Îkaanûkia rîa Ninebe
3
1 Bûkoona thîîna biû taûni ya ûûragani!Ûûyûrîîte mantû ma ûrongo na ûtuunyani;
Gûtirî rîo waagaga agwate.
2 Gîtuma kîa ibooko,
gîtuma kîa magûrû makîruruma;
mbaraathi ikîthûngûthathûngûtha,
na nkaarî cia ndûa igîtûûbatûûbaga!
3 Athiithia ba mbaraathi bacithiithia,
bakamatîîte ndûûyiû ikîyicaga,
na matumo makîenagia.
Antû baingî bara baûragirwe,
baatuîka ithûmba bia biimba,
biarî biimba bitatarîka,
mwanka gwatuîka antû ibagûtaratara îgûrû rîa bio.
4 Mamu monthe marîkarîka n'ûntû bwa wingî bwa ûmaraaya bwa îrwaya,
rîra rîkuuyagia antû na mîtheega,
rîra rîgwataga mîgongo ûkombo na ûmaraaya bwa rîo,
na rîgakuuyia antû na mîtheega yarîo.
5 Mwathani Mwene Inya ariuga ata rî, “Raitha, niû Inkûregeete,
naani ngagûkûma nguo ciaku ikinye ûthiû bwaku;
nkoonia mîgongo ûtheri bwaku,
na mbonie moonene îgi rîaku.
6 Naani ngakûgerera into bia mûgiro,
ngaatûma ûbûthîîrua,
na ngagûtuîkithia gîntû gîa kûraithwa na kûmeneerua.
7 Rîru bara bonthe bagaakwonaga ibagaagûkuthûkaga, bakiugaga,
‘Ninebe nîrathûûkire; n'ûû ûkamîîgîîrua kîao?’
I kû ngûgûcereria ba gûgûkirakiria?”
8 Ka ûrî mwega nkûrûki ya Thebesi
îra îrî muuro wa Naero,
ûthiûrûkîrîîtwe i rûûyî?
muuro nuu waamîrigîîrîîtie,
ndûûyî i rûthingo rwayo.
9 Ethiopia na Miisiri ciarî inya yake îtarî kîthimi,
Puti na Rîbia i ciarî ngwatanîro n'yo.
10 Amwe na ûgu naathûkiirue airwa kûraaya
aathi ûkombooni.
Tûgenke twake twakanyaniirue
makomanooni ma barabara cionthe;
antû baake ba gîtîîyo baaringîrwa kuura
na atongoria baake bonthe baathaîkwa na nyororo.
11 Kinya woû ûgaatogoona,
ûgaaceria wîbitho n'ûntû bwa anthû.
12 Wîbitho bwaku bunthe bûkari ta mîkûyû
îrî na nkûyû cia mbere i mbîru;
rîra îrî miinainie,
ikagwa kanyuani ka ndîi.
13 Raitha, antû arûme baaku
bonthe bakari ta aka!
Mîîrîga ya nthîgûrû yaku
n'îrugûrîîtwe kûrû kîrî anthû baaku;
mwanki n'ûbîîthîîtie biingi biayo.
14 Taa rûûyî rwa gûtûmîra rîra ûkeegua ûrî mûcîgîîrie;
îkîraani wîbitho bwenu inya;
înjaani mûthetu, bûkinyange ntaga,
thûkiani gîtorobo bûûmbe matubaarî.
15 Mwanki ûgakûbîîthîria naagu;
Rûyiû rûgakûgiitania,
na rûgakûthiria ta mpandi.
Thagayaani ta mpandi!
Thagayaani ta ngige!
16 Wongeereete abiacaara baaku
mwanka baingîa nkûrûki ya nthata cia îgûrû;
îndî wa ta ngige, beenyangagia nthîgûrû.
Rîru bakabuurûûka.
17 Atongoria beenu bakari ta ngige,
anene nabo ta mîrumbî ya mpandi,
îra igwîyagîîra rwinciini ntugû ya mpîo,
îndî riûa rîauma ikabuurûûka ikathi,
na gûtirî we amenyaga kûra ithiiyaga.
18 Arîîthi baaku i bamaami toro,
Woû mûnene wa Aramu;
antû baaku ba gîtîîyo ka bamaami banogokeete.
Antû baaku banyagaarîîte irîmaani
gûtarî muntû wa kûbeethîrania.
19 Kîronda gîaku gîtikûora;
kûgurarua gwaku i kûûthûûku mûno.
Wonthe ûra eegagua nkuma yaku
ka aringaringaga mpî i kûgwa gwaku,
n'ûntû n'ûû ateegîîtue
ûthûûku bwaku bûtarî mûthia?