Kûgwa kwa Ninebe
2
1 Ûra ûthithiraga tûcuncî tûcuncî agûkuumîîra, woû Ninebe.Karia gûntû kûra kwirigîre,
raithîra barabara,
Îîthuuranîreeni n'ûntû bwa ndûa,
gîani na inya mûno!
2 N'ûntû Mwathani agaacookanîîria mwago wa Njakubu
ta mwago wa Isiraeri,
wana wegua eenyangia ibaataire into biao
na beenyangia mpoong'i cia mîcabiibû yao.
3 Rong'o cia acikaarî bara barî îgweta n'intuune;
ncamba cia ndûa ciîkîrîîte nguo intuune.
Cuuma ira irî nkaarîîni cia ndûa,
iyicaga ta ntugû îra ciathuuranagîrwa
matumo namo imakûyiûrua na njîra ya kûmakia.
4 Nkaarî cia ndûa n'ikûringa gîtuma tûbarabaraani,
Irînyaranyara mwîtio na mwîndamo tûbarabaraani na bieniini bia taûni;
Irîoneka ikari ta imonjo,
Iriugia na mpwî ta rweni.
5 Eetaga atongoria baake ba acikaarî;
Batarataraga rûgendooni rwao;
Beetharîîte na mpwî beerekereete bwa rûthingo.
Bakarutûmîra rûrî wîbitho bwao.
6 Mîîrîga ya miuro n'îrugûrîîtwe,
na nyomba ya mûnene îkûgwa.
7 I gûkûrûkîîtue atî ntûûra
îtaîgwe na îthiîgwe n'yo.
Aruti ngûgî baao ba aarî barîrîra ta macea
bagwete rûthea i kîeba.
8 Ninebe îkari ta kîria,
na rûûyî rwakîo i rûkûbwa.
Antû ba Ninebe barîrîra bakiugaga, “Tiga! Tiga!”
îndî gûtirî we akûûndûka.
9 Taani fetha!
Taani thaabu!
N'ûntû ûtonga bûtikûthira
ûtonga bwa into biingî bia goro kuuma igîînaani biayo bionthe!
10 Taûni înu n'întheri na n'îtuîkithîîtue îganjo!
nkoro ciamaka, maru maarigooya,
mîîrî n'îkwinaina, moothiû monthe maatuga.
11 Bûrîkû ûkaro bwa cimba,
bantû ara ciareragîra twana twacio,
kûra cimba ya nka na ya ndûme na biunga ikaraga,
itagûkuthûka nwa mbi?
12 Cimba yaûragîîre aana baacio nyamû cia kûgana,
na yeethîranîria nka yaayo nyama cia kûgana.
Yaûyûria ikaro biayo na bira yûûragire
na ûkaro bwa yoo na nyama.
13 Mwathani Mwene Inya ariuga,
“Inkûregeete,
nkaabîîthia nkaarî ciaku cia ndûa na mwanki ciûke ntoogo,
na aana baaku bakaathirua na rûûyiû.
Gûtirî nwa nyamû ya kûgwîmwa nkaabûtigarîria nthîgûrû.
Tûyû twa atûmwa beenu
tûtiîguîka kaîrî.”