TITO
Nkeethi
1
1 I niû Paûrû, mûruti ngûgî ya Ngai na mûtûmwa wa Yiesû Kîrîstû ngûkwandîkîra. Ndatuîkithiirue mûtûmwa nteethia kûrikithia wîtîgio bwa bara Ngai athuurîîte, na mbamenyithia ûmma bungwa bwa kîîngai 2 bûra bûrî wîrîgîîrooni bwa kwewa mwoyo wa tene na tene. Karaaya mûno Ngai ûra atarongwaga naatwere wîrane bwa mwoyo ûyû 3 na rîra kagiita kara kaagîrîîte gaakinyire naagwûranîîre ûntû bûbû ntûmwaani yake îra mpeetwe na watho i Ngai Mwonokia wetû mmîtûmagîîria.4 Nkwandîkîrîte woû Tito, mwana wakwa wengwa ndeeni ya wîtîgio bûra twinthe tûrî nabu.
Ngai Baaba na Kîrîstû Yiesû Mwonokia wetû barookwaa ûtugi na ûkiri.
Ngûgî ya Tito arî Kiriti
5 Ndagûtigire Kiriti kaingo ûrûngaria mantû mara mataarî ma kûrûnga njîra bwega na ûtaara akûrû ba kanica, ba wa kîra taûni wa ta bûra ndakwîrîîte. 6 Nwa mwanka mûkûrû wa kanica eegue arî na riîtwa rîega, mûrûme wa mûka ûmwe wegua agûreene, na nwa mwanka wegua arî na aana beegue barî aana eetîgîri. T'aana ndagi kana batarî aathîki. 7 Na n'ûntû mûtongoria wa kanica i mûrûngamîîri wa ngûgî ya Ngai, nwa mwanka eegue arî muntû arî na riîtwa rîega. Ti muntû wa kwîbûkagîîria kana wa kûthûûrangaga na mpwî. Atikeegue arî muntû wa ntogoona, kana arî muntû aûmba kûringana, kana wa kwîrirîîria ûtonga. 8 Mûtongoria wa kanica nwa mwanka eegue arî muntû wa nkoro ya kwenda kûgwataga antû ûgeni na wa kwendaga mantû meega. Nwa mwanka eegue arî muntû arî na ûtombo bûûkûrû. Nwa mwanka eegue arî muntû ûmwagîru na ûmûtheru nkoro. Na nwa mwanka eegue atarî muntû wa kwathagwa i mwîrî wake. 9 Nwa mwanka eegue arikîîtie ntûmwa îra îrî ya gwîtîgîka, îra îgwatanagîra na ûrutani bwetû. Na gîtûmi i kaingo aûmba gwîkîra antû wîru na ûrutani bûra bûrî bwa gwîtîgîka, na kaingo akoonagia bara batagwatanagîra na ûrutani bwa mma mabîtia maao.
10 Antû baingî ibakûregana na ûrutani bûra tûrutanaga. I bo bagûta bara bangî na ndwaria ciao cia ûtaku. Na mûno mûno, i bara baugaga eetîgîri bataanwe kûringana na wîthîre bwa Ayaundi. 11 Antû baba nwa mwanka beerwe batige n'ûntû ibaindiganîîtie antû ba mîciî îmingî bakîrutanaga mantû mara batabatîîrue barutana. Na barîrûtha ûgu kûringana na wîrirîîria bûra barî nabu bwa kwenda ûtonga. 12 Na wabu ûmwe wa iroria biao naugire bûra bakari. Atî, “Antû beetû ba Kiriti n'arongo mûno. I bûmwe na nyamû na n'ithao na n'wabu beendeete kûrîa!” 13 Na wabu ûkûûyî bûbu bwa kîroria gîku kîaugire ûgu n'ûmma. Kwoogu bakaanie ûtarî na mathee kaingo beegua barî na wîtîgio bwa mma, 14 batigane na ngono cia Kîîyaundi cia ûrongo na barege kûrûthaga mantû mara bakwîrwa barûthage n'antû bara bagarûrîîte ûmma. 15 Bara bo bathereetue nkoro boonaga bionthe birî biitheru.a Îndî bara beetankîîte na meeyia na bateetîgagia, gûtirî bu bwao bûtheru n'ûntû mathûgaania maao i maindiganu. Batiiyî i bûrîkû bwega kana i bûrîkû bûthûûku. 16 Baugaga i baiyî Ngai, îndî mantû mara barûthaga matigwatanagîra na ûntû bûbu. N'antû baathûûku mûno, aregi kwathîkîra Ngai na gûtirî ûntû bwega baûmba kûrûtha.