Kîoneki kîa matunda meeru
8
1 Ûûgû i bu Mwathani Mwene Inya aamboniirie ndeeni ya kîoneki. I kwarî na gîkaabû kîa matunda meeru. 2 Mwathani ambûûria, “Amosi i mbi ûkwona?” Ndacookia, “I gîkaabû kîa matunda meeru.” Rîru Mwathani ambîîra atarî, “Mûthiaa ûgûkinya kîrî antû baakwa Isiraeri. Mwanka agu îîndî ntiitîîra kûbakaanûkia. 3 Mûthenya ûyu, nyîmbo ndeeni ya nyomba ya mûnene igaatuîka irîro bia kîeba. Gûkeethîrwa kûrî na biimba gûntû kunthe. Bikaagerwa ome gûkirîtwe ki.” 4 Thikîîriani biû bara bûkinyangagîra bara barî na ûbatu nthî na kûgeria kwînyangia nkîa cia nthîgûrû. 5 Bûkeebîîra atarî, “Irî ntugû îra ntheru ya kûyiûka kwa mweri îkathira kaingo twendia irio bietû? Irî Sabatû îkaathira kaingo twanjîîria kwendia ngano kaîrî? Tûkeendia irio bietû tûgîtûmagîra ithimi bia ûrongo, na tûkîenagîîria na ithimi bitarî biega. 6 Tûkagûra nkîa na fetha na bara barî na ûbatu tûbagûre na iraatû, na kinya tûkeendia matiia ma ngano.” 7 Mwathani Ngai wa Njakubu, n'athiîtîîtie na riîtwa rîake auga, “Namma ntikaaro ndiganîrua i mathûûkia maao. 8 Na kwoogu nthîgûrû îkainaina, bonthe bara batwîre ku bakaagwatwa i kîeba. Nthî yonthe îgaûkîîra ta muuro wa Naero, îkaunjugwa na îcooke îgwîrîîre kaîrî ta muuro wa Miisiri. 9 Îgiita irîîyîîte rîra ngaatûma riûa rîthûa mûthenya gatî na nthî îrume mwindu mûthenya. I niû Mwathani Mwene Inya nkuuga. 10 Nkaagarûra biatho bienu bituîke mathiko na ngarûre nyîmbo cienu cia gîkeno ituîke irîro bia kîeba. Ngaatûma bwenje biongo bienu na bwîkîre nguo cia makunia kwonania kîeba, na bûgaakara ta aciari bakîrîrîra mwana wao wa kîmoomwe. Mûthia wa ntugû înu ûkeegua ûrî gana.11 “Îgiita irîîyîîte rîra ngaatûma yûûra nthîgûrû. Antû bakaabûûta, na ti yûûra rîa irio, bakeegua bûûta, na ti bûûta ya rûûyî. Bakeegua yûûra na bûûta n'ûntû bwa kiugo kîa Mwathani. Niû Mwathani Mwene Inya i bu nkuuga. 12 Antû bakaariûnga kuuma bwa îgûrû na bwa iti na kuuma bwa umîîro bwa riûa mwanka ûthwîro. Bagaacwa kiugo kîa Mwathani gûntû kunthe, îndî batikîona. 13 Mûthenya ûyu wana kinya nthaka ira irî na inya na aka baathongi bakaagirîka i bûûta. 14 Bara bathiîtagia na ngai cia mîbuanaano ya Samaria, bakiugaga, ‘Inkûthiîtia na ngai wa Ndani,’ kana ‘Inkûthiîtia na ngai wa Beeriseba,’ antû babu bakaagwa nthî na batiûkîîra kaîrî.”