Gaꞌanj Pablo ngà Bernabé yumanꞌ Iconio
14
Ni̱ gahuin nga guchiꞌ nguèj sij ruhuâ yumanꞌ Iconio ni̱ gaꞌanj nguèj sij ruhuâ hueꞌ huin si-nùhuì nej sí judío,
ni̱ gaꞌmin nguèj sij si-nùguànꞌ Ma̱ꞌan Ñaꞌanj an ni̱ ûta hueꞌê guruguñuꞌunj Ma̱ꞌan Ñaꞌanj an rukû nguèj sij ni̱ ûta gàꞌì nej sí judío guyumân ruhuâ,
ni̱ huê danj na̱nj guyumân ruhuâ nej sí aꞌmin nânj griego si-nùguànꞌ Ma̱ꞌan Ñaꞌanj an.
2 Sani̱ nej judío nun gùyùmàn ruhuâ niꞌin nej nuguanꞌ nânj ni̱ duguachej nej sôꞌ ruhuâ nej sí nàsìnùnj un ni̱ rayiꞌî dânj ni̱ gayiꞌì nej sôꞌ ni̱ gata rùhuà nej sôꞌ nej dinï̂nt nìkòꞌ rukû Ma̱ꞌan Jesús.
3 Huê danj ni̱ gunâj Pablo ngà Bernabé ni̱ gane nguèj sij ûta gàꞌì gui ruhuâ yumanꞌ Iconio,
ni̱ ûta nùkuaj ruhuâ nguèj sij niꞌin nguèj sij Ma̱ꞌan Ñaꞌanj an ni̱ ganataꞌ nguèj sij nuguanꞌ yàngà hia rayiꞌî Ma̱ꞌan Ñaꞌanj an riñan nej guiì.
Huê danj ni̱ giꞌhiaj Ma̱ꞌan Ñaꞌanj an si ga̱na̱huin gàꞌì nej guiì giꞌhiaj nguèj sij ni̱ ûta gàꞌì nej sa hueꞌê ga giꞌhiaj nguèj sij.
4 Ni̱ giyiꞌchraꞌ da̱ꞌa̱j nej guiì màn ruhuâ yumanꞌ dânj ni̱ da̱ꞌa̱j ni̱nj ganakaj duguiꞌ ngà nej judío ni̱ aꞌngô da̱ꞌa̱j ni̱nj ganakaj duguiꞌ ngà nej sôꞌ gaꞌanj gànàtàꞌ si̱nï̱n si-nùguànꞌ Ma̱ꞌan Ñaꞌanj an.
5 Hiôꞌ ni̱ guchiꞌ nej judío ꞌngo̱ duꞌhua ngà da̱ꞌa̱j nej sí nàsìnùnj un ni̱ ngà nej sí ni̱ka̱j su̱n riñan yumanꞌ Iconio,
si ga̱rru̱n nej sôꞌ hiëj ni̱ ganï̂n ruhuâ nej sôꞌ da̱gahuiꞌ nej sôꞌ Pablo ngà Bernabé,
6 sani̱ nga gunïn nguèj sij dàj ganï̂n ruhuâ nej sôꞌ giꞌhiaj nej sôꞌ ngà nguèj sij,
huê danj ni̱ guxunj nguèj sij ma̱ꞌan nguèj sij ni̱ gaꞌanj nguèj sij yumanꞌ snàꞌànj Listra ngà yumanꞌ snàꞌànj Derbe,
ni̱ gaꞌanj nguèj sij aꞌngô nej yumanꞌ snàꞌànj ni̱ka̱j ñuꞌunj Licaónia,
ni̱ gaꞌanj nej sij daranꞌ nej yumanꞌ màn ganikàj rukú hioꞌó dânj,
7 ni̱ hiuj dânj gaꞌanj gànàtàꞌ nej sij nuguanꞌ gi̱ꞌhiaj ga̱na̱ni̱n nej guiì.
Garrûn nej sij hiëj Pablo ruhuâ yumanꞌ Listra
8 Ni̱ nne ꞌngo̱ sí màn yumanꞌ Listra,
ni̱ nitaj si hua̱ hueꞌê nguèj dakó sôꞌ guendâ ga̱che̱ sôꞌ,
ni̱ àsìj hua lij sôꞌ ni̱ nitaj àmàn gaché sôꞌ.
9 Ni̱ gunïn sôꞌ gaꞌmin Pablo,
ni̱ ûta sàꞌ giniꞌhiaj Pablo riñan sôꞌ,
ni̱ giniꞌin Pablo si guyumân ruhuâ sôꞌ guendâ ga̱na̱huin sôꞌ,
10 Ûta nùkuaj gaꞌmin Pablo ni̱ gataj sôꞌ:
—Ga̱na̱chi sôꞌ ni̱ na̱ni̱kïnꞌ ni̱ka̱ nguèj dakót râj.
Ni̱ guej sí nânj,
ni̱ gaché sôꞌ.
11 Ni̱ nga giniꞌin nej guiì sa giꞌhiaj Pablo,
ni̱ ûta nùkuaj gaguâj ninj,
ni̱ gaꞌmin ninj nânj Licaónia:
—Gininj ñaꞌanj an gaꞌnaj yàtàꞌa ni̱ huaj dàj rûnꞌ hua nej síi ni̱ ginin gaꞌnaj siganï̂nj nêꞌ.
12 Ni̱ Bernabé dugûꞌnàj nej sij ñaꞌanj Zeus,
ni̱ Pablo duguꞌnàj nej sij ñaꞌanj Hermes,
dadinꞌ Pablo huin sí ni̱ka̱j nuguanꞌan.
13 Ni̱ nne si-nùhuì síchìj rej gunânj gi̱ꞌtsi riñan ñaꞌanj Zeus,
neꞌ ga̱tu̱ꞌ neꞌ ri̱ña̱n yumanꞌ snàꞌànj Listra,
ni̱ ni̱ka̱j sôꞌ rô gaꞌnaꞌ sôꞌ ni̱ ganachrâj sôꞌ hia̱j a nikaj sôꞌ gaꞌnaꞌ sôꞌ riñan rahueꞌ nuhuî nânj,
ni̱ ganï̂n ruhuâ nej sôꞌ dagahuiꞌ nej sôꞌ rô riñan Pablo ngà Bernabé dadinꞌ ganï̂n ruhuâ nej sôꞌ si ñaꞌanj an huin nguèj sij.
14 Nga giniꞌin Pablo ngà Bernabé si dànanj ganï̂n ruhuâ nej sij gi̱ꞌhiaj nej sij ngà nguèj sôꞌ,
ni̱ gutù nguèj sij siganꞌ nguèj sij riñan nej sí dânj,
ni̱ gunânj nguèj sij gaꞌanj nguèj sij ñan màn nej guiì rigì dânj,
ni̱ gaꞌmin nùkuaj nguèj sij,
15 —ni̱ gataj nguèj sij:
Nùnj huin saj ni̱ giꞌhiaj nej suj dànanj ràꞌaj.
Sê ñaꞌanj an huin nguèj ñûnj mánj,
síi huin nguèj ñûnj ni̱ huê dàj rûnꞌ hua nej suj huê danj hua nguèj ñûnj,
ni̱ ganataꞌ nej ñûnj si-nùguànꞌ Ma̱ꞌan Ñaꞌanj an riñan nej suj ni̱ ga̱na̱du̱na̱ nej suj ma̱ꞌan nej suj ni̱ gi̱nikòꞌ nej suj Ma̱ꞌan Ñaꞌanj hua̱ nìꞌnàꞌa,
dadinꞌ huej giꞌhiaj yàtàꞌa ni̱ huej giꞌhiaj hioꞌóo,
ngà nne ña̱ꞌa̱nj,
ni̱ daranꞌ nej sa màn guruguiꞌ giniꞌhioꞌ.
16 Diû gâchin ni̱ gudunâj Ma̱ꞌan Ñaꞌanj an si ga̱che̱ daranꞌ nej yumanꞌ màn ruhuâ yumiguìi si-chrej ma̱ꞌan ninj;
17 ni̱ daranꞌ diû gidigân Maꞌan Ñaꞌanj an dàj nìko hua Ma̱ꞌan riñan nej guiì ni̱ giꞌhia sa sàꞌa ngà ninj,
ni̱ rikij gumàn ꞌna̱ꞌ yàtàꞌa riñan ninj,
ni̱ rikij diû gimàn sa ya̱ ninj,
ni̱ giꞌhia si ga̱chra ruhuâ si-gùchrù ninj,
ni̱ giꞌhia si ga̱na̱huin nìhiàꞌ ruhuâ nimân ninj.
18 Ni̱ nùnj huin si dànanj gataj Bernabé ngà Pablo gunïn nej sí dânj,
sani̱ ûta ꞌì garânj yina nej sôꞌ guendâ si̱ dagahuiꞌ nej sôꞌ rô riñan nguèj sij.
19 Hiôꞌ ni̱ guyumân nej sí judío ꞌna̱ꞌ yumanꞌ Antioquía ngà yumanꞌ Iconio,
ni̱ gachrîj nej sôꞌ chrej aꞌnanꞌan riki nej sí rìgì màn hiuj dânj,
ni̱ gayiꞌì nej sí dânj ni̱ garrûn nej sôꞌ hiëj Pablo,
ni̱ ganï̂n ruhuâ nej sôꞌ si gàꞌ ꞌngo̱ gahuiꞌ Pablo ni̱ gunukuaj nej sôꞌ ni̱ giri nej sôꞌ nneè kú Pablo neꞌ ye̱ꞌ yumanꞌ snàꞌànj dânj.
20 Sani̱ ganikàj ga̱chrin nej sí ꞌna̱ꞌ ga̱huin chru̱n riñan Ma̱ꞌan Jesús rukû Pablo,
huê danj ni̱ ganachi sij,
ni̱ ginikaj nej sôꞌ gaꞌanj ñûn nej sôꞌ sij ruhuâ yumanꞌ snàꞌànj nânj;
ni̱ nga garangaꞌ aꞌngô gui ni̱ gaꞌanj Bernabé ngà Pablo yumanꞌ gùꞌnàj Derbe.
21 Ni̱ neꞌ rùkù nga gisîj ganataꞌ nguèj sij si-nùguànꞌ Ma̱ꞌan Ñaꞌanj an riñan nej guiì màn ruhuâ yumanꞌ snàꞌànj dânj ni̱ gidigân nguèj sij ni̱ ûta gahuin chru̱n gàꞌì nej sí gi̱nikòꞌ rukû Ma̱ꞌan Jesús,
huê danj ni̱ nanikàj ñun nguèj sij gaꞌnaꞌ nguèj sij yumanꞌ Listra,
ngà yumanꞌ Iconio,
ngà yumanꞌ Antioquía,
22 ni̱ gaꞌhuiꞌ nej sij nuguanꞌ na̱gi̱ꞌhiaj nùkuaj ruhuâ nej sí ꞌna̱ꞌ ga̱huin chru̱un,
ni̱ dunaꞌnga nej sij riñan nej sôꞌ ni̱ gataj nej sij si gùyùmàn yìtï̀nj ruhuâ nej sôꞌ ngà Ma̱ꞌan Ñaꞌanj an,
ni̱ gataj nej sij gunïn nej sôꞌ:
Hua̱ ni̱ña̱n si ga̱chi̱nꞌ riñan ûta gàꞌì sañuun daꞌnga ni̱ ga̱tu̱ꞌ ñan ni̱ka̱j su̱n Ma̱ꞌan Ñaꞌanj an na̱nj ánj.
23 Ni̱ ga gi̱ni̱ne̱j nùgui nguèj sij huê danj ni̱ ganï̂n nguèj sij ꞌngo̱ sí ganikïnꞌ riñan daꞌ goꞌngo̱ nej si-nùhuì Ma̱ꞌan Jesús,
ni̱ gachín nìꞌhiaj nguèj sij riñan Ma̱ꞌan Señor dadinꞌ guyumân ruhuâ nguèj sij si gi̱ꞌhia sunuj u ni̱ du̱guminj nej sôꞌ màn daꞌ goꞌngo̱ nej si-nùhuì Ma̱ꞌan Jesús.
Gaꞌanj nej sij Siria ni̱ nanikàj nej sij gaꞌnaꞌ nej sij Antioquía
24 Ni̱ gachín nguèj sij ñan nngaj yumanꞌ Pisidia ni̱ guyumân nguèj sij Panfilia.
25 Ni̱ nga gisîj ganataꞌ nguèj sij si-nùguànꞌ Ma̱ꞌan Ñaꞌanj an riñan nej guiì màn yumanꞌ Perge,
ni̱ gaꞌanj nguèj sij yumanꞌ Atalia.
26 Ni̱ gatûj nguèj sij ruhuâ barku ni̱ nanikàj nguèj sij gaꞌnaꞌ nguèj sij ñan nngaj yumanꞌ Antioquía,
dadinꞌ hiuj nânj giyiꞌnïnꞌ suun riñan nguèj sij giꞌhiaj Ma̱ꞌan Espíritu Santo,
si ga̱ꞌa̱nj gàꞌhuìꞌ nguèj sij si-nùguànꞌ Ma̱ꞌan Ñaꞌanj an riñan aꞌngô nej yumanꞌan,
ni̱ dagahuin nguèj sij nuguanꞌ giyiꞌnïnꞌ su̱n riñan nguèj sij.
27 Ni̱ nga guyumân nguèj sij hiuj dânj,
ni̱ nagiꞌhiaj chre̱ꞌ nguèj sij nej dinï̂nt huin si-nùhuì Ma̱ꞌan Jesús,
ni̱ ganataꞌ nguèj sij si ûta nìko hua sa giꞌhiaj Ma̱ꞌan Ñaꞌanj an ngà nguèj sij,
dadinꞌ ganaꞌnïn ruhuâ nimân ûta gàꞌì nej sí nàsìnùnj un ni̱ guyumân ruhuâ nej sôꞌ niꞌin nej sôꞌ Ma̱ꞌan Ñaꞌanj an.
28 Ni̱ gane Pablo ngà Bernabé ûta gàꞌì gui ruhuâ yumanꞌ dânj ngà aꞌngô nej sôꞌ ꞌna̱ꞌ ga̱huin chru̱un.