Îromba rîa Abakuku
3
1 Îromba rîrî rîarombirwe i kîroria Abakuku:2 Mwathani, i mbîgîîtue nkuma yaku,
na ndaarigara i mantû mara ûrûthîîte, Mwathani.
Îgiitaani rîrî rîetû rîa thîîna onania inya yaku ta bûra waarûthaga tene,
na mûthûûrooni waku, ûririkane kwonania kîao.
3 Ngai aayire aumîîte bwa Temani,a
Ûra Mûtheru, aumîîte kîrîmaani gîa Parani.
Mwago wake ûkunîkîîte îgûrû,
na nthîgûrû yûûyûrîîte ûkumio.
4 Mwago wake wakari ta mînyîîrî ya werû bwa riûa
wenagia kuuma njarani yake,
ara inya yake iithîîtwe.
5 Mûrimo wathiiyaga ûrî mbere yake,
mûthiro nau ûmuumîte nyuma.
6 Aarûngamire, nthîgûrû yainaina,
na acûûba, mîgongo yathetema.
Aaragania irîma bia ntwîre
na oomoranga tûrîma twa ntwîre.
Njîra ciake itigarûkaga.
7 Antû ba Kusani i bakuinaina,
na antû ba Mindiani bakainaina n'ûguaya.
8 Mwathani, i mûthûûro watûmire ûringa miuro,
na ûtuîkania îria?
Ka wathûûri i bio?
Arî, ka waatûmaga nkaarî cia mbaraathi cia wonokio.
9 Waatumire ûta bwaku, gwîthuuranîrîîte wagera mîgwî!
Wagaaniirie nthîgûrû na miuro!
10 Na irîma biakûraitha biainaina,
Rûûyî rwetîga kuuma îgûrû,
naru rûûyî rûra rûrî mborokerooni ya îria rwagondoka,
na makûmbî maaru meetia kûra îgûrû.
11 Riûa na mweri i biarûngamire ki îgûrû
n'ûntû bwa kwenia kwa mîgwî yaku îra gwagereete,
na kûyica wa îtumo rîaku.
12 Wagiitaniirie nthî na mûthûûro ûmûnene
na wakinyanga mîgongo, ûrî na marûrû.
13 Waayire gûkûûra antû baaku,
kwonokia mwîtûûrîrua maguta waku.
Wathiria mûtongoria wa bara bathûûku
na waathiria athingati baake kûrû.
14 Wamuntire mûnthû kîongo na îtumo rîake wengwa
rîra acikaarî ba ndûa baatuumîîrîîte batûnyagaaria,
bagîtwîkumagîria taka bagaatûtaguta
twîbithîîte tûtaûmba gwîteethia.
15 Waakinyangire îria na mbaraathi ciaku,
na rûûyî rûru rûnene rwebûmba mûnthûmbî.
16 Rîra ndeegiirue mantû mama monthe ndaagwatwa i kainaino,
mîromo yakwa yathetema n'ûguaya.
Maîndî maakwa maathira inya,
magûrû maakwa i mainainaga nthiîte.
Ngaakira ki mbeteere ntugû îra îîyîîte,
rîra bara batwithûkagîra bakoona thîîna.
17 Wana kinya mîkûyû îkarega kûraa,
na mîcabiibû îkarega gûciara ncabiibû,
wana kinya mîceituuni îkarega gûciara,
na mînda îkeegua îrî mîtheri,
naka wana kinya nyamû cionthe cia ndîîthia igakua,
na biaga bia ng'ombe bigatigwa biitheri,
18 nwa ngaakena ndeeni ya Mwathani.
Ngaakeneera ndeeni ya Ngai Mwonokia wakwa.
19 Mwathani Ngai n'we ûmpeeyaga inya,
agaatûma magûrû maakwa matarîîria ta ma nkûrûûngû
na aankûrûkîîrie îgûrû rîa irîma ndî mayîîga.
Rwîmbo rûrû i rwa mûtongoria wa nyîmbo na i rwakwinwa na wandîndî.