Kîoneki kîa ngige
7
1 Ûûgû i bu Mwathani Mwene Inya aamboniirie ndeeni ya kîoneki. Ka aathuuranagîra mîruumbî ya ngige nyuma ya rûgai rwa mûnene rûkûrîîkia gûkethwa na kîmera kîa biîrî kîanjîîria gûkûra. 2 Ndeeni ya kîoneki gîakwa indoonire ngige ikîrîa gîntû kîonthe kîîthî nthîgûrû, na i rîo ndaugire atarî, “Mwathani Mwene Inya, rekera antû baaku! N'ata Njakubu aûmba gûtûûra? N'ûmûniini mûno.” 3 Kwoogu, Mwathani aagarûra mathûgaania maake na auga ata rî, “Bûbu woona bûtiikarîka.”Kîoneki kîa mwanki
4 Ûûgû i bu Mwathani Mwene Inya aamboniirie ndeeni ya kîoneki. I ka aathuuranagîra gûkaanûkia antû baake na mwanki ûmûnene mûno. Mwanki warûûngûria îria rîra rînene na warûûngûria nthî. 5 I rîo ndaugire atarî, “Itû ngûkwereka tiga, Mwathani Ngai! N'ata Njakubu aûmba gûtûûra? N'ûmûniini mûno.” 6 Mwathani Mwene Inya aagarûra mathûgaania maake kaîrî auga, “Wana kinya bûbu nabu bûtiikarîka!”
Kîoneki gîa kabirû
7 Ûûgû i bu Mwathani Mwene Inya aamboniirie ndeeni ya kîoneki. Ndoona Mwathani arûngameene na rûthingo rûra rwakîîtwe na gûgîtûmagîrwa kabirû, na i kwarî na kabirû njaraani yake. 8 N'we ambûûria, “Amosi i mbi ûkwona?” Ndamûcookeria ndamwîra, “I kabirû.” Rîru Mwathani auga, “Ngaatûmîra kabirû gaka kûthima antû baakwa ba Njakubu. Na îîndî ntiigarûra mathûgaania maakwa ntîîria îkaanûkia rîao. 9 Gûntû kûra gûûkîîru nciarwa cia Isaka irombagîra gûkeenyangua. Na gûntû kûra kûtheru gwa Isiraeri gûgaatigwa kûrî maganjo. Na rûûyiû rwakwa nkaathiria wathani bwa mûnene Njeroboamu.”
Amosi na Amasia
10 Rîru Amasia mûthînjîri wa Betheri, aatûmana ntûmwa kîrî mûnene Njeroboamu wa Isiraeri, îkiugaga, “Amosi n'agûkûbîndîra njûri gatîgatî ga antû ba Isiraeri. Nthîgûrû îno îtiûmîîria biugo biake. 11 Ûûgû i bu Amosi akuuga, ‘Njeroboamu akaûragwa na rûûyiû, nabo antû ba Isiraeri bagaataîwa baume nthî yao bathi ûkombooni.’ ” 12 Rîru Amasia eera Amosi atarî, “Îthi îîndî kîroria, kuthûka ûthi nthîgûrû ya Njunda, ûrîe biakûrîa biaku noogo na ûrorie noogo. 13 Ûtikaarorie aaga Betheri kaîrî. N'ûntû gûkû i gûntû kûûtheru kwa mûnene gwa kûrombera na i nyomba ya kîrombero kîa ûnene.”
14 Amosi aacookeria Amasia, “Niû ntirî kîroria kana mwana wa kîroria. Ndî mûrîîthi na mmenyagîîra mîkûyû. 15 Îndî Mwathani anthûkiirie kuuma ngûgîîni yakwa ya ûrîîthi na ambîîra nthi nkarorerie antû baake Isiraeri. 16 Îîndî thikîîria bûra Mwathani akuuga. Ûrîmbîîra, ‘Tiga kûroria, kîînyume gia antû ba Isiraeri na ûtige gûtûmîîria kîînyume na rûciaro rwa Isaka.’ 17 Kwoogu, îndî thikîîria bûra Mwathani akuuga. ‘Mûka waku agaatuîka îrwaya rîa taûni, nthaka na aarî baaku bakaûragwa na rûûyîû. Mûnda waku ûkaagaîgwa na ûneenkerwe antû baangî naawe ûgaakuîra nthîgûrû ya bara bateetîgîîtie. Na mma antû ba Isiraeri bakaarutwa baume nthîgûrû yao ya kaumo bathi ûkombooni.’ ”