RUKA
1
1 Antû baingî i baageriirie baandîka bakiugaga mantû mara makarîkîîte kîrî tiû. 2 Baandîkire wa ta bûra twerîîtwe mo i bara baarî oogo makîrûthwa. Bara baarî akûûyî na atûmîîria ba kiugo kuuma kîambîrîria i baatwîrire bûra gwakarîkire. 3 Nyuma ya ngûcûnkûûna kaumo ka mo monthe ndoona bûra maakari, wana niû i ndaroonire nkwandîkîre mo tarîîria, woû mûkaathe Thiofiras. 4 Ndîkwandîkîra kaingo ûmenya ûmma bwa mantû mara warutanirwe.Kwerwa Njoana Mûbaatithania agaaciarwa
5 Eronde arî mûnene wa Njundea, i kwarî na mûthînjîri wa Ngai eetagwa Sakaria. Aarî ûmwe wa *athînjîri bara baataragîrwa gîkundiini kîa Abiya. Wana mwekûrû wake, Erisabethi, aarî wa rûrîîyo rwa Arûni, mûthînjîri ûra mûnene wa Ngai. 6 Barî baîrî, baarî antû baatheru nkoro kîrî Ngai na i baathîkagîra mawatho na maathana maake monthe. 7 Bataarî na twana n'ûntû Erisabethi aarî nthaata na barî baîrî, i baarî bagûkûra mma.
8 Kagiita ka athînjîri ba gîkundi kîa Abiya gagûkinya, Sakaria aathûngîra Nyomba ya Ngai kûruta ngûgî. 9 Na wa ta bûra wîthîre bwa athînjîri ba Ngai bwakari, i kuura baaringire, Ngai aboonia ngûgî îra woora ûmwe waciao akaaruta. Sakaria n'we aathuurirwe athûngîra Nyomba ya Mwathani atoogia macoco.a 10 Îgiita rîgûkinya rîa gûtoogia macoco, kîrîndî kîonthe i kîarombaga kîrî ome naara kîagîrîtwe kwîgua kîrî. 11 Mûraîka wa Mwathani aaya gûku Sakaria aarî, aarûngama rûteere rwa ûrîo rwa bantû ara macoco maabîîthagîrua. 12 Sakaria akûmwona aagwatwa i kîrikithi, aatua kwîgua ûguaya. 13 Mûraîka amwîra, “Ûtikaamake Sakaria. Ngai neegîîtue maromba maaku. Mwekûrû waku Erisabethi agagûciarîra kaana ga kaîyî ûgeete Njoana. 14 Kaana gaku gagaatûma ûkena na ûgwîrua. Na antû baingî bagaakeneera gûciarwa gwako. 15 Akeegua arî mûruti ngûgî ya Mwathani ûmûnene. Atikooro anyua ncoobi kana anyua gîntû gîa gûtogoonia. Akeegua aûyûrîîtwe i Kîrundu Ûmûtheru kuuma gûciarwa. 16 Akaagarûra antû ba Isiraeri bacooke kîrî Mwathani Ngai wao. 17 Njoana akaaya mbere ya Mwathani aaya, na akeegua atongoreetue i Kîrundu, arî na inya ta ya Eriya. Agaatûma aciari beendage aana baao. Na agaatûma aregi bagarûka bathûgaanagie ta antû baagîru nkoro. N'we akaathuuranîra Mwathani antû baake.”
18 Sakaria aûria mûraîka, “N'ata nkaamenyanga ûntû bûbu bûgaakarîka? Niû ndî mûkûrû, wana mwekûrû wakwa n'ûmûkûûrû kûrû.”
19 Mûraîka amûcookeria amwîra, “I niû Ngaburieri ûra arûngi mbere ya Ngai. Ntûmirwe i Ngai mbûya kwaria naawe nkwîra ntheto ino imbega. 20 Ka ngûkwîra, ûtiaria kaîrî kuuma îîndî ûgu mwanka rîra mantû mama magaakarîka, n'ûntû ûtireetîgania na ntheto ciakwa ira igaatuîkîka îgiita rîacio rîakinya.”
21 Mantû mamu mathiîte na mbere woogu, antû nwa baakari nja beeteereete Sakaria. Baarigara baatua kûûrania, “I mbi n'ûntû Sakaria aakara Nyomba ya Ngai îgiita rîgana ûgu?” 22 Akuuma ataûmba kwaria nabo na kanyua kaîrî. Aabo onagîîria mantû na njara akî. I rîo baamenyire kûrî kîoneki oona arî ndeeni ya Nyomba ya Ngai.
23 Îgiita rîao rîa ûthînjîri rîkûthira, Sakaria eenûka mûciî wake. 24 Nyumaani Erisabethi mwekûrû wake aagîa nda. Akûmîgîa atauma nyomba bantû a mîeri îtaano. Aakaraga akiugaga, 25 “Mwathani agûnteethia aanthiria îgi rîra ndaraarî narîo kîrî antû!”
Mûraîka eera Maria mantû ma gûciarwa kwa Yiesû
26 Nda ya Erisabethi îgûkinyia mîeri îthanthatû, Ngai aatûma mûraîka Ngaburieri taûni ya Nasareethi îra îrî gîteere kîa Gariiri. 27 Aamûtûmire kîrî mwarî eetagwa Maria, ataamaamîîte na muntû mûrûme. Maria aakeethagua agûrwa i mûthaka eetagwa Njosebu, wa rûrîîyo rwa Ndaundi. 28 Mûraîka aathi kîrî we amûkeethia amwîra, “Woû ûrî ûmûthaarime mûno na Mwathani arî amwe naawe.”
29 Maria akwîgua mîgambo înu, aamaka mûno. Aarigara n'ûntû bûbu. 30 Mûraîka amwîra, “Ûtikaamake, Maria. Ngai nakeneete i woû. 31 Ûkaagîa nda ûciare kaana ga kaîyî ûgeete Yiesû. 32 Agaatuîka mûnene na ageetagwa Mwana wa Ngai Ûra Arî Îgûrû Mûno. Na Mwathani Ngai akamwaa ûnene bwa kîûyûûyû gîake, Ndaundi. 33 Akaatha rûrîîyo rwa Njakubu tene na tene, na ûnene bwake bûtiithira rî kana rî.”
34 Maria aûria mûraîka, “Mantû mama magaakarîkanga ata na niû ntaamaama na muntû mûrûme?”
35 Mûraîka amûcookeria amwîra, “Kîrundu Ûmûtheru akaaya kîrî woû, na inya ya Mwathani Ûra Arî Îgûrû Mûno îgagûkinyîîra. Kwoogu kaana kara gagaaciarwa gageetwa Ûra Mûtheru, Mwana wa Ngai. 36-37 Ndîenda ûmenya Erisabethi ûra wenu, n'ûmûrito na wone we n'ûmûkûûrû kûrû. Îîndî ûûgû arî na nda ya mîeri îthanthatû n'ûntû gûtirî bu Ngai ataûmba kûrûtha, na antû baraugaga i nthaata.”
38 Maria auga, “Niû ndî mûruti ngûgî wa Mwathani, inkare woogu wauga.” Mûraîka amûtiga aathi.
Maria aathi gûkeethia Erisabethi
39 Kagiita gaku Maria auma agu na mpwî aathi bwa taûni yarî gatîgatî ka irîma bia Njundea. 40 Agûkinya gwa Sakaria, aathûngîra nyomba aakeethia Erisabethi. 41 Erisabethi akwîgua nkeethi ya Maria, kaana gaatûûbatûûba karî nda. Erisabethi aûyûrwa i Kîrundu Ûmûtheru. 42 Augîîria na inya auga, “Woû ûrî ûmûthaarime kîrî aka bonthe. Wana kaana kara ûgaaciara i kaathaarime! 43 Niû ndî ûû wa kûriûngîrwa i gina wa Mwathani wakwa? 44 Nkwîgua wankeethia, kaana igagûtûûbatûûbaga karî nda i gîkeno. 45 Woû ûrî ûmûthaarime n'ûntû bwa gwîtîgia bûra werirwe i Mwathani bûgaakarîka.”
Maria aina rwîmbo rwa gûkumia Ngai
46 Maria auga,
“I ngûkumia Mwathani na nkoro yakwa yonthe,
47 ingûkena mûno n'ûntû bwa Ngai Mwonokia wakwa.
48 Akûndirikana niû mûruti ngûgî wake ûmûkirîîru
kuuma îîndî ûgu nciarwa cionthe
ikaugaga ndî ûmûthaarime.
49 Ngai ûra arî inya akûndûthîra mantû maanene,
riîtwa rîake i rîîtheru.
50 Nabeegagua kîao bara bamûtîîyaga,
nciarwa na nciarwa.
51 Narûthaga manene na inya yake.
Naaraganagia bara beekumagia mathûgaaniani maao.
52 Narutaga bara banene itîîni bia ûnene,
akaneneia bara beenyithagia.
53 Bara barî na yûûra rîa mantû meega,
nababaithagia namo,
akeengatia itonga bikathi njara i ntheri.
54 Natûteethagia tiû Aisiraeri, aruti ngûgî baake,
n'ûntû naririkanaga gûtwîgua kîao.
55 Ngai narûthaga bûra eerire biûyûûyû bietû
akaarûthîra Îburaîmu,
na nciarwa ciake tene na tene.”
56 Maria baakarire na Erisabethi bantû a mîeri îthatû akîîya gûcooka kwao.
Njoana Mûbaatithania aaciarwa
57 Îgiita rîa Erisabethi rîa kuurûka rîgûkinya, aagîa na kaana ga kaîyî. 58 Atûûri na antû ba mûciî wao bakwîgua Mwathani naamwîgîîrue kîao ibaakenanîîre amwe n'we. 59 Baataana kaana gaku ntugû ya inyanya kuuma gagûciarwa. Beendaga gûgeeta Sakaria ta îthe, 60 gina aarega, auga, “Gatigeetwe ûgu, i geetwe Njoana.”
61 Bamwîra, “Gûtirî muntû wa mûciî wenu eetagwa ûgu!”
62 Baarîria Sakaria na njara bakîmûûria bûra eendaga mwana eetwa. 63 Sakaria eetia bantû a kwandîka. Aandîka, “Riîtwa rîake i Njoana.” Antû bonthe baarigara boona ûgu. 64 Warîo Sakaria aarugûka mîario, aanjîîria kwaria agîkumagia Ngai.
65 Atûûri bonthe baagwatwa n'ûguaya. Na ntheto cia mantû mamu ciatambua ntûûra cionthe irîmaani bia Njundea. 66 Muntû wonthe ûra eegagua ntheto inu aathûgaanagia akeebûûria, “Ka mwana ûyû agaatuîka ûû?” Antû baûragia ûgu n'ûntû i boonaga inya ya Mwathani n'yarî amwe na Njoana.
Sakaria aaroria
67 Sakaria, îthe wa Njoana, aûyûrwa i Kîrundu Ûmûtheru. Aaroria auga,
68 “Ga tûkumieni Mwathani, Ngai wa Isiraeri!
Akûûya gûteethia antû baake akîbakûûra.
69 Agûtwaa Mwonokia arî na inya,
kuuma rûrîîyooni rwa Ndaundi mûruti ngûgî wake.
70 Wa ta bûra eeranire kuuma wo tene
gûkûrûkîîra tûnyuani twa iroria biake biitheru.
71 Augire agatwonokia kuuma kîrî anthû beetû,
na kuuma inyaani ya bara batûmenaga.
72 Na akeegua biûyûûyû kîao,
aririkane kîrîîkanîro gîake kîîtheru,
73 ta kîo mûthiîtio ûra aathiîtîîrie
kîûyûûyû gîetû Îburaîmu,
74-75 auga agatûtuunyûkia kuuma kîrî anthû beetû,
agatûteethagia tûtûûrage tûtarî na ûguaya.
Rîru i rîo tûkaamûrutîra ngûgî tûrî baatheru,
na tûrî baagîru nkoro meethooni maake
ntugû cietû cionthe cia mwoyo.
76 Naawe, mwana wakwa, ûgeetagwa kîroria
kîa Ngai Ûra Arî Îgûrû Mûno.
Mbere ya Mwathani aaya,
ûkamûrûthîra njîra kûra agaakûrûkîîra,
77 wîre antû baake bamenye
bûra baarekerwa meeyia maao, boonokue,
78 n'ûntû bwa kîao kîînene kîa Ngai wetû.
Werû bûkauma îgûrû bûtûthararîre,
79 na bûkaamûrîkîra antû bonthe
bara batûûraga mwinduuni wa gîkuû,
bûtûtongoreerie njîraani ya ûkiri.”
80 Mwana ûyu aakûra, aagîa inya mûno ya gîîkîrundu. Aakara rwanda ntugû yakinya îra aanjîîrie gûtûmîîria antû ba Isiraeri.