ABAKUKU
Kûnung'una kwa Abakuku
1
1 Ntûmwa îra kîroria Abakuku aawatire kuuma kîrî Mwathani na njîra ya kîoneki.2 Aabu Mwathani îî, i mwanka rî ngeetana ûnteethia,
na ûtinthikagîîria?
I ngaakûrîrîra mwanka rî,
kaingo ûtwonokia kuuma bitinaani îno?
3 I mbi n'ûntû ûgûtûma ntûûra nkîonaga thîîna,
i mbi îgaatûma gwinyîkîria thîîna na kwinyanîîria gûkû kûgana ûûgû?
Ndaaraitha mbere yakwa, ndîona wînyangia na bitina,
ncîgîîrîîtue n'antû bara beendeete gûkararania na kûrûa.
4 Kwoogu antû baathûûku i bainyagîîria bara baagîru, watho i bûthirîîte inya na bwatuîka bwa mana,
na gûtirî kûgambithania bûra kûbatîîrue.
Ûthûûku i bwingîîte bwakûrûka wagîru,
n'ûntû bwa ûgu, magamba matigiitawa bûra kûbatîîrue.
Îcookio rîa Mwathani
5 Mwathani aacookia auga,
“Cûûbaani mîgongo yonthe na bwone,
bûkaarigara na bwame i bûra nkaarûtha!
N'ûntû inkûrûtha ûntû ntugûûni ino cienu bwingwa,
ûntû wana ndabwîra bûteetîgia.
6 N'ûntû rî, ingûûkîîria antû ba Mbabironi,
mûgongo ûra mûthûûku, ûra ûrî îtanûka mûno,
ûra ûriûngaga nthîgûrû yonthe
ûgîcwaga gûntû gwa gûtuunyana.
7 Antû babu n'antû ba kûmakia na ba kûguayia mûno,
batongoragua i rwîkumia na bûra biongo biao bikûbeera.
8 Mbaraathi ciao n'injiûku nkûrûki ya ngo,
na irî ûrûme nkûrûki ya ncûûgi ûgoro.
Athiithia ba mbaraathi ciao i bathiiyaga gûntû kûûraaya.
Bagiitanagia nthî na mpwî ta kathûngûnkuma gakîbûria gacui.
9 Bonthe batûmagîra taka,
njûûrî yao yûûmbûraga nthî ta kîbuubani kîa ng'aarû,
bakîîthîranagia agwate baingî
ta bûra ruuo rwîthîranagia mûthanga.
10 Nabo bacambagia anene,
na kîrî bo atongoria n'antû ba kûmeneerua.
I bathekagîîra taûni ira mbirigîre na nthingo,
n'ûntû baciûmbagîîra ithûmba bia mûthetu kaingo batwa bacigwata baciatha.
11 Rîru bagakûrûka na mpwî bea ta kîbuubani,
bakathi,
beegagua barî na mabîtia,
n'ûntû batuîte inya yao n'yo ngai yao.”
Abakuku aakayîra Mwathani
12 Îî Mwathani Ngai wakwa, mûtheru wakwa,
woû ûtaarî oogo kuuma woo tene?
Woû ûra ûtakuuyaga.
Woû Mwathani i woû ûtûrigagîîria,
i woû ûtûmîîte antû ba Mbabironi batûkaanûkia.
13 Woû ûrî ûmûtheru,
na ûtiûmîîria kwona mantû maathûûku kana ûremu.
I kî n'ûntû ûkûraitha na meetho antû bara barûthaga mantû maathûûku,
na ûgakira ki,
muntû ûmûthûûku akîthiria muntû ûmwega nkûrûki yake?
14 Ga tûrî makûyû tûgwatwa tûkîûragagwa?
Kana i tûrî tûnyamû tûra twîkururagia nthîgûrû tûtarî mûtongoria?
15 Antû ba Mbabironi batûgwataga na ndwano ta makûyû,
bagatûruûra na neeti,
na bagakengeûka i gîkeno,
n'ûntû bwa bira baagwata.
16 Wana kinya i barutagîra neeti inu ciao igongwana,
na bagacibîîthîria macoco
n'ûntû i cio i beeyaga ûtonga,
na igatûma bagîta into.
17 Aabu i mwanka rî bagaatûûra gûtûmîra neeti ciao,
kûthiria mîgongo batarî na kîao?