2
1 Ngaakara mbeteereete kiugo kuuma kîrî Mwathani,ngaatwa agu kîbayooni.
Mbeteere mbîgue bûra Mwathani akaambîîra,
na bûra agaancookeria n'ûntû bwa gûkaya gwakwa.
Îcookio rîa Mwathani kîrî Abakuku
2 Rîru Mwathani ancookeria ambîîra,
“Andîka mbaariûni na ntemwa inene bûra ngaakûgwûrîria,
kaingo mûtûmwa akamatîîte mbaariû inu ikaathoomekaga.
3 Ûntû bûbû i bwa kagiita kara gakaaya,
na mma bûkaûyûra kagiita kaabu gaakinya.
Nwa bwoneke ta bûgûkarakara, îndî bweteere,
ûmma n'atî bûkaûyûra, na bûtiikaraanga.
4 Raithaani bwone eekumia,
beebîtîgîîtie bo bongwa,
na mîtûûrîre yao ti mîega
îndî bara baagîru bagaatûûra n'ûntû bwa wîtîgio.”a
5 Ûtonga i bwenanagîîria,b
i beekumagia na batinogokaga,
barî îtanûka ta nthiko,
na wa ta gîkuû n'ûntû batiganagîrwa.
Na i ntûma baturaga mîgongo îra îîngî,
na bakeegwatîra agwate.
6 Îndî îgiita irîîyîîte rîra agwate babu baao bakabathekeera, bakîbeeraga,
“Bûkoona thîîna. Biû bwîtongagia na kwiya bara bangî!
I mwanka rî bûgaatûûra bûtuunyanaga?”
7 Na waagu eerandû beenu nabo, bagaûkîîra na mûthûûro babûgarûke,
bathûkie bionthe bira bûrî nabio,
bûrûûngi woogu bûkiinainaga bûtarî na bwa gwîteethia nabu.
8 I bûtaîte mîgongo îmingî,
îîndî antû baao bara batigeere bakabwonia thîîna kinya biû.
I bwîtûûrîîte nthakame cia antû,
na bwenyangia nthîgûrû na taûni ciao na antû bonthe bara barî ku.
9 Bûkoona thîîna biû bûgwataga ûtonga na njîra ira itabatîîrue!
Bwîbakîrîîte nyomba inthongi gûntû kûra gûûkîîru,
na bwageria kwaiga mîciî yenu ara ûgwati bûtakîmîgwata!
10 Îndî n'ûntû bwa bûra bwenyangiirie mîgongo îmingî,
i bwîbirîîte îgi,
na n'ûntû bwoogu i bwîbînyangîîtie.
11 Maiga mara marî nthingooni cia nyomba cienu makabûrîrîra,
na mata ma kîgaango mamaambûkîîrie.
12 Bûkoona thîîna biû bwakaga taûni na njîra ya gûtûûra nthakame,
bûciakaga na bitina!
13 Anga Mwathani Mwene Inya ataabangire bûra
ngûgî cia antû ikaabîa ituîke muu?
Barutaga ngûgî na inya mûno,
îndî înu yonthe n'ya mana!
14 N'ûntû îgiita rîkaaya rîra nthî yonthe îkaûyûra ûmenyo bwa ûkumio bwa Mwathani,
wa ta bûra rûûyî rûûyûraga îriani.
15 Bûkoona thîîna biû bûtûmaga atûûri beenu banyua gîkombe kîa mûthûûro,
Bûkabakaîrîîria bakanyua mûthûmba ûûyûri,
bagatogoona kaingo bwona ûtheri bwao.c
16 Bûkaagîa îgi bantû a ûkumio.
I rîo rîkeegua rîrî îgiita rîenu rîa gûtogoona na kûguûra ûtheri bwenu.
Mwathani akabûnyuithia gîkombe kîa îgamba,
nau mwago wenu ûkaagarûka ûtuîke îgi.
17 Bwenyangiirie ithaka bia Rebanoni,
rîru i biû bûkeenyangua!
Bwamakiirie nyamû cia kîthaka,
naabi bûkaamakua.
N'ûntû i bwaûragire antû na bwenyangia taûni ciao.
18 I baita mbi bwonaga kuumania na mûbuanano ûra ûrûthîîtwe na njara cia muntû?
Ûyu i mûbuanaano na i kaumo ka ûrongo.
N'ûntû ûra acurûthaga eetîgagia gîntû kîra we mwene arûthîîte,
n'aata bûrî waa wîtîgia mûbuanaano ûtaûmba nwa kwaria!
19 Bûkoona thîîna bara beeraga ndungu ya mûtî, “Gîta mwoyo,”
kana iiga rîtarî mwoyo, “Ûkîîra.”
Nwa ûbwîre bûra bûkaarûtha?
Ûkaandîîtwe na thaabu na fetha,
îndî ûtirî mwoyo.
20 Îndî Mwathani arî nyomba yake îra ntheru,
ka nthîgûrû yonthe îkire ki mbere yake!