Ûrutani bwa mma
2
1 Îndî woû, rutanaga antû mantû mara makûgwatanîra na ûrutani bwa mma. 2 Îraga akûrû beemenyagîîre, bathûgaanagie bwega na beegue barî ûûme. Nwa mwanka barikie wîtîgio, wendo, na kûûmîîria.3 Îra kinya eekûrû bara bakûrû wana bo bakarage rîonthe barî eekûrû ba mîkarîre îmîtheru. Na ti bakaraga bagîtuuyanagîîra ûrongo kana beegua barî nkombo cia ncoobi. Nwa mwanka kinya bo barutanage mantû meega, 4 i kaingo baûmba gûtûma eekûrû bara baîthî beendaga arûme baao na aana baao. 5 Nwa mwanka beegue barî na ûtombo bûûkûrû, nwa mwanka beegue barî baagîru, nwa mwanka beegue bakîûmba kûruta ngûgî ciao cia mîciî bakîînyiagia kîrî arûme baao kaingo gûtooneka muntû acambia ntûmwa ya Ngai.
6 Wana kinya aana baîthî ba antû arûme bakaanie ûbeere barûthage mantû na njîra îra yagîrîte. 7 Tuîka ngerekano îmbega mantûûni monthe. Tuîka wa mma ûrutaniini bwaku na ûtigeekîre mathee. 8 Îndî amwe na ûgu tûmagîra mîgambo îra yagîrîte kaingo anthû baaku beegua nthoni, baaga ûntû bûûthûûku bwa gûtûgwetanîria nabu.
9 Nkombo nacio ibatîîrue ciînyiagia kîrî anene baacio na ibakenagia na mantû monthe. Gûtiagîrîte nkombo îcookagia mûnene wayo mîgambo, 10 kana îmwiya. Îndî kûbatîîrue warîonthe nkombo yonanagia nwa îîtîgîke mantûûni monthe, kaingo antû batîîya ûrutani bwa Ngai Mwonokia wetû kuumania na mantû monthe mara barûthaga.
11 Twagîrîtwe tûrûthaga mantû mama n'ûntû Ngai aagwûrire ûtugi bwake n'ûntû bwa wonokio bwa antû bonthe. 12 Gûkûrûkîîra kîrî ûtugi bwake, Ngai atûrutanaga kûrega wîyia na wîrirîîria bunthe bwa kîînthîgûrû. Tûrûthaga mantû na njîra îra yagîrîte, tûtûûraga tûrî baagîru, na tûrî ba mûtûûrîre wa kîîngai îgiita rîrî tûrî îgûrû rîa nthîgûrû îno, 13 tweteereete ntugû îra nthaarime twîrîgîîrîîte. Ntugû înu i rîo tûkoona mwago wa Ngai wetû ûra mûnene na wa Mwonokia wetû Yiesû Kîrîstû.a 14 Kîrîstû eerutire n'ûntû bwetû atûkûûra kuuma meeyiani ma mîthemba yonthe, atûtheria twatuîka baake wenka, na atûtuîkithia antû barî na wendo bwa kwenda mantû meega.
15 Kwoogu îrutanaga antû mantû mama ûgîtûmagîra watho bunthe bûra ûrî nabu rîra ûkûbeekîra inya kana ûkûbakaania. Ûtikaareke muntû akûbûthîîria.