḯn si̱nï̱n Ma̱ꞌan Ñaꞌanj an gaꞌanj sôꞌ riñan nej sí nàsìnùnj un,
guendâ ga̱na̱huin ra̱ꞌa nej sôꞌ si-nùguànꞌ Ma̱ꞌan Ñaꞌanj ni̱ gahuin nej sôꞌ yiñan ni̱ ga̱na̱ka̱j nej sôꞌ siyu̱gui Ma̱ꞌan.
15 Ni̱ huê dànanj ga̱huin dadinꞌ gàꞌ gataj Ma̱ꞌan Ñaꞌanj an riñan si-nùguànꞌanj nga garânj sunj gaꞌmin nej sôꞌ gataj dàj gahuin:
16 Neꞌ rùkù nânj ni̱ gànànìkàj ñûn
ni̱ na̱gi̱ꞌhiaj nàkàj ñan gane David nga ginikaj su̱n sôꞌ,
dadinꞌ gàꞌ ganatûj man;
ni̱ ga̱na̱chi nikâ ꞌngo̱ nej daꞌnin si̱ꞌnï̱n David
ni̱ sôꞌ huin sí gi̱nikaj su̱n riñânj.
17 Daꞌnga ni̱ ga̱ꞌna̱ꞌ nànàꞌhuìꞌ aꞌngô da̱ꞌa̱j nej sí nàsìnùnj màn aꞌngô país ñùnj,
ni̱ gi̱ni̱ꞌin daranꞌ nej país ni̱ giꞌhia si ga̱huin nej sôꞌ sí gànàtàꞌ du̱ꞌhua siyu̱guí,
18 Huê danj gataj Ma̱ꞌan Señor,
dadinꞌ àsìj diû ri̱ki gàꞌ gidiganj dàj ga̱huin.
19 ’Huê danj ni̱ ganakaj guendâj,
si nitaj si hua̱ hueꞌê man si gàchìnꞌ aꞌngô sa hua̱ chìꞌi da̱gahuin nej sí nàsìnùnj un,
dadinꞌ gàꞌ gudunâj nej sôꞌ chrej yìñànj nâ guyumân ruhuâ nej sôꞌ ni̱ ginikòꞌ nej sôꞌ rukû Ma̱ꞌan Ñaꞌanj an,
20 ga̱chru̱nꞌ ñanj karta riñan nej sij ni̱ ga̱to̱ꞌ si si̱ ya nej sij nej sa gutaꞌ nej guiì riñan nej ñaꞌanj giꞌhiaj ra̱ꞌa nej síi,
ni̱ si̱ ya nej sij nneè nej yuku gaꞌhiuj u,
ni̱ si̱ ya nej sij tun nej yuku ni̱ si̱ gaꞌhue ga̱ne sìgìchràꞌ nej sij mánj.
21 Dadinꞌ àsìj nâ ni̱ gàꞌ ganï̂n nej sôꞌ chru̱n ley nej sí ganikïnꞌ riñan daꞌ goꞌngo̱ nej yumanꞌ snàꞌànj an,
guendâ gànàtàꞌ nej sôꞌ si-ley Moisés riñan nej guiì,
nej gui ganarânj rûhua na̱nj ánj.
22 Hiôꞌ ni̱ dùgùnàj hua nuguanꞌ nânj gataj nej sôꞌ gaꞌanj gi̱di̱gân si̱nï̱n si-nùguànꞌ Ma̱ꞌan Ñaꞌanj an ni̱ huê danj na̱nj gataj nej sôꞌ huin si-nùhuì Ma̱ꞌan Jesús,
huê danj ni̱ ganagui nej sôꞌ siganï̂nj nej sôꞌ nej sí hua̱ yu̱gui ni̱ gaꞌnḯn nej sôꞌ gaꞌanj nej sij yumanꞌ snàꞌànj Antioquía ngà Pablo ni̱ ngà Bernabé:
Ni̱ nej sôꞌ nânj huin Judas sí dugûꞌnàj nej sij Barsabás,
ni̱ Silas.
Ni̱ huin nej sôꞌ sí huin ña̱n doj siganï̂nj nej dinï̂nt;
23 raꞌa nej sôꞌ gaꞌhuiꞌ nej sij ñanj karta gachrûn nej sij ni̱ ginikaj nej sôꞌ gaꞌanj nej sôꞌ ni̱ taj riñan ñanj karta dânj:
“Nej ñûnj nej sí gaꞌanj gi̱digân si̱nï̱n si-nùguànꞌ Ma̱ꞌan Ñaꞌanj an ngà nej sôꞌ ni̱ka̱j ñuꞌunj nûhui nne Jerusalén,
gaꞌnḯn nej ñûnj ꞌngo̱ nuguanꞌ ni̱ꞌña̱nj an huaj riñan nej suj nej dinï̂nt huin sí nàsìnùnj nìkòꞌ rukû Ma̱ꞌan Jesús ni̱ nne nej suj siganï̂nj nej sí nàsìnùnj nne yumanꞌ snàꞌànj Antioquía,
yumanꞌ snàꞌànj Siria,
ni̱ yumanꞌ snàꞌànj Silisia.
24 Dadinꞌ gunïn nej ñûnj si hua̱ da̱ꞌa̱j nej sí gahui siganï̂nj nej ñûnj ni̱ guchiꞌ nej sôꞌ ñan màn nej suj,
sani̱ nun gàꞌnï̀nꞌ nej ñûnj suun riñan nej sôꞌ si gùchìꞌ nej sôꞌ ñan màn nej suj,
ni̱ garanꞌ ñuꞌunj nej sôꞌ nej suj ni̱ giꞌhiaj nej sôꞌ si gùrùguìꞌ chìꞌ ruhuâ ma̱ꞌan nimân nej suj,
25 ni̱ nadigiꞌñûn nej ñûnj ni̱ guchiꞌ nej ñûnj ꞌngo̱ duꞌhua,
si dùgùnàj huaj ni̱ gachrûn su̱n nej ñûnj nej dinï̂nt màn nuhuî nânj ni̱ gaꞌnḯn nej ñûnj huaj nej sôꞌ ngà dinï̂nt Bernabé ni̱ ngà dinï̂nt Pablo,
nej sôꞌ ꞌì staꞌu ruhuâ nêꞌ,
26 nej sôꞌ nânj nun ga̱ yuꞌhuiꞌ ruhuâ guendâ gàhuìꞌ nej sôꞌ,
dadinꞌ ûta hueꞌê dagahuin nej sôꞌ riñan Ma̱ꞌan Señor Jesucristo.
27 Ni̱ gaꞌnḯn nej ñûnj huaj Judas ngà Silas riñan nej suj,
ni̱ huê gè dàj rûnꞌ taj riñanj ñanj ñânj ni̱ huê danj gànàtàꞌ nej sôꞌ gu̱nïn nej suj.
28 Dadinꞌ dùgùnàj huaj taj Ma̱ꞌan Espíritu Santo,
ni̱ huê danj na̱nj dùgùnàj huaj ganï̂n ruhuâ nej ñûnj,
sisi̱ si̱ gaꞌhue gùtàꞌ nej ñûnj aꞌngô karga àꞌì doj yichrá nej suj dadinꞌ man nej sa ña̱ꞌa̱n doj da̱gahuin nej suj huin nej nânj:
29 Ni̱ si̱ ya nej suj nihia gutaꞌ nej sôꞌ riñan nej ñaꞌanj giꞌhiaj ra̱ꞌa síi,
ni̱ si̱ yâ nej suj tun nej yuku,
ni̱ si̱ yâ nej suj nneè nej yuku gaꞌhiuj u,
ni̱ si̱ gane sìgìchràꞌ nej suj;
ni̱ si hua̱ gu̱dadû nej suj ma̱ꞌan nej suj riñan nej nânj,
ni̱ dùgùnàj giꞌhiaj nej suj.
Ga̱na̱huin ra̱ꞌa nej suj nuguanꞌ ni̱ꞌñanj an na̱nj ánj.”
30 Huê danj ni̱ gaꞌanj Bernabé,
Pablo,
Judas,
Silas,
yumanꞌ snàꞌànj Antioquía.
Ni̱ nga guchiꞌ nej sij hiuj dânj,
ni̱ nagiꞌhiaj chre̱ꞌ nej sij daranꞌ nej dinï̂nt hua̱j nûhui,
ni̱ nagaꞌhuiꞌ nej sij ñanj karta ni̱ka̱j nej sij huaj nej sij raꞌa nej sôꞌ;
31 ni̱ nga gisîj gahia nej sij ñanj karta nânj,
ni̱ ûta ganahuin nìhiàꞌ ruhuâ nej sôꞌ sa taj riñan ñanj dânj.
32 Ni̱ Judas ngà Silas huin nej sôꞌ sí ganataꞌ dàj gahuin,
ni̱ giꞌhiaj nej sôꞌ si ga̱na̱huin nìhiàꞌ ruhuâ nej dinï̂nt naraꞌhuiꞌ hiuj dânj ni̱ nagiꞌhiaj yìtï̀nj nej sôꞌ ruhuâ nej dinï̂nt ngà ûta nìko si-nùguànꞌ Ma̱ꞌan Ñaꞌanj an.
33 Ni̱ gahuin ràn nej sôꞌ ꞌngo̱ diû yumanꞌ snàꞌànj dânj,
huê danj ni̱ hua̱ dïnꞌïnj ruhuâ nej sôꞌ ni̱ gaꞌmin nej sôꞌ ngà nej dinï̂nt màn hiuj dânj,
huê danj ni̱ nanikàj nej sôꞌ ganaꞌnaꞌ nej sôꞌ riñan nej dinï̂nt gaꞌnḯn gaꞌanj nej sôꞌ hiuj dânj.
34 Sani̱ gunâj Silas yumanꞌ snàꞌànj dânj dadinꞌ garanꞌ ruhuâ sôꞌ ga̱ne sôꞌ hiuj dânj.
35 Huê danj na̱nj gahuin ràn Pablo ngà Bernabé yumanꞌ snàꞌànj Antioquía,
ni̱ gidigân nguèj sôꞌ nuguanꞌ gi̱ꞌhiaj ga̱na̱ni̱n nej guiì.
Gaꞌanj ga̱ꞌmi̱n Pablo dukuán huìj i si-nùguànꞌ Ma̱ꞌan Ñaꞌanj an riñan nej guiì màn aꞌngô país
36 Neꞌ rùkù nga gachín gàꞌì gui ni̱ gataj Pablo gunïn Bernabé:
—Nànìkòꞌ gaꞌanj giniꞌhioꞌ daranꞌ nej yumanꞌ snàꞌànj ñan màn nej dinï̂nt ri̱ña̱n gaꞌminꞌ si-nùguànꞌ Ma̱ꞌan Ñaꞌanj an,
ni̱ giniꞌînꞌ si hua̱ yìtï̀nj ruhuâ nej sij.
37 Ni̱ garanꞌ ruhuâ Bernabé si ga̱ꞌa̱nj Juan Marcos ngà nej sij;
38 sani̱ ganï̂n ruhuâ Pablo si nitaj si dùgùnàj huaj si ga̱ꞌa̱nj Juan Marcos ngà nej sij dadinꞌ guxun sôꞌ ma̱ꞌan sôꞌ riñan nej sij àsìj yumanꞌ Panfilia,
ni̱ nun ga̱ꞌa̱nj sôꞌ riki si-su̱n Ma̱ꞌan Ñaꞌanj an ngà nej sij.
39 Sani̱ nun ga̱ꞌhue gùchìꞌ Pablo ngà Bernabé ꞌngo̱ duꞌhua,
huê danj ni̱ gahuin anêj nej sij riñan daꞌ goꞌngo̱ nej duguiꞌ nej sij,
huê danj ni̱ ganakaj duguiꞌ Bernabé ngà Juan Marcos ni̱ gatûj nguèj sôꞌ ruhuâ barku ni̱ gaꞌanj nguèj sôꞌ neꞌ Chipre,
40 ni̱ ganagui Pablo,
Silas,
ni̱ gaꞌanj nguèj sij,
ni̱ gachín niꞌhiaj nej dinï̂nt si giꞌhiaj Ma̱ꞌan Señor sunuj u ni̱ gu̱ru̱gûñuꞌun rukû nguèj sij,
41 ni̱ gachîn nguèj sij riñan hioꞌó Siria ni̱ gachîn nguèj sij riñan hioꞌó Silisia,
ni̱ nagiꞌhiaj nùkuaj nguèj sij ruhuâ nej sôꞌ huin si-nùhuì Ma̱ꞌan Jesús ñan gachîn nguèj sij gaꞌanj nguèj sij.